Jon 3

Jisas Nikodemus ka beke togwa

1 Ana Juda yagl kade ta moglkwa, kagie Nikodemus we digwa. Ye Farisi yagl ta moglkwa. 2Ana aglke ta yagl Nikodemus i eduer Jisas moglmara ugwa. Udre, ye yegl di togwa, Tisa yo, God ene ka mabuno beke noratnedi dedugo, unga i, no tau pre kan erumniwe dugwa. I siragl pre ene kimagl etnga i, no kandre, God ka kaima ene motnara mogl tomedi pre pogl sumniwe dugwa. 3Yegl dugo, Jisas di ikne ede te, yegl dugwa, Na ene ka kaima di teiga, yoba ta u kor pikran, ye God yoba kingno mogl, ye suglno morabara i, suna ta pikrabiwe dugwa.

4Ana Jisas ka yegl di kodugo, Nikodemus aglke kor yegl dugwa, Yoba ta kade mogl kodugwa i, ye siragl mere u kor enabe? dugwa. Ye aglke kor mam dane wagle enan, mam ye kor kurabuka pre dino? dugwa. 5Yegl dugo, Jisas di ikne ede te, yegl dugwa, Na yegl pre dikrika. Na ene ka kaima di teiga, God yoba ta nigl mere yegl pai tedre, te Murubuglo mina ye ere i kor edenan, yoba i keme ede suna enabuka. Ta manan, ye God yoba kingno mogl, ye suglno morabara suna ta pikrabiwe di, Jisas yegl dugwa.#3.5 Esekiel 36.24-27 kano. God kamo bage i mina ye Israel yoba okuo di togwa i, Na ene nigl pai tebo, ene pe sinabe dugwa. Te, ye ama dugwa i, Na Murubuglona ene tenabe dugwa. Jisas ka ta nigl ya Murubuglo pre dugwa i, ye ka i idre, dugwa paugwa.

6Jisas ka yegl didre, ama yegl dugwa, Yoba ogono nagino mina ere mogl, gak kiglkwa i, ogono nagino bogl kiglkwa. Ba yoba kiano wagle u kor enaiglkwa i, God Murubuglo swara eran, u kor enaiglkwa. 7Na ene di te, Ene u kor enaiglkwa pame diga i, ene gagn koglkro! dugwa. 8Ir magugwa i pro! Ir ugwa i, ene pitnga, ba ir ugwa konbo i ene kankre, ogwa konbo i, ene ama gumugln mina ta kankitnga. Kuno yegl mere, God Murubuglo ye yoba ere i kor edenabuka i, ye kiano mina erabuka pre ene gugmugln mina ta kankratniwe dugwa.

9Jisas ka yegl di kodugo, Nikodemus ye yegl di prukwa, Ene yoba u kor enaiglkwa pame dinga i, siragl mere plau dinabe? dugwa. 10Yegl dugo, Jisas di ikne ede te, yegl dugwa, Ene Israel yoba ka mabuno beke tenga yagl motnga pre na ka diga i, ene pre pogl sinatnga paugwa ba ene ta pre pogl sikitne dugwa. 11Na ene ka kaima di teiga, No taragl tau kandre, pre pogl sidre, erumga i, ene di tomga ba ene no kaima dimedi prikrime dugwa. 12Na taragl tau makandigle plau dinabuka i keme ene di teigo, ene pre mediglkrikwa. Yegl pre na taragl tau heven ibo plau dinabuka i ta ene di tebo, ene pre medraiglkwa i ta kuno erekrabiwe dugwa. 13Yoba ta ede heven ibo pi kandre, ede ikne ukrikwa pre ye ene heven pre di tenaiglkwa i, kuno ta erekrukwa. Na swara, Yoba Wam moglka i, heven ibo moglsre, ede atne wiga pre na swara ene di tenaglka i kuno erumiwe di, Jisas yegl dugwa.

14 Ana Jisas ka yegl didre, ye ama yegl di togwa, Moses okna ibo dumo wau yomara toki kide ta beke, ede wagle padiglsre, i mitna edumere mere yegl, na Yoba Wam moglka i, okuo yoba na ama yegl ede mina padigl, na ake i mitna edenaiglkwa pamiwe dugwa. 15Yegl eribi, yoba ira ta na pre medrabuka i, aimadi kamin kor morabiwe di, Jisas yegl dugwa.

16God yoba mudu uglo koglo koglo meglkwa i, dem muduo ka kaima togwa pre na Ye Wam swara moglka i, dedugo, wiga. Yegl pre yoba ira ta na pre medrabuka i, goglkre, kor aimadi kamin morabiwe dugwa. 17Na God Wam moglka i, God na di narsre, Yoba mudu uglo koglo koglo meglkwa i, ka tage tenatna, po! dugo, ta ukrika. Ta manugwa. Ye, Yoba mudu uglo koglo koglo meglkwa i, ere inatnedi dedugo, wiwe dugwa. 18Yoba ta na pre meduglkwa i, God ye ka tage ta tekrabuka. Ba yoba na pre mediglkrukwa i, ye ka tage tenagledi di padigl kodugwa. Na God Wam swara moglka i, pre mediglkrukwa pre di padigl kodume dugwa. 19God ye yoba tau ka tage tenagledi di padigl kodugwa i, i siragl pre na abuglage si tenagledi ede atne makandigle wiga ba yoba mim erumara moglsre, mabuno kide ere meglkwa pre ye na kide pre narsre, mim erukwa i wakai pre teigwa. 20Yoba ira ta mabuno kide erikwa i, ye abuglage sugwa i kide pre tedre, ye mabuno kide erikwa i, yoba kan dinaiglmedi ede u abuglage sumara ukrimiwe dugwa. 21Yegl erikwa ba yoba ta ka kaima duglo beglkwa i, ye ede abuglage sumara wime dugwa. I siragl pre ye prikwa i, mabuno wakai nogugl eun, yoba kandre, God no yobuglo noruko, erimiwedi, yoba yegl kanaiglmedi primiwe di, Jisas yegl dugwa.

Jon ye Jisas ira moglkwa i, di nogugl edugwa

22Ana okuo Jisas ye duglo beglkwa yagl bogl ede meda pi distrik Judia suna i ege tau akie wan meglko, Jisas yoba nigl bugl togwa. 23Togo, Jon ama dumo ta Ainon we digwa i, dumo ta Salim we dimara magigl yogwa i, moglsre, yoba nigl bugl te moglkwa. Dumo i, nigl nubun tau mere moglkwa pre ye dumo i moglko, yoba ta nigl buramnedi prikwa i ye moglmara eigo, Jon ye nigl bugl togwa. 24Ege i, yoba Jon si kane sikrikwa igne yegl erukwa ba okuo Jon ye si kane sigwa.

25Ana igne i, Juda yagl swara ta ugo, ye Jon duglo beglkwa yagl bogl nonga digwa. Ye nonga digwa i, Juda yoba mabunono pamere yegl, yoba ta ogono kaglno nigl keglbi, yoba i God gumuglo mina deno muduno pe sinabo mo sikrabo mo i pre nonga digwa.

26Digo, ye Jon moglmara udre, yegl digwa, Tisa yo, ene okna nigl Jordan koglo ibo motngo, yagl ta ene motnara ugo, ene ye ira moglkwa i yoba di pogl tenga yaglmo ikra we, ye yoba nigl bugl te moglko, yoba mudu nono munara ukre, ye moglmara keme eimiwe di, yoba yegl dime digwa. 27Yegl digo, Jon di ikne ede te, yegl dugwa, God yene heven ibo moglsre, kogon swara swarade tenan keme inaiglmiwe dugwa. 28Na God Kere Yugwa Yagl Krais ta moglkriwe diga i, na drana mina prisre, Yagl i unabara ede okna enatnedi na dedumiwe diga i, ene ama drana mina prime dugwa.

29Ana Jon ka yegl didre, ama yegl dugwa, Na ka ebrie ta dibo, ene praiglmiwe dugwa. Yagl abu ta bogl inabrika igne, abu i ere mogl, ye wie moglmara enabuka ba komono kana yagl kabaglemo, abu kep yagl ta abu nem agiglema bogl meglmara ede okna pidre, taragl mudu ere wakai ersre, yaglmo i unabedi sugl morabuka. Sugl moran, yaglmo i ede abu moglmara udre, ye ebie agle dinabuka igne, yagl kabaglemo i ye ka dinan prisre, gun podo yenabuka. Kuno yegl mere, na ede okna wiga pre Jisas ugo, yoba ye meglmara eigwa i, na prisre, gun podo yeiwe dugwa. 30Jisas kagie ede mitna pi moran, na kagna ede atne enabuka pamiwe di, Jon yegl dugwa.

31Ana Jon ka yegl di kodidre, ama yegl dugwa, Na makandigle yoba keme moglka pre na makandigle taragl plau dinabere i keme yoba di te moglka. Yegl erika ba yagl swara ta heven ibo moglsre, ede atne ugwa i, ye swara mogl mitna kaima edugo, yoba mudu mogl atne edimiwe dugwa. 32Yene taragl ta pre kan erukwa i, yoba di pogl togwa ba yoba mere kide ye ka dugwa i ta pre mediglkrikwa. 33Yoba mere ye ka dugwa i ta pre mediglkrikwa ba ira ta ye ka dugwa pre mediglkwa i, ye God kaima dumiwedi, i nogugl edime dugwa. 34God yagl ta dedugo, ugwa i, ye God kamo kuno ere dugwa. I siragl pre God ere mogl, ye Murubuglomo ye si kau si togo, ye Mudu Murubuglo nomane tomere kuno keme dumiwe dugwa. 35God Nem i, ye Wam dem muduo tedre, ye taragl mudu bitno morabedi togwa. 36Yoba ta God Wam pre meduglkwa i, ye aimadi kamin kor morabuka i, i kodugwa. Ye i kodugwa ba yoba ta God Wam pre mediglkre, mane dugwa i, ye ta aimadi kamin kor moglkrabuka. God yoba i dem kubro tomiwe di, Jon yegl dugwa.

Currently Selected:

Jon 3: KB

Highlight

Compare

Copy