Jon 16

1Na ene ka di te moglka i, ene yage si dinaiglkwa pre diga. 2Juda yoba ka mabuno yugu makai simara i, ene si meda edinaiglkwa. Te, ege ta okuo yenan, yoba ta ene si geglbi, i ama God kogonmo ere tomnedi praiglkwa. 3Ye na Nina ya na ama pre kan erekrikwa pre mabuno yegl ere tenaiglkwa. 4Ba ye mabuno kide yegl ere tenaiglkwa igne, ene poglo di praiglkwa i, Jisas okna di norumere kra plau dumiwe di, prisre, yage sikraiglkwa pre diga. Na okna akie munga pre dinaglka mem wakai ta paikrukwa ba erme ede enaglka paugwa pre ene di pogl teiwe di, Jisas yegl dugwa.

Jisas Mudu Murubuglo dedenabuka pre dugwa

5Ba Nina na dedugwa moglmara ede ikne enagledi erika i, na ede aglo mere enaglka i, ene kira ta pogl narekrikwa. 6Ba ede enagle diga i pre ene deno muduno kaima yubun podo dogwa. 7Yubun di prikwa ba na ene ka kaima di teiga, na enaglmara i pre ene mina wakai panabuka. Na ta pikribo, Ake Ple Yoba ene meglmara ta ukrabuka ba na ede ebo, ene meglmara unabedi dedenaluwe di, yegl dugwa.

8Ana God Murubuglomo unabe diga i, unabuka igne, yoba mabuno suota pre pogl sinaiglmedi i nogugl ede tenabuka. Ye tadaglme mabuno ya te, yoba du moraiglkwa i ya te, God kotmo unabere i, i nogugl ede tenabuka. 9Tadaglme mabuno i, yoba na we di pre mediglkrikwa pre tadaglme erikwa. 10Te, mabuno du i, na Nina moglmara ebo, na ta kankraiglkwa pre du moraiglkwa kuno erabuka. 11Te, God kotmo i, makadigle bitno moglkwa yagl kot mina yage si kodugwa pre God ka tage tenabuka. Tedre, yoba mudu ama ka tage tenabuka. Mudu Murubuglo udre, mem suota i, i nogugl ede tenabiwe di, Jisas yegl dugwa.

12Na ka tau mere ama ene di tenagledi prika ba ene erme pre inaiglkwa kuno erekrabuka. 13Kuno erekrabuka ba God Murubuglomo, ka kaima mabuno i nogugl edugwa Murubuglo ikra unan, ene mem kaima mudu pre pogl sinaiglmedi erabuka. I siragl pre ye yene prumere ta dikrabuka ba na Nina dugo, prumere i keme didre, taragl okuo plau dinabuka i ene di tenabuka. 14Di tenabuka i, na kana idre, ene i nogugl ede tenabuka pre na ama kagna kade narabuka. 15Na Nina taraglmo mudu na pre yogwa. Mem swara i pre Mudu Murubuglo na kana idre, ene i nogugl ede tenabe diga ikra, kuno erumiwe di, Jisas ka yegl dugwa.

Jisas duglo beglkwa yoba okuo gun podo yenaiglkwa

16Ana Jisas ka ta ama yegl dugwa, Ene kuri ta mogl, na ta kankraiglkwa. Ba okuo kuri kaima ta mogl, na aglke kor dagl kanaiglmiwe dugwa. 17Jisas yegl dugo, duglo beglkwa yagl tau di ikne ikne ede, yegl digwa, Ye ka yegl dugwa i, Kuri ta mogl, na ta kankraiglkwa ba okuo kuri kaima ta mogl, na aglke kor dagl kanaiglme dugwa i, siragl pre dume? Te, Na ede Nina moglmara eiwe dugwa i, ama siragl pre dume? digwa. 18Yegl didre, ama yegl di prikwa, Ye kuri ta we dugwa i, mem siragl paugo, dume? Nono pre kan erekrumniwe di, yegl digwa.

19Ka kira yegl poramnedi Jisas duglo beglkwa yagl nomane mina prikwa i, Jisas pre kan kodo, yegl dugwa, Na ka ta diga i, Ene kuri ta mogl, na ta kankraiglkwa ba okuo ene kuri ta mogl, aglke kor dagl na kanaiglme diga i pre mem pre pogl sinamnedi dimo? 20Na erme ene ka kaima ta di tenaglka i, Ene kai ersre, mitna podo goraiglkwa ba makandigle yoba gun yenaiglkwa. Ene deno muduno yubun denabuka ba okuo ene gun podo kaima yenaiglkwa. 21Abu ta gak kuragledi erukwa igne, ye egemo umedi prisre, giugl pre dinagledi prukwa pre ye dem muduo yubun dogwa. Ba ye gak kugl kodugwa igne, ye gun yedre, giugl siragl mere prukwa i, kiurukwa. I siragl pre yoba kor ta makandigle umedi prisre, gun yogwa. 22Okuo kuri ta mogl, gun podo yomere mere yegl, ene deno muduno erme yubun dogwa ba na aglke kor dagl ene kanaglka igne, ene deno muduno mina gun podo yenaiglkwa. Te, ene gun yenaiglkwa i, yoba swara ta i eglke edekrabiwa.

23Ege okuo i, ene ka kira swara ta na pogl prikraiglkwa ba ene na kagna mina ka siragl mere na Nina di praiglkwa i, ye ene dinaiglmere ere tenabuka. I ka kaima diga. 24Okna ede u erme ugwa i, ene na kagna mina taragl swara ta inamnedi agle di prikrikwa. Ba erme agle di pribi, inaiglkwa. Ene ibi, gun mabuno i, ene meglmara si kau si tenabiwe di, Jisas yegl dugwa.

Jisas makandigle mabuno yobuglo ere te kodiwe dugwa

25Ana Jisas ka yegl didre, ka ta ama yegl dugwa, Na ka erme di teiga i, ka ebrie keme ene di teiga ba ege ta okuo yenan, na Nina kamo ene nogugl kaima di tenaglka. 26Ege i ene na kagna mina agle di praiglkwa ba dibi, ene kano kep ta erekraglka. 27I siragl pre na Nina ene dem muduo podo togwa pre kano prabuka. Ene na Nina moglmara mogl umedi pre mediglsre, deno muduno narikwa pre na Nina dem muduo podo ene togwa. 28Na Nina moglmara mogl umedi pre mediglkwa i, kaima na Nina bogl muglka ede makadigle wiga. Aglke erme makadigle kide kodo, ede Nina moglmara enaluwe dugwa.

29Ana Jisas yegl dugo, ye duglo beglkwa yagl yegl digwa, Ana erme i, ka ebrie dikre, ka mogo nogugl di notniwa. 30No erme kamga i, yoba nomane mina prikwa i, ene pre kan kodinga pre ene ka kira pogl praiglkwa i ta paikrukwa. No yegl kandre, ene God moglmara mogl, unedi pre meduniwe digwa.

31Ana Jisas duglo beglkwa yagl yegl digo, Jisas di ikne ede, Ene erme keme pre mediglmo? 32Ene prio. Ege ta u kodugwa ene mudu na kide kodo, ede pere pere pi, teke ede ikne yugunomugl ebi, na swara moraglka. Na kodinaiglkwa ba na Nina bogl akie mogl pai morabuglka.

33Na ka erme di teiga i, mudu ene na mina si dakagl moglsre, deno muduno wida di inaiglkwa pre diga. Ene makandigle moraiglmara i, yoba yubun kane kane tenaiglkwa ba ene gun yeio! Na makandigle yoba yobuglo ere te kodiwe di, Jisas yegl dugwa.

Currently Selected:

Jon 16: KB

Highlight

Compare

Copy