Matyu 21

Jisas king mere yegl mogl, ede Jerusalem suna ugwa

(Mak 11.1-11, Luk 19.28-40, Jon 12.12-19)

1 Ana Jisas ye duglo beglkwa yagl bogl ede Jerusalem magigl udre, taun Betfage muglo Oliv ibo suna yomara ede wigo, Jisas ye duglo biurka yoba suo dedidre, 2ye yegl di togwa, Ene dumo ta yomara iro suna pidre, donki mam nagigle suo kane kogl padiglbi, tabre kanabrika. Ene donki suo i kane poko ede, yunabrika. 3Pogl edenabrika igne, yoba ta ene di pribi, Yagl Kade kogonmo ta paugwa pre dugwa ba ye tabre te ikne edenabiwe di, ene yegl diro dugwa.

4Taragl yegl mere plau dugwa i, ka kep yagl ta okna ibo ka ta boglkwa i, pai inabedi dumara plau dugwa. Ye boglkwa i, yegl boglkwa,

5Yoba ta dumo Saion meglkwa i, ka yegl di teo, Ene kingno moglkwa i, uma, kanio! Ye mogl atne edidre, donki moko bolamugl au sidre, ede umiwa. Te, donki kulu ta moglkwa au sidre, ede umiwe#21.5 Sekeraia 9.9

di, yegl boglkwa.

6Ana Jisas ye duglo biurka yagl suo i, Jisas dumere ersre, 7donki mam nagigle suo yubrika. Yu, Jisas moglmara edidre, ir gaglno gugl, donki nagigle kulu moko bolamugl kiglbriko, Jisas donki au sidre, ede ogwa. 8Te, ye ede omara i, yoba mere kide ere mogl, ye gaglno olto konbauna unabara kugl yeigo, te, tau ede yogagle bru maginagle kugl yeigwa. 9Yeigo, Jisas tebe ede pi moglkwa igne, yoba tau ede okna eigo, tau okuo wigo, Jisas yene suna ogwa. Eimara i, yoba mudu aglage kaglkane ere, yegl digwa,

Devit Gawamo ugwa i, debie si tomniwa!

Yagl ta Yagl Kade dedugo, ugwa i, God ye ere wakai ere tenabiwa.#21.9 Giglage 118.25-26

Nono God heven ibo moglkwa i, debie si tomniwe

di, yegl digwa.

10Ana Jisas ede Jerusalem suna ugo, yoba mudu Jerusalem suna meglkwa i, wai kugl, Yoba i, ira ume? digwa. 11Yegl digo, yoba podo meglkwa di ikne ede, yegl digwa, Yagl ta ugwa i, ka kep yagl Jisas ikra ugwa. Ye distrik Galili suna dumo Nasaret nem ta umiwe digwa.

Tawa teigwa yugu yomara yoba taragl tau topo beglkwa i, Jisas si meda edugwa

(Mak 11.15-19, Luk 19.45-48, Jon 2.13-22)

12Ana Jisas ede tawa teigwa yugu yomara togl suna pidre, yoba taragl tau i pi topo bogl meglkwa i, si meda edugwa. Ye si meda edidre, mige topo suade erikwa yobamo i, bogl ake yake tedre, kua yumugl mige beglkwa yobamo i, siano ama ake yake tedre, 13yoba mudu yegl di togwa, God kamo mina bage ta beglkwa i, yegl dugwa, Na yuguna i, yoba kamage eraiglkwa dumo ta yenabiwe#21.13 Aisaia 56.7 dugwa. Ba ene dumo i, ere i kunogl gogl yoba teke paigwa dumo mere yegl edimiwe#21.13 Jeremaia 7.11 dugwa.

14Ana Jisas tawa teigwa yugu togl suna yomara moglko, yoba gumuglno kin yogwa ya ogono kaglno kide erukwa i, pi Jisas moglmara eigo, ye ere wakai ere togwa. 15Ana Jisas siragl wakai wakai yegl eruko, gak kebra ama God yugumo togl suna meglkwa i, Jisas kagie kade tedre, Devit Wam debie si tomniwe di teigwa. Di teigo, tawa teigwa yoba bitno meglkwa i ya te, God lomo beke teigwa yoba i, kandre, kide kaima prikwa. Ye kide kaima prisre, 16Jisas yegl di teigwa, Gak kebra ka yegl digwa i, ene pitno? digwa. Yegl digo, Jisas di ikne ede, Owo, na prika. Ene God kamo bage ta dugwa i, ene kerekrikwa pre dimo? Bage i yegl dugwa, Gak kebra ya gak kuglabu meglkwa i, na debine karougl ere naraiglmedi beke teniwe di,#21.16 Giglage 8.2 yegl dumiwe Jisas yegl dugwa. 17Jisas yegl didre, ye meglmara kide kodo, ede dumo Jerusalem meda pidre, pi dumo Betani ugl paugwa.

Jisas ede fik ta di kide yei togwa

(Mak 11.12-14, 11.20-24)

18Ana tagana kana Jisas adiglsre, dumo Betani kide kodo, ede ikne dumo Jerusalem enagledi ogwa. Ye konbauna pi moglmara kidan podo goglsre, 19kanugwa i, ede fik ta paugo, ede magigl pi mogo ta kogl pamo mo di, kanugwa i, mogo ta kogl paugo, kankrukwa. Yaudo keme paugo, kandre, ede i di kide yei te, Ene mogo okuo ta koglkratniwe dugo, ede i tabre yaminidre, goglkwa. 20Ana Jisas duglo beglkwa yagl ede i goglkwa kandre, wai kugl, yegl digwa, Siragl mere ede fik i tabre yamine, goglme? digwa. 21Yegl digo, Jisas di ikne ede, yegl dugwa, Ene ka kaima di teiga. Ene pre medigl mogl, kinano suo yekran, na ede fik ere teimere mere yegl eraiglkwa. Ersre, ene taragl podo ama ere, muglo meglbi magigl paugwa i, di tedre, Ene dumo ta panara i kide kodo, ede mudi nigl suna po dibi, ka kaima plau dinabuka. 22Te, ene pre medigl moglsre, kamage eribi, siragl ta ene di praiglmere God ene kaima ere tenabiwe di, Jisas yegl dugwa.

Ira ene kagn kade tomedi yoba kade wagle Jisas kira peglkwa

(Mak 11.27-33, Luk 20.1-8)

23Ana Jisas tawa teigwa yugu yomara togl suna moglsre, yoba ka beke te moglko, tawa teigwa yoba bitno meglkwa i ya te, Juda yobano kade ye moglmara udre, kira pogl pre, yegl digwa, Ira ene dedugo, taragl yegl etne? Te, ira taragl yegl ero dugwa i, no di noro! 24Yegl digo, Jisas di ikne ede, yegl dugwa, Na ama ka kira swara ta poglbo, ene di ikne ede naribi, ira na dedugo, kogon erika i, ene di tenaglka. 25Jon yoba nigl bugl togwa i, God dedugo, erumo mo yoba dedigo, erume? Na di nario, dugwa. Jisas yegl dugo, yoba kade wagle yene meglmara di ikne ikne ede, ka di pre, yegl digwa, Nono di ikne, God ye Jon dedume dumun, yagl i ere mogl, Ene siragl eruko, Jon kamo pre mediglkrime? di norabuka. 26Ba nono di ikne ede, Makadigle yoba nomano idre, erume dumun, nono ama yoba kuduglno goramga paugwa. I siragl pre ye mudu prikwa i, yagl Jon i ye God kamo kep yoba kaima ta moglmedi primiwe di, yene ikne ikne yegl digwa. 27Yegl paugwa pre Jisas di ikne ede te, No ta pre kan erekrumniwe digwa. Yegl digo, Jisas yegl dugwa, Yegl eran we, ira na dedugo, kogon yegl erika i, ene ta di tebo, prikraiglmiwe dugwa.

Yagl ta wam suo miurka pre Jisas ka ebrie dugwa

28Jisas ka ta ama yegl dugwa, Ene siragl we di prime? Yagl ta wam suo miurka. Aglke ta ye wam ta moglmara pidre, ye di te, yegl dugwa, Wana yo, ene erme ede pi na ede wain ere yaglmara kogon eratniwe dugwa. 29Yegl dugo, ye wam di ikne ede, Na ta pikragledi priwe dugwa. Yegl dugwa ba okuo nomane kor idre, ede ogwa. 30Ana yagl i ede pi wam ta moglmara pidre, ye wam ta di tomere kuno yegl di togo, ye di ikne ede, yegl dugwa, Yagl kade yo, na ede enagliwe dugwa. Yegl dugwa ba ye kaima ta pikrukwa. 31Ana wam suo miurara i, yoba ira ye nem ye erabedi prumere erume? dugwa. Jisas yegl dugo, yagl kade wagle di ikne ede yegl digwa, Wam ta komono di prukwa ikra, ye nem prumere erumiwe digwa. Yegl digo, Jisas di ikne ede yegl di togwa, Ene kuno digwa. Te, na ene kaima di teiga. Gak ta nomane kor yugwa i, erumere yegl mere, taks igwa yoba ya konbauna abu meglkwa i, ye ede okna u God yoba kingno moglmara ede suna wigwa ba ene meda meglkwa. 32I siragl pre yagl Jon ikra ene meglmara udre, konbauna du yogwa i, ene obuno di togwa ba ye ka dugwa i, ene pre mediglkrikwa. Ene pre mediglkrikwa ba taks igwa yoba ya konbauna abu meglkwa i, ye Jon ka dugwa i, pre mediglkwa. Ye pre mediglko, ene kanigwa ba ene nomane kor idre, pre mediglkrimiwe di, Jisas yegl dugwa.

Yoba kide ede wain sugl moglsre, mabuno kide beglkwa ka ebrie

(Mak 12.1-12, Luk 20.9-19)

33 Ana Jisas yegl didre, ama yegl dugwa, Ene ka ebrie swara ta ama prio! dugwa. Yagl makanmo podo yogwa ta ere mogl, ede wain ere yaglmara togl ere winabo didre, suna wom yugu ta kei bodugl sugl kan moraiglmedi kedre, ye wain nuglo duglo inaiglmedi pre maugl ta pere yedre, erukwa. Ersre, ye ede bage ta enagledi yoba ta sugl mogl, mige teke yei naraiglmedi pre yoba ta ogono mina yedre, ede ogwa. 34Ye pi mogl prukwa i, erme wain bogl yenabuka egemo yomedi prisre, ye nigl kogonmo yoba tau dedidre, Ene ede wain sugl meglkwa yoba meglmara ebi, ye mige kia ta tebi, idre, ede ikne unaiglmiwe di, dedugo, ede eigwa. 35Ba ede wain sugl meglkwa yoba i, nigl kogon yoba si akidre, swara ta ere sidre, swara ta si goglsre, swara ta kobuglo sigwa. 36Yegl erikwa pre makan nem yagl i ere mogl, nigl kogonmo yoba tau aglke mere dagl dedugo, ede eigwa. Mere ede eigwa ba ede wain sugl meglkwa yoba i, okna erimere kuno yegl mere ere teigwa. 37Yegl eriko, okuo kaima makan nem yagl i, nomane ta idre, Na pra wana dedibo, enan we, ye kandre, kamo praiglmiwe di prisre, ye wam dedugo, ogwa. 38Ba wain sugl meglkwa yoba ye kandre, yene di ikne ikne ede pre, yegl digwa, Wain nem yagl ikra wam ugwa pre siragl mudu sugl kan munga i, ye mudu inabuka umiwe digwa. Yegl pre ye si gun we, nono taragl mudu kan munga i, no nono pre yenabiwe digwa. 39Yegl didre, wain nem yagle wam ugwa i, si meda edidre, si geglkwa. 40Ana ede wain nem yagle unabuka igne, ye erimara i siragl ere tenabedi prime? di, Jisas yegl dugwa. 41Yegl dugo, yoba di ikne ede, yegl digwa, Ye yoba kide meglkwa i, ere kide kaima ere tedre, si gogl, ye ede wain ere yaglmara i, yoba pere sugl mogl naraiglmedi tenabuka. Tenabuka yobamo i, ye sugl meglbi, wain bogl yenan, ye ursre, mige kia bogl akie tenaiglmiwe digwa.

42Ana yoba i, yegl digo, Jisas di ikne ede, yegl dugwa, Ene kaima digwa ba God kamo bage ta beglkwa i, ene ta kerekrikwa paugwa. Ka i, yegl dugwa,

Kobuglo yugu keigwa yoba i,

ye kobuglo gade imara i kobuglo swara ta kide yomedi kandre, kide kodigwa.

Ba God yugu ta kenagledi kobuglo swara ta kide kodigwa i, idre,

Yugu kei ede mitna enabara i,

Mabunomugl mabuno bogl paduglmiwa.

Yagl Kade yene yegl eruko,

No kandre, nagino podo kuniwe#21.42 Giglage 118.22-23

di, yegl dugwa. 43Ene kobuglo swara i kide kodigwa pre na ene di teiga, God yoba kingno mogl, suglno morabuka i, ene suna ta moglkraiglkwa ba yoba yugobuno pere meda ta mogo wakai koraiglkwa i, ye ede suna enaiglkwa. 44Te, yoba ta yage kobuglo i mina bolamugl sinan, ye bogl bagla dinabuka. Te, kobuglo i yage si, yoba ta sinan, yoba i si deduwagle ere kodinabiwe di, Jisas yegl dugwa.

45Ana Farisi ya tawa teigwa yoba bitno meglkwa i, ye Jisas ka ebrie tau mere dugwa i, no di boglmedi prisre, 46Jisas si kane sinamnedi prikwa ba yoba Jisas ka kep yoba kaima ta moglmedi prikwa pre ye kuduglno goglsre, si kane sikrikwa.

Currently Selected:

Matyu 21: KB

Highlight

Compare

Copy