Mak 5
5
Murubuglo kide tau yagl ta moglmara suna meglko, Jisas ye di meda edugwa
(Matyu 8.28-34, Luk 8.26-39)
1 Ana Jisas ye duglo beglkwa yagl bogl nigl nubun Galili ede koglo pidre, Gerasa yoba meglmara eigwa. 2Eigo, Jisas baglkugl kide kodo ede meda ugwa igne, yagl ta gigl pene yomara pai mogl, ye moglmara ugwa. Yagl i murubuglo kide tau ye moglmara suna meglko, 3-4yoba geglkwa padiglmara pai wan moglkwa. Te, yoba ege tau mere ogo kagle sen mina si kane sigwa ba ye ege ege sen si biglke dugwa. Yegl eruko, yoba swara ta erme yobuglo ere, ye aglke kor kan wagle mo sen wagle si kane sinabuka kuno erekrukwa. 5Ye ege ege etne ya eduer yoba geglkwa yeimara ya muglo meglbi wan mogl, kaglkane yei, kobuglo idre, yene ogo nagie wagle bogl biglke dugwa.
6Ana Jisas eglke iro mogl ugo, yagl i Jisas kandre, muku di ede pi Jisas umara yage kobragai pai, 7ka podo yegl dugwa, Jisas yo, ene God Mogl Mitna Kaima Ibo Edugwa Wam motnga i, ene siragl mere ere naragledi une? Na God kagie mina ene di prika i, ene giugl narekratnedi priwe dugwa. 8Ye yegl dugwa i, siragl pre Jisas ye murubuglo kide i di tedre, Ene yagl i moglmara kide kodo, ede meda wio! di yegl di te kodugwa. 9Ana Jisas ere mogl, Ene kagn dagl naro! dugo, yagl i, Kagna Ami we dugwa. I siragl pre no mere muniwe di, yegl dugwa. 10Te, murubuglo kide i, Jisas di pre, no di dumo bage eglke ta edekrabedi mogl, kamage yogwa.
11Ana dumo i muglo meglbi ta yogo, muglo meglbi i mina bugla mere kide yumun ne meglkwa. 12Ana Jisas ye murubuglo kide ede meda wio dugwa igne, murubuglo kide i Jisas di prisre, Ene no kanige etn, ede bugla meglmara suna enamniwe digo, 13Jisas pra we dugwa. Pra we dugo, murubuglo kide i, yagl i moglmara kide kodo, ede meda udre, bugla mere kide meglmara suna eigo, bugla mudu i, guglo ta yomara muku di ede atne pi, nigl nubun suna pidre, nigl ne geglkwa. Bugla i, 2,000 mere yegl meglkwa.
14-15Ana yoba ta ye bugla ikra sugl meglkwa i, ye taragl ta plau dugwa i kandre, muku di pi yoba taun suna kipaigwa ya meda kipaigwa i di teigo, yoba mudu pi taragl ta plau dugwa i kanamnedi ede eigwa. Ye pi Jisas moglmara plau didre, yagl ta murubuglo kide ye moglmara ede meda eigwa i, nomanemo u wakai ogo, ye kugugl gagl ede, ame di moglko, ye kandre, kudugl geglkwa. 16Kudugl gogl meglko, yoba tau ye siragl taragl bugla mina ya yagl murubuglo kide kau sugwa mina plau dugwa kanigwa i, ye boglo kugl teigwa. 17Di teigo, prisre, Jisas ye dumono moglkre, ede bage ta enabedi kamage yeigwa.
18Ana yoba i Jisas yegl di teigo, Jisas ede baglkugl kuglo pidre, ede enagledi eruko, yagl murubuglo kide okna ye moglmara suna meglkwa ikra, u Jisas bogl akie wanabugledi kamage yogwa. 19Yegl dugwa ba Jisas mane didre, yegl di togwa, Ene ede ikne pi yugun kaminen pidre, Yagl Kade ene siragl mere mitn goglsre, taragl podo ene ere togwa i, yobanma di to di, yegl dugwa. 20Yegl dugo, yagl i ede pi dumo ta taun 10-pela suna yogwa, kagie 10-pela Taun we dimara suna i pidre, Jisas ye siragl mere ake ple podo di tomere yoba mudu di togo, ye prisre, gagno keglkwa.
Abai gak ta goglko, Jisas ye ere i kor edidre, te, abu ta Jisas gaglmo akugo, kidemo aragan erukwa
(Matyu 9.18-26, Luk 8.40-56)
21Ana Jisas nigl nubun Galili mina aglke kor ede ikne koglo ya ugo, yoba mere kide Jisas nigle bina moglmara u makai si, winabo di meglkwa. 22Ana Jisas ugo, yagl ta kagie Jairus we digwa i, ede Jisas moglmara udre, Jisas kagle mina yage kobragai paugwa. Yagl i ye Juda yoba ka mabuno yuguno ta sugl moglkwa yagle moglkwa. 23Ye Jisas kagle mina yage kobragai padre, kamage yei, yegl dugwa, Na abra kebra kide sugwa, goragledi erukwa. Ene u akin, ye aragan eran, goglkrabiwe di, yegl dugwa. 24Yegl dugo, Jisas ye bogl akie ede kipamara enabugledi ebrika.
Ede ebriko, yoba mere kide ye omara, magigl magigl, gagie bai, eigwa. 25Ana yoba eimara suna i, abu ta ogwa. Abu i kide ta sugo, abu ba kanimere yegl, bugla yugu 12-pela bu yeikruko, aimadi kan pai moglkwa. 26Te, dokta mere meglmara ogwa i, ye ake ple di tenaiglkwa i, manugo, ibun keme yugwa. Te abu i dokta topono te ogwa, migemo dudugwa ba kide ye sugwa i aragan erekre, u podo ogwa. 27Ana abu i Jisas kamo digo, prukwa pre Jisas yoba mere kide bogl akie eimara i, abu i Jisas mokomugl u ye kuguglmo gaglmo akugwa. 28Akidre, prukwa i, Na ye kuguglmo gaglmo keme akibo, kidena bu yenabiwe di prukwa. 29Ana ye gaglmo akugo, bormai ugwa i oglade bu yogo, yene ogo nagie wagle prukwa, kidena bu yomiwe di prukwa. 30Kidemo bu yogo, Jisas oglade Na yobra tau ede meda omedi prisre, yoba mere meglmara suna kan yake tedre, Ira na gaglna akume? di, yegl dugwa. 31Dugo, ye duglo beglkwa yagl i ere mogl, Ene siragl pre Ira na akume dine? digwa. Yoba mere bogl akie umga i, ene unara mogl winabo didre, nagn bai, ede wimiwe digwa. 32Yegl digwa ba Jisas ye abu ta ye gaglmo akugwa i kanagledi kan koglo koglo edugwa. 33Yegl eruko, abu i ye moglmara siragl plau dugwa i prisre, kudugl gogl, nagie nuglo didre, u Jisas moglmara yage kobragai padre, ye siragl mere erukwa i mudu Jisas di togwa. 34Di togo, Jisas ye di te, yegl dugwa, Abra yo, ene na pre mediglnga pre kidenen bu yomiwa. Ene den mudun wida dinan, ede enatniwe dugwa.
35Ana Jisas ka yegl di moglko, yoba tau ka mabuno yugu sugl moglkwa yagl ikra kipamara mogl, wigwa. Ye udre, yagl i yegl di togwa, Ene abutn goglmiwe digwa. Ene Tisa kogon tau tenatnga i, ta paikrume digwa. 36Yegl digo, Jisas prisre, ka mabuno yugu sugl moglkwa yagle yegl di togwa, Ene kudugl goglkre, na yobuglna pre mediglo dugwa. 37Yegl didre, ye yoba mudu akie enaiglkwa i mane didre, Pita, ya Jems ye agigle Jon i keme bogl akie Nono ede enamne dugwa. 38Yegl dugo, ye ede pi ka mabuno yugu sugl moglkwa yagl i kipamara eigo, yoba mere kide kai ere, kai giglage sidre, taragl podo eriko, Jisas kanugwa. 39Kandre, ye ede yugugl pi yoba kai ere meglkwa yegl di togwa, Ene siragl eruko, kai ere, taragl podo ere meglme? dugwa. Abai kebra i ta goglkrukwa ba ugl keme pamiwe dugwa. 40Yegl dugo, yoba ye gauglmo ere teigwa. Gauglmo ere teigwa ba ye yoba mudu i di meda edidre, abai goglkwa i nem mam yebriko, ye duglo beglkwa yagl suota i bogl, abai ikra kiule pai moglmara eigwa. 41Eigo, Jisas ye abai i ogo akidre, Talita kum! dugwa. Ye ka dugwa i, mabuno yegl paugwa, Abai kebra, adiglo! 42Ana Jisas yegl dugo, abai i oglade adigl, konbo u ikne ikne ogwa. Abai i, bugla yugu 12-pela nogwa. Ye adigl, konbo u ikne ikne ogo, ye nem mam si puglo di, gagno kiurika. 43Yegl eribriko, Jisas ye yoba swara ta di te dinabredi mane kaima dugwa. Mane didre, ye kaya mokna ta nenaba, tero dugwa.
Currently Selected:
Mak 5: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
