Matyu 19
19
Yagl abu si biglke digwa pre dugwa
(Mak 10.1-12, Luk 16.18)
1Ana Jisas ka yegl di kodidre, ye distrik Galili kide kodo, ede pi distrik Judia, nigl Jordan koglo ibo kra ogwa. 2Ye dumo i ogo, yoba tau mere ye mokomugl sika si eigo, Jisas ye kide sigwa i, mudu ere wakai ere togwa.
3Ana igne i Farisi yoba tau Jisas moglmara udre, ye ka aglau ere dinabo mo di, kira yegl pogl prikwa, Yagl ta mabuno kane kane mina ebie sedinabuka i, mane ta pamo mo paikrume? digwa. 4Yegl digo, Jisas di ikne edidre, Ene God kamo kere kankrimo? Okna ibo God dumo makan beke yedre, ye yagl ya abu beke yogwa.#19.4 Oknayene Ibo 1.27 5Te, mabuno i pre yagl ye nem mam kide kodidre, ye ebie bogl si dakagl morabrika. Miur, ye ogono nagino swara kaima mere yegl paugwa.#19.5 Oknayene Ibo 2.24 6Yegl paugwa pre ye suo moglkre, yoba swara mere yegl miurka. Yegl pre God taragl ta ere i swara edenabuka i, yoba ta ere i pere pere edekraiglmiwe dugwa.
7Ana Jisas yegl dugo, Farisi yoba di ikne ede yegl digwa, Yegl panan, siragl eruko, Moses ye yagl abu si biglke dinaiglkwa i, pepa mina bogl, si biglke dinaiglkwa kuno erume dume? di, yegl digwa. 8Yegl digo, Jisas di ikne ede, Ene God kamo prakirikwa yoba meglkwa pre Moses ene yagl abu si bugl dinaiglkwa i, pra we dugwa ba okna ibo mabuno yegl ta paikrukwa. 9Na ene di teiga, Yagl ta ebie yagl ta bogl kunogl nekrabrika ba ye ebie yoko sedidre, abu kor ta inan, ye abu kor i bogl kunogl nebrika mere yegl pamiwe dugwa.
10Dugo, ye duglo beglkwa yagl di ikne ede, yegl digwa, Yagl abu bogl igwa mabuno yegl panan, ta bogl ikramniwe digwa. 11Yegl digo, Jisas aglke kor yegl dugwa, Yagl ta abu ikrabuka i, wakai paugwa ba yagl mudu abu ikraiglkwa i, kuno ta erekrukwa. God yene abu ikraiglmedi eran, kuno erabuka. 12Siragl pre yagl tau mano kiglkwa ege i, nagino kide erukwa pre ye abu ibi, kuno erekrabuka. Te, yagl tau yoba yobaglku nagino ere kide erikwa pre abu ikraiglkwa. Te, yagl tau God yoba kingno morabuka i, ede eglke enabedi prisre, mawagl mogl, abu ikrikwa. Yoba yegl ta erabuka i kuno erabedi pran, ye erabuka keme pamiwe di, Jisas yegl dugwa.
Jisas gak kebra na moglmara unaiglmedi kanige erio dugwa
(Mak 10.13-16, Luk 18.15-17)
13Ana igne i, yoba gak kebra Jisas akidre, kamage ere tenabedi auro yuigwa ba Jisas duglo beglkwa yagl i kandre, ka teigwa. 14Mane digwa ba Jisas ye yegl di togwa, Gak kebra na moglmara unaiglkwa i, ene mane dikre, kanige erio. I siragl pre yoba ta gak meglmere yegl ta moraiglkwa i, God ye yoba kingno mogl, suglno morabara yoba i pre yenabiwe dugwa. 15Jisas yegl didre, ye ogo i pi gak kebra akidre, dumo i kide kodo, ede bage ta ogwa.
Yagl ta mige moni mere kan nogwa i, Jisas bogl ka dibrika
(Mak 10.17-31, Luk 18.18-30)
16Ana yagl swara ta Jisas moglmara udre, yegl dugwa, Tisa yo, na mabuno wakai siragl mere ersre, aimadi kamin kor moraiglkwa ikra kaima inagle? dugwa. 17Yegl dugo, Jisas ye yegl di prukwa, Ene siragl pre mabuno wakai pre na di pitne? Yoba swara keme wakai moglkwa. Ba ene aimadi kamin kor moraiglkwa i, inagledi pitn, ene God lomo duglo boglo dugwa. 18Jisas yegl dugo, yagl i aglke kor yegl dugwa, Siragl lo duglo boraglka pre dine? dugwa. Dugo, Jisas di ikne ede, yegl dugwa, God lomo bage tau yegl dugwa, Ene yoba ta si goglkre, yagl abu ta bogl kunogl nekre, taragl ta kunogl nekre, kot mina kibi dikre, 19Ene nen man pre i mitna edidre, kano pro.#19.19 Isip Kide Kodigwa 20.12-16, Lo 5.16-20 Te, ene enene wakai kanere yegl, yoba ta magigl akie kipanaiglkwa i, ama yegl mere wakai kano#19.19 Tawa Teigwa Yoba 19.18 di, yegl dumiwe dugwa.
20Ana Jisas ka yegl dugo, yagl kulu i yegl dugwa, Na God lomo mudu i, duglo boglka ba na taragl ta eraglka pai moran, di naratniwe dugwa. 21Yegl dugo, Jisas di ikne ede, yegl dugwa, Ene u wakai kaima enagledi pitn, ene taraglnen mudu i pi topo boglsre, mige i pi goduglme yoba to. Ene yegl etn, ene heven ibo taragl wakai wakai inatnga. Te, ene yegl ersre, u na duglo boglo di, Jisas yegl dugwa. 22Jisas yegl dugo, yagl kulu i prisre, kide pre, ede ogwa. I siragl pre ye taragl tau mere kan nogwa yagl ta moglkwa.
23Ana yagl i ede ogo, Jisas ye duglo beglkwa yagl yegl di togwa, Na ene kaima di teiga, Yoba taragl podo ere neigwa i, God yoba kingno morabara ede suna enaiglkwa i, waragne paugwa. 24Te, na ama ene yegl di tenaglka, Bugla kamel ta kar nil kwie yomara ede suna enabuka i, yuaglke paugwa ba yoba ta taragl podo kan neigwa i, God yoba kingno moglmara ede suna enaiglkwa i, waragne kaima pamiwe dugwa. 25Jisas yegl dugo, ye duglo beglkwa yagl prisre, nagino podo koglsre, yegl digwa, Yegl panan, God yoba ira ere inan, kuno erabe? digwa. 26Yegl digo, Jisas ye toro kandre, ye yegl di togwa, Yoba ta ye yene ere inaiglkwa i, kuno ta erekrabuka ba God taragl mudu erabuka keme paugwa pre ye ere inabuka i, waragne ta paikrumiwe dugwa.
27Ana Jisas yegl dugo, Pita ye yegl di prukwa, Kano. No taraglno mudu kide kodidre, ene duglo bunga pre no siragl taragl inamne? dugwa. 28Yegl dugo, Jisas di ikne ede yegl dugwa, Na ene ka kaima di teiga, taragl mudu u kor enan, na Yoba Wam moglka i, abuglagena mina moglsre, sia king mina ame di moglbo, ene na duglo beglkwa yoba sia king 12-pela mina ame didre, Israel yoba yugobunono 12-pela i, suglno moraiglkwa. 29Te, yoba swara ta na kagna mina ye yugumo toglmo kide kodinabo mo ye agiglema abaugloma mo nem mam mo nagiglema kide kodinabo mo ye makanmo kide kodinabuka i, ye taragl tau kide kodumara i, ye 100 mere i tebe edenabuka. Te, ye aimadi kamin kor morabara i, wakai kaima morabuka. 30Ba yoba tau mere erme mogl mitna edigwa i, okuo kagno paikran, atne kaima moraiglkwa. Te, yoba tau erme atne kaima meglkwa i, okuo mogl mitna kaima edenaiglmiwe dugwa.
Currently Selected:
Matyu 19: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
