Jems 4
4
Makandigle yoba mabunono i, yoba ta wakai kanan, ye God kudamo ikne mere yegl moglkwa
1Ana ene ikne ikne nonga didre, kuda mere yegl beglkwa i, ene mem ta primo mo prikrime? Na ene di tenaglka. Ene taragl tau ersre, erme keme gun yenaiglkwa i, nomano mina kau sugwa pre nomane kide i, ene deno muduno suna kuda bogl togo, ene nomane kide idre, ikne ikne nonga di, kuda mere yegl beglkwa. 2Ene taragl tau bubuno goglsre, yoba pere jelas ere teigwa ba ene taragl ta inamnedi prikwa i, ikrikwa pre ene aglke kor nonga didre, kuda mere yegl bogl, agroma abaroma ikne ikne si geglkwa mere yegl paugwa. Ba ene taragl tau ikrikwa i, i siragl pre ene God agle di prikrikwa. 3Te, ege tau ene God agle di prikwa ba ye ene di primere mere ere tekrukwa. I siragl pre ene nomane wakai idre, taragl wakai pre God agle di prikrikwa ba ene erme keme gun yenamnedi prisre, God agle di prikwa pre ye ene dimere ere tekrukwa.
4Ana ene mabuno yegl erikwa i, ene kide erikwa. Ene abu ta bogl kunogl neigwa mere yegl paugwa. Ene prio! Makandigle yoba ebrie mabunono i, yoba ta wakai kanan, ye God kudamo ikne mere yegl moglkwa. 5God kamo di norukwa i,
God ye Murubuglomo noruko, suna moglkwa i, no ye moglmara swara mogl atne edinaiglmedi prumiwe#4.5 Isip Kide Kodigwa 20.5, 34.14
di, yegl di norukwa. God kamo yegl dugwa i, yoko di yar edumedi primo? Ta manugwa. Mem paugwa pre dugwa.
6Ana nono ege mere nomane kide imga ba God mitno podo goglsre, ake ple di noragledi prukwa. Mabuno i pre ye kamo mina bage ta yegl dugwa,
Yoba ta mogl mitna edenabuka i, God ye ake atne edenabuka ba yoba ta mogl atne edenabuka i, God ye ere wakai ere tenabiwe#4.6 Ame Wakai Dinaiglkwa 3.34
dugwa. 7Yegl pre ene God moglmara mogl atne edidre, yagl kide bakagl noro dinabedi adigl gigledi molo! Ene yegl eribi, yagl kide ene meglmara kide kodo, teke ede enabuka.
8Ene God moglmara mogl magigl edio! Ene God moglmara mogl magigl edibi, ye ama ene meglmara mogl magigl edenabuka. Yoba ogono nigl edimere yegl, ene tadaglme erikwa i, i pi kide kodio! Te, ene yoba ta nomano suo yenabuka i, nomano kide, i pi kide kodibi, deno muduno pe sinabuka. 9Ene tadaglmeno pre kide prisre, kai erio! Ene gun yedre, gaugl erikwa i kodo, deno muduno yubun denan, kai eraiglkwa paugwa. 10Ene yegl ersre, Yaglno Kade moglmara mogl atne edibi, yene ere mogl, ene ake mitna edenabuka.
Agroma abaroma ka kide ta di tekramga paugwa
11Ana agrama abarama wagle, ene ka kide ikne ikne dikrio! Yoba ta ye agigle ka kide di tedre, ye kan yubu sugwa i, ye mogl mitna edidre, God lomo kan yubu sugwa mere yegl paugwa. Te, ye God lomo ama dumere erekrukwa ba God lomo di kide yei togwa mere yegl paugwa. 12God swara lo ere padigl norsre, ye swara jasno moglkwa. God yoba ta wakai morabedi ake ple dinabo mo ye si gorabo mo i, ye moglmara paugwa. Ba ene agro tau jasno moramnedi erikwa i, ene ira munedi prime? Mabuno i kide kodio.
No nono prumnere mere kogon tau eramne dumun, kide panabuka
13Ana ene prio! Ene tau digwa i, Erme mo tagna no ede pi dumo yegl, yegl pidre, bugla yugu swara mere dumo i mogl, kogon tau ersre, mige kia tau inamniwe digwa. 14Ene yegl digwa ba taragl ta tagna plau dinabuka i, ene ta pre kan erekrikwa. Tagna mogl kamun kua sugwa ba ade sugwa igne, kamun kua pigla baglmere yegl, ene ama ege sugunagle moglsre, goraiglkwa. Ene aunake goraiglkwa i ta prikrikwa. 15Yegl pre ene ka ta dibi, kuno erabuka i, yegl dinaiglkwa, Yagl Kade ta wakai pran, no kor moglsre, kogon yegl, yegl eramniwe di, yegl dinaiglkwa paugwa. 16Ba erme ene mogl mitna edidre, enene primere mere yegl eramne digwa i, wakai ta paikrukwa. Ene mogl mitna edigwa i, mabuno kide erikwa.
17Ana yoba ta mabuno wakai swara ta erabuka panan, ye pre kan ersre, mabuno wakai i ta erekran, ye tadaglme erukwa.
Currently Selected:
Jems 4: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission