Matyu 23
23
God lomo beke teigwa yoba pre kan kun erio!
(Mak 12.38-39, Luk 11.43, 11.46, 20.45-46)
1Ana okuo Jisas ye yoba mere kide magigl meglkwa i ya te, ye duglo beglkwa yoba ka di te, 2yegl dugwa, God lomo beke teigwa yoba i ya te, Farisi yoba meglkwa i, ye Moses agaimo idre, God lomo ene beke teigwa. 3Yegl pre ye ene ka beke tenaiglkwa i, prisre, duglo boraiglkwa ba mabuno erimere yegl, ene ta erekrio! I siragl pre ye yoba ka beke teimere yegl ta erekrikwa. 4Te, ye God lomo duglo bolo dimara i mina yoba yubun podo kaima kakenaiglmedi teigwa mere yegl paugwa ba ye kuri kaima ta ikne ake ple di tekrikwa. 5Ye mabuno kane kane ta erikwa i, yoba no kanaiglmedi pre erikwa. Ye God kamo bage tau boglsre, mabro mina padiglkwa i, yoba kanaiglmedi ere i podo edigwa. Te, ye kugugl gagl edimara yoba wakai kanaiglmedi kan tau mere bai akidre, puduo yomara si beglkwa. 6Te, ka mabuno yugu yugugl eigwa igne mo yoba kaya mokna podo gaiglkwa igne, ye sia wakai, gumamugl iro ame dinamnedi prikwa. 7Te, ye maket wanigwa igne, yoba ye wakai we di tedre, Tisa yo we digwa i, gun podo yeimiwe dugwa.
8Ba ene meglmara suna i, yoba ta ene Tisa yo we dinaiglkwa i, ene mane dio. I siragl pre ene meglmara mudu agigle agigle meglko, yoba swara keme ene tisano moglkwa. 9Te, ene meglmara suna yoba swara ta Neno yo, dikrio. I siragl pre ene Neno swara kaima heven ibo moglkwa. 10Te, yoba ta ene Yaglno Kade yo dibi, ene ama mane dinaiglkwa. I siragl pre na God Kere Yugwa Yagl moglka i, swara ene Yaglno Kade moglka. 11Ba ene meglmara suna i, yoba ta kade moragledi pran, ye u ene mudu niglno kogono yoba mere yegl morabuka paugwa. 12Yoba ta ye mogl mitna edenabuka i, God ye ake atne edenabuka. Te, yoba ta mogl atne edenabuka i, God ye ake mitna edenabiwe di, Jisas yegl dugwa.
Jisas God lomo beke teigwa yoba ya Farisi yoba mabunono kide di poglkwa
(Mak 12.40, Luk 11.39-52, 20.47)
13-14Ana Jisas ka ta ama yegl dugwa, Ene God lomo beke teigwa yoba ya Farisi yoba meglkwa i, ene ka didre, mabunono erimara u swara pikrukwa yoba meglkwa. God yoba kingno mogl, suglno morabara dua yomara i, ene yogugl teigwa. Enene suna pi dinamnedi ersre, te yoba ama pi dinaiglmedi erikwa pre ene yubun podo inaiglmiwe dugwa.
15Ene God lomo beke teigwa yoba ya Farisi yoba meglkwa i, ene ka dimara ya mabunono u swara pikrukwa yoba meglkwa pre ene yubun podo inaiglkwa. I siragl pre ene mudi nigl ya dumo makan bage bage wandre, yoba swara ta u Juda panabedi dokigwa. Dokigo, ye u Juda yoba ogwa igne, ene ye ere i doga denabuka yoba mere yegl edigwa. Ene yoba kide meglkwa ba ene yoba i, ere i yoba kide kaima moraiglmedi edimiwe dugwa.
16Ene meglkwa i, yubun podo inaiglkwa. Ene yoba gumuglno kin yogwa i, konbauna obuno di tomne digwa ba ene gumuglno ama kin yogwa paugwa. Ene yoba ka beke tedre, yegl digwa, Ene kano gigledi panabedi God yugumo kagie daglsre, kaima diwe didre, dinere eratno mo erekratnga i, aglau ta paikrume digwa ba siragl ta gol mina bekigwa God yugumo yugugl yogwa i, kagno mina kano gigledi panabedi kaima diwe dinatnga i, kano gigle dugo, kaima eratnga pamiwe digwa. 17Ene ka yegl beke teimara i, gumuglno kin yogo, du ere digwa paugwa. Gol God yugumo yugugl yogwa i, taragl podo yomo mo yugumo taragl podo yome? God yugumo i ta yeikran, gol yugugl yogwa i, kogonmo wakai ta paikrabuka.
18Te, ene ama yoba ka beke teimara i, Ene kano gigledi panabedi tawa bogl kagie daglsre, kaima diwe dinatnga i, eratno mo erekratnga i, aglau ta paikrukwa ba taragl tawa bogl mina yogwa i, kagie mina kaima diwe dinatnga i, kaima eratnga pamiwe digwa. 19Ene gumuglno kin yogwa paugwa. Yoba tawa ta yuigwa i, taragl podo yomo mo tawa bogl i, taragl podo yome? Tawa bogl i ta yeikran, tawa yuigwa i, God pre ta yeikrabuka. 20Yegl pre yoba ta ka gigledi panabedi tawa bogl kagie darabuka i, taragl kane kane tawa bogl mina yenabuka i akie pre dinabuka. 21Te, yoba ta ka gigledi panabedi God yugumo kagie darabuka i, God yugugl moglkwa i akie pre dinabuka. 22Te, yoba ta ka gigledi panabedi heven ibo kagie darabuka i, ye God ya God king siamo akie pre dinabiwe dugwa.
23Ene God lomo beke teigwa yoba ya Farisi yoba meglkwa i, ene ka didre, mabuno erimara u swara pikrukwa yoba meglkwa pre yubun podo inaiglkwa. I siragl pre ene siragl kebra kide kaima ede yaudo demene erukwa gaden mina paugwa i, br boglsre, swara ta i pi God teigwa wakai ersre, lo duglo bunedi prikwa ba ene yoba mabuno du ere tenaiglkwa ya God wakai kanaiglkwa i, i taragl podo paugwa ba erekrikwa. Ene taragl podo eraiglkwa paugwa i ersre, taragl kebra eraiglkwa ama eribi, i wakai panabiwe dugwa. 24Ene yoba gumuglno kin yogwa i, konbauna obuno di tomne digwa ba ene gumuglno ama kin yogwa paugwa. Ene diun yage sup mina atne sugwa i, ene wakai ere kandre, akie ne dinamnedi si ple di edigwa ba bugla kamel pemgo edigwa i, ta kirikwa pamiwe dugwa.
25Ene God lomo beke teigwa yoba ya Farisi yoba meglkwa i, ene ka dimara ya mabunono u swara pikrukwa yoba meglkwa pre yubun podo inaiglkwa. Ene kap ya dis meda nigl keglkwa ba deglbi suna yogwa i, nigl kogl koko edekrikwa. Na diga i, ene ogono nagino meda yogwa i, yoba wakai yomedi kanigwa ba ene deno muduno atne i, mabuno kide kau sugo, ene taragl kane kane bubuno goglsre, yoko mogl, ame wakai keme dinamnedi prikwa. 26Ene Farisi yoba gumuglno kin yogwa paugwa. Kap atne yogwa i, ene komono kana nigl edibi, kap meda yogwa i, ama deglbi yekrabiwe dugwa.
27Ene God lomo beke teigwa yoba ya Farisi yoba meglkwa i, ene ka dimara ya mabunono u swara pikrukwa yoba meglkwa pre yubun podo inaiglkwa. I siragl pre ene meglkwa i, ene gigl pene tebe ekin teigwa mere yegl meglkwa. Gigl pene tebe ekin teigwa ba atne kra ime yoba yobro ya targl deglbi kau sugwa. 28Kuno yegl mere, yoba ene meda kanigwa i, yoba du meglmedi kanigwa ba ene deno muduno suna ime mabuno kibi ya God lomo si biglke digwa mabuno i, kau sumiwe dugwa.
29Ene God lomo beke teigwa yoba ya Farisi yoba meglkwa i, ene ka dimara ya mabunono u swara pikrukwa yoba meglkwa pre yubun podo inaiglkwa. I siragl pre ka kep yoba ya yoba du okna meglkwa i, ene ye giglno pene yomara i, yugu kedre, ekin tedre, ersre, 30yegl digwa, No okna nenoma meglkwa igne akie muna, no ye bogl akie ka kep yoba i ta si goglkrumgo we digwa. 31Ba yoba ka kep yoba okna ibo si geglkwa i, ene no nenoma meglme dimara i mina enene si geglkwa yoba gawanoma muniwe didre, ama yegl mere si geglkwa yoba mune digwa.
32Te, ene kawanoma mabuno kide erimere mere yegl, ene ere ede okna enaiglkwa pai moglkwa. 33Ene toki kide meglkwa. God ka tage noro, doga mina ede dinabedi, teke ebi, kuno erabo? Kuno ta erekrabiwe di, Jisas yegl dugwa.
34Ene mabunono kide i, ere kodianiglkwa pre ene meglmara yoba tau dedenaglka. Dedenaglka i, ka kep yoba ya, yoba nomane podo paugwa ya, ka mabuno beke tenaiglkwa yoba akie dedenaglka. Dedibo, ene ere mogl, ere kide ere tenaiglkwa. Tau ede prak mina si goglsre, tau ka mabuno yuguno yugugl dunai sidre, tau ye dumo ta moraiglmara i, ene sika si, sinamnedi eribi, ye dumo i kide kodo, ede dumo ta pidre, ta pidre, eraiglkwa. 35Ene yegl eraiglmara i mina God yobama si gogl ede wimara i, ene mabuno mere mogl, yubun podo inaiglkwa. God kamo kep yoba ta komono kana si geglkwa i, Abel si geglkwa. Yoba Abel si goglsre, God kamo kep yoba tau mere si gogl wimara i, okuo kaima yagl Sekaraia, ye tawa bogl yomara ya God yugumo yomara suna i moglko, yoba ye si geglkwa ba ene kaima mabuno kama si moraiglkwa. 36Na ene ka kaima di teiga, yugobuno erme meglkwa i, God topo kide mudu i, ene tenabiwe di, Jisas yegl dugwa.
Jisas Jerusalem yoba mitno goglkwa
(Luk 13.34-35, 19.41-44)
37Jisas yegl didre, ka ta ama yegl dugwa, Aiya, ene Jerusalem yoba meglkwa i prio, God kamo kep yoba God ene meglmara dedugwa i, ene si goglsre, tau kobuglo mina si geglmiwa. Te, na ege mere ene suglno moragledi prisre, koduagle mam ye nagiglema kugl bogl tedre, suglno wakai moglmere mere eragledi erika ba ene mane di narikwa. 38Prio, ene erme dumono wau yenabuka. 39Na ene di teiga, na ta kankre, ebi, ene God di tedre, Yoba ta Yagl Kade kagie mina ugwa i, ere wakai ere to!#23.39 Giglage 118.26 dinaiglkwa ege i mina aglke kor dagl na kanaiglmiwe di, Jisas yegl dugwa.
Currently Selected:
Matyu 23: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
