Matyu 24
24
Yoba tawa teigwa yugu ere kide eraiglkwa i pre Jisas dugwa
(Mak 13.1-2, Luk 21.5-6)
1Ana Jisas ye tawa teigwa yugu yomara kide kodo, ede meda ogo, ye duglo beglkwa yagl tawa teigwa yugu yomara yugu wakai wakai keigwa i, Jisas kanabedi obuno di teigwa. 2Obuno di teigo, Jisas ye di te, yegl dugwa, Ene yugu magigl kan digwa i, okuo yoba udre, yugu i si gurdi atne edibi, kobuglo swara ta kobuglo ta yenabara tebe ta yeikrabiwe dugwa.
Yubun podo podo okuo plau dinaiglkwa
(Mak 13.3-13, Luk 21.7-19)
3Ana Jisas ede muglo meglbi Muglo Oliv we dimara pi ame di moglko, ye duglo beglkwa yagl yoba ta pre dinaiglmedi ugl mage ere pi kira pogl, yegl di prikwa, Tisa yo, taragl yegl mere plau dinabe dinga i, aunake plau dinabe? Te, no siragl taragl kandre, ene unatnga igne i umedi prisre, ege erme munga i, dudunabuka magigl erumedi pramne? digwa. 4Yegl digo, Jisas yegl dugwa, Yoba ta ene bakagl te dinaiglmedi kan kun erio. 5I siragl pre yoba tau mere na kagna mina udre, Na Krais moliwe didre, yoba mere bakagl tenaiglkwa. 6Te, yoba tau kuda beglme dibi, prisre, kuda yegl yegl plau dinarume dibi, ene ama praiglkwa ba ene kudugl goglkrio. I siragl pre taragl yegl mudu plau dinaiglkwa paugwa ba taragl pra pra dudunabuka ege i, okuo kaima unabuka. 7Kantri ikne ikne kuda beglbi, te, king ikne ikne ama kuda boraiglkwa. Imem podo podo unan, bage tau kidan podo kaima panaiglkwa. 8Taragl yegl mere mudu plau dinaiglkwa i, abu ta gak kuragledi mabuno bogl gagie giugl prumere mere yegl mere panabiwe dugwa.
9Jisas yegl didre, ama yegl dugwa, Igne i, yoba ene gudu i pi yoba pere ogono mina yedre, ene ama si goraiglkwa. Te, ene na kagna mina kogon eraiglmara i pre yugobuno mudu meglkwa i, ene kide kanaiglkwa. 10Yegl panan, yoba mere na pre mediglkwa i, yage sidre, agroma abaroma tau i pi kuda ikne ogono mina yedre, ikne ikne kide kanaiglkwa. 11Te, ka kep yoba kibi tau mere ede nogugl udre, yoba mere bakagl tenaiglkwa. 12Te, igne i yoba God lomo kide kodinaiglkwa mabuno i, u podo enan, yoba mere God deno muduno teigwa i, dudunabuka. 13Ba yoba ta adigl gigledi mogl enan, ege kide i dudinan, God ye ere inabiwe dugwa.
14Te, God yoba kingno mogl, suglno morabuka ka wakai i, ede yoba yugobuno pere pere u koglo koglo meglmara enan, mudu praiglkwa paugwa. Ye pre kodibi, taragl mudu dudunabuka ege i, okuo ime unabiwe di, Jisas yegl dugwa.
Yoba dumo Jerusalem ere kide ere tenaiglkwa
(Mak 13.14-23, Luk 21.20-24)
15Ana Jisas ka ta ama yegl dugwa, Ka kep yagl Daniel okna ka boglkwa i, taragl ta God gumuglo mina kide kaima yogo, taragl mudu ere kide erabuka God yugumo mina bodugl padiglbi, ene kanaiglkwa.#24.15 Daniel 9.27, 11.31, 12.11 (Prio. Yoba ta ka magigl paugwa kerenatnga i, pre pogl suo!) 16Ana ege i, yoba ta distrik Judia suna moraiglkwa i, ye teke ede muglo paimara ebi, 17yoba yugu idaule moraiglkwa i, ye taragl ta yugugl yenabuka ikre, tabre teke ede ebi, 18Te, yoba kaya mokna ere yaiglmara kogon ere meglkwa i, ede ikne u kugugl gaglno wakai inamnedi erekre, mudu teke edenaiglkwa. 19Igne i, abu ta dano panabuka mo gak kebra am te moraiglkwa i, mitno erabuka. 20Ene teke ede enaiglkwa ege i, ir erabuka ege yei dinabedi kamage ersre, wakan kade ege ama yei dinabedi kamage erio dugwa.
21Igne i, yubun podo kide kaima plau dinabuka. God dumo makan ere yogwa igne, ede u erme pra, yubun yegl mere ta plau dikrukwa. Te, okuo ama yegl ta plau dikrabuka. 22Ege kide plau dinabuka i, God tabre ta ere i sugunagle edekran, yoba mudu goraiglkwa mere yegl panabuka pre ye ere i sugunagle edenabuka. Ba ye yoba tau kere igrawa we di prisre, ege i, ere i sugunagle edenabiwe dugwa.
23Ege i, yoba tau ene yegl di tenaiglkwa, Ene kanio! Krais magigl i moglmiwe didre, Ye bage ta iro moglmiwe dinaiglkwa. Ba ye yegl dibi, ene ye pre mediglkrio. 24I siragl pre yoba ka kibi didre, Krais muniwe dinaiglkwa i, mere unaiglkwa. Te, ka kep yoba kibi meglkwa i, mere udre, kimagl ya diu podo ere, yoba bakagl tenaiglkwa. Te, ta kuno eran, God yoba ta kere i pere edugwa meglkwa i, ama bakagl tenaiglkwa. 25Ene prio. Na erme eglke pai moglko, siragl taragl okuo plau dinabuka i, ene di te kodiga. 26Yegl pre yoba ta ere mogl, Prio! Krais dumo wau yomara suna moglmiwe dinaiglkwa i, ene pi kankrio. Mo, ye ere mogl, Ye yugugl teke moglme ta dibi, ene ye pre mediglkrio. 27I siragl pre na ede ikne unaglka igne, na nogugl wibo, yoba kanaiglkwa. Kamun tai dumo swara keme sidre, pogl dugo, kamun kua mudu abuglage sumere mere yegl na unaglka. 28Nogugl kanimere mere yegl yoba ta goran, ye ogo nagie aglo mere ta yenabara i, kua kigla u dumo i makai sidre, i nogugl edenaiglmiwe dugwa.
Yoba Wam ede ikne unabuka
(Mak 13.24-27, Luk 21.25-28)
29Ana Jisas yegl didre, ama yegl dugwa,
Yubun podo kide yegl unan, mokomugl i taragl tau tabre plau dinabuka. Ade ake mim eran, ba ama abuglage sikrabuka. Kugl kuri paigwa i, yage makandigle sibi, taragl tau heven ibo gigledi paigwa i, ama piga kar dinaiglkwa.#24.29 Aisaia 13.10, 34.4 30Igne i, na Yoba Wam moglka i, kamun mitna ibo plau didre, na yobuglna ya abuglagena podo paugwa i nogugl edibo, kanaiglkwa.#24.30 Daniel 7.13-14 Yoba yugobuno mudu meglkwa i, na kandre, kai eraiglkwa. 31Eribi, biugel podo ta boran, na angelona dedibo, ye ede uglo koglo koglo pidre, na yoba ta kere i pere edigo, meglkwa i, yu makai sinaiglkwa. Ye ade umara ya ade beimara pidre, te nigl bre ya nigl beye pidre, na yobanama yu makai sinaiglmiwe di, Jisas yegl dugwa.
Yoba ede fik kandre, nomane inaiglkwa ka padum
(Mak 13.28-31, Luk 21.29-33)
32Ana Jisas ka yegl di kodidre, ye ka ebrie swara ta yegl di togwa, Ede fik paugwa i, poglo di prisre, nomane io. Ede fik yogagle ake wida dugo, yaudo sugwa igne, ene kandre, niga dinabuka ege i yenabiwe di primere 33na taragl tau plau dinaiglme diga i plau dibi, ene kandre, na ede ikne unaglka igne i ede magigl u kodumedi praiglmiwe dugwa.
34Jisas yegl didre, ama yegl dugwa, Na ene ka kaima di teiga, Yoba erme meglkwa i goglkre, yoko meglbi, taragl yegl mere mudu plau di kodinan, okuo goraiglkwa. 35Kamun mitna ibo ya dumo makan dudunabuka ba na kana ta dudukre, aimadi kamun pai morabiwe dugwa.
Jisas aunake ede ikne unabuka i, yoba ta pre kan erekrikwa
(Mak 13.32-37, Luk 17.26-30, 17.34-36)
36Jisas yegl didre, ama yegl dugwa, Na aunake ikne unaglka i, ade kwia mo ege i yoba ta pre kan erekrikwa. Yoba ta pre kan erekriko, angelo heven ibo meglkwa i pre kan erekriko, te na God Wam moglka i ama pre kan erekrika. Na Nina ege swara i pre kan erukwa. 37Kuno yegl mere Na Yoba Wam unaglka i, Noa egemo yomere mere yegl yenan, yoba pre kan erekraiglkwa. 38Noa egemo yoba gun yei, kaya mokna podo nedre, abu idre, abroma yagl tedre, ere meglkwa. Ye pra munedi ere meglko, Noa ede sip yugugl ogo, 39yoba meda meglkwa i, pre kan erekre, meglko, nigl kamun podo sugwa igne, ye pre kan erikwa. Na Yoba Wam moglka i, unaglka igne, kuno yegl mere panabiwe dugwa.
40Jisas yegl didre, ama yegl dugwa, Ege i, yoba suo kaya mokna ere yaraiglmara kogon eribr, God swara ta auro i ede enan, ta yoko morabuka. 41Te, abu suo wit mogo akie si deduagle ere miur, God swara ta auro i ede enan, ta yoko morabuka. 42Ene Yaglno Kade aunake unabuka i, ene pre kan erekrikwa pre kwi ere molo. 43Prio. Kunogl gogl yoba eduer suna unabuka i, yugu nem yagl aunake unabuka i, pre kan eruma, ye kwi ere moglsre, kunogl gogl yoba ede yugugl u dinabedi si kegl dugo. 44Yegl paugwa pre ene aimadi kwi ere molo. I siragl pre na Yoba Wam moglka i, ege ta prikraiglkwa ege ikne unagliwe di, Jisas yegl dugwa.
Jisas nigl kogon yoba wakai ya kide pre dugwa
(Luk 12.42-46)
45Ana Jisas ka yegl didre, ka ebrie ta dugwa, Yagl kade ta ere mogl, ye niglmo kogonmo yoba meglmara suna i ta kaya mokna sugl morabedi pran, ye yoba ta kamo duglo boglsre, nomanemo wakai panabuka i kere inabuka. Kere inan, yobamo i, kaya mokna sugl mogl, pamere yubu si tedre, erabuka. 46Ana nigl kogon yagl i, ye yaglmo kade kogon dedumere ere moran, ye wakai erumedi kandre, gun podo yenabedi ere wakai ere tenabuka. 47Te, ye ka kaima taraglmo mudu sugl morabedi edenabuka. 48Ba nigl kogon yoba i nomane kide idre, na yaglna kade tabre ukrukwa pre na gua gua eragledi pran, kide panabuka. 49Ye yoba tau suglno moglkwa i ere sidre, spak erikwa yoba bogl kaya mokna podo akie nedre, spak eran, 50ye yaglmo kade ye ta ukrabedi prabuka igne unabuka. 51Udre, ye duglnai ere sidre, nagie si baka dinabuka. Didre, Ene ede pi yoba ka didre, mabunono erikwa u swara pikrikwa meglmara i po! dinabuka. Dumo i, yoba kai ersre, signo gikr eraiglmiwe di, Jisas yegl dugwa.
Currently Selected:
Matyu 24: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
