Luk 8

Abu tau Jisas duglo bogl meglkwa

1Ana okuo, Jisas ye duglo beglkwa yagl 12-pela bogl wan ede pi taun ya dumo kebra pere pere eigo, Jisas ye God kamo yoba beke tedre, God yoba kingno mogl, suglno morabuka kamo wakai i, yoba di te wan moglkwa. 2Te, ye wan ede eimara i, abu tau, Jisas okna murubuglo kide ye meglmara meglkwa i di meda edidre, kideno ere wakai ere togwa meglkwa i, ama duglo bogl wigwa. Ta Maria, dumo Makdala mam moglkwa. Okna murubuglo kide 7-pela ye moglmara suna meglko, Jisas di meda edugwa. 3Te, abu ta ugwa i, kagie Joana we digwa. Abu i, wie kagie Kusa we digo, ye Herot yugumo toglmo sugl moglkwa yagl ta moglkwa. Te, abu ta kagie Susana we digwa i ya abu tau mere ama Jisas duglo boglsre, yene mige monino mina Jisas ye duglo beglkwa yagl bogl ake ple di teigwa.

Jisas yagl ta kaya mokna yubo suduglkwa pre ka ebrie dugwa

(Matyu 13.1-9, Mak 4.1-9)

4 Ana yoba tau mere Jisas moglmara u makai sigo, te yoba taun pere pere kipaigwa i, ede Jisas moglmara wigo, Jisas ere mogl, yoba magigl meglkwa i, ka ebrie ta yegl di togwa, 5Yagl ta kugl mogo i pi sudragledi i ede ogwa. Kugl mogo i pi, sudugl ake pia sugo, kugl mogo tau yage konbauna sigwa. Kugl mogo i, yoba egriko, kua ama pru di u, neigwa. 6Te, kugl mogo tau, yage makan gaba kuri ta kobuglo bolamugl moglmara yage sigwa. Kugl mogo i, parikwa ba nigl mere ikrikwa pre tabre ade de, yaminugwa. 7Te, kugl mogo tau, yage kan kagigle yaglkwa bogl moglmara sigwa. Kugl mogo i pare wi sigwa ba kan kagigle yaglkwa i ama akie pare ede mitna pi, kugl i atne edugwa. 8Te, kugl mogo tau yage makan wakai yomara sigwa. Kugl mogo i, pare ede mitna pi, mogo 100 mere yegl keglmiwe di, yegl dugwa. Didre, ama yegl dugwa, Yoba na kana ta pramnedi praiglkwa i, na ka diga i wakai ere kinano gudu prio! dugwa.

Jisas ka ebrie dugwa ikra, mem di poglkwa

(Matyu 13.10-23, Mak 4.10-12)

9Ana okuo Jisas duglo beglkwa yagl ye ka ebrie dugwa i, mabunomo pramnedi kira pogl prikwa. 10Kira pogl priko, Jisas ye di te, yegl dugwa, God yoba kingno morabuka kamo paugwa i, teke paugwa ba erme nogugl dibo, ene pre pogl sinaiglmedi na Nina pra we dugwa. Pra we dugwa ba yoba tau meglkwa i we, ka ebrie keme dibo, praiglkwa. I siragl pre God kamo yegl dugwa,

Ye kan, kan eraiglkwa ba kan pogl sikraiglmiwa. Te, ye pre, pre eraiglkwa ba pre pogl sikraiglmiwe#8.10 Aisaia 6.9

dume dugwa.

11Ana Jisas ka yegl didre, ama yegl dugwa, Na ka ebrie diga i, mem yegl mere paugwa. Kugl mogo i, God kamo yogwa. 12Kugl mogo tau yage konbauna bina sime diga i, yoba tau God kamo prikwa ba yagl kide ye pre mediglbi, God ye ere i dinabedi prisre, u ye ka prikwa i nomano mina i eglke edugwa. 13Te, kugl mogo tau yage kobuglo moglmara sime diga i, yoba tau God kamo prikwa igne, gun yeigwa. Ba kugl mogo tau duglane ede atne pikrumere mere yegl meglkwa pre ye ege sugunagle keme pre mediglsre, yubun ta ugwa igne, ye yage sigwa. 14Te, kugl mogo tau yage kan kagigle yaglkwa boglmara sime diga i, yoba tau God kamo prikwa ba ye erme mogl pai eraiglkwa i ya mige moni inaiglkwa i we di prisre, erme gun yenaiglkwa i pre i mitna edigwa pre kan kagigle yaglkwa i, kugl i atne edumere mere yegl, taragl i ye nomano mina kau sugo, ye mogo wakai ta koglkrikwa. 15Te, kugl mogo tau yage makan wakai yomara sime diga i, yoba tau God kamo prikwa i, ye nomano wakai paugo, God kamo kaima duglo boramnedi prikwa pre ye God kamo ake mogl, yage sikre, mogo wakai keglmiwe di, Jisas yegl dugwa.

Yoba ken gaglsre, degigl gagl mina atne yeikraiglkwa

(Mak 4.21-25)

16Ana Jisas ka ta ama yegl dugwa, Yoba ken gagl yu bogl atne yeimo? dugwa. Mo, ken gagl yu yei, sin ta yu ken bolamugl yei, si bi dimo? dugwa. Yegl ta erekraiglkwa. Yoba ede yugugl unaiglkwa i, abuglage sinan, kanaiglmedi pre bogl mina yenaiglkwa. 17Kuno yegl mere ka siragl mere ta teke paugwa mo yoba pre pogl sikrikwa i, okuo ede nogugl unan, yoba pre pogl sinaiglkwa keme pre pamiwe dugwa.

18Jisas ama yegl dugwa, Ene nomano siragl mere paugo, ene na kana pre meglkwa i, enene pre yubu sio! dugwa. I siragl pre yoba tau na kana wakai ere kinano gudu praiglkwa i, God ye nomane tau te tebe edenabuka. Ba yoba tau na kana wakai ere kinano gudu prikraiglkwa i, ye nomane kebra ta imnedi prikwa i, God ama i eglke edenabiwe di, yegl dugwa.

Jisas mam ya agiglema ye moglmara wigwa

(Matyu 12.46-50, Mak 3.31-35)

19Ana igne i Jisas mam ya agiglema ye moglmara wigwa ba ye Jisas yugugl moglmara unaiglkwa i, kuno ta erekrukwa. I siragl pre yugugl i, yoba mere kau kaima sigwa. 20Yegl pre ye meda meglko, yoba tau Jisas di te, yegl digwa, Ene man ya agiglnma meda mogl, ene kanamnedi primiwe digwa. 21Yegl digwa ba Jisas di ikne ede, yegl dugwa, Yoba ira ta God kamo prisre, duglo boraiglkwa i, ye keme na mana moglsre, agrama moglsre, erimiwe dugwa.

Jisas ka dugo, ir waga kudu ta ugwa i, bu yogwa

(Matyu 8.23-27, Mak 4.35-41)

22 Ana ege swara ta Jisas ye duglo beglkwa yagl bogl ede bakugl kuglo eigo, Jisas ye di te, Nono ede nigl nubun koglo ibo omno dugwa. Yegl dugo, ye bakugl mina ede eigwa. 23Ye bakugl mina pi meglko, Jisas ugl paugwa. Ye ugl pai moglko, nigl nubun suna eimara i, ir waga kudu podo ta ugo, nigl si pepigl di u bakugl mina suna ugo, Jisas duglo beglkwa yagl kanigwa i, No nigl nedre, goramga mere yegl pamedi kanigwa. 24Ye yegl mere kanigwa pre ye Jisas moglmara pi uglo yokidre, ye yegl di teigwa, Yagl Kade yo, nono goramga pamiwe digwa. Yegl digo, Jisas adiglsre, ir podo ugwa ya nigl si pepigl dugwa i, ka togo, ir ugwa i dudugo, nigl ama kiede moglkwa. 25Yegl eruko, Jisas ye duglo beglkwa yagl yegl di prukwa, Ene na pre mediglmo mo pre mediglkrime? dugwa. Yegl dugo, ye kudugl goglsre, nagino kogl, di ikne ikne yegl digwa, Yagl i irane? Ye ir ya nigl akie ka togo, pribriwe di, yegl digwa.

Murubuglo kide tau yagl ta moglmara suna meglko, Jisas ye di meda edugwa

(Matyu 8.28-34, Mak 5.1-20)

26Ana Jisas ye duglo beglkwa yagl bogl baglkugl mina ede pi Gerasa yoba meglmara eigwa. Dumo i nigl nubun Galili koglo ibo kra yogwa. 27Ye pi dumo i plau digo, Jisas baglkugl kide kodo ede meda ugwa igne, dumo i makan nem yagl ta ye moglmara ugwa. Yagl i murubuglo kide tau ye moglmara suna meglko, ye ege olto kugugl gagl edekre, yugu kipaikre, yoba geglkwa padiglmara pai wan moglkwa. 28Ana yagl i Jisas kanugwa igne, ye grigle didre, yage kobragai pai, Jisas ka podo yegl di togwa, Jisas yo, ene God mogl mitna kaima edugwa Wam motnga i, ene siragl mere ere naragledi une? Na ene di prika i, ene giugl narekratnedi priwe dugwa. 29Ye yegl dugwa i, siragl pre Jisas ye murubuglo kide i di tedre, Ene yagl i moglmara kide kodo, ede meda wio! di, yegl di te kodugwa. Murubuglo kide i yagl i ege mere ere kide ere teigwa. Yoba ege mere ye sen mina ogo kagle kan sidre, ye suglmo meglkwa ba ye ege ege sen si biglke dugo, murubuglo kide i, ye si i pi dumo wau yomara, yoba ta moglkrimara edigwa.

30Ana Jisas yagl i di te, Kagn dagl naro dugwa. Dugo, yagl i di ikne ede yegl dugwa, Na kagna Ami we dugwa. Ye yegl dugwa i siragl pre murubuglo kide tau mere ye meglmara suna pi meglkwa. 31Te, murubuglo kide i, kamage yei, Jisas yegl di prikwa, No makan mur ta yei ede atne kaima ime omara i, ede pio dikro digwa.

32Ana dumo i muglo meglbi ta yogo, muglo meglbi i mina bugla mere kide yumun ne meglkwa. Ana Jisas ye murubuglo kide ede meda wio dugwa igne, murubuglo kide i Jisas di prisre, Ene no kanige etn, ede bugla meglmara suna enamniwe digo, Jisas pra we dugwa. 33Pra we dugo, murubuglo kide i, yagl i moglmara kide kodo ede meda udre, bugla mere kide meglmara pidre, deno muduno mina ede atne eigwa. Eigo, bugla mere kide i, guglo ta yomara muku di ede atne pi, nigl nubun suna pidre, nigl ne geglkwa.

34Ana yoba ta ye bugla ikra sugl meglkwa i, ye taragl ta plau dugwa i kandre, muku di pi yoba taun suna kipaigwa ya meda kipaigwa i di teigwa. 35Di teigo, yoba tau mere pi taragl ta plau dugwa i kanamnedi ede eigwa. Ye pi Jisas moglmara plau didre, yagl ta murubuglo kide ye moglmara ede meda eigwa i, Jisas kagle mina ame di moglko, kanigwa. Te, yagl i kugugl gagl edugo, nomanemo ama u wakai ogo, ye kandre, kudugl geglkwa. 36Ye kudugl gogl meglko, yoba tau ye siragl taragl plau dugwa kanigwa ikra ye boglo kugl tedre, Jisas ye yagl ta murubuglo kide moglmara atne meglkwa i siragl mere ake ple di togwa i, ye di teigwa. 37Di teigo, yoba distrik Geresa suna kipai meglkwa, ye mere u makai si meglkwa i mudu kudugl podo goglsre, Jisas ye dumono moglkre, ede bage ta enabedi di prikwa. Yegl di priko, Jisas ede bage ta enagledi baglkugl mina ede kuglo ogwa.

38Ana Jisas baglkugl kuglo moglko, yagl ta murubuglo kide ye moglmara ede meda wigwa i, kamage yei, Jisas bogl akie wanabugle dugwa. Yegl dugwa ba Jisas ye ede ikne dumomo enabedi dedidre, yegl dugwa, 39Ene ede ikne pi yugun kaminen pidre, God ene siragl mere ere togwa i, yoba boglo kugl to dugwa. Yegl dugo, yagl i ede ikne dumomo pidre, Jisas ye siragl mere ake ple podo di tomere yoba mudu taun suna meglkwa i, di togwa.

Abai gak ta goglko, Jisas ye ere i kor edidre, te, abu ta Jisas gaglmo akugo, kidemo aragan erukwa

(Matyu 9.18-26, Mak 5.21-43)

40Ana Jisas nigl nubun Galili mina ede ikne koglo ya ugo, yoba tau mere ye kandre, ye di igwa. I siragl pre ye mudu Jisas ede ikne unabedi sugl meglko, ye ugwa. 41Ana Jisas ugo, yagl ta kagie Jairus we digwa i, ede Jisas moglmara udre, Jisas kagle mina yage kobragai paugwa. Yagl i, ye Juda yoba ka mabuno yuguno ta sugl moglkwa yagle moglkwa. Ana ye Jisas kagle mina yage kobragai padre, kamage yei, Jisas ene na kipaimara unatniwe di, yegl dugwa. 42Ye yegl dugwa i, siragl pre ye abuglo swara kaima ta moglsre, bugla yugu 12-pela mere yegl nogwa i, kide sugo, goragledi erukwa pre Jisas ye ere wakai ere tenabedi pre yegl dugwa. Ana yagl i yegl dugo, Jisas ye bogl akie ede ebriko, yoba tau mere ye ebrara mogl winabo didre, akie ede eigwa.

43Ana yoba eimara suna i, abu ta ogwa. Abu i kide ta sugo, abu ba kanimere yegl, bugla yugu 12-pela bu yeikruko, aimadi kan pai moglkwa. Te, dokta mere meglmara pi kanugo, migemo dudugwa ba yoba swara ta ye ake ple di tenaiglkwa i, kuno erekrukwa. 44Ana abu i, yoba mere eimara suna pidre, Jisas mokomugl u ye kuguglmo gaglmo puduo yomara akugo, bormai ugwa i, oglade bu yogwa.

45Ana abu i kidemo bu yogo, Jisas ere mogl, Ira na akume? dugwa. Yegl dugo, yoba magigl meglkwa i mudu Na ta manume di, yegl di meglko, Pita ere mogl, Jisas yegl di togwa, Yagl Kade, yoba mere bogl akie umga i, ene unara mogl winabo didre, nagn bai, ede wimiwe dugwa. 46Pita yegl dugwa ba Jisas di ikne ede yegl dugwa, Yoba ta na akugo, na priwa. I siragl pre yobuglna tau ede meda ogo, na priwe di, Jisas yegl dugwa. 47Jisas yegl dugo, abu i prukwa, na ye akiga i, pre kan erukwa pamedi prisre, ye kudugl gogl, nagie nuglo didre, u Jisas moglmara yage kobragai paugwa. Ye yage kobragai padre, mem siragl mere paugwa pre ye Jisas akugwa ya ye kidemo siragl mere tabre bu yogwa i, ye yoba mudu gumuglno mina di nogugl edugwa. 48Di nogugl edugo, Jisas ye di te, yegl dugwa, Abra yo, ene na pre mediglnga pre kidenen bu yomiwa. Ene den mudun wida dinan, ede enatniwe dugwa.

49Ana Jisas ka yegl di moglko, yoba ta ka mabuno yugu sugl moglkwa yagl ikra kipamara mogl ugwa. Ye udre, yagl i yegl di togwa, Ene abutn goglmiwe dugwa. Ene Tisa kogon tau tenatnga i, ta paikrume dugwa. 50Yegl dugo, Jisas prisre, Jairus yegl di togwa, Ene kudugl goglkre, na yobuglna pre mediglo. Ene pre medigln, abutn u kor enabiwe dugwa.

51 Ana Jisas ede pi Jairus kipamara pidre, ye yoba suom keme ede yugugl enamne dugwa. Ye Pita ya Jon ya Jems, abai i nem mam bogl ede yugugl omun, yoba tau wigwa i, mudu meda moraiglmiwe dugwa. 52Ana yoba i ede yugugl eigo, yoba tau mere yugugl i, abai i kaimo ere meglko, kanigwa. Kanigo, Jisas ere mogl, yoba kai ere meglkwa i, yegl di togwa, Ene kai erekrio. Abai i goglkrukwa ba ugl keme pamiwe dugwa. 53Jisas yegl dugo, yoba kai erikwa i, gauglmo ersre, Abai i goglmiwe digwa. 54Yegl digwa ba Jisas ede pi abai i moglmara pidre, ogo ake, ka podo yegl dugwa, Abai yo, ene adiglo! dugwa. 55Yegl dugo, abai i kiamo ede ikne ugo, ye tabre aduglkwa. Aduglko, Jisas yegl dugwa, Ye kaya mokna tau nenabiwa, ene teo! dugwa. 56Ana abai nem mam i, ye taragl ta plau dugwa i kandre, nagino kiurka ba Jisas ye yoba swara ta di te dinabredi, mane dugwa.

Currently Selected:

Luk 8: KB

Highlight

Compare

Copy