Jems 3
3
Nono drano sugl wakai moramga paugwa
1Ana agrama wagle, ene tau mere tabre God kamo beke tenamga yoba moramnedi erekrio. I siragl pre God kamo yoba beke tomga yobamo ta munga i, nono mabunono ya kano i, God swara kaima ta kanige erekre, mudu kan yubu sinabuka.
2Nono mudu munga i, mabuno tau mere mina yage sumga, ba ege mere ka dumnara i mina yage sikramga. Yoba ta ye dra sugl wakai moglsre, ka dumara yage sikrukwa ta morabuka i, ye yake ede kade pi kodugwa mere yegl paugwa pre ye ogo nagie mudu ama sugl wakai morabuka i, kuno erabuka.
3 Ana yoba hos au sidre ede eigwa i, ene prio. Ain kebra ta hos drano mina padiglsre, kane kogl, stia mere yegl akigo, hos ye kano pre, ta enaiglmedi erimara i, ede eigwa. 4Te, yoba sip stia akigwa i, ama prio. Sip i taragl podo kide ta yogo, ir podo kide mage, ake nu sugwa ba yoba ta stia kebra akumara i mina, sip ye enabedi prumara i, ede ogwa. 5Kuno yegl mere, nono ogono nagino podo pamara suna i, drano taragl kebra ta paugwa ba nono drano i, mogl mitna edidre, ka kane kane dugwa taragl paugwa.
Ana ene prio! Doga kebra ta denabuka ba de wir di, ede pi kono are denabuka. 6Kuno yegl mere, nono drano i, doga bauglo mere yegl ere, taragl mere kide ere kide ere togwa. Nono drano i mina taragl kide kane kane atne kau sugwa. Te, nono ogono nagino mudu i, drano swara ede okna pi, aglau ersre, ogono nagino mudu si deglbi yogwa mere yegl paugwa. Drano swara i eruko, nono mogl pai erumga i, mudu u kide ogwa. Te, nono drano i, doga bauglo mere yegl dome diga i, Satan yene doga i, ere gaglkwa mere yegl paugwa.
7Ana yoba ere mogl, agl bugla kane kane ere kiglko, taragl i yoba kano prikwa. Te, kua ya gur toki ya nigle taragl kane kane meglkwa i, yoba ama ere kuglsre, suglno meglkwa 8ba yoba swara ta ere mogl, yene dra sugl wakai moglsre, ka prabedi erabuka i, kuno ta erekrabuka. Are ere pai morabuka. Nono drano i, mogl atne edekre, ka kide keme dinagledi prukwa mere yegl paugwa. Marasin kide, yoba ne geglkwa i, nono drano mina kau sugwa mere yegl paugwa.
9Nono drano mina Neno Kade, nono Yaglno Kade moglkwa i, di wakai yei tedre, te drano swara i mina yoba, God ye moglmere mere yegl moraiglmedi beke yogwa i, di kide yei tomga. 10Nono drano swara i mina ka kide ya wakai akie ede meda ugwa. Agrama abarama wagle, nono mabuno yegl ta erekramga paugwa. 11Nigl swara ta ogo beinabara i, nigl kide ya nigl wakai akie ta ede meda ukrabrika. 12Te, agrama abarama wagle, ede muli edie popo mogo koran, kuno erabo? Mo, amugl ta bata mogo korabuka i, kuno erabo? Kuno ta erekrabuka. Te, mudi nigl moglmara i, nigl kor ama akie ta moglkrabuka. Kuno yegl mere, nono drano swara i mina, ka wakai ya ka kide akie ede meda ugwa i, kuno ta erekrukwa.
God nomane wakai norukwa i, yegl mere paugwa
13Ana ene tau nomano wakai pamedi pribi, ene mogl atne edidre, mabuno wakai eraiglmara i mina, nomano wakai i, i nogugl edenaiglkwa paugwa. Yegl eribi, ene mabunono wakai i, yoba kandre, ene nomano wakai pamedi kanaiglkwa. 14Ba ene nomano mina enene pre i mitna edidre, yoba tau kide kan, jelas ere tebi, ene aglau ere kodigwa pre enene kagno ake mitna edidre, no nomano wakai pamiwe dikrio! Ene yegl dibi, ene ka kaima paugwa i kide kodidre, ka kibi digwa. 15Yoba ta mabuno yegl ersre, nomana podo pamedi prabuka i, nono pre pogl sinamga. Ye nomanemo i, God ta tekrukwa. Ye makandigle yoba nomano idre, yene nomanemo ama duglo boglsre, murubuglo kide nomano pamere yegl paugwa. 16Te, ene prio. Yoba yene pre i mitna edidre, jelas erikwa igne i ye mogl pai erikwa i, u kide ogo, mabuno kide mudu ye meglmara plau dugwa.
17Ba God yoba ta nomane wakai tenan, inabuka i, ye mabuno wakai tau mere erabuka. Ye mabuno swara ta erabuka podo paugwa i, mabuno tau pe sugwa i ere morabuka. Te, ye ama yoba pere bogl deno muduno swara yenamnedi ersre, ye wakai moraiglmedi prisre, ye kano ama prabuka. Ye yegl ersre, te, yoba pere ege ege mitno goglsre, ere wakai ere tenabuka. Te, ye ama yoba mudu mabuno swara ere tedre, yoba gumuglnomugl keme mabuno wakai eragledi erekrabuka ba ege ege erabuka. 18Te, yoba ta yoba pere bogl deno muduno swara yenamnedi erikwa i, ye kaya mokna yubo i pi sudiglkwa mere yegl paugwa. I siragl pre ye erimara i, mabuno du ya mabuno wakai okuo pare ede mitna pidre, yake ede podo enabuka.
Currently Selected:
Jems 3: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission