Luk 1

Luk ka i bogl yagl kade ta Tiofilus we digwa i, togwa

1Yagl kade Tiofilus yo, taragl podo ta no munara plau dugwa i, yoba tau mere bogl atne edinamnedi prisre, pepa tau mere bogl kodigwa. 2Ye beglkwa i, Jisas kogon mabuno bogl eruko, yoba akie ere wan meglkwa i, ye yoba i di teigo, kano mudu bogl atne edigwa pre diga. 3Ba na prika i, na ama Jisas kamo bogl atne edenaglka i, kuno erumedi prika. Jisas kamo mabuno boglmara ede pi dudumara i, na wakai ere dokiga pre na epigl epigl boglbo, ene kerenatnedi prika. 4I siragl pre Jisas kamo yoba ene beke teigo, pitnga i, kaima yegl yegl pamedi pre pogl sinatnedi prika.

Angelo ta Sekaraia di te, Ene yagl gak ta kuglsre, kagie Jon yenatniwe dugwa

5 Ana okna tawa togwa yagl ta moglkwa, kagie Sekaraia we digwa. King Herot ye distrik Judia sugl moglkwa igne i yagl Sekaraia i moglkwa. Sekaraia moglkwa i, ye tawa togwa yagl Aron okna ibo moglkwa i gawamo ta moglsre, Aron gawama yugobuno kebra kebra meglmara i, ye Abiya we digwa ta meglmara suna i moglkwa. Te, yagl Sekaraia i, ebie kidagl kagie Elisabet we digwa. Abu i ama yagl Aron ikra gawamo ta moglkwa. 6Ana yagl abu suo Sekaraia ya Elisabet i, ye God gumuglo mina yoba du miurka. Yagl Kade lomo ya ye yoba siragl mere eraiglmedi di togwa i, yagl abu suo i duglo borabugledi ere miurko, yoba ye gagno ka ta sikrikwa. 7Yegl miurka ba abu Elisabet we, ye temne paugwa pre yagl abu suo i gak ta kuglkribrika. Ye gak ta kuglkre, kidagl yei kodibrika.

8Ana aglke ta Abiya gawama ikra tawa teigwa yugu yomara kogon eraiglkwa egemo ugwa pre Sekaraia ama akie pidre, tawa teigwa yugu yomara kogon erikwa. 9Kogon ersre, ye ege ege erimere yagl swara ira ta ede yugugl pi ede nuglo demene wakai erukwa gagl tenabuka i, kere inamnedi kagno mudu bogl atne edidre, swara ta gudu i meda edigo, Sekaraia kagie yogo, kanigwa. Yegl pre Sekaraia ede nuglo demene wakai erukwa i gagl tawa tenagledi ede yugugl ogwa. 10Ye ede yugugl pidre, ede nuglo gagl tawa togo, yoba tau mere ye ede nuglo gagl tawa tomedi prisre, meda mogl, kamage ere meglkwa.

11Ana Sekaraia ye ede nuglo gagl tawa togo, Yagl Kade angelomo ta ye moglmara u plau didre, ede nuglo demene wakai erukwa gaiglmara boglmo i, ogo wo kra adigl moglkwa. 12Adigl moglko, Sekaraia ye kandre, wai kugl, kudugl podo goglkwa. 13Kudugl podo goglkwa ba angelo i ye di te, yegl dugwa, Sekaraia yo, ene kudugl goglkro! dugwa. Ene God kamage ere tenga i, God prukwa pre ye ene ebin Elisabet gak ta kurabedi eran, ye yagl gak ta kurabuka. Ye yagl gak kuran, ene kagie Jon yenatniwe dugwa.

14Angelo i ka yegl didre, ama yegl dugwa, Ene ebin ye yagl gak i kuran, ene gun podo yebr, yoba tau mere ama akie gun podo yenaiglmiwe dugwa. 15Yoba mere gun podo yenaiglkwa i, i siragl pre yagl gak Jon i, Yagl Kade gumuglo mina yoba kade ta morabuka. Ye nigl wain ya ki ta nekrabuka. Te, ye mam dane wagle morabuka igne, Mudu Murubuglo mabuno bogl u, yagl gak Jon morabara si kau si tenabiwe dugwa. 16Te, yagl gak i kade morabuka igne, ye Israel yoba tau mere agre i ede ikne u Yaglno Kade God moglkwa unabuka. 17Ene wan kuratnga i, ka kep yagl Elaija okna ibo yobuglo ersre, kogon podo erumere yegl ye okuo yegl mere ersre, Yagl Kade unabara ede okna pi konbaunamo ere wakai erabiwe dugwa. Yagl Kade konbaunamo ere wakai eran, yoba yagl moraiglkwa i, ye gagroma bogl aglke kor deno muduno swara yebi, te yoba God kamo duglo boglkrikwa i nomane kor idre, yoba tau God gumuglo mina du meglkwa i primere yegl praiglmiwe dugwa. Wan Jon i yegl mere Yagl Kade unabedi yoba ake kun erabiwe di, angelo yegl dugwa.

18Ana angelo i, yegl dugo, Sekaraia di ikne ede, yegl dugwa, Na kidagl moglko, ebina ama kidagl mogl kodugwa pre ene ka dinga i, kaima plau dinabo mo, na kinana yomiwe di, yegl dugwa. 19Sekaraia yegl dugo, angelo aglke kor yegl dugwa, Na moglka i, na ege ege God gumuglo mina adigl moglko, na kagna Gebriel we digwa. Te, na ka wakai ene di te kodiga i, God na ene di tenatnedi dedugo, wiga. 20Ba na ka diga i, ene pre mediglkitnga pre ene dran kegl di pai moran, ene ka dikre, mogl en, wan kurantnga igne, aglke kor ka dinatnga. Ba na taragl tau plau dinabedi diga i, God yene ege paduglmere mere, kaima plau dinabiwe di, angelo i yegl dugwa.

21Ana Sekaraia tawa teigwa yugu yugugl moglkwa igne, yoba meda meglkwa i, ye tau kanana yugugl moglmiwedi prisre, kinano gudu meglkwa. 22Ye kinano gudu meglko, Sekaraia ede meda ugwa ba ka ta dinabuka mere manugo, arie keme ere moglkwa pre yoba i kandre, ye yugugl moglkwa igne, gumuglomugl eruko, taragl ta kanugwa pamiwe di, yegl prikwa. 23Ana okuo Sekaraia ye tawa teigwa yugu yomara kogon ta erabuka paugwa i, ere kodidre, ede ikne yugomugl ogwa.

24Ana okuo Sekaraia ebie Elisabet dane paugo, ye ba 5-pela mere yugugl mogl, yoba meglmara wankre, yegl dugwa, 25Yagl Kade na wakai pre narsre, na ere wakai ere narukwa. Na okna gak ta kuglkrika pre agai goglka ba erme agai ta goglkraluwe di, yegl dugwa.

Angelo ta Maria di te, Ene Yagl Gak ta kuratne dugwa

26 Ana Elisabet dane paugo, ba 6-pela mere ede ogo, God ere mogl, ye angelomo ta kagie Gebriel we digwa ikra dedugo, angelo i ye distrik Galili suna dumo kebra ta Nasaret we dimara udre, 27abai mor ta kagie Maria we digwa i, moglmara ugwa. Maria ege swara ta kumugl yagl bogl paikriko, ye yagl ta kagie Josep we digwa i moglmara enabedi yoba di padigl kodigwa. Yagl Josep i, ye king Devit gawamo ta moglkwa. 28Ana angelo Gebriel ye Maria moglmara udre, yegl dugwa, Abai yo, ene motno? dugwa. Yagl Kade ene ere wakai ere tedre, motnara mogl tomiwe dugwa. 29Yegl dugwa ba Maria nomane sidre, Ye ka i siragl pre di narume? di, yegl kina gudu prukwa. 30Yegl kina gudu pruko, angelo ye aglke kor di te, yegl dugwa, Ene kudugl goglkro! God ene wakai kanumiwa. 31Te, ene pro! Ene dan panan, yagl gak ta kuglsre, kagie Jisas yenatniwa. 32Ye Yagl Kade ta moran, yoba ye God Mogl Mitna Kaima Edugwa Wam moglmiwe di, yegl dinaiglmiwe dugwa. Te, Yagl Kade God ere mogl, ye kowamo Devit agaimo ye tenan, king morabuka. 33Ye king moglsre, Jekop gawama, Israel yoba meglkwa i, aimadi kamin sugl morabuka. Ye king morabuka i ta dudukrabiwe di, angelo i yegl dugwa.

34Ana angelo i yegl di kodugo, Maria di ikne ede, yegl dugwa, Na ege swara ta kumugl yagl bogl pai kankrika pre na siragl mere gak ta kuragle? di, yegl dugwa. 35Yegl dugo, angelo aglke kor dugwa, God Murubuglomo ene motnara unan, God Mogl Mitna Kaima Edugwa yobuglomo bi dinan, ene dan panabiwe dugwa. Yegl pre ene yagl gak ta kuratnga i, dem muduo pe si yenan, yoba ere mogl, Ye God Wam moglmiwe dinaiglkwa. 36Te, ene pro! Abu Elisabet, ye ene bogl bormai swara meglbrika i, kidagl yei kodidre, dane paugwa. Ye ama yagl gak ta kurabuka. Yoba okna ye temne pame digwa ba ye erme dane paugo, ba 6-pela ede ogwa. 37I siragl pre God ye siragl ta eragledi prukwa i, erabuka keme yomiwe di, angelo i yegl dugwa. 38Angelo i yegl dugo, Maria di ikne ede, yegl dugwa, Na Yagl Kade nigl kogonmo abai moglka. Yegl pre pra, ene taragl ta na moglmara plau dinabe dinga i, plau dinabedi priwe di, yegl dugwa. Yegl dugo, angelo ye moglmara kide kodidre, ede ogwa.

Maria ede pi Elisabet moglmara ogwa

39Ana igne i Maria ere mogl, abu Elisabet ikra kanagledi tabre ede pi muglo meglbi tau distrik Judia suna paimara i, ede ogwa. 40Pidre, Sekaraia ya Elizabet kipabrara ede yugugl pi Elisabet kandre, wakai we di togwa. 41Ana Maria ka dugo, Elisabet prukwa igne, gak kebra ye Elisabet dane mina moglkwa i tabre kaima sumun sugwa. Yegl eruko, Mudu Murubuglo ye Elisabet moglmara si kau si togo, 42Elisabet ere mogl, Maria ka podo yegl di togwa, Abu mudu meglmara suna i God ene swara ere wakai kaima ere tedre, gak ta dan mina moglkwa i ama ere wakai ere tomiwe dugwa. 43Ana siragl eruko, ene na Yaglna Kade mam motnga i, ede na moglmara une? dugwa. 44Ene pro! Ene ka dingo, na prika igne, gak ta na dana mina moglkwa i gun podo yedre, tabre sumun sugo, na prika. 45Yagl Kade ene ka ta di togo, kaima plau dinabedi pre mediglnga pre ye ene ere wakai ere tomiwe di, Elisabet yegl dugwa.

Maria God kagie kade togwa

46Ana Elisabet ka yegl di kodugo, Maria ere mogl, yegl dugwa,

Na dena muduna mina Yaglna Kade kagie kade tedre,

47kiana mina God, gun yei teiga. Ye na ere yugwa yagle moglkwa.

48I siragl pre, na ye niglmo kogonmo abu moglka i,

yoba yoko ta moglka ba ye na pre kiurekre, ere wakai ere narukwa.

Yegl pre yoba erme meglkwa ya okuo moraiglkwa i,

God Maria ere wakai ere tomiwe dinaiglkwa.

49God, ye yobuglomo podo paugwa i, taragl podo ere naruko,

kagie i ta ede paugwa.

50Yoba ta God kuduglmo geglkwa i,

ye mitno goglsre, ere wakai ere togwa.

God yoba erme meglkwa i yegl ere tedre,

yugobuno okuo mogl unaiglkwa i, ama yegl keme ere tenabuka.

51Yene yobuglo mina taragl podo ersre,

yoba ye nomano mina mogl mitna edigwa i,

si pere pere edugwa.

52Yoba sia king mina moglsre, yoba pere suglno meglkwa i,

God si atne edidre,

yoba mogl atne edigwa i, ake mitna edugwa.

53Ye yoba kidan gogl meglkwa i, taragl wakai wakai nenaiglmedi tedre,

yoba mige moni mere kan neigwa i, Yoko ede pio! dugwa.

54God ye niglmo kogonmo yoba, Israel yoba meglkwa i, ake ple di togwa.

I siragl pre ye okna mitno goragle dugwa i, pre moglkwa.

55Ye kowano awano okna di tedre,

Abraham ya ye gawama okuo ta moraiglkwa i,

ere wakai ere tenagle dumere yegl, erme plau dumiwe di,

Maria yegl dugwa.

56Ana mokomugl i, Maria ye Elisabet kana ba suota mere yegl moglsre, okuo ede ikne kipamara ogwa.

Elisabet Jon kuglkwa

57Ana okuo Elisabet gak kurabuka egemo ugo, ye yagl gak ta kuglkwa. 58Kuglko, yoba magigl kipaigwa ya bormai swara meglkwa i ye gak ta kuglme digo, prisre, Yagl Kade ye Elisabet mirie podo goglsre, ake ple di tomiwedi pre, Elisabet bogl akie gun yei meglkwa.

59Ana Elisabet ye gak kuglko, wakan swara ta ede ogo, ye nagie puduo nagie boraiglkwa ege yogwa pre yoba tau mere u makai si meglkwa. Makai si moglsre, yagl gak i nem kagie, Sekaraia, ama yei tenamniwe digwa. 60Yegl digwa ba Elisabet mane didre, Ye kagie Jon we dinamniwe dugwa. 61Dugo, yoba makai si meglkwa i aglke kor yegl digwa, Yoba ene bogl bormai swara meglmara suna i, yoba kagie yegl paugwa ta moglkrikwa pre ene kagie yegl yei tenatnga i, kuno ta erekrumiwe digwa. 62Yegl didre, ogono mina arie ere, gak nem ama ye wam kagie siragl mere yei tenagledi prabuka i, obuno di noran, kanamnedi erikwa. 63Yegl eriko, ye taragl ta yuibi, taragl i mina bogl atne edenagledi ogo mina yuio dugo, yuigwa. Yuigo, ye taragl i mina boglsre, Ye kagie Jon yomiwe di, yegl boglkwa. Boglko, yoba mudu i kandre, nagino keglkwa.

64Ana Sekaraia ye ka yegl bogl kodugo, ye dra okna si kegl dugwa ikra tabre kaima bu yogo, ye ka didre, God kagie kade togwa. 65Yegl eruko, yoba magigl kipai meglkwa i mudu kandre, kudugl geglkwa. Kudugl goglsre, ka i di wan meglko, yoba distrik Judia, muglo meglbi paimara suna kipaigwa i, mudu prisre, ka i di ikne ikne ede meglkwa. 66Te, yoba ka i prikwa igne, ye kinano gudu prisre, Yagl gak i, okuo siragl mere morabada? we di, yegl digwa. I siragl pre ye prikwa i, Yagl Kade yobuglo ere, yagl gak i ake ple di togwa pamedi prikwa.

Sekaraia God dra idre, ka kep ere dugwa

67Ana Sekaraia, yagl gak Jon nem moglkwa i, Mudu Murubuglo ye moglmara si kau si togo, ye ka kep ere, yegl dugwa,

68Yagl Kade, Israel yoba Godno moglkwa i, nono Israel yoba, ye yobama munga i, ake ple di norsre, nono ere ikne edugwa pre ye sigie kagie wanabiwe dugwa. 69Ye Yagl ta yobuglo podo paugwa nono ere inabedi dedugwa. Yagl ta nono ere inabedi dedugwa i, King Devit, God nigl kogonmo yagl okna moglkwa i, gawamo ta moglkwa. 70God okna ibo ye kamo kep yobama di togo, ye bogl atne ede noro, Devit gawamo yegl ta unabiwe di, yegl beglmiwa. 71Ana erme we, God Nono Ere Inabuka Yagle dedenagle dugwa i, kaima dedugwa pre ye nono kudano ikne ya yoba nono kide kanigwa i kubun ere noro, nono ere inabiwe

dugwa.

72Ana Sekaraia ye ka kep ere, yegl didre, ama yegl dugwa,

God okna nono kowano awano mitno goglsre, ake ple dinagledi yene ka kaima di te paduglkwa i, ye pre moglsre, ye dumere erukwa. 73Ye nono kowano awano Abraham promismo i, 74nono kudano ikne mina kubun ere inan, nono taragl swara ta kuduglno gogl tekre, ye niglmo kogonmo ere tenamga pre dugwa. 75Didre, nono ama ye gumuglo mina mabuno wakai ya du keme boraiglmedi prumiwe

di, Sekarai yegl dugwa.

76Ana Sekaraia ka yegl didre, ama ye wam kebra Jon ka ta yegl di togwa, Te, ene na wana kebra motnga i we, yoba ene God Mogl Mitna Kaima Edugwa i, ka kep yobamo ta motniwe dinaiglkwa. Ye yegl dinaiglkwa i, siragl pre ene Yagl Kade unabara ede okna pi konbomo ere wakai eratnga. 77Te, ene God yobama, Israel yoba i di te, God siragl mere ye ere idre, ye tadaglmeno gugl edenabuka i, ene ye di tenatniwe dugwa.

78God nono yoba ere inabuka i, ye nono mitno goglsre, dem muduo norukwa pre nono ere inabuka. Te, nono Ere Inabuka Yagle unabuka i, ye kamun tagugo, ade si yoba meglmara edumere mere yegl, heven ibo kide kodo, nono munara ede atne unabiwa. 79Nono Ere Inabuka Yagl i, yoba mim erumara mogl, goramga pamedi kudugl gogl meglkwa i, abuglage si tenagledi unabuka. Te, nono konbauna ta duglo boglsre, deno mudno wida di inamga i, obuno di norabiwe di, Sekaraia yegl dugwa.

80Ana gak kebra i yakugo, ye kiamo ama yobuglo yugo, erukwa. Ye kade moglkwa igne, ye ede pi dumo wau yomara pidre, kipai moglkwa. Ye dumo wau yomara kipai moglsre, okuo ede nogugl u Israel yoba mabuno bogl ka mabuno beke togwa.

Currently Selected:

Luk 1: KB

Highlight

Compare

Copy