Matyu 20
20
Jisas ye kogon yoba tau ede wain mina kogon ersre, topo igwa pre dugwa
1Jisas ka ebrie ta ama yegl dugwa, God yoba kingno mogl, suglno morabuka i, siragl mere panabere i na ka ebrie ta dibo, praiglkwa. Yagl ta makanmo podo yogwa. Ye tagna kide mogl adiglsre, Na wain ere yaglmara i, kogona ere naribi, topo tenagledi pre dokugwa. 2Dokidre, yoba i bogl ka di kogl, Ene pi kogon eribi, silva swara swarade tenagliwe di, dedugo, ede wain ere yaglmara eigwa. 3Ede eigo, kuri ta mogl 9 klok mere yegl, aglke kor pi maket kanugwa i, yoba yoko adigl meglko, 4ama yegl di togwa, Ene ama pidre, kogon eribi, topo inaiglmere mere topo tenagliwe dugwa. 5Yegl dugo, ye pi kogon ere meglko, belo ya 3 klok, makan nem ikra, ama kuno yegl ere yoba tau dedugo, wain ere yaglmara eigwa. 6Ana okuo 5 klok poko dugo, aglke kor pi maket dumo kanugwa i, yoba tau ama yoko meglkwa kandre, ka kira pogl, Ene siragl eruko, ege mudu ta wakan yoko meglme? dugwa. 7Yegl dugo, yagl wagle i di ikne ede, Yoba ta kogon norokrimiwe digwa. Yegl digo, wain nem yagl i di te, yegl dugwa, Ene ama pi kogon ere naraiglma, pio, dugo, ede eigwa.
8Ana min eragledi eruko, ede wain nem yagl i, ye kogonmo sugl moglkwa yagl di tedre, yegl dugwa, Ene pi kogon erikwa yoba agle din, wibi, topono tenatniwa. Topo tenatnga i, yoba okuo kaima wigwa i, ye komono kana tedre, te taganamogl erikwa i, i okuo edo dugwa. 9Ana yagl i agle dugo, wigo, yoba 5 klok wigwa mere ikra, komono kana silva swara swarade togwa. 10Topo te ede ugo, yoba tagna kide mogl kogon erikwa ikra, u prikwa i, no topono podo ta inamniwe di prikwa ba ye topono i kuno ede, silva swarade togwa. 11Yegl togo, ye kide prisre, nonga si ikne ede tedre, 12yegl digwa, No kogon taganamogl ere ede pi mim paugwa erumga i, kogon mere ersre, ade domga ba yoba aua swara keme kogon erikwa i bogl topono i kuno ede notnga i, kuno ta erekrumiwe digwa. 13Yegl digo, gaden nem yagl kogon yoba swara ta yegl di togwa, Agra, na ene aglau ta ere tekrika. Na ene mige silva swara ta tenagle digo, ene pra we dinga pre na kogon i teiga etniwe dugwa. 14Yegl pre ene topono idre, ede enaiglkwa paugwa. Yoba okuo kogon yuwaglke erikwa i, topo kuno ere tenaglka i, na nana mina pamiwe dugwa. 15Na nana migena mina yoba primere tenaglka i, aglau ta pamedi pitno? Na yoba tau ere wakai ere teiga i, siragl eruko, kiam sine? di, wain nem yagl yegl dumiwe dugwa. 16Kuno yegl mere yoba tau erme okuo wigwa i, ede okna enaiglkwa. Te, yoba tau erme ede okna eigwa i, okuo unaiglmiwe di, Jisas yegl dugwa.
Ege suota Jisas goglsre, adigl u kor enabuka pre dugwa
(Mak 10.32-34, Luk 18.31-33)
17Ana Jisas ye duglo beglkwa yagl bogl ede ido Jerusalem enamnedi konbauna pi meglko, Jisas yoba tau mogl dinaiglmedi ye duglo beglkwa yagl i, di i bina edidre, yegl di togwa, 18Ene prio. Nono ede ido Jerusalem enauniwa. Omun, yoba ta na Yoba Wam moglka i, i pi tawa teigwa yoba bitno meglkwa i ya God lomo beke teigwa yoba i ogono mina yenabuka. Na i pi ye ogono mina yenan, yoba i na kotna prisre, Ene goratniwe dinaiglkwa. 19Didre, na i pi yugobuno pere, Juda yoba moglkrikwa i ogono mina yebi, ye na agai goratnedi ersre, ama duglnai sidre, ede prak mina na si goraiglkwa paugwa. Si geglbi, na ege suota pai mogl, adigl u kor enaluwe dugwa.
Jems ya Jon yoba kade morabugle dibrika
(Mak 10.35-45)
20Ana okuo Sebedi wam suo ye mano bogl ede Jisas moglmara wigo, ye mano ere mogl, Jisas goglko bodugl tedre, yegl dugwa, Na taragl ta dibo, ene pre naratnedi priwe dugwa. 21Yegl dugo, Jisas ye di pre, yegl dugwa, Na siragl ere narabedi pitne? dugwa. Dugo, ye di tedre, Ene erme ka gigledi di padiglsre, adigl moratnga i, ene king mogl, sianen idre, ame dinatnga igne, na wana suo i, ta ogon wo kra edin, ame dinan, ta ogon koda kra edin, ame dinan, yegl erabedi priwe di, abu i yegl dugwa. 22Yegl dugo, Jisas di ikne ede, yegl dugwa, Ene na yegl di prikwa i, ene pre pogl sikre, dimiwe dugwa. Didre, yagl suo i yegl di prukwa, Na nigl kide ta kogl nenaglka i, ene kogl nebr, kuno erabo? dugwa. Kuno erabiwe dibrika. 23Yegl dibriko, Jisas aglke kor yegl dugwa, Kaima, na nigl kide ta kogl nenaglka i, ene ama kogl nenabrika ba yoba ta na ogona wo kra mo ogona koda kra mina ame dinabuka i, i na mina ta paikrukwa. Na Nina ira kra ame dinaiglkwa i, yene kere i pere edugo, i keme ame dinaiglmiwe dugwa.
24Ana Jisas duglo beglkwa yagl 10-pela ye agigle agigle suo ka yegl dibrika i prisre, ye deno kubro teigwa. 25Yegl erikwa ba Jisas ye agle di, wio dugo, ede magigl wigo, ye yegl di togwa, Yoba Juda yoba moglkre, yugobuno pere meglkwa i, ye yobano kade ebrie mabuno erikwa i, ene pre kan erikwa. Ye yobano kade mogl mitna edidre, yobano kan atne ede teigwa. Te, ye kingno ama ka dimere dimere i, sika sidre, yegl erio digo, erikwa. 26Yegl erikwa ba ene meglmara suna i, mabuno yegl kaima ta paikrabuka. Ene meglmara suna i, ene ta kade moragledi pratnga i, ene mogl atne edidre, yoba ake ple di tenatnga paugwa. 27Te, yoba ta mogl gumamugl edenagledi pratnga i, ene yoba mudu niglno kogono yoba mere yegl moratnga paugwa. 28Na Yoba Wam moglka i, ama kuno yegl mere yoba na niglna kogona ere naraiglmedi ukrika ba na yoba niglno kogono ere tenagledi wiga. Nigl kogono ere tedre, ye pre goglsre, topono tebo, yoba kane paimara i, kide kodidre, ede meda unaiglmedi pre wiwe di, Jisas yegl dugwa.
Yagl suo gumuglno kin yogwa i, Jisas ere wakai ere togwa
(Mak 10.46-52, Luk 18.35-43)
29Ana Jisas ye duglo beglkwa yagl bogl dumo Jeriko suna moglsre, okuo ede meda eigwa. Te, ye eimara yoba mere kide ye sika si ede eigwa. 30Ana yagl suo, gumuglno kin yogwa i, konbo bage ame di miurka. Ame di miurko, yoba tau Jisas umiwe digo, yagl suo prisre, ka podo di, yegl dibrika, Yagl Kade yo, Devit Gawamo motnga i, no mitno goglo! dibrika. 31Yegl dibriko, yoba mere Jisas umara wigwa i, Ene ka kodo! Drano kegl di, konande moglsro! di, ka teigwa ba ye kano prikre, ka podo kaima di, Devit Gawamo motnga i, no mitno goglo! di, grigle dibrika. 32Yegl dibriko, Jisas u adigl moglsre, ye agle didre, Ene na siragl ere tenabedi pre dibre? dugwa. 33Yegl dugo, Yagl Kade yo, no kanabugledi prubugle dibrika. 34Yegl dibriko, Jisas ye mitno goglsre, gumuglno akugo, oglande kandre, Jisas duglo bogl ede ebrika.
Currently Selected:
Matyu 20: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
