Matyu 5
5
Jisas muglo meglbi moglsre, yoba ka beke togwa
(Luk 6.20-23)
1Ana ege swara ta yoba mere kide ede Jisas moglmara wigo, ye kandre, muglo meglbi ta pamara ede muglo ibo pidre, ame dugwa. Ye ame dugo, ye duglo beglkwa yoba ede magigl u meglko, 2Jisas ye duglo beglkwa yoba i, ka beke tedre, yegl dugwa,
3Yoba ta God gumuglo mina goduglme munedi prikwa i, gun yenaiglkwa paugwa.
I siragl pre God yoba kingno morabara dumo i, ye inaiglkwa.
4Yoba ta erme kai ere meglkwa i, gun yenaiglkwa paugwa.
I siragl pre God ye deno muduno wida di padigl tenabuka.
5Yoba ta mogl atne edigwa i, gun yenaiglkwa paugwa.
I siragl pre ye dumo makan mudu inaiglkwa.
6Yoba ta mabuno du eramnedi pre kidan gogl, nigl mere yegl geglkwa i, gun yenaiglkwa paugwa.
I siragl pre okuo mabuno du ye meglmara kau sinan, ye aragan eraiglkwa.
7Yoba ta yoba pere mitno geglkwa i, gun yenaiglkwa paugwa.
I siragl pre God ye ama mitno gorabuka.
8Yoba ye deno muduno ta pe sugwa meglkwa i, gun yenaiglkwa paugwa.
I siragl pre ye God kanaiglkwa.
9Yoba ta yoba pere deno muduno swara yenaiglmedi erikwa i, gun yenaiglkwa paugwa.
I siragl pre yoba i, ye God gagiglma meglmiwe dinaiglkwa.
10Yoba tau ye mabuno du erimara yoba ye ere kide ere teigwa i, gun yenaiglkwa paugwa.
I siragl pre God yoba kingno morabara dumo i, ye pre yenabuka.
11Ana ene na duglo boraiglkwa pre yoba ka tenaiglkwa mo, ere kide ere tenaiglkwa mo, ka kibi kogl ka kide kane kane ta ene di beglbi, ene gun yenaiglkwa paugwa. 12Okna ibo God kamo kep yoba kuno yegl ere teigwa pre ene heven ibo topo podo inamnedi gun yedre, grigle dio di, Jisas yegl dugwa.
Jisas duglo beglkwa yoba i, mudi ya abuglage mere yegl meglme dugwa
(Mak 9.50, Luk 14.34-35)
13Jisas yegl didre, ama yegl dugwa, Ene erme makandigle meglkwa i, ene mudi mere yegl meglkwa. Ba mudi kuglomo ta dudinan, ene siragl mere kuglomo ere ikne edinaiglme? Mudi yegl mere kogonmo okuo ta paikrabuka ba yoba pia si makan mina edidre, egre kwagl paraiglmiwe dugwa.
14Ene erme makandigle meglkwa i, ene abuglage mere yegl meglkwa. Taun ta muglo meglbi mina ibo ta yenan, taun i teke yeikran, yoba taun i kanaiglkwa keme paugwa. 15Te, yoba lam ere gaglsre, degigl gagl mina atne edekrikwa ba lam beyemo mina padigl, nogugl yeigo, yoba mudu yugugl meglkwa i, abuglagemo kanigwa. 16Kuno yegl mere ene mabuno wakai bogl, abuglage mere yegl meglbi, yoba pere kandre, ene Neno heven ibo moglkwa i, kagie kade tenaiglmiwe dugwa.
Jisas God lomo pre dugwa
17Jisas yegl didre, ama yegl dugwa, Na God lomo ya God kamo kep yoba beglkwa i, ere kide era umedi prikrio! Ta manugwa. Na God lomo ya ka kep yoba beglkwa i, ere kide eragledi ukrika ba dumere ere kodinagledi wiga. 18Na ene kaima di teiga, God lomo bage kebra swara ta wau boglkre, kogonmo mudu ere kodinabuka. Ere kodinan, okuo kamun mitna ibo ya dumo makan u taya enabuka.
19Yegl pre God lomo swara ta kebra yenabuka i, yoba ta kide kodidre, yoba pere ama lo i duglo boglkraiglmedi beke tenan, God yoba kingno morabuka igne, ye kagie atne kaima yenabuka. Ba yoba ta God lomo duglo boglsre, yoba pere duglo boraiglmedi beke tenan, God yoba kingno morabuka igne, ye kagie kade panabuka. 20I kaima yegl mere paugwa pre na ene di teiga, Farisi yoba ya God lomo beke teigwa yoba du kaima meglkwa. Ba ye du meglmere ene ta egre atne edidre, du kaima moglkribi, God yoba kingno morabara ede suna pikraiglmiwe di, Jisas yegl dugwa.
Jisas yoba deno kubrikwa pre dugwa
(Luk 12.57-59)
21Ana Jisas yegl didre, ama yegl dugwa, God okna nono kowano awano di te, Ene yoba ta si goglkrio didre, Ene yoba ta si geglbi, ka inaiglmiwe#5.21 Isip Kide Kodigwa 20.13, 21.12 dugwa i, ene prikwa. 22Ka i ene pre kodigwa ba erme na ka kor ta dibo, praiglkwa. Yoba ta ye agigle si goglkrabuka ba ye dem ta kubro tenan, ye ama ka tage inabuka kuno erukwa. Ye agigle di te, Ene tom motne dinan, ede kot kade enabuka kuno erukwa. Te, yoba ta ye agigle di te, Bitn ta paikrume dinan, ye ede doga kade de pamara enabuka ama kuno erabiwe dugwa.
23Yegl pre ene taragl ta yu tawa bogl mina God tenagledi etn, agitn ta na kide pre narumedi pitn, 24Ene taragl ta yunga i, tawa bogl yomara yei padiglsre, ede pi agitn i bogl deno muduno swara yenabugledi ero. Ene deno muduno swara yebr, ene ede ikne u, taragl ta yunga i, gaglsre, God tenatniwe dugwa.
25Ana yoba ta ene kot ere tenagledi eran, jas moglmara pikre, tabre ere wakai erabrika. Kowai ye ene gudu i pi jas moglmara edenan, jas ene kibr nem ogo mina yenan, ye ene i pi kane yugu ede dinabuka pre diga. 26Taragl yegl plau dinan, na ene kaima di teiga, ene kane yugu kodokratnga. Mige mogo swara keme ta tenatnga pai moran, ene ede meda ukratniwe di, Jisas yegl dugwa.
Jisas yoba yagl abu ta bogl kunogl neigwa pre dugwa
27Ana Jisas ka yegl didre, ka ta ama yegl dugwa, God okna yoba di te, Ene yagl abu ta bogl kunogl nekrio!#5.27 Isip Kide Kodigwa 20.14 dugwa i, ene prikwa. 28Ka i ene pre kodigwa ba erme na ene ka kor ta di tebo, praiglkwa. Yagl ta abu kunogl nekrabuka ba ye ere mogl, abu ta kandre, nomane suo inan, ye nomanemo wagle abu i kunogl ne kodumiwe dugwa.
29Ene gumugln koglo, ogon wo kra paugwa i, ene tadaglme eratnedi eran, ene gumugln i, pogl ede, kide kodo! I siragl pre ene ogon nagn bage swara ta u kide enan, tadaglme ta erekitn, i wakai panabuka ba ene ogon nagn mudu ede doga kade enan, kide panabuka. 30Te ene ogon wo i, yage sinatnedi eran, ene ogon i si keglu sidre, kide kodo! I siragl pre ogon nagn bage swara ta u kide enan, tadaglme ta erekitn, i wakai panabuka ba ogon nagn mudu ede doga kade enan, kide panabiwe di, Jisas yegl dugwa.
Jisas ye yagl abu si biglke digwa pre dugwa
(Matyu 19.9, Mak 10.11-12, Luk 16.18)
31Jisas yegl didre, ama yegl dugwa, Yoba okna digwa i, Yagl ta ye ebie sedinagledi pran, ye pepa ta bogl tedre, sedinabiwe#5.31 Lo 24.1-4 digwa. 32Ba na ene di teiga i, yagl ta ye ebie sedinan, ye ebie i, yagl ta bogl kunogl nenabredi erukwa. Te, abu sedugwa i, yagl pere ta inan, ye abu i kunogl nogwa. Mem swara i keme pre yagl ta ye ebie sedinan, kuno erabuka i, ye ebie yagl ta bogl mabuno kide eribr, ye sedinabuka i, kuno erabiwe di, Jisas yegl dugwa.
Jisas yoba ka gigledi ta di padiglkraiglkwa pre dugwa
33Ana Jisas yegl didre, ka ta ama yegl dugwa, Moses lomo ta dugo, prikwa, Ene ka gigledi di padraiglkwa i, si biglki dikraiglkwa ba ka gigledi ta Yagl Kade di tenaiglkwa i, mudu dinaiglmere ere tenaiglkwa pame dugo,#5.33 Isip Kide Kodigwa 20.7 ene prikwa. 34Ene ka i prikwa ba na erme ene di teiga i, ene ka gigledi swara ta di padiglkrio. Ene kano si gigle dinagledi heven ibo kagie daglkraiglkwa paugwa. I siragl pre heven ibo i, God siamo king yomara yogwa. 35Te, ene dumo makandigle i, kagie daglkraiglkwa paugwa. I siragl pre dumo makandigle i, God ye kagle tebe yomara yogwa. Te, ene kano si gigle dinagledi dumo Jerusalem ama kagie daglkraiglkwa paugwa. I siragl pre dumo i, King ta podo moglkwa i, taunmo yogwa. 36Te, enene bitno mina ama ka gigledi ta dikraiglkwa paugwa. I siragl pre ene bitno yugo i, ikan unabedi eraiglkwa mo kama panabedi eraiglkwa i, ene kuno ta erekrikwa. 37Ene owo dinaiglkwa panan, ene owo keme dio. Mo, ene mane dinaiglkwa panan, mane keme dio. Ba ene kano si gigle dinagledi taragl tau kagno daiglbi, yagl kide ene nomane togwa mere yegl pamiwe dugwa.
Jisas dugwa i, Yoba ta ene ere kide ere tenan, ere ikne ede tekrio dugwa
(Luk 6.29-30)
38Jisas yegl didre, ama yegl dugwa, Ka ta okna digwa i, yegl digwa, Yoba ta yoba pere gumuglo ere kide eran, ene ye ama gumuglo ere kide ere tenaiglkwa paugwa. Mo, ye yoba pere sigie ta si buko dinan, ene ye ama sigie ta si buko dinaiglkwa pamiwe digo,#5.38 Isip Kide Kodigwa 21.24 ene prikwa. 39Ka i digo, ene prikwa ba na ene di teiga i, yoba ta ene ere kide ere tenaiglkwa i, ene si kegl dinamnedi erekrio. Yoba ta ene sibi, paunano koglo beglbi, ene kan ake tedre, koglo ama teo. 40Mo, yoba ta ene kot ere tedre, gaglno suna inamnedi eribi, ene ir gaglno ama teo. 41Yoba ene ka gigledi di tedre, ene ye bonaganano 1 kilomita mere kakenaiglmiwe ka gigledi dibi, ene 2 kilomita mere kake teo. 42Yoba ene taraglno pre yana dibi, ene ye dinaiglmere teo. Mo, ye dina ta eramne dibi, ene mane dikrio di, Jisas yegl dugwa.
Jisas yoba di te, Ene kudano ikne deno muduno teo dugwa
(Luk 6.27-28, 6.32-36)
43Jisas yegl didre, ama yegl dugwa, Ka ta okna digwa i, yegl digwa, Yoba ta magigl akie kipanaiglkwa i, ene wakai kandre, kudano ikne kide kanaiglmiwe digo, #5.43 Yoba magigl akie kipanaiglkwa i, deno muduno tenaiglme dugwa i, Tawa Teigwa Yoba 19.18 dugwa ba yoba ye kudano ikne kide kanaiglme digwa i, yene primere digwa paugwa. ene prikwa. 44Ka i digo, prikwa ba na ene di teiga i, ene kudano ikne ta moraiglkwa i, deno muduno tedre, yoba ene ere kide ere tenaiglkwa i pre kamage ere teo. 45Ene yegl eribi, ene Neno heven ibo moglkwa i, mabunomo erikwa mere yegl paugwa pre yoba ene God gagiglma meglmedi kanaiglkwa. I siragl pre God moglkwa i, ye ade si, yoba kide wakai akie meglmara edenabedi ersre, yoba du meglkwa ya du moglkrikwa i ama pra, kamun si ye meglmara edenabedi ere togwa.
46Aglau eran, yoba ta ene wakai kanigwa i keme wakai kanibi, siragl topo inaiglme? Ta ikraiglkwa. Taks igwa yoba ama ye wakai kanigwa yoba i keme wakai kan meglkwa. 47Mo, ene agroma abaroma moraiglkwa i keme wakai we di tebi, i taragl podo erimo? Ta manugwa. Juda yoba moglkrikwa God pre kan erekrikwa i, ye ama agroma abaroma wakai we di teigwa. 48Yegl pre ene Neno heven ibo du moglmere mere yegl, ene ama du kaima moraiglkwa pamiwe di, Jisas yegl dugwa.
Currently Selected:
Matyu 5: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
