Luk 2
2
Maria dumo Betlehem mogl, Jisas kuglkwa
(Matyu 1.18-25)
1Ana igne i Rom King, Sisar Ogastus we digwa i ere mogl, lo ta padiglsre, yoba mudu uglo koglo koglo meglkwa i, kagno inamniwe dugwa. 2Rom gavman ege i, keremoknayene yoba kagno yegl mere igwa. Te, igne i yagl ta kagie Kwirinius we digwa i, provins Siria gavana moglkwa.#2.2 Rom yoba dumo kane kane sugl moglsre, ere i provins edigwa i, dumo Israel provins ta Siria we dimara suna i yogwa.
3Ana Rom king lo yegl mere paduglkwa pre yoba mudu ede yugunomugl pidre, gavman yoba kagno tenamnedi ede eigwa. 4Yegl pre Josep ama ye distrik Galili, dumo kebra Nasaret moglmara i kide kodo, ede distrik Judia pi dumo kebra ta Betlehem we dimara i ogwa. I siragl pre dumo i, okna King Devit yugomugl yogo, Josep Devit gawamo ta moglkwa pre dumo Betlehem ye yugomugl yogwa. 5Te, ye ogwa igne, Maria dane paugo, ye Josep bogl akie ede ebrika. I siragl pre Maria ye Josep moglmara enabedi di padigl kodigwa pre gavman yoba ye kagno suo akie tenabugledi ede ebrika.
6Ana Josep ya Maria ede dumo Betlehem pidre, dumo i miurko, Maria ye gak kurabuka egemo ugo, 7ye wam komono kuglsre, lap mina were, agl bugla kugl neigwa boks i mina atne ugl paduglkwa. I siragl pre haus pasindia kau sugwa pre ye agl bugla paimara akie paigwa.
Maria Jisas kuglko, angelo sipsip sugl meglkwa yoba di teigwa
8 Ana dumo igle sipsip sugl meglkwa yoba ama meglkwa. Ye taun meda sipsipno meglmara eduer suglno meglkwa. 9Suglno meglko, Yagl Kade angelomo ta ye meglmara tabre plau dugo, God abuglagemo ama si ye meglmara edugwa pre ye kudugl podo geglkwa. 10Kudugl geglkwa ba angelo i ye di tedre, Ene kudugl goglkrio! dugwa. Ene prio. Na ka wakai ta di tebo, ene gun podo yenaiglmiwa. Ka wakai i ene pribi, yoba mudu pra pra ama praiglkwa paugwa. 11Ka wakai i yegl pre diga, Erme Devit taunmo dumo Betlehem i mina, abu ta gak kuglmiwa. Gak i ene Ere Inabuka Yagl moglkwa. Ye Yagl Kade moglsre, God Kere Yugwa yagl ama moglmiwe dugwa. 12Te, ene taragl ta kandre, gak i moglmedi kanaiglkwa. Gak i ye lap mina wersre, agl bugla kugl neimara boksmo ta yomara ugl padiglkwa pre ene kandre, gak i moglmedi kanaiglmiwe di, angelo i yegl dugwa.
13Ana angelo i yegl dugo, angelo mere kide, ye heven amimo meglkwa i, tabre angelo swara ta moglmara i plau digwa. Ye plau didre, God kagie kade te, yegl digwa, 14God ye mogl mitna kaima edugwa i, debie sinamniwa. Te, God ye wakai kanugwa yoba ta makandigle meglkwa i, deno muduno wida dinabiwe di, angelo wagle i, yegl digwa.
Sipsip sugl meglkwa yoba pi, gak kebra Jisas kanigwa
15Ana angelo wagle i, ka yegl didre, ede ikne heven ibo eigwa igne, sipsip sugl meglkwa yoba yene di ikne ikne ede pre, yegl digwa, Nono ede dumo Betlehem omno! digwa. Yagl Kade ye no di norsre, taragl ta plau dume dugwa i, nono pi kanamniwe di, yegl digwa. 16Ye yegl didre, tabre pi Maria ya Josep doko kandre, gak kebra ikra agl bugla kugl neigwa boks i mina ugl pai moglko, kanigwa. 17Kandre, ede meda eigwa igne, angelo ye gak i pre ka siragl mere dugwa i, ye di wai digwa. 18Di wai di eigo, yoba ta prikwa i, mudu nagino keglkwa. 19Ye nagino keglkwa ba Maria ye taragl plau dugwa i pre kina gudu aimadi pre moglkwa. 20Ana sipsip sugl meglkwa yoba i, ye ede ikne sipsipno meglmara pidre, taragl tau prisre, kandre, erikwa i pre God debie sidre, kagie kade teigwa. I siragl pre angelo ye ka di tomere mere kuno yegl plau dugo, kanigwa pre ye God kagie kade teigwa.
Josep, Maria bogl Jisas agre i ede pi tawa teigwa yugu yomara ebrika
21Ana Maria Jisas kuglko, wakan swara ta ede ogo, ye nagie puduo nagie boraiglkwa igne, Maria ya Josep ye kagie Jisas yei tebrika. Kagie i ye mam dane wagle moglkrukwa igne, angelo ye kagie yegl yeiro dumere ikra, yei tebrika.
22Ana Moses okna lo boglmara suna i, ye abu ta gak kuran, ege tau sugl moglsre, okuo tawa tenabe dugwa. Tawa yegl tebi, gak i God gumuglo mina deglbi yeikrabedi tawa tenaiglkwa pre paugwa. Moses lo pamere ege i dumere plau dugo, Josep ya Maria ye Jisas i pi Yagl Kade tenabugledi ede ebrika. 23I siragl pre Yagl Kade lomo mina ama yegl dugwa, Yagl gak komono ta morabuka i, ye Yagl Kade taraglmo mere yegl morabiwe#2.23 Isip Kide Kodigwa 13.2 dugwa. 24Yegl pre ye Jisas i pi Yagl Kade tedre, ye lomo dumere mere ama tawa tenabugledi ede ebrika. Yagl Kade lomo dugwa i, abu ta gak kuran, ye okuo kua tobu suo mo kua yumugl gagigle suo idre, tawa narabiwe#2.24 Tawa Teigwa Yoba 5.11 dugwa.
25Ana igne i yagl ta dumo Jerusalem moglkwa, ye kagie Simeon we digwa. Yagl i ye yagl du moglsre, God we di pre wan moglkwa. Te, ye ama God Kere Yugwa yagl u no Israel yoba ake ple di norabedi sugl moglko, Mudu Murubuglo ye moglmara si kau si togwa. 26Ana okna, Mudu Murubuglo yagl i yegl di te kodugwa, Yagl Kade ye Kere Yugwa Yagl dedenan, ene gumugln mina kandre, okuo goratniwe di, togwa. 27Ana igne i Mudu Murubuglo ye yagl Simeon auro yu tawa teigwa yugu yomara togl suna edugo, moglkwa. Moglko, Jisas nem mam ye God lomo dumere gak kebra Jisas yu Yagl Kade tenabugledi ama ede togl suna ubrika. 28Ye ede togl suna ubriko, Simeon ye kandre, pi Jisas ake yu kugro moglsre, God kagie kade te, yegl dugwa,
29Yagl Kade yo, na ene niglnen kogonen yoba moglka i,
ene okna na di natnere mere yegl ere kodinga pre
erme dena muduna wida dugo, na goraglka pra we di prika.
30Ene dinere yegl, no Ere Yugwa Yagl gumuglna mina kaniga.
31Ene ye yoba mudu ere inabedi kere idre, ye dedingo, ugwa.
32Ye yoba yugobuno pere pere meglkwa i konbauna kanaiglmedi ere,
abuglage mere yegl si tedre,
ene yobanma, Israel yoba munga i, ama ake mitna edenan,
yoba mudu kanaiglmiwe
di, yegl dugwa.
33Ana yagl Simeon gak kebra Jisas pre ka yegl dugo, ye nem mam prisre, nagino kiurka. 34Nagino kiurko, Simeon ere mogl, ye suo akie di wakai yei tedre, Jisas mam Maria ama yegl di togwa, Ene kano! Gak i pre God ka ta di padigl, Israel yoba tau mere ye mokono tedre, yage sibi, te tau mere ye pre mediglsre, adiglbi, erabiwa. 35Te, yegl eran, yoba nomano teke paugwa i, ama ede nogugl unabuka. Te, ene giugl prisre, yoba ta bainet mina na dena muduna sumedi pratniwe di, Simeon yegl dugwa.
36Ana igne i abu kidagl ta God kamo kep ere dugwa abu moglkwa, ye kagie Anna we digwa. Ye Israel yoba yugobuno kebra kebra meglmara suna i yugobuno ta Aser we dimara suna i moglsre, yagl ta kagie Fanuel we digwa i, abuglo moglkwa. Abu i ye okna wie bogl bugla yugu 7-pela miurko, ye wie goglkwa. 37Wie goglko, ye abu werai mogl padre, igne i bugla yugu 84 ne kodugwa. Ye yegl mere kidagl moglsre, tawa teigwa yugu yomara keme mogl, ede meda pikrukwa. Ye dumo i keme moglsre, God kagie kade te, ege mere kaya mokna mawagl ersre, kamage keme erukwa. 38Ana yagl Simeon ye Josep ya Maria bogl ka di meglko, abu kidagl Anna i, ama ede magigl udre, ka digwa prisre, God di wakai yei togwa. Tedre, Anna pidre, God Jerusalem ere inabedi sugl meglkwa yobamo i, mudu Jisas pre di te moglkwa.
Josep, Maria ye Jisas bogl ede ikne Nasaret eigwa
39 Ana Josep ya Maria ye Yagl Kade lomo dumere mere ere kodidre, Jisas auro i ede ikne pi distrik Galili pidre, yene yugunomugl, dumo kebra Nasaret we dimara i, ebrika. 40Ana Yagl Gak Jisas we, ye yakidre, yobuglo idre, ere moglkwa. Yegl ere moglsre, ye ama nomane podo yugo, God ye ere wakai ere te pai moglkwa.
Yagl Gak Jisas dumo Jerusalem mogl pai moglkwa
41-42Ana bugla yugu yomere yomere ege swarade Israel yoba ere mogl, okna ibo God no oglo sidre, Isip yoba si goglkra we di prisre, kaya mokna podo ne ne erikwa. Ana Jisas nem mam ama ege ege pi ne mogl ebriko, Jisas bugla yugu 12-pela ne kodugwa igne, ye ama akie ege kade i kanamnedi ede Jerusalem eigwa. 43Ye pi Jerusalem suna wan mogl eigo, ege i dudugo, aglke ede ikne yugunomugl enamnedi wigwa. Ana ye ede wigwa igne i ye nem mam ede ubrika ba Jisas Jerusalem mogl pai moglkwa i, nem mam ta kiribrika. 44Ye pribrika i, yoba mere kide wimara suna i, ye ama uda umedi prisre, ye ede ubrika. Ba ye pi konbo bage pi miurko, mim eruko, Jisas pre dokibrika. Ye neno agroma ya kabaglema meglmara suna i dokibrika. 45Ye dokibrika kankrisre, aglke kor ede ikne dumo Jerusalem ebrika. 46Ye ede ikne Jerusalem pi dokibriko, ege suota ede ogo, ye tawa teigwa yugu yomara togl suna moglko, kanibrika. Ye kanibrika i, yagl tau yoba God kamo beke teigwa i ame di meglmara suna mogl, ye ka di teigwa i prisre, ka kira pogl pre, erukwa. 47Ye yegl eruko, yoba pre meglkwa i, Aya! di, Yagl gak i nomane podo paugo, yoba ye ka kira pogl teigwa i di ikne ede, ka wakai dumiwedi prikwa. 48Te, ye yegl ere moglko, ye nem mam ama kandre, nagino kiurka. Nagino kiurko, ye mam ere mogl, yegl dugwa, Wana yo, ene siragl pre mabuno yegl ere notne? dugwa. Ene aglo mere motnga i, na ene nen bogl kankrubuglka pre nomano sidre, ene dokubugle dugwa. 49Yegl dugo, Jisas ye nem mam di te, yegl dugwa, Siragl eruko, ene na dokibre? Na Nina yugumo moraglka paugwa i, ene ta prikribro? di, yegl dugwa. 50Ye ka yegl dugwa ba ye nem mam ka dugwa i, mabuno pre pogl sikribrika.
51Ana Jisas nem mam bogl aglke ede ikne dumo Nasaret eigo, ye nem mam kano duglo bogl moglkwa. Duglo bogl moglko, ye mam Maria taragl tau Jisas mina dumo Jerusalem plau dugwa ikra aimadi kina gudu prukwa.
52Te, Jisas we, ye yakidre, nomane kor kor idre, erukwa. Yegl eruko, God ye wakai kanugo, yoba ama ye wakai kanigwa.
Currently Selected:
Luk 2: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
