Luk 9

Jisas ye duglo beglkwa yagl 12-pela di bage bage edugwa

(Matyu 10.5-15, Mak 6.7-13)

1-2Ana Jisas ye duglo beglkwa yagl 12-pela agle dugo, ye ede magigl wigo, ye yobuglo ya namba togwa. Togwa i, ye murubuglo kide ya kide kane kane yoba sinaiglkwa i ere wakai ere tedre, te God yoba kingno mogl, suglno morabuka ka i di pene ede tenaiglmedi pre dedugwa. 3Te, Jisas ye ama yegl di togwa, Ene konbauna wan enaiglmara i, ene taragl ta idre, pikraiglkwa. Ene muglbo mo hanbek mo kaya mokna mo mige moni ta idre, pikrio. Te, gagl suna suo idre, pikraiglmiwa. 4Ene yoko ede pidre, ene dumo ta ede suna enaiglmara i, yoba ta ene di inabuka yugumo swara i pai mogl, okuo dumo i kide kodo ede dumo kor ta enaiglkwa. 5Ebi, yoba ene kano prikre, ta di ikribi, ene dumo i kide kodio. Te, ede enaiglkwa igne, ye aglauno nogugl panabedi pre kaglno kugane tama bagl, ede meda pio di, Jisas yegl dugwa. 6Dugo, ye duglo beglkwa yagl ede bage bage pidre, God kamo wakai i, yoba di nogugl ede tedre, yoba kide sigwa i ama bage bage ere wakai ere teigwa.

Herot Jisas ye Jon moglmedi prukwa

(Matyu 14.1-2, Mak 6.14-16)

7Ana Herot gavman mogl, dumo i sugl moglkwa ege, Jisas kogon ere wan moglkwa i, yoba di teigwa pre Herot nomane sidre, kina podo yogwa. I siragl pre yoba digwa i, Jon baptais si geglkwa u kor ogwa, moglmedi tau yegl digwa. 8Digo, tau Elaija ikra moglme digwa. Tau ka kep yagl okna mogl geglkwa i, swarano ta u kor ogwa, moglme digo, 9ana Herot Jon Baptais i nana nugu gariko, goglkrawa. Yoba ta kimagl kane kane erume digwa i, kaima ira moglmada di, yene kanagledi pre dokugwa.

Jisas ye bret ya buglo bagle ake buko didre, yoba 5,000 mere yegl togwa

(Matyu 14.13-21, Mak 6.30-44, Jon 6.1-13)

10Ana Jisas duglo beglkwa yagl bage bage wan mogl, ede ikne wigwa igne, ye kogon kane kane ta erikwa i, Jisas boglo kugl teigwa. Boglo kugl teigo, Jisas ye duglo beglkwa yagl i bogl yene moramnedi pre ye auro i ede ogo, ede dumo ta Betsaida we dimara eigwa. 11Eigwa ba yoba mere pre kan erikwa pre ye eimara i sika sigo, Jisas yoba i di idre, God yoba kingno mogl, suglno morabuka i pre ka didre, yoba kide ta sigwa i, ama ere wakai ere togwa.

12Ana Jisas yegl ere moglko, min panagledi eruko, Jisas duglo beglkwa yagl 12-pela i ede magigl pidre, yegl digwa, Yoba i dedin, ede enaiglmiwa. Dumo magigl i, yugu togl ta yeikrukwa. Ye magigl i kidan gogl, kaya mokna ya yugu dokinaiglkwa pre dedin, ye ede taun ya yugu togl yomara enaiglmiwe digwa. 13Yegl digo, Jisas di ikne ede yegl dugwa, Enene kaya mokna ta nenaiglmere teo dugwa. Dugo, ye di ikne ede, No bret 5-pela ya buglo bagle suo yomga i, yoba i ta tomin, kuno erekrabiwa. No aglke kor pi kaya mokna topo sidre, yu tomin, mudu nenaiglmo? digwa. 14Yoba dumo i makai si meglkwa i, yagl 5,000 mere yegl meglkwa.

Ana Jisas di ikne ede ye duglo beglkwa yagl di tedre, Ene yoba i ye 50-de kere bage swarade makai si, ame di moraiglmedi edio dugwa. 15Yegl dugo, ye dumere eriko, yoba mudu i ame di meglkwa. 16Ame di meglko, Jisas ye bret 5-pela ya buglo bagle suo ikra idre, kan heven ibo ede, God di wakai yei togwa. Di wakai yei tedre, ake buko didre, ye duglo beglkwa yagl yoba i pi tenaiglmedi te moglko, ye i pi teigwa. 17I pi teigo, yoba mudu neigwa, dano eruko, ye bret ya buglo bagle kawa te yogwa i, gade makai sidre, degigl gagl 12-pela gre kau sigwa.

Pita Jisas di tedre, Ene God Kere Yugwa Yagl motniwe dugwa

(Matyu 16.13-20, Mak 8.27-29)

18Ana ege ta Jisas yene kamage ere moglko, ye duglo beglkwa yagl tau magigl dagl meglkwa. Ana Jisas kamage ere kodidre, u kira pogl, Yoba mere nono munara wigwa i, na ira moglme dime? dugwa. 19Yegl dugo, ye di ikne ede yegl digwa, Ene Jon yoba nigl bugl togwa yagle ikra, adigl u kor enga, motniwe digwa. Te, tau digwa i, ene Elaija motniwe digwa. Te, tau digwa i, ka kep yoba okna ibo meglkwa i, swarano ta u kor enga, motniwe di, yegl dime digwa. 20Yegl di kodigo, Jisas yegl dugwa, Ana ene we? Ene na ira moglme di prime? dugwa. Yegl dugo, Pita di ikne ede, yegl dugwa, Ene God Kere Yugwa Yagl motniwe dugwa.

Jisas goglsre, adigl u kor enabuka pre dugwa

(Matyu 16.20-28, Mak 8.30–9.1)

21Ana Jisas ye ka gigledi di tedre, Na ira moglka i, yoba ta di tekrio dugwa. 22Didre, ama yegl dugwa, Na Yoba Wam moglka i, yubun podo tau inaglka paugwa. Israel yobano kade meglkwa i, ya te tawa teigwa yoba bitno meglkwa i, ya te God lomo beke teigwa yoba i, mudu mokono narsre, na si geglbi, na ege suota mogl, adigl u kor enaglka pamiwe di, yegl dugwa.

23Ana Jisas ka yegl di kodidre, ye yoba mudu yegl di togwa, Yoba ta na duglo boragledi prabuka i, yoba ede prak kake ede eigo, si geglmere mere yegl, ye ege ege gorabuka i pre gun yedre, te ye yene nomanemo si goglsre, na duglo borabuka paugwa. 24I siragl pre yoba ta na pre gorabuka i pra we dinan, ye kor kaima morabuka. Ba yoba erme keme kor mogl, wakai moragledi pran, ye u kide enabuka. 25Yoba ta makandigle taragl mudu nem yagl morabuka ba ye yene u kide pidre, wau boran, wakai panabo? 26Ana yoba swara ta na Yoba Wam moglka i, againa goglsre, na kana pre ama agai goran, okuo yobamo i ama agaimo goraglka. Na nana abuglagena mina ya Nina abuglagemo mina ya te, God angeloma abuglageno mina unaglka igne, na yoba i agaimo goraglka pre diwe dugwa.

27Jisas yegl didre, ama yegl dugwa, Na ene kaima di teiga. Ene yoba tau magigl adigl meglkwa i, goglkre, yoko meglbi, God yoba kingno mogl, suglno morabuka ege i plau dinan, ene kanaiglmiwe di, Jisas yegl dugwa.

Jisas ogo nagie u pere ta ogwa

(Matyu 17.1-13, Mak 9.2-13)

28Ana Jisas ka yegl di kodugo, ege 8-pela de mere ede ogo, ye Pita ya Jon ya Jems auro idre, kamage eragledi ede muglo ibo ta ogwa. 29Kamage ere moglko, ye guma dra u pere ta ogo, kuguglmo gaglmo pe kaima sidre, pogl dugwa. 30-31Taragl yegl plau dugo, yagl suo ta ye moglmara tabre abuglage bogl plau dibriko, Jisas bogl ka di meglkwa. Yagl suo i, Moses ya Elaija miurka. Ye Jisas bogl ka di meglkwa i, Jisas kuri ta mogl dumo Jerusalem gorabuka i pre digwa. 32Di meglko, Pita yagl suo bogl ugl guko si mogl pine di kanigwa i, Jisas ogo nagie abuglage sugwa i kandre, yagl suo ye bogl akie adigl meglkwa ama kanigwa. 33Ye kan meglko, yagl suo i Jisas moglmara kide kodo, ede enabugledi eribriko, Pita ere mogl, yegl dugwa, Yagl Kade yo, no magigl munga i, wakai pamiwa. No yugu teka suota tabre sumun, swara ta ene pre yenan, swara ta Moses pre yenan, swara ta Elaija pre yenabiwe dugwa. Pita yegl dugwa ba ye ka siragl mere dugwa i, pre pogl sikre, dugwa.

34Ana Pita ka yegl di moglko, kamun kua ta winabo di ye adigl meglmara i, si bi dugo, Jisas duglo beglkwa yagl i kudugl podo geglkwa. 35Ye kudugl geglko, ka ta kamun kua mina ede meda ugwa i, yegl dugwa, Yoba i na Wana moglko, kere i pere ediga moglmiwa. Ye kamo prio! dugwa. 36Ana ka i udre, dudugo, kanigwa i, Jisas yene adigl moglko, kanigwa. Ana igne i siragl taragl plau dugo, kanigwa i, ye ta dikrikwa. Ba okuo di nogugl edigwa.

Murubuglo kide yagl gak ta moglmara suna moglko, Jisas di meda edugwa

(Matyu 17.14-21, Mak 9.14-29)

37Ana ege ta ede ogo, ye muglo ibo kide kodidre, ede atne wigwa. Wigo, yoba mere kide Jisas umara eigo, tegigl yeigwa. 38Ana yoba mere wimara suna i, yagl ta ka podo didre, yegl dugwa, Tisa yo, na wana swara ta moglkwa ene kanatnedi priwa. 39Murubuglo kide ege mere ye moglmara suna ogwa igne, tabre grigle didre, ake piga dugo, dra eurie sumiwa. Te, murubuglo kide ye kodinagledi kiurkwa pre ye ere kide kaima erabuka. 40Na wana yu ene duglo beglkwa yagl meglmara edidre, ye murubuglo kide di meda edinaiglmedi ka gigledi diga ba ye di meda edinamnedi eriko, manumiwe di, yagl i yegl dugwa.

41Ana yagl i yegl dugo, Jisas di ikne ede yegl dugwa, Ene yoba yugobuno erme meglkwa i, u kide pidre, na pre mediglkrime dugwa. Nono akie ege olto munga i, na pre medraiglmo mo pre mediglkraiglme? Ene wan pra auro yu magigl ya edo! dugo, 42ye auro yumara murubuglo kide aglke kor pia si makadigle edidre, ake piga dugwa. Yegl erukwa ba Jisas ye murubuglo kide i ka tedre, gak i ere wakai ere te, ye nem moglmara te ikne edugwa. 43Yegl eruko, yoba kan meglkwa i, God yobuglomo podo kide kaima pamedi nagino keglkwa.

Jisas gorabuka pre aglke kor dugwa

(Matyu 17.22-23, Mak 9.30-32)

Ana yoba mere ye Jisas kogon kane kane erumara i pre nagino koglsre, kinano gudu meglko, Jisas ye duglo beglkwa yagl yegl di togwa, 44Na ka erme dinaglka i, ene wakai ere kinano gudu prio! Na Yoba Wam moglka i, yoba ta na i pi kudana ikne meglkwa i, ogono mina yenabuka magigl erumiwe dugwa. 45Jisas yegl dugwa ba ye ka dugwa i, ye duglo beglkwa yagl pre pogl sikrikwa. Ka i mem atne teke paugwa pre ye pre inaiglkwa i, kuno ta erekrukwa. Te, ye ka i pre Jisas di praiglkwa i, kudugl geglkwa pre dikrikwa.

Jisas duglo beglkwa yagl i, ira kra mogl mitna edibedi pre ka drano digwa

(Matyu 18.1-5, Mak 9.33-37)

46Ana igne i Jisas duglo beglkwa yagl meglmara suna i, ira mogl mitna ede, tau egre tenabuka i pre ka drano digwa. 47Ba ye nomane mina siragl mere prikwa i, Jisas pre kan ersre, gak kebra ta auro yu ye moglmara edidre, 48ye duglo beglkwa yagl yegl di togwa, Na kagna mina gak kebra magigl moglkwa i di inatnga i, na di inga paugwa. Te, na di inatnga i, ene God, na dedugo, wiga i, ama di inga mere yegl paugwa. Te, yoba ira ta ene meglmara kagno paikrukwa i, God ye kagno pamedi kanugwa.

Yoba ta nono ere kide ere norokrabuka i, ye nono mina moglme dugwa

(Mak 9.38-40)

49Ana Jisas ka yegl di kodugo, Jon ye di te yegl dugwa, Yagl Kade yo, no kamga, yagl ta ene kagn daglsre, murubuglo kide di meda edenagledi eruko, kamniwa. Kandre, ye no duglo bunga yoba munara suna ta moglkrukwa pre ye mane di tomne dugwa. 50Jon yegl dugwa ba Jisas di ikne ede, yegl dugwa, Ene ye mane di tekrio. Yoba ta nono ere kide ere norokran, ye nono mina moglmiwe di, Jisas yegl dugwa.

Jisas dumo Samaria mogl dinabedi mane digwa

51Ana Jisas ede mitna pi heven ibo enabuka ede magigl ugo, ye nomane mina ede dumo Jerusalem enagledi pre kodidre, ede ogwa. 52Te, ye enabara i, Jisas yoba tau dedugo, ye ede okna pidre, Jisas unabuka pre ere wakai ersre, ye ede pi dumo swara ta Samaria suna yogwa i, Jisas unabedi ake kun eramnedi ede eigwa. 53Ba Samaria yoba ye Jisas di ikramnedi mane digwa. I siragl pre Jisas ede Jerusalem enagledi ugwa i, ye kide prikwa pre mane digwa. 54Ana Samaria yoba ka yegl digo, Jisas duglo beglkwa yagl suo Jems ya Jon kide prisre, ede Jisas moglmara pi ye yegl dibrika, Yagl Kade yo, ene siragl we di pitne? No God agle di prubugl, ye doga bauglo heven ibo yei, yage atne si, yoba i gagl tege erabedi di prabuglo? dibrika. 55Yegl dibrika ba Jisas kan ake te, yagl suo i kandre, ka togwa. 56Ka togo, ye konbauna ta mina ede dumo pere ta eigwa.

Yoba siragl mere ersre, Jisas duglo boraiglkwa i pre Jisas dugwa

(Matyu 8.19-22)

57Ana ege ta Jisas duglo beglkwa yagl bogl konbauna pi meglko, yagl ta u Jisas moglmara udre, yegl di togwa, Ene aglo mere ta enatnga i, na ene duglo boraluwe dugwa. 58Yegl dugo, Jisas di ikne ede yegl dugwa, Agl are meglkwa i, ye makan mur mina atne paigo, te kua ama yene yuguno bagl paigwa ba na Yoba Wam moglka i, na dumo ta panaglka i ta yekrumiwe dugwa.

59Te, Jisas yagl pere ta di tedre, Na duglo boglo! dugo, yagl i di ikne ede, yegl dugwa, Yagl Kade yo, ene pra we din, na ede ikne yugunamugl pidre, nina goran, ye maugl sidre, okuo ene duglo boragliwe dugwa. 60Yegl dugwa ba Jisas di ikne ede, yegl dugwa, Yoba geglkwa yugobunomo mina atne meglkwa i, ta geglbi, yene maugl sibi, kuno erabiwe dugwa.

61Ana yagl ta ama Jisas yegl di togwa, Yagl Kade yo, na ene duglo boraglka ba ene pra we din, na aglke ede ikne pi nina agrama di wakai yei tedre, ede unagledi priwe dugwa. 62Yegl dugo, Jisas ye di te yegl dugwa, Yoba ta konbauna pi moglsre, kan ikne ede, ede enan, kuno erekrabuka. Kuno yegl mere God yoba kingno morabuka kamo i, ene yoba di tenagledi prisre, kan ikne ede nen agiglnma meglmara enagledi pitn, ene God kogonmo eratnga i, kuno ta erekrabiwe dugwa.

Currently Selected:

Luk 9: KB

Highlight

Compare

Copy