Matyu 17
17
Jisas ogo nagie u pere ta ogwa
(Mak 9.2-13, Luk 9.28-36)
1 Ana Jisas ka yegl di kodugo, ege 6-pela de mere ede ogo, ye Pita ya Jems ye agigle Jon bogl auro idre, ede muglo ibo ta ogwa. 2Muglo ibo ogo, ye ogo nagie u pere ta ogo, guma dra ade abuglage sumere yegl abuglage sugo, kuguglmo gaglmo pe kaima sidre, pogl dugwa. 3Yegl mere eruko, yagl suo ta ye moglmara plau dibriko, Jisas bogl ka di meglkwa. Yagl suo i, Moses ya Elaija miurka. 4Ye ka di meglko, Pita ere mogl, yegl dugwa, Yagl Kade yo, no magigl munga i, wakai pamiwa. Ene ta pitn, kuno eran, na yugu teka suota sibo, swara ta ene pre yenan, swara ta Moses pre yenan, swara ta Elaija pre yenabiwe dugwa.
5Ana Pita ka yegl di moglko, kamun kua pogl dugwa ta ye meglmara i, winabo di, si bi dugo, kamun kua i mina ka ta ede meda ugwa i, yegl dugwa, Yoba i na Wana moglmiwa. Ye na dena muduna suna moglko, na ye gun podo ye teiga. Ye kamo prio! dugwa. 6Ana Jisas duglo beglkwa yagl suota i, ka i prisre, kudugl podo gogl, yage kobragai paigwa. 7Pai meglko, Jisas u ye ogo i pi ye akidre, yegl dugwa, Ene kudugl goglkre, adilo dugwa. 8Jisas yegl dugo, kan mina edigwa i, Jisas yene adigl moglko, kanigwa.
9Ana ye Jisas duglo beglkwa yagle bogl muglo ibo kide kodo, ede atne u meglko, Jisas ye ka gigledi di te, Erme taragl ta kanigwa i, yoba swara ta di tekrio. Na Yoba Wam moglka i goglsre, adigl u kor ebo, okuo yoba di tenaiglmiwe dugwa.
10Ana Jisas ka yegl di kodugo, ye duglo beglkwa yagl i, Jisas di prikwa, God lomo beke teigwa yoba digwa i, Elaija komono kana unan, Yoba Wam okuo unabe digwa i, siragl pre dimedi pitne? digwa. 11Yegl digo, Jisas di ikne ede, yegl dugwa, Elaija unabe digwa i, kaima udre, taragl kane kane ake kun erabuka paugwa. 12Ba na ene di teiga, Elaija kwade u kodugwa ba ye ira moglkwa i, yoba ye moglmedi kan pogl sikre, ye yene primere mabuno kide ere teigwa. Te, na Yoba Wam moglka i, ye kuno yegl mere na ere kide ere naraiglmedi priwe dugwa. 13Yegl dugo, ye duglo beglkwa yagl aglke kor yegl di prikwa i, O, Elaija, Jon yoba nigl bugl togwa yagl ikra pre dumedi prikwa.
Murubuglo kide yagl gak ta moglmara suna moglko, Jisas di meda edugwa
(Mak 9.14-29, Luk 9.37-42)
14Ana Jisas duglo beglkwa yagl suota i bogl ede atne u yoba podo makai si meglmara wigwa. Wigo, yagl swara ta Jisas moglmara udre, goglko bodugl, 15yegl dugwa, Yagl Kade yo, na wana mirie goglo. Ye kua sidre, yubun podo i moglmiwa. Ye ege tau mere yage doga mina sidre, yage nigl atne sidre, erukwa. 16Na wana yu ene duglo beglkwa yagl meglmara ediga ba ye ere wakai ere tenamnedi eriko, manumiwe di, yagl i yegl dugwa.
17Ana yagl i yegl dugo, Jisas di ikne ede, yegl dugwa, Ene yoba yugobuno erme meglkwa i, u kide pidre, na pre mediglkrime dugwa. Nono akie ege olto munga i, na pre medraiglmo mo pre mediglkraiglme? Ene wan pra auro yu magigl ya edo dugwa. 18Dugo, yuigo, Jisas ye murubuglo kide ta gak i moglmara atne moglkwa i di te, Ede meda wo! dugo, ede meda ugo, gak kidemo i tabre kaima bu yogwa.
19Ana okuo, Jisas duglo beglkwa yagl keme Jisas moglmara udre, yegl digwa, Siragl pre no murubuglo kide di meda edinamnedi erumga i kuno erekrume? digwa. 20-21Yegl digo, Jisas di ikne ede, yegl dugwa, Ene pre mediglkwa i, kebra kaima paugwa pre kuno erekrukwa. Na ene kaima di teiga, ene pre mediglkwa i, kebra panan, ene ama taragl podo eraiglkwa paugwa. Ene pre mediglkwa i, mastet mogo ta kebra kaima yomere yegl panabuka ba ene pre medigl moglsre, muglo meglbi ta magigl paugwa i di te, Ene dumo ta panara kide kodo, ede po dibi, kaima ede bage ta enabuka. Te, ene pre medigl meglbi, ene taragl swara ta erekraiglkwa i ta paikrabiwe di, Jisas yegl dugwa.
Jisas gorabuka pre aglke kor dugwa
(Mak 9.30-32, Luk 9.43-45)
22Ana distrik Galili suna i, Jisas duglo beglkwa yagl u Jisas moglmara makai sigo, Jisas ye di te, yegl dugwa, Na Yoba Wam moglka i, yoba ta na i pi yoba pere ogono mina yenabuka paugwa. 23Ogono mina yenan, yoba i na si geglbi, na ege suota mogl, adigl u kor enaglka pamiwe dugwa. Jisas yegl dugo, ye duglo beglkwa yagl i, deno muduno yubun podo dogwa.
Pita ye yene pre ya Jisas pre taks togwa
24Okuo Jisas ye duglo beglkwa yagl bogl ede dumo Kaperneam eigwa. Eigo, taks igwa yoba Pita moglmara wigwa. Ye tawa teigwa yugu pre taks i meglkwa. Ye ede Pita moglmara udre, kira pogl yegl digwa, Ene tisano God yugumo pre taks tomo mo tekrume? digwa. 25Yegl digo, Pita di ikne ede, Tenabiwe dugwa. Pita yegl didre, ye aglke kor ede pi Jisas yugugl moglmara ogwa ba ye ka swara ta dikruko, Jisas tabre Pita yegl di togwa, Saimon, ene siragl we di pitne? King makandigle meglkwa i, ye yoba ira taks norio di teime? Yene wanoma taks norio dimo mo yoba meda taks norio dime? dugwa. 26Jisas yegl dugo, Pita di ikne ede, Yoba meda taks norio dime dugwa. Yegl dugo, Jisas aglke kor yegl dugwa, Kaima. Wanoma ta tekraiglkwa 27ba yoba i kide pre dinaiglkwa pre nono taks tenabuglka. Yegl pre ene ede pi nigl nubun huk edin, buglo bagle komono kana ta sinatnga i, dra ake ada bogln, mige mogo ta atne yenan, kanatnga. Mige mogo i, ene i pi na pre ya ene pre akie taks to di, Jisas yegl dugwa.
Currently Selected:
Matyu 17: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
