Luk 7
7
Ami kepten ta niglmo kogonmo yoba kide sugo, Jisas ye ere wakai ere togwa
(Matyu 8.5-13)
1Ana Jisas ka mudu i, yoba di te kodidre, ede Kaperneam ogwa. 2Ede Kaperneam ogwa igne, yagl ta Rom soldia 100 mere bitno moglkwa i, niglmo kogonmo yagl ta kide sugo, goragledi erukwa. Te, soldia bitno yagl i, ye niglmo kogonmo yagl i, wakai kanugwa. 3Ana yoba ye Jisas ede Kaperneam ume digo, soldia bitno yagl i prisre, Juda yoba kade tau dede, ye Jisas moglmara pi di tebi, Jisas udre, nigl kogon yagl i ere wakai ere tenabedi pre dedugo, ede eigwa. 4Ye pi Jisas moglmara plau didre, Jisas ye nigl kogon yagl i ere wakai ere tenabedi kamage yei, yegl digwa, Soldia bitno yagl i, ye yagl wakai ta moglkwa pre ene ye niglmo kogonmo yagl i ere wakai ere tenatnga i, kuno erume digwa. 5Yagl i, ye nono Israel yoba wakai kandre, no ka mabuno yugu makai sumnara i, ama kei norukwa pre yagl wakai ta moglmiwe digwa.
6Ana Juda yoba kade i, u Jisas yegl di teigo, Jisas ye bogl akie ede eigwa. Ye bogl akie ede pi soldia kipamara ede magigl eigo, soldia bitno yagl i, kabaglemo tau dedidre, pi Jisas ka yegl di teo dugo, ye Jisas moglmara udre, yegl dume digwa, Yagl Kade yo, ede yugugl unatnga i, ere yenaba! Na yagl wakai ta moglbo, ene na kipaimara ede yugugl unatnga i, kuno ta erekrumiwe di, yegl dume digwa. 7Te, na yagl wakai ta moglbo, ene motnara unaglka i, ama ta kuno erekrumedi prisre, na kabaglena tau dediga. Yegl pre ene yugugl ukre, ka keme din, na niglna kogona yagl i, aragan erabedi priwa. 8I siragl pre na moglka i, yoba ta na bitna moglko, te na soldia tau mere ama bitno moliwa. Na soldia ta di tedre, Ede po! digo, ye ede ogo, te ta Ede wo! digo, ye ama ede umiwa. Te, na niglna kogona yoba ta Kogon yegl ero! diga i, ye erukwa. Yegl pre ene ka keme din, niglna kogona aragan erabedi prie di, yegl dumiwe digwa.
9Ana yoba ka yegl digwa i, Jisas nagie podo koglsre, kan ake te, yoba ye duglo bogl wigwa i, yegl di togwa, yagl i pre meduglmere yegl Israel yoba swarano yegl ta pre mediglkrime dugwa. 10Yegl dugo, soldia bitno yagl yoba dedugwa i, ye ede ikne yugugl pi kanigwa i, yagl kide sugwa ikra aragan eruko, kanigwa.
Kumugl gak ta dumo Nain goglko, Jisas ye ere i kor edugwa
11Ana tagna ta i, Jisas ye duglo beglkwa yagl bogl ede dumo ta Nain we dimara eigo, yoba mere kide ye eimere sika si ede eigwa. 12Ye ede pi dumo Nain kobuglo togl dra mina wigo, kumugl gak ta goglko, yoba boglo ere i wigo, kanigwa. Kumugl gak i ye mam abu werai ta moglko, agiglema abaugloma ama ta moglkrikwa. Kumugl mam i ugo, yoba dumo suna i kipaigwa tau mere ama ye wimara akie kai ere wigwa. 13Ana Yagl Kade Jisas ye gak goglkwa i mam kandre, mirie gogl, Ene kai erekro dugwa. 14Didre, ede magigl pi gak i gagle bogl akugo, yoba boglo ere yuigwa i adigl meglko, Jisas yegl dugwa, Kumugl ya, adiglo dugwa. 15Yegl dugo, gak goglkwa ikra adigl, ka dugo, Jisas ye auro i pi mam togwa. 16Ana Jisas yegl eruko, yoba kan meglkwa i, kudugl podo goglsre, God kagie kade te, yegl digwa, God kamo kep yoba kade ta no munara umiwe didre, God no ye yobama munga i, ake ple di noragledi erukwa pamiwe di, yegl digwa. 17Ana Jisas kimagl erukwa i ka di wai di eigo, distrik Judia suna i, mudu priko, te dumo tau distrik Judia magigl yeigwa ama prikwa.
Jon Baptais duglo biurka yagl suo Jisas moglmara dedugwa
(Matyu 11.2-19)
18Ana Jisas kogon kane kane erukwa i, Jon duglo beglkwa yagl kandre, pi Jon boglo kugl teigo, 19prisre, ye duglo biurka yagl suo Wiro dugo, ede ubrika. Ubriko, ye Jisas moglmara pidre, yegl di priro dugwa, Yagl ta unabuka ikra ene uno mo, no yoba ta pre sugl moramne? di priro dugwa. 20Jon yegl dugo, yagl suo i wan ede pi Jisas moglmara pi plau didre, ye yegl di tebrika, Jon, ye yoba nigl bugl togwa yagle moglkwa i, no ene motnara enabredi no dedidre, ene yegl di priro dugwa, Yagl ta unabuka ikra ene motno mo, no yoba ta pre sugl moramno? di, Jon no yegl di priro dugo, no ubuluwe di, yagl suo i yegl dibrika.
21Ana Jisas yoba kide kane kane sigwa ya murubuglo kide ye ere kide ere teigwa i ere wakai ere tedre, yoba gumuglno kin yogwa i, aglke kor kanaiglmedi ere moglko, yagl suo u kanibrika. 22Yagl suo i, udre, Jon ye di tomere ikra di kodibriko, Jisas di ikne ede, yegl dugwa, Ene ede ikne pi ene siragl taragl kandre, prisre, eribrika i, Jon di tero dugwa. Yoba gumuglno kin yogwa i, aglke kor kanigo, kaglno kide erukwa i konbauna ede eigo, yoba leprosi erikwa i, ogono nagino u wakai omiwe di tero. Te, yoba kinano gi dugwa i, aglke kor priko, yoba gogl kodigwa i, u kor eigo, te, goduglme yoba ye God kamo wakai i, priko, no kabugledi, Jon yegl di tero. 23Te, ka ta ama yegl di tero. Yoba na erabedi primere erekrika ba na pre medigl mogl pai moraiglkwa i, gun yenaiglmiwe di, Jisas yegl dugwa.
24Ana yagl suo ede ikne ebriko, Jisas yoba mere makai si meglkwa i, Jon pre ka tau yegl di togwa, Ene okna yagl Jon kanamnedi dumo wau yomara eigwa i, ene siragl taragl kanamnedi ede eime? dugwa. Jon yobuglo paikruko, ir u sugo, egre ya kugl kan piga dumere yegl mere moglko, kanamnedi eimo? 25Ta manugwa. Mo, Jon kugugl gagl wakai kaima ta edugwa i kanamnedi eimo? Ta manugwa. Yoba ta kugugl gagl wakai kan nedre, taragl wakai wakai ere neigwa i, ye king yuguno toglno suna i keme meglkwa. 26Mo, ene God kamo kep yoba ta kanamnedi ede eime? Kaima, Jon kaima God kamo kep yagl ta moglkwa ba ye ka kep yagl yoko ta moglkrukwa. 27God kamo okna yagl ta unabe dugwa i, Jon moglme dugwa. God kamo yegl dugwa,
Ene pro! Na yagl ta kana kep ero dibo, ye ene enatnara ede okna enabiwa. Ye ene enatnara ede okna pi yoba konbauna ake kun erimere yegl erabiwe#7.27 Malakai 3.1
dugwa i, Jon yoba i moglmiwe dugwa. 28Na ene di teiga, Jon yagl kade mogl, yoba mudu makandigle meglkwa i egre togwa. Ba God yoba kingno morabuka igne i yoba yoko kaima ta morabuka i, ye Jon erme makadigle moglmere moglkre, mogl mitna edenabiwe di, Jisas yegl dugwa.
29Ana Jisas ye Jon debie sugwa pre ka yegl dugwa igne, taks igwa yobamo i ya te, yoba mudu i wakai prisre, God mabuno du keme erumiwe digwa. Ye okna Jon moglmara eigo, Jon ye mudu nigl bugl togwa pre Jisas kamo wakai prikwa. 30Ba Farisi yoba ya God lomo beke teigwa yoba i, Jon nigl bugl norokrabe digwa pre God konbo ta ama si togwa i, mane didre, Jisas kamo kide pre teigwa.
31Ana Jisas ka yegl di kodidre, ama yegl dugwa, Ene yoba erme paigwa i, na Jon bogl kenaglno sigwa i, na ka ebrie siragl we di boragle? 32Gak tau ere mogl, gak tau di te, No ene suglno muniwa. Ene daragl yegl erio! dimere yegl ene yegl meglmiwa. No pu migi sidre, ene kaglno egrio dumga i, kaglno egrekrikwa. Te, no kai giglage sidre, kai erio dumga i, ene kai erekrimiwe digwa. 33Ka ebrie i mina ene Jon erukwa i kide kandre, na erika i ama kide kandre, erikwa. Jon, yoba nigl bugl togwa yagle moglkwa i, ede nogugl ugwa igne, ye bret nekre, nigl wain nekre, eruko, ene ere mogl, Murubuglo kide ta ye moglmara suna moglmiwe digwa. 34Te, na Yoba Wam moglka i, ede nogugl wiga igne, na bret ya nigl wain akie neiga pre ene ama kenaglna sidre, Yagl i kaya mokna podo nedre, spak erukwa yagle moglsre, tadaglme ya taks igwa yoba bogl begane yei wan moglmiwe digwa. 35Ba yoba ta God nomanemo wakai pre igwa meglkwa i, ye kogon erimara i mina ye nomaneno wakai pamedi i nogugl edime di, Jisas yegl dugwa.
Abu ta kugo nuglo i pi, toide Jisas kagle mina edugwa
36Ana Farisi yagl ta Jisas bogl akie kaya mokna nenabugledi agle dugo, Jisas yagl i kipamara ede yugugl pidre, kaya mokna nenagledi ame di moglkwa. 37Ana taun suna i, tadaglme abu ta moglmedi kanigwa i moglkwa. Abu i Jisas u Farisi yagl kipamara kaya mokna ne moglme digo, prisre, kugo demene erukwa ta mige podo boglkwa migie mina moglkwa idre, ugwa. 38Ana abu i, ede yugugl u Jisas kagle mina goglko bodugl moglsre, kai eruko, kai nuglo yage Jisas kagle mina sugo, ye bre yugu mina kai nuglo i koko edidre, kugo nuglo ikra toide Jisas kagle mina edugwa.
39Ana abu i yegl ere moglko, Farisi yagl ta Jisas agle dugwa ikra ere mogl, yene nomane mina yegl di prukwa, Yagl i ka kaima God kamo kep yoba ta moran, tadaglme abu ta ye akugwa i, ye pre pogl sidre, mane di tenabiwe di, yegl prukwa.
40Ana Farisi yagl i, nomane mina yegl di pruko, Jisas pre kan ersre, yagl i di te, yegl dugwa, Saimon yo, na ka ta ene di tenagledi priwe dugwa. Yegl dugo, Farisi yagl Saimon i, di ikne ede, yegl dugwa, Tisa yo, ene do dugwa. 41Yegl dugo, Jisas ka ta yegl dugwa, Yagl swara ta ere mogl, yagl suo ta miurka i, dina pere pere ere togwa. Yagl swara ta dina erukwa i, mige 500 mere dina eruko, ta dina erukwa i, mige 50 mere dina erume dugwa. 42Ana okuo yagl suo i, mige te ikne edenabrika i ta yeikruko, yagl ta dina ere togwa ikra ere mogl, dina suo akie i, kide kodo togwa. Ana ene siragl we di pitne? Yagl suo miurara i, ira gun podo yagl i tomedi pitne? dugwa.
43Ana Jisas yegl dugo, yagl Saimon i, di ikne ede, yegl dugwa, Yagl ta dina podo erukwa i, gun podo yei, ta tomedi priwe dugwa. Yegl dugo, Jisas ye di te, Ene kuno diniwe dugwa.
44Ana Jisas ka yegl di kodidre, kan ake te, abu ikra kan moglsre, Saimon yegl di prukwa, Ene abu i kano. Na ene kipanara ede yugugl wigo, ene kagln nigl koglo didre, nigl kogl narekitnga ba abu i kaimo nuglo mina kaglna nigl edidre, bre yugo mina kokugwa. 45Te, na yugugl wiga i, ene paunana si nekitnga ba abu i ede yugugl udre, kaglna ege tau mere si ne moglmiwa. 46Ene oliv nuglo toide bitna mina edekitnga ba abu i, kugo nuglo toide kaglna mina edugwa. 47Yegl pre na ene di teiga, nono abu i kandre, kan pogl sinamga. Na ye tadaglmemo mere kide paugwa i, gugl ede teiga pre ye dem muduo podo narukwa ba yoba ta tadaglmemo kebra panan, na gugl ede tebo, yoba i dem muduo kuri ta narabuka mere yegl pamiwe dugwa.
48Ana Jisas ka yegl di kodidre, abu ikra yegl di togwa, Na ene tadaglmenen gugl ede te kodiwe dugwa. 49Yegl dugo, yoba kaya mokna akie nenamnedi ame di meglkwa i ere mogl, yene nomano mina yegl di prikwa, Yagl i ye yoba tadaglmeno gugl ede teiwe dugwa pre ye ira moglme? di, yegl di prikwa. 50Yegl di priko,Jisas abu ikra ama yegl di togwa, Ene na pre mediglnga pre na ene ere iga. Ene den mudun wida dinan, ede enatniwe di, Jisas yegl dugwa.
Currently Selected:
Luk 7: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
