Jon 2

Jisas nigl kor ere i wain koglo edugwa

1 Okuo, ege suo ede ogo, dumo ta Kana we dimara, distrik Galili suna yogwa i, yagl abu suo ta bogl ibriko, yoba kaya mokna podo ere nenamnedi makai si meglkwa. Ye makai si meglmara suna i, Jisas mam ama moglko, 2te yoba ye ama Jisas ye duglo beglkwa yagl bogl di gaiglko, wigwa. 3Ye u suna meglko, yoba kaya mokna nedre, nigl wain nedre, ere meglko, nigl wain dudugwa. Dudugo, Jisas mam pi Jisas moglmara di tedre, Yoba nigl wain nenaiglkwa i, dudumiwe dugwa. 4Yegl dugo, Jisas di ikne edidre yegl dugwa, Mana yo, ene siragl pre na di natne? Na kimagl eraglka egena ta yeikrumiwe dugwa. 5Jisas yegl dugwa ba ye mam ere mogl, yugu nem niglmo kogonmo yoba tau meglkwa i di te, yegl dugwa, Na wana ka siragl mere ta ene di tenabuka i, ye dinabere sika si erio di, yegl dugwa.

6Ana yugu ta yoba makai si meglmara i, nigl migi kobuglo mina bekigwa 6-pela yogwa. Nigl migi i, ye Juda yoba ebrie mabunono pamere i, ogono kaglno nigl koraiglkwa pre yeigo, swara swarade 100 lita mere yegl toide atne edibi, kau sinabuka yogwa. 7Ana Jisas ere mogl, yugugl i nigl kogon yoba ta meglkwa i di te, yegl dugwa, Ene nigl kogl yu, nigl migi 6-pela i mudu kogl kau sio dugwa. Yegl dugo, nigl kogon yoba ye dumere ere, kogl kau sigwa. 8-9Kogl kau sigo, Jisas nigl i ere i wain edidre, ye di te, yegl dugwa, Ene nigl migi i mina nigl tau kogl i pi, yagl ta kaya mokna sugl moglkwa i, tebi, ye ne prabiwe dugwa. Dugo, ye tau kogl i pi teigo, yagl i ne prukwa. Yagl i, ye nigl kogon yoba aglo mere kogl yuigwa i ta pre kan erekrukwa ba nigl kogon yoba i keme pre kan erikwa. Ana ye ne prisre, yagl abu suo bogl ibrika yagl i agle dugo, ugwa. 10Ugo, ye di te, yegl dugwa, Aya, yoba kaya mokna podo yegl neigwa igne, yoba ege ege nigl wain kuglo wakai erukwa i komono kana teigo, neigwa. Mere ne kodigo, ye okuo nigl wain kuglo wakai ta erekrukwa i, yoba nenaiglmedi teime dugwa. Yoba ege ege yegl erikwa, ba ene yegl ta erekitne dugwa. Nigl wain kuglo wakai erukwa i, ene okuo i notniwe di, yegl dugwa.

11Ana Jisas kimagl yegl erukwa i, dumo Kana, distrik Galili suna yomara i moglsre, erukwa. Te, ye kimagl i koragle ersre, kimagl tau mudu erukwa i, okuo erukwa. Ye kimagl i ersre, yobuglomo ya kagie kade i nogugl edugo, ye duglo beglkwa yagl i kandre, ye pre mediglkwa.

12Ana okuo Jisas yogo, ye mam ya agiglema yeigo, ye duglo beglkwa yagl i bogl dumo Kana i kide kodidre, ede pi dumo Kaperneam pidre, kuri ta meglkwa.

Tawa teigwa yugu yomara yoba taragl tau topo beglkwa i, Jisas si meda edugwa

(Matyu 21.12-13, Mak 11.15-17, Luk 19.45-46)

13Ana Juda yoba ere mogl, God okna ibo ye kowano awano oglo si pidre, Isip yoba wano komono si goglkwa i pre moraiglkwa ege i ede magigl ugo, Jisas ye duglo beglkwa yagl bogl ede Jerusalem eigwa. 14Ede Jerusalem eigo, Jisas ede pi tawa teigwa yugu yomara togl suna pidre, kanugwa i, yoba kau ya sipsip ya kua yumugl topo beglko, te mige topo suade erikwa yoba ama tebol mina ame di mogl, mige topo suade eriko, kanugwa. 15Jisas taragl yegl erikwa i kandre, kide pre, kan tau magigl i yogwa i idre, ake pema si, ere i duglnai mere yegl edidre, duglnai i mina yoba maket ere meglkwa i ya sipsip ya kau togl suna meglkwa i pra, si meda edugwa. Si meda edidre, mige topo suade erikwa yoba i, tebolno ake yake tedre, mige mogono pia si bage bage edugwa. 16Yegl ersre, te yoba ta kua yumugl mige beglkwa i di te, yegl dugwa, Ene kua yumugl topo beglkwa i, i ede meda pio! Na Nina yugumo maket mere ta edekrio! dugwa. 17Yegl dugwa pre ye duglo beglkwa yagl prikwa, God kamo mina okna ibo bage ta yegl beglkwa,

Ene yugunen wakai yenabedi nomane sidre, pre mitna edinaluwe#2.17 Giglage 69.9

di, yegl beglkwa, te erme ye beglmere i, Jisas erumiwe di, ye duglo beglkwa yagl yegl prikwa.

18Ana Jisas yegl ere, tawa teigwa yugu yomara yoba si meda edugo, Juda yoba kade tawa teigwa yugu yomara togl suna meglkwa i kandre, Jisas yegl di teigwa, Ene taragl yegl etnga i, God ene ta dedenan, ene etn, kuno erabuka ba ta manan, kuno erekrabiwe digwa. Yegl pre ene kimagl siragl mere etn, no kandre, God kaima ene dedumedi pramne? digwa. 19Yegl digo, Jisas di ikne ede te, yegl dugwa, Ene God yugumo magigl i si gur di atne edidre, ere kide eribi, na ege suota keme ke ikne edinaluwe dugwa. 20Dugo, Juda yoba kade yegl digwa, God yugumo magigl i, yoba bugla yugu 46-pela kei meglko, dudumiwe digwa. Ene pitnga i, ege suota mina kor kenatnga i kuno erabedi pitno? digwa. 21Ye yegl digwa ba Jisas ye God yugumo we dugwa i, ye ka padum didre, yene ogo nagie pre dugwa. 22Yegl pre okuo Jisas goglsre, adigl u kor ogwa igne, ye duglo beglkwa yagl pre ikne edidre, Jisas ye ka ta Juda yoba kade di ikne ede togwa i pre mogl, ye kaima dumedi prisre, te God kamo okna Jisas adigl u kor enabuka pre dugwa i ama kaima dumedi pre mediglkwa.

23Ana Juda yoba dumo Jerusalem ege kade yogwa pre makai sidre, God okna ibo ye kowano awano oglo sugwa igne pre meglko, Jisas ye meglmara suna wan mogl, kimagl mere erukwa. Eruko, yoba mere kandre, ye Jisas pre mediglkwa. 24-25Yoba mere ye pre mediglkwa ba Jisas ye yoba i tau mere okuo nomane suo idre, adigl gigledi moglkraiglmedi pre kan ere kodugwa. I siragl pre yoba siragl mere munga ya deno muduno siragl mere paugwa i, yoba ye Jisas di tenaiglkwa ta paikrukwa. Yene pre kan ere kodugwa.

Currently Selected:

Jon 2: KB

Highlight

Compare

Copy