Matyu 18
18
Jisas duglo beglkwa yagl i, ira kra mogl mitna edibedi pre ka drano digwa
(Mak 9.33-37, Luk 9.46-48)
1Ana igne i Jisas duglo beglkwa yoba Jisas moglmara udre, kira pogl yegl di prikwa, God yoba kingno mogl, suglno morabuka igne i yoba ira mogl mitna edidre, kagie kade inabe? digwa. 2Yegl digo, Jisas gak kebra ta agle di, u ye meglmara suna adigl moglo, dugo, adigl moglkwa. 3Adigl moglko, Jisas yegl dugwa, Na ene kaima di teiga. Ene nomano yake tedre, u gak kebra mere yegl enaiglkwa paugwa. Yegl ta erekribi, God yoba kingno mogl, suglno morabara suna ta pikraiglkwa. 4Te, yoba ta ye yene ake atne edidre, gak kebra magigl moglmere yegl moran, God yoba kingno morabuka ege i, yoba i mogl mitna edenabiwe dugwa.
5Jisas yegl didre, ama yegl dugwa, Yoba ta na we di prisre, gak kebra yegl mere ta di inan, ye na di yumiwe dugwa.
Yoba yage si dinamnedi eraiglkwa paugwa
(Mak 9.42-48, Luk 17.1-2)
6Jisas yegl didre, ama yegl dugwa, Yoba ta gak kebra mere yegl moglsre, na pre medigl meglkwa i, yoba ta yage sinaiglmedi eribi, yubun podo inaiglkwa. Kobuglo podo yoba nuguno mina kan kogl pia si mudi nigl edenaiglkwa i, yuwaglke panabuka ba God ye ka tage tenabuka i, i tade panabiwe dugwa.
7Ana dumo makinagle magigl i, yoba mere kide yage sinaiglmedi erukwa pre dumo i mirie podo erukwa. Taragl tau mina yoba yage sinaiglmedi eran, erabuka ba yoba ta iro yage sinabedi erabuka yobamo i, ye yubun podo inabuka paugwa. 8Ana ene ogon mo kagln ene yage sinatnedi eran, ene ogon mo kagln koglo i, si biglki dedo. Ogon mo kagln swara panan, ene ede aimadi kamin kor meglmara enatnga i, wakai panabuka. Ta manan, suo akie panan, ede doga kade aimadi domara enatnga i, kide panabuka. 9Te, ene gumugln ta ene yage sinatnedi eran, gumugln koglo i, pogl pia sedo. Aglau eran, ene gumugln kogl koglo panan, ede doga kade domara enatnga i, kide panabuka. Ba ene gumugln koglo ekrike keme panan, ene aimadi kamin kor meglmara enatnga i, wakai panabiwe dugwa.
10-11Jisas yegl didre, ama yegl dugwa, Ene gak kebra moraiglmara i, swarano ta kan atne edekrio. I siragl pre na ene di teiga, angelo tau ye suglno meglkwa i, ye ege ege Nina heven ibo moglkwa i, moglmara adigl meglmiwe dugwa.
Sipsip ta wau boglkwa ka ebrie
(Luk 15.3-7)
12 Jisas yegl didre, ama yegl dugwa, Ene siragl we di prime? Yoba ta sipsip 100 kuran, swara ta wau boran, ye sipsip 99-pela muglo meglbi ta meglmara i kanige eran, meglbi, ye ede pi sipsip swara ta wau boglkwa i, dokinabuka. 13Doko kan inan, ye gun podo yenabuka. Na ene kaima di teiga. Ye sipsip 99-pela yoko meglkwa i pre gun kebra yenabuka ba sipsip swara ta wau boglkwa i doko kan yugwa i pre gun podo yenabuka. 14Kuno yegl mere ene Neno heven ibo moglkwa i, ye gak kebra meglkwa i, swarano ta wau borabedi prikrumiwe di, Jisas yegl dugwa.
Agro ta tadaglme eran, yoba ta pi, ye di tenabuka paugwa
15Jisas ka ta ama yegl dugwa, Ene agitn ta tadaglme eran, ene swara ye moglmara pidre, aglaumo di pogl tenatnga. Di pogl ten, ye nomane inan, pra, ene agitn ere ikne edinga mere yegl paugwa. 16Ba ene di pogl ten, ye ta prikran, ene yoba swara mo suo akie ye moglmara enaiglkwa paugwa. I siragl pre God kamo dugwa i, yoba suo mo suota mogltre, ka ta dibi, gigle dinabuka#18.16 Lo 19.15. 17Ba ene dibi, prikran, ene yugobuno swara moraiglmara di nogugl edibi, ye kaima nomane ta ikran, ene ye yoba meda mo taks igwa yoba mige tau wau simere mere yegl ta moglmedi kanaiglmiwe dugwa.
18Na ene kaima di teiga, God heven ibo moglsre, ye taragl tau makinagle pre mane dinabuka i, ene makandigle mogl, mane dinaiglkwa. Te, ye taragl tau makinagle pre pra we dinabuka i, ene ama pra we dinaiglkwa. 19Te, na aglke ene yegl di tenaglka, ene yoba suo mo suota na kagna mina taragl swara pre ta di pribr, di prabrere mere na Nina heven ibo moglkwa i, ere tenabuka. 20Yegl pre yoba suo mo suota na kagna mina makai sinaiglkwa i, na ye meglmara suna mogl teiwe dugwa.
Nigl kogon yoba suo ikne ikne dina eribrere pre dugwa
21Ana ege i, Pita ede Jisas moglmara udre, yegl di prukwa, Yagl Kade yo, Na agra ta aglau ere naran, na aglaumo i, ege siramna kide kodo tenagle? Na aglaumo i, 7-pela taim mere kide kodo tenaglo? dugo, 22Jisas ye di ikne ede te, yegl dugwa, Ye aglaumo ege 7-pela taim ta kide kodo tekratnga ba ege 77-pela mere yegl aglaumo kide kodo tenatnga pamiwe dugwa.
23Jisas yegl didre, ka ebrie ta yegl dugwa, God yoba kingno mogl, suglno morabuka i, yegl mere paugwa, king ta moglkwa ye niglmo kogonmo yoba dina togwa. Ye ege swara ta ikne edenagledi pre ye yu naraiglmedi dugo, 24ye nigl kogon yagl ta dina podo kide 10 milion kina mere yegl ta dina eruko, auro ede wigwa. 25Auro ede wigo, dinamo te ikne edenabuka i, ta yeikrukwa pre king i ere mogl, nigl kogon yoba di tedre, yagl i bona ganamo ya ebie gagiglma bogl, topo mere yegl bun, yoba ta boino paibi, migena ikne inamniwe dugwa. 26Yegl dugo, niglmo kogonmo yagl i, yage kobragai padre, ye di pre, Ene na mitna goglo. Ene kuri ta kan motn, na dina erika i, mudu te ikne edinaluwe dugwa. 27Yegl dugo, king i ye mirie goglsre, dina erukwa i kide kodo tedre, Yoko ede po dugwa.
28Ana nigl kogon yagl i ede meda udre, ye nigl kogon yagl ta ama tegigl yogwa. Nigl kogon yagl i, ye dina kebra 10 kina ta togwa paugo, ye tegigl yebriko, ye nugo mina akidre, Ene dina etnga i, nare ikne edo! dugwa. 29Yegl dugo, yagl i yage kobragai padre, ye di pre, Ene na mitna goglo. Na kuri ta mogl, migenen mudu te ikne edinaluwe dugwa. 30Yegl dugwa ba mige dina kade erukwa yagl ikra kanige erekre, si kane sugwa. Si kane sidre, ye di te, Ene kane pai moglsre, dinanen mudu nare ikne edin, ede meda unatniwe dugwa.
31Ana taragl yegl mere plau dugo, king niglmo kogonmo yoba tau kandre, kide kaima pre, pi ye bitno yagl i boglo kugl teigwa. 32Boglo kugl teigo, king i prisre, yagl i agle dugo, ugwa. Ugo, king i ye yegl di togwa, Ene nigl kogon yoba kide motnga. Ene kamage yenga pre ene dina podo etnga i, na kide kodo teiga. 33Yegl pre na ene mitn goglmere yegl, ene ama agitn mirie goglsre, dinamo kide kodo tenatnga paugwa ba ene aglau etniwe dugwa. 34King ka yegl didre, ye dem kubrumara i, yagl i, yoba ye giugl tenaiglmedi ogono mina yogwa. Yagl i ye giugl podo te pai meglbi, dinamo mudu nare ikne edidre, ede meda enabedi ogono mina yomiwe di, Jisas yegl dugwa.
35Jisas yegl didre, ama yegl dugwa, Ene agitn ta aglau ere tenan, ene deno muduno bogl ye aglaumo kide kodo tekitn, na Nina heven ibo moglkwa i, mabuno kuno yegl mere ene ere tenabiwe di, Jisas yegl dugwa.
Currently Selected:
Matyu 18: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
