Jon 15

Jisas ye ede wain mere yegl mole dugwa

1Ana Jisas ka yegl di kodidre, ka ta ama yegl dugwa, Na ede wain mere yegl moglko, na Nina ede wain sugl baglkwa yagl mere yegl moglkwa. 2Na ede wain moglka i, na moglmara, yogagle ta mogo koglkrabuka i, na Nina bagl, i eglke ede enabuka. Te, yogagle ta mogo koglkwa i, ye mogo tau mere korabedi bagl, ere wakai erukwa. 3Ana na ka di teimara i, ene pre igwa pre ye ene bagl ere wakai ere kodugo, ene deglbi yeikrikwa. 4Ene na moglmara si dakagl molo. Ene yegl eribi, na ama ene meglmara si dakagl moraglka. Ede wain yogagle ta yene pere panan, mogo ta koglkrabuka ba ede mabuno mina si dakagl panan keme mogo korabuka. Kuno yegl mere, ene enene mogo ta koglkraiglkwa ba na moglmara si dakagl meglbi keme, mogo koraiglmiwe dugwa.

5 Na ede wain mere yegl moglko, ene wain yogagle mere yegl meglkwa. Na bogl si dakagl meglbi, ene mogo mere koraiglkwa. I siragl pre na mina si dakagl moglkribi, ene taragl swara ta erekraiglkwa. 6Yoba ta na bogl si dakagl moglkran, yoba ede yogagle tau boro, i eglke edimere yegl, na Nina ye i eglke edenabuka. Te, yoba ede yogagle tau i eglke edigwa i, gigle goglko, ye ake i swara ede, i pi doga edidre, gaiglmiwe dugwa.

7Ene na mina meglbi, na kana ene mina yenan, God di praiglmere mere ene ere tenabuka. 8Te, ene mogo mere keglkwa igne, na duglo beglkwa yoba kaima meglkwa. Ene erimara i mina na Nina kagie kade yumiwe dugwa.

9Na Nina dem muduo narumere yegl, na ama ene dena muduna teiga. Te, dena mudna teimara i mina atne mogl paio. 10Na Nina kamo duglo boglsre, ye dem muduo narumara i mina atne mogl paimere yegl, Ene na dena mudna tenaglmara atne mogl panaiglkwa i, na kana duglo beglbi, atne panaiglmiwe di, Jisas yegl dugwa.

11Na ene ka yegl di teiga i, Na gun yeimere mere yegl ene mina yedre, gun mabuno si kau si tenabedi prika.

12Na ene ka ta duglo boraiglme di teiga i, Na ene dena muduna teimere yegl, ene ama agrama abarama deno muduno teo diga. 13Ana yoba kabagle ta ere inagledi goran, ye deno muduno teigwa mabuno i, mudu egre i atne kaima edenabiwe dugwa.

14Na ene ka ta duglo boraiglmedi teiga i, duglo beglbi, ene na kabaglena moraiglkwa. 15Na okna ene nigl kogon yoba meglme diga ba okuo yegl ta dikraglka. I siragl pre nigl kogon yoba meglkwa i, ye bitno yoba nomanemo i pre pogl sikrikwa. Ba na Nina ka mudu di narukwa i, na ene di nogugl ede teiga pre erme na ene nigl kogon yoba meglme dikre, ene na kabaglena meglmiwe dinaluwe dugwa.

16Ene na ta kere ikrikwa ba nana ene kere iga. Ene pi mogo keglbi, aimadi panabedi pre ene kere iga. Na ene kere iga i, na kagna mina ene siragl ta inamnedi Nina di praiglkwa i, tenabuka. 17Na ene ka ta duglo boraiglmedi teiga i, ene ikne ikne deno muduno teo di, Jisas yegl dugwa.

Makandigle yoba ye Jisas duglo beglkwa yobama kide kanaiglkwa

18Makandigle yoba ene kide kanibi, ye komono kana na kide kanimedi praiglkwa. 19Te, ene ama makandigle yoba meglma, makandigle yoba i, no swara munedi kandre, ene deno muduno teigo. Ba ene mogl pere edenaiglmedi na ene kere igo, ene makandigle yoba bogl swara moglkrikwa pre makandigle yoba ene kide kanigwa.

20Yoba na ere kide ere naribi, ene ama ere kide ere tenaiglkwa. Ene okna di teiga i pre ikne edenaiglkwa. Na yegl diga, Nigl kogon yoba ta mogl mitna ede, ye yaglmo kade egre atne edekrabe#15.20 Jon 13.16 diga. Te, yoba na kana duglo beglkwa panan, ye ene kano ama duglo boraiglkwa. 21Ba ene na yobanama meglkwa pre makandigle yoba mabuno kide kane kane ene ere tenaiglkwa i, Yoba ta na dedugwa i, ye pre kan erekrikwa pre ene ere kide ere tenaiglmiwe dugwa.

22Jisas yegl didre, ama yegl dugwa, Na u, makandigle yoba ka di tekria, ye tadaglmeno ta paikruko, ba na ye ka di teiga pre ye ere mogl, No tadaglme ta erumga i, ta prikune dibi, kuno ta erekrabuka. 23-24Yoba pere ta kogon erekrimere yegl na yoba gumuglno mina erika i, ta erekria, ye tadaglmeno ta paikruko. Ba erme ye na kogon erika i gumuglno mina kandre, na kide kan, na Nina ama kide kanigwa pre tadaglmeno paugwa. Yoba ta na kide kanugwa i, ye na Nina ama kide kanugwa. 25Ba ye yegl erikwa i, ka ta ye lono mina okna beglkwa i, pai inabuka pre erikwa. Ka i, yegl paugwa, Mem ta paikrumara ye na kide kanigwa.#15.25 Giglage 35.19, 69.4

26Jisas yegl didre, ka ta ama yegl dugwa, Na Nina moglmara pidre, Mudu Murubuglo, ye ka kaima i nogugl edugwa i, dedibo, ye na Nina moglmara mogl udre, ye na kana ene obuno di tenabuka. 27Te, na kogon mabuno bogl erika igne ede u erme pra, nono akie munga pre ene ama na kana i pi yoba obuno di tenaiglmiwe di, Jisas yegl dugwa.

Currently Selected:

Jon 15: KB

Highlight

Compare

Copy