Mak 6
6
Nasaret yoba Jisas mokono teigwa
(Matyu 13.53-58, Luk 4.16-30)
1Ana Jisas dumo i kide kodo, ye duglo beglkwa yagl bogl ede ye yugomugl dumo Nasaret i eigwa. 2Eigo, wakan kade yogo, Jisas ede ka mabuno yugu yomara yugugl pi yoba ka beke togwa. Ye ka beke te moglko, yoba mere kide prisre, nagino kogl, yegl digwa, Aiya, nomane podo yegl ya kimagl tau erukwa i, ira beke tedre, yobuglo togo, taragl mudu yegl erume? digwa. 3Ye yegl didre, kiam si, ama yegl digwa, Ye magigl i mogl, kapenta kogon eruko, kamgrawa. Te, ye mam Maria moglko, agiglema okuo Jems ya Josep, Judas ya Saimon meglko, te ye abaugloma nono bogl magigl i akie muniwe di, yegl digwa. Yegl didre, Jisas kubro teigwa. 4Deno kubro teigo, Jisas di ikne ede, yegl dugwa, God kamo kep yoba ta morabuka i, yoba dumo pere pere moraiglkwa i, ye kamo praiglkwa ba yene yugomugl yoba ya neno agroma ya bormai swara meglkwa i, ye eran, kaima ta prikraiglmiwe dugwa. 5Yegl didre, ye dumo i yoba kide sigwa suom ta ogo mina akidre, kideno ere wakai ere togwa ba ye kimagl tau ama erabuka i, kuno erekrukwa. 6Kuno erekruko, ye Jisas pre mediglkrikwa i, kina podo yogwa.
Jisas ye duglo beglkwa yagl 12-pela di bage bage edugwa
(Matyu 10.5-15, Luk 9.1-6)
Ana Jisas dumo kade i kide kodidre, ede dumo kebra kebra pidre, yoba ka beke togwa. 7Ana Jisas ye duglo beglkwa yagl 12-pela agle dugo, wigo, ye murubuglo kide di meda edinaiglmedi yobuglo tedre, ye suo suode ede dumo pere pere enaiglmedi dedugwa. 8Dedidre, ye yegl di togwa, Ene konbauna wan enaiglmara i, muglbono keme idre, ede enaiglkwa. Ene bret ya gaglno kaban ta ikre, te ene mige gagl giurekre, yoko ede pio dugwa. 9Te, ene kaglno towo edenaiglkwa ba gaglno suna suo edekrio. 10Te, ene dumo ta ede suna enaiglmara i, yoba ta ene di inabuka yugumo swara i pai mogl, okuo dumo i kide kodo ede dumo kor ta enaiglmiwa. 11Ana ene dumo swara ta ebi, yoba ene kano prikre, ta di ikribi, ene dumo i kide kodio. Te, ede enaiglkwa igne, ye aglauno nogugl panabedi pre kaglno kugane tama bagl edio di, Jisas yegl dugwa. 12Yegl dugo, ye duglo beglkwa yagl suode ede bage bage pi, yoba ka mabuno di te, Nomane kor io! di, yegl di teigwa. 13Ka yegl di tedre, ye murubuglo kide mere di meda edidre, yoba kide sigwa i tau mere oliv nuglo wagle kugo ere tedre, ye kideno ere wakai ere teigwa.
Herot Jisas ye Jon moglmedi prukwa
(Matyu 14.1-12, Luk 3.19-20, 9.7-9)
14Ana igne i Jisas sigie kagie wanugo, King Herot prukwa. Jisas kagie wanugo, yoba tau ka yegl digwa, Yagl Jisas i, ye Jon nigl bugl togwa yagle goglkwa ikra, ye adigl u kor ogwa pre yobuglo paugo, kimagl yegl erimiwe di, yegl digwa. 15Digo, tau Elaija ikra moglme digwa. Tau God ka kepmo yoba okna meglmere yegl ta moglme digwa. 16Digwa ba Herot prukwa igne ye yegl dugwa, Aya, nana Jon nugu gariko, goglkwa ba erme ye adigl ede u kor pidre, ere moglmiwe dugwa.
17-18Ana Herot ye okna Jon si goglkwa i, kamo yegl paugwa, Herot okna ye agigle Filip ebie na ebina morabedi yugwa. Ye agigle ebie i, kagie Herodias. Ye abu Herodias yugo, Jon ye ege mere di te, yegl dugwa, Ene agitn ebie inga i, aglau etniwe dugwa. Jon yegl dugwa pre Herot yoba dedugo, ye si kane si, i pi kane yugu edigwa. 19Te, abu Herodias, King Herot yugwa ikra we, Jon ye Herot ka togwa i ye ama prisre, Jon kide kan, si goragledi konbauna dokugwa. Konbauna dokugwa ba ye si gorabuka i, konbauna ta yekrukwa. 20I siragl pre king Herot ye Jon si kane sugo, pai moglkwa ba Herot ye si gorabuka i, mane di prukwa. I siragl pre Jon mabuno wakai ersre, yagl du moglko, Herot kandre, ye si gorabuka i kudugl gogl, yoba ye si gogl dinabedi ye suglmo mogl, kugl bogl togwa. Kugl bogl tedre, Herot ye ege tau Jon agle dugo, Jon u Herot ka mabuno di togo, Herot prisre, wakai prukwa. Ye Jon ka mabuno dugwa prukwa i, pre pogl sikrukwa ba ye Jon ka dinan prabuka i, ama wakai pre pai moglkwa pre ege tau prukwa.
21 Ana okuo i we, Jon kane yugu pai moglko, abu Herodias ye Jon si gorabuka i, konbauna ta yogo, kanugwa. King Herot mam ye kuglkwa egemo yogo, ye yobamo kade ya te, ami sugl meglkwa yagl ya te, yagl kade distrik Galili suna meglkwa i kaya mokna podo gaglko, ye u neigwa. 22U ne meglko, Herodias abuglo ede suna u, kagle egrukwa. Egruko, King Herot yoba kade bogl wakai kanigwa. Wakai kanigo, King abai i ka gigledi di padigl, yegl di togwa, Ene siragl ta kwian borabuka i, na di natn, ene tenaluwa. 23Taragl kebra pre dinatno mo taragl kade na dumo sugl moglka i suna biglke di suo edidre, koglo ta ene naro dinatnga i, na ene tenaluwe di, ka gigledi yegl paduglkwa. 24Yegl dugo, abai ikra ede meda pi ye mam di pre, Na siragl taragl naro dinagle? dugwa. Dugo, ye mam ere mogl, yegl dugwa, Ene di te, Jon, yoba ake nigl atne ede, nigl bugl togwa yagle ikra, nugu gare ede, ye bre yu naro di, yegl do! dugwa. 25Yegl dugo, abai ikra tabre ede ikne king moglmara u yegl di togwa, Ene yagl Jon, yoba ake nigl atne ede, nigl bugl togwa yagle ikra, nugu tabre gare ede, ye bre plet mina yu naratnedi priwe dugwa. 26Yegl dugo, king kide kaima prukwa ba ye ka giglede di te paduglkwa ikra pre ya te, ye di gaglkwa yoba kan meglkwa i pre mane dinabuka i, kuno erekrabedi prukwa. 27Yegl prisre, ye oglade yagl ta Jon si gorabedi di te, Ye nugu gare ede, bre yuo dugwa. Dugo, yagl i ede kane yugu pi, Jon nugu gare ede, 28bre plet mina ede, yu abai i togo, abai i ere mogl, Jon bre i pi mam togwa.
29Ana Herot ye Jon si goglko, Jon duglo beglkwa yagl digo, prisre, u ye ogo nagie idre, i pi kobuglo mur atne yeigwa.
Jisas bret buko didre, yagl 5,000 togwa
(Matyu 14.13-21, Luk 9.10-17, Jon 6.1-13)
30Ana Jisas dedugwa yagl suode ede bage bage eigwa ikra, mudu ede ikne u Jisas moglmara makai sidre, ye kogon kane kane erikwa ya ka beke teimere mudu Jisas boglo kugl teigwa. 31Boglo kugl teigo, Jisas yegl di togwa, Nono erme ede pi yoba ta moglkrimara pidre, kuri ta mogl, ir si pramniwe dugwa. Ye siragl pre yegl dugwa i, yoba mere kide ye moglmara udre, ede eigo, kor meglkwa u suglo sigo, yegl erikwa pre Jisas ye duglo beglkwa yagl bogl kaya mokna nenaiglkwa i, ege ta yekrukwa. 32Ana Jisas yegl dugo, ye duglo beglkwa yagl bogl yene moramnedi pre ede baglkugl mina kuglo pidre, ede dumo ta yoba moglkrimara eigwa.
33Ede eigwa ba yoba tau mere ye ede eigo kandre, yuguno toglno yomara kide kodo, nigle bina muku di ede pi Jisas enabara komono kana pi plau digwa. 34Plau di, sugl meglko, Jisas baglkugl wagle ede meda pidre, ye yoba mere kide meglko, kandre, ye mitno kaima goglkwa. Ye kanugwa i, sipsip mere yegl meglko, sipsip suglno yoba ta moglkrimedi kanugwa. Yegl kandre, ka mabuno kane kane paugwa i, beke togwa. 35Beke te moglko, min panagledi eruko, ye duglo beglkwa yagl i ede magigl pidre, yegl digwa, Dumo magigl i yugu togl ta yeikruko, min pai kodugwa 36pre ene yoba i dedin, ede enaiglmiwa. Ye magigl i, kidan gogl, kaya mokna ya yugu dokinaiglkwa pre dedin, ye ede taun ya yugu togl yomara enaiglmiwe digwa. 37Yegl digo, Jisas di ikne ede yegl dugwa, Enene kaya mokna nenaiglmere teo dugwa. Dugo, ye di ikne ede, Yoba yegl mere meglkwa i, mige silva 200 mere ta i pi bret topo sumun, kuno erabedi pitno? di, yegl digwa. 38Yegl digo, Jisas yegl di prukwa, Ene bret siramna yeigwa yomada? Pi kanio! dugwa. Yegl dugo, ye pi kandre, ede ikne u Jisas yegl di teigwa, Bret 5-pela yogo, buglo bagle suo ama yomiwe digwa.
39Ana Jisas ye duglo beglkwa yagl di te, Ene yoba mudu di tebi, kugl wakai bogl moglmara ame dinaiglmiwe dugwa. 40Dugo, ye bage bage ame di meglkwa. Bage tau yoba 50 mere ki yegl makai si meglko, bage tau 100 mere ki yegl makai si meglko, pere pere meglkwa. 41Ame di meglko, Jisas ye bret 5-pela ya buglo bagle suo ikra idre, kan heven ibo ede, God di wakai yei togwa. Di wakai yei tedre, bret ake buko didre, ye duglo beglkwa yoba i pi tenaiglmedi togwa. Tedre, ye buglo bagle suo ikra ama ake buko didre, yoba mudu yubu si togwa. 42Yubu si togo, yoba mudu neigwa, dano eruko, 43ye bret ya buglo bagle kawa te yogwa i, gade makai sidre, degigl gagl 12-pela gre kau sigwa. 44Ana Jisas yoba bret togwa neigwa i, mere kide meglkwa. Yagl 5,000 mere yegl meglkwa.
Jisas nigl yaudomugl konbauna ogwa
(Matyu 14.22-23, Jon 6.16-21)
45 Ana Jisas ye duglo beglkwa yagl di tedre, Tabre ede bakugl mina pio dugwa. Enene ede okna pi nigl koglo ibo, Betsaida we dimara ebi, na yoba mere magigl meglkwa i, di pere pere edinaluwe dugwa. Yegl dugo, ye ede eigwa. 46Di pere pere edidre, ye swara ede muglo pi kamage eragledi ede ogwa.
47Ana min paugo, Jisas yene mogl pai moglko, ye duglo beglkwa yagl ede koglo ibo enamnedi baglkugl wagle nigl suna ede eigwa. 48Ede suna pidre, yobuglo ere, nigl aware si, ede enamnedi erikwa, kuno erekrukwa. Ye enaiglmara ir podo u baglkugl guma ake ikne edugwa pre kuno erekrukwa. Ana Jisas ye yegl eriko, kandre, kamun tagenagledi eruko, ye nigl yaudomugl konbauna egre, ede eimara i pidre, ede okna enagledi erukwa. 49-50Ede okna enagledi erukwa ba ye duglo beglkwa yagl mudu kandre, kudugl podo gogl, grigle di, Yoba goglkwa ta kiamo umiwe digwa. Yegl digwa ba Jisas oglade yegl di togwa, Ene kiede mogl, kudugl goglkrio! Na wiwe dugwa. 51Yegl didre, ye ede baglkugl kuglo ogo, akie meglko, ir ugwa i, tabre bu yogwa. Bu yogo, ye duglo beglkwa yagl nagino podo keglkwa. 52Ye nagino podo keglkwa i siragl pre Jisas okna bret idre, yagl 5,000 buko di togwa ikra, ye kanigwa ba nomano gigle dugwa pre Jisas ira ka kaima moglmedi nomane ta ikrikwa.
Jisas dumo Genesaret we dimara mogl, yoba kide sigwa ere wakai ere togwa
(Matyu 14.34-36)
53Ana Jisas ye duglo beglkwa yagl bogl ede nigl koglo ibo dumo Genesaret we dimara plau didre, ye baglkugl nigle bina kan kogl padigl, 54ede meda eigwa. Eigo, yoba oglade Jisas ikra umedi kandre, 55ye muku di ede koglo koglo pi di wai digo, yoba dumo magigl yeimara i prisre, yoba kide sigwa i ede padigl, boglo ere i pi Jisas aglo mere ta moglme digo primara i, eigwa. 56Yegl erikwa i, Jisas ede aglo ogwa i, dumo kade mo kebra mo bina dage ta omara i, yoba makai sigwa dumo ta yomara i, yoba kide sigwa i pi igle edidre, kamage yei, yegl digwa, Ene kanige etn we, yoba kide sigwa i, ene gaglnen puduo akibi, kideno bu yenabiwe di, yegl di prikwa. Ye yegl di prisre, yoba ira ta Jisas kuguglmo gaglmo akigwa i, ye kideno aragan erukwa.
Currently Selected:
Mak 6: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
