Matyu 4
4
Satan Jisas kina sugwa
(Mak 1.12-13, Luk 4.1-13)
1 Ana God Murubuglomo ere mogl, Jisas auro i pi dumo wau yomara suna edidre, Satan ye bakaran kanagledi edugwa. 2Edugo, Jisas ege 40-pela de etne ya eduer kaya mokna mawagl ersre, kidan podo kaima goglkwa. 3Kidan podo kaima goglko, yoba kina sugwa yagle ikra udre, Jisas yegl di togwa, Ene God Wam kaima motn, ene kobuglo magigl paigwa i di tedre, U bret koglo pio do! dugwa. 4Yegl dugwa ba Jisas di ikne ede te, yegl dugwa, God kamo mina yoba ta yegl boglkwa, Yoba bret keme i nedre, kor moglkraiglmiwa. Ye God kamo mudu swara swarade idre, kor kaima moraiglmiwe#4.4 Lo 8.3 di, yegl boglme dugwa.
5Ana Jisas ka yegl di kodugo, Satan ye auro i pi Jerusalem suna pidre, tawa teigwa yugu yomara tebe bolamugl ibo edidre, 6ye yegl di togwa, Ene God Wam kaima motn, ene puglo di, yage atne suo. I siragl pre God kamo bage ta yegl dugwa,
God angeloma dedenan, ene sugln moraiglmiwa.
Te, ene kagln kobuglo bogl dinatga pre ye angeloma ene ake i mitna edinaiglmiwe#4.6 Giglage 91.11-12
dumiwe dugwa. 7Yegl dugo, Jisas di ikne ede te, yegl dugwa, God kamo bage ta ama yegl dugwa, God, ene Yaglnen Kade moglkwa i, ene ye eran, kanagledi erekro!#4.7 Lo 6.16 dumiwe dugwa.
8Ana Jisas yegl dugo, Satan ye agre i pi muglo mitna kaima ibo ta edidre, king dumo uglo koglo koglo sugl meglkwa i, wakai kaima yomere Jisas obuno di tedre, 9ye Jisas yegl di togwa, Ene goglkon bodugl narsre, guman dran i pi makan mina edidre, na kagna kade natn, taragl kanga i, mudu ene tenaluwe dugwa. 10Yegl dugo, Jisas di ikne ede te, Satan, ene ede eglke po! God kamo bage ta yegl paugwa, God, ene Yaglnen Kade moglkwa i, ye swara goglkono bodugl tedre, kagie kade te, kogonmo ere teo!#4.10 Lo 6.13 di, yegl boglme dugwa.
11Yegl dugo, Satan ye moglmara kide kodidre, ede ogo, angelo tau Jisas moglmara u, ake ple digwa.
Jisas distrik Galili suna kogon mabuno bogl erukwa
(Mak 1.14-15, Luk 4.1-15)
12Ana Jisas yoba Jon si kane sime digo, prisre, ye moglmara kide kodo, ede distrik Galili suna ogwa. 13Pidre, ede Nasaret pidre, dumo i ama kide kodidre, ede pi dumo Kapernaum pai moglkwa. Ana dumo Kapernaum i, nigl nubun Galili moglmara bina yedre, Sebulun yoba ya Naptali yoba okna makan imara suna i yogwa. 14Jisas ede dumo Kapernaum ogwa i, ka kep yagl Aisaia ka ta okna boglkwa pai inabedi Jisas ede dumo Kapernaum i, pi pai moglkwa. Aisaia yegl boglkwa,
15Sebulun yoba ya Naptali yoba makano i, suna yogo, nigl Jordan koglo wogo, mudi nigl koglo moglmiwa. Dumo suna i, Galili we digwa. Dumo Galili i, yoba yugobuno pere, Juda yoba ta moglkrikwa i, tau mere suna kipaimiwa.
16Yoba i mim erumara atne meglkwa ba abuglage podo sugo, kanimiwa. Yoba i, geglkwa dumo mere yegl ta yomara atne moglsre, goraiglkwa magigl erukwa ba abuglage si, ye meglmara edumiwe#4.16 Aisaia 9.1-2
di, Aisaia yegl boglkwa.
Jisas ye yagl 4-pela na duglo boraiglmedi agle dugwa
(Mak 1.16-20, Luk 5.1-11)
17Ana igne i Jisas mabuno bogl yoba ka mabuno di tedre, yegl dugwa, God yoba kingno mogl, ye suglno morabuka egemo i, ede magigl u kodugwa. Yegl pre ene nomano yake teo! dugwa.
18Ana Jisas nigl nubun Galili winabo di udre, kanugwa, agigle agigle suo ta degigl gagl nigle ede, buglo bagle ere si, i pi mige borabugledi ere miurko, kanugwa. Ye kagno Saimon ya Andru we digwa. Te, Saimon kagie ta Pita we digwa. 19Jisas ye agle didre, Na duglo boglsro! Na duglo biur, na ene buglo bagle ere si, i suna edibrere kuno yegl yoba ama yegl auro i suna edenabredi obuno di tenagliwe dugwa. 20Yegl dugo, yagl suo i degigl gaglno tabre kide kodidre, Jisas omara sika si ede ebrika.
21Ana Jisas kunabe ta ede ido pidre, agigle agigle ta ama miurko, kanugwa. Ye yagl ta Sebedi we digwa i wam suo miurko, kagno Jems ya Jon we digwa. Yagl suo i, ye neno bogl baglkugl bolamugl moglsre, degigl gaglno i si bogl, ake kun ere meglko, kanugwa. Ye kandre, yagl suo i agle dugwa. 22Agle dugo, ye neno baglkugl bogl tabre kide kodo, Jisas duglo bogl ede ebrika.
Jisas yoba ka mabuno di tedre, kideno ere wakai ere togwa
(Luk 6.17-19)
23Ana Jisas distrik Galili suna wan ede bage bage pidre, Juda yoba ka mabuno yuguno ede yugugl pi, God yoba kingno mogl, ye suglno morabuka ka wakai i, yoba beke togwa. Beke tedre, ama yoba kide kane kane ta sugwa ya ogono nagino ta kide erumara i, ere wakai ere togwa. 24Yegl eruko, yoba ye kamo di wai digo, yoba mudu provins Siria suna meglkwa i, prikwa. Prisre, yoba kide kane kane sigwa ya, giugl kane kane prikwa ya, murubuglo kide ye meglmara suna meglkwa i, auro yu Jisas moglmara edigwa. Yoba kide sigwa i, tau kide kane kane mina u kide eigo, tau ogono kaglno mawa sugo, tau kua sugwa. Yoba kide kane kane yegl sigwa i, yuigo, Jisas ye ere wakai ere togwa. 25Ana yoba mere kide Jisas sika si ede eigwa. Distrik Galili yoba ya, dumo Jerusalem yoba ya, distrik Judia yoba ya, distrik ta 10-pela Taun we digwa i ya, nigl Jordan koglo ibo kipai meglkwa i, mere kide u Jisas sika si wan meglkwa.
Currently Selected:
Matyu 4: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
