Jon 14
14
1Ana Jisas ka ta ama yegl dugwa, Ene deno muduno yubun dekrano. Ene God pre mediglsre, na ama pre medilo. 2Na Nina yugumogl i, ene againo mogl pai eraiglkwa mere yogwa. Ta yekruma, ene di teigo. Na pi ene moraiglmara ere wakai eraglka. 3Te, na pi ene moraiglmara ere wakai ere tebo, na aglke ede ikne u ene na moglmara akie moramnedi agre i ede enaglka. 4Na enaglmara i, ene konbauna pre kan ere kodimiwe dugwa.
5Ana Jisas yegl di kodugo, ye duglo boglkwa yagl Tomas di ikne ede, yegl dugwa, Yagl Kade yo, ene aglo mere enatnga i, no ta pre kan erekunga pre konbomo i ama pre kan erekuniwe dugwa. 6Yegl dugo, Jisas ye di te, yegl dugwa, Na konbauna moglsre, te ka kaima i, na mabuno moglsre, yoba kor moraiglkwa i, na mabuno moglsre, erika. Yoba ta ede pi na Nina moglmara enabuka i, konbauna pere ta mina ta pikrabuka. Na swara mina enabuka. 7Na siragl mere moglka i, ka kaima prikwa panan, na Nina ama pre kan erikwa. Ba erme ene God kandre, ama ye pre kan pogl simiwe dugwa.
8Ana Jisas yegl dugo, Filip ye di te, yegl dugwa, Yagl Kade yo, Ene Nen moglkwa i, obuno di noro. Obuno di notn, no kandre, wakai pramne dugwa. 9Yegl dugo, Jisas ye yegl di togwa, Filip yo, na ene bogl tau kanana munga ba ene na pre kan erekitno? Yoba ta na kanugwa i, ye na Nina ama kan kodugwa. Yegl pre siragl eruko, ene na di narsre, Nen obuno di noro dine? dugwa.
10Na Nina na moglmara suna moglko, na ye moglmara ama suna moglka i, ene pre mediglkitno? Na ka diga i, na nana primere ta dikrika. Na Nina yene na moglmara suna kogon eruko, na prisre, erika. 11Na Nina moglmara suna moglko, ye na moglmara ama suna moglkwa i, ene pre medilo. Ba ta pre mediglkribi, na kogon kane kane erimara i mina pre medilo dugwa.
12Na ene ka kaima di teiga, na ede Nina moglmara enaglka pre yoba ta na pre medran, na kogon erimere yegl ersre, ama kogon podo kaima erabuka. 13Pre medigl mogl, God Wam moglka i, siragl kane kane na kagna mina kamage ere, di pribi, na Nina kagie kade inabedi ere wakai ere tenaglka. 14Ene siragl kane kane na kagna mina di pribi, dimere eraluwe di, Jisas yegl dugwa.
15Ene deno muduno naribi, na kana duglo boraiglkwa.
16Te, na Nina di pribo, ye Ake Ple Dugwa yoba ta aimadi kamin meglmara suna morabedi tenabuka. 17Na Ake Ple Dugwa yoba we diga i, ka kaima mabuno i nogugl edugwa Murubuglo ikra ene tenabuka pre diga. God Muruboglomo erme ene bogl akie moglsre, te, okuo ene meglmara suna morabuka pre ene ye pre kan erikwa. Ba makandigle yoba ye kankre, pre pogl sikre, erikwa pre ye God Murubuglomo ta ikraiglme dugwa.
18Jisas ka ta ama yegl dugwa, Na ene kide kodibo, ene gak mua mere yegl mogl dinaiglmedi na ene meglmara ede ikne unaglka. 19Na kuri ta moglbo, makandigle yoba okuo na ta kankraiglkwa ba ene na kanaiglkwa. Te, na kor moglmara i pre ene ama kor moraiglkwa. 20Na u kor enaglka igne, na Nina moglmara suna moglko, ene na moglmara suna meglko, na ama ene meglmara suna moglka i, ene pre kan eraiglmiwe dugwa.
21Na ka tau duglo bolo diga i, yoba ta prisre, duglo borabuka i, yoba i dem muduo narukwa. Te, yoba ta dem muduo narukwa i, na Nina yoba i dem muduo tenabuka. Tenan, na ama siragl mere moglka i, yoba i obuno di tenaluwe dugwa.
22Ana Jisas yegl di kodugo, Judas ta, ye Judas Iskariot moglkrukwa i, Jisas di pre, yegl dugwa, Yagl Kade yo, Siragl mabuno pre ene no keme obuno di norsre, yoba mudu pra pra obuno di tekratne? dugwa. 23Yegl dugo, Jisas di ikne ede, yegl dugwa, Yoba kane suo mere yegl meglkwa. Ta dem muduo narabuka i, na ka diga i, ama duglo borabuka. Yegl eran, na Nina yoba i dem muduo tenan, na Nina bogl akie yoba i moglmara udre, ye moglmara suna mogl tenabuglka. 24Yoba ta dem muduo narekrukwa i, na ka diga i, duglo boglkrabuka. Prio. Na ka diga prikwa i, i na kana manugwa ba na Nina na dedugwa i, ye kamo pamiwe di, Jisas yegl dugwa.
25Na ene bogl akie munga igne i ka tau mere ene di teiga. 26Ba ka mudu pre ikne edenaiglkwa pre na Nina ene Ake Ple Dinabuka yagle, Mudu Murubuglo ikra, na kagna mina dedenabuka. Mudu Murubuglo dedenan, ye ka pra pra di pogl si tedre, ka mudu di teiga i, pre ikne edinaiglmedi erabiwe dugwa.
27Na ene deno muduno wida dinabedi ersre, ene kodinaglka. Te, na ene deno muduno wida dinabedi tenaglka i, makandigle yoba swara ta tekrimere ene deno muduno wida dinabedi tenaglka. Yegl pre ene deno muduno mina pre yubun dedre, kudugl goglkrio dugwa.
28Na ka erme ta diga i, Na pidre, okuo ede ikne u ene meglmara unaluwe ka diga i, prisre, ene deno muduno narima, na Nina moglmara enaglka i, ene gun yeigo. I siragl pre Na Nina wakai kaima mogl, na i atne edugwa. 29Te, taragl i, na moglmara plau dikrukwa igne, tabre di teiga. Yegl pre plau dinan, ene pre medraiglmiwe dugwa.
30Makadigle yoba bitno moglkwa ikra, tabre kana unagledi erukwa pre nono ka kanana ta dikramga. Ba ye yobuglo ta ere naran, kuno ta erekrabuka. 31Te, yoba uglo koglo koglo na Nina dena muduna teiga i, pre pogl sinaiglmedi na Nina kamo pamere duglo boglka.
Ana ene adigl ede wio. Nono ede enamniwe di, Jisas yegl dugwa.
Currently Selected:
Jon 14: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
