Mak 9
9
1Jisas yegl didre, ama yegl dugwa, Na ene kaima di teiga, ene yoba tau magigl adigl meglkwa i, goglkre, yoko meglbi, God yobuglo eran, ye yoba kingno mogl, ye suglno morabuka ege i, plau dinan, kanaiglmiwe dugwa.
Jisas ogo nagie u pere ta ogwa
(Matyu 17.1-13, Luk 9.28-36)
2 Ana Jisas ka yegl di kodugo, ege 6-pela de ede ogo, ye Pita ya Jems ya Jon keme auro idre, ede muglo ibo ta ogwa. Muglo ibo ogo, ye ogo nagie u pere ta ogo, 3ye kuguglmo gaglmo pe kaima sidre, pogl dugwa. Pe kaima sugwa i, makandigle yoba kuguglno gaglno nigl edidre, blits wagle ere i kruo edibi, pe sinabere mere yegl sikre, Jisas gaglmo i pe kide kaima sugwa. 4Yegl mere eruko, yagl suo ta ye moglmara plau dibriko, Jisas bogl ka di meglkwa. Yagl suo i, Moses ya Elaija miurka. 5Ka di meglko, Pita ere mogl yegl dugwa, Neno Yagle , no magigl munga i, wakai pamiwa. No yugu teka suota tabre sumun, swara ta ene pre yenan, swara ta Moses pre yenan, swara ta Elaija pre yenabiwe dugwa. 6Pita ka yegl dugwa i, ye Jems ya Jon bogl kudugl podo geglkwa pre ka di yar edugwa. 7Dugo, kamun kua ta winabo di, si bi dugo, kamun kua i mina ka ta ede meda ugwa i, yegl dugwa, Yoba i na Wana moglmiwa. Ye na dena muduna suna moglkwa. Ye kamo prio! dugwa. 8Ana ka i udre, dudugo, kanigwa i, Jisas yene adigl moglko, kanigwa.
9Ana ye Jisas bogl muglo ibo kide kodo, ede atne u meglko, Jisas ye ka gigledi di te, Erme taragl ta kanigwa i, yoba swara ta di tekrio. Na Yoba Wam moglka i, goglsre, adigl u kor ebo, okuo yoba di tenaiglmiwe dugwa. 10Yegl dugo, ye dumere ere, yoba swara ta di tekrikwa ba yagl suota i yene meglmara suna ye ka di ikne ikne ede pre, yegl digwa, Ye Na goglsre, adigl u kor enagle dugwa i, siragl pre dume? digwa. 11Yegl didre, ye Jisas yegl di prikwa, God lomo beke teigwa yoba digwa i, Elaija komono kana unan, Yoba Wam okuo unabe digwa i, siragl pre dimedi pitne? digwa. 12Yegl digo, Jisas ye di ikne ede yegl dugwa, Elaija unabe digwa i, kaima udre, taragl kane kane ake kun erabuka paugwa pre kuno digwa. Ba siragl pre God kamo wagle Yoba Wam yubun mere kide inan, yoba ye mokono tenaiglme dume? 13Na ene di teiwa, Elaija kaima ede ikne u kodugwa ba yoba yene primere mabuno kide ere teigwa. God kamo yoba ye ere tenaiglme dumere erimiwe di, yegl dugwa.#9.13 Jisas ye Elaija ede ikne ume dugwa i, ye ka yake tedre, Jon pre dugwa. Jon ye u, Elaija okna kogon erumere eruko, yoba ye si geglkwa i pre dugwa.
Murubuglo kide yagl gak ta moglmara suna moglkwa i, Jisas di meda edugwa
(Matyu 17.14-21, Luk 9.37-43)
14Ana Jisas ye Pita, Jems ya, Jon bogl akie ede ikne Jisas duglo beglkwa yagl tau meglmara wigwa igne, ye kanigwa i, yoba mere kide ye meglmara i meglko, God lomo beke teigwa yagl tau ama suna mogl, Jisas duglo beglkwa yoba bogl ka drano di meglkwa kanigwa. 15Ba yoba mere kide magigl meglkwa i, mudu Jisas umedi kandre, gagno kogl, ye oglade kogl kare di ere inamnedi muku di ede pi ye umara eigwa. 16Yegl eriko, Jisas ye di pre, Ene siragl pre ka drano di meglme? dugwa. 17Yegl dugo, yoba mere wimara suna i, yagl ta ka podo didre, yegl dugwa, Tisa yo, na wana agre yu, ene motnara wiwe dugwa. Murubuglo kide ta ye moglmara suna mogl, ye ka dikrabedi erukwa. 18Murubuglo kide ye moglmara suna ogwa igne, ye pia si makandigle edugo, ye dra eurie sidre, sigie gikr eruko, ogo kagle diglke di pai moglmiwe dugwa. Yegl erukwa pre na ene duglo beglkwa yagl murubuglo kide i di meda edinaiglmedi di prika ba ye di meda edinamnedi erikwa, manumiwe di, yegl dugwa. 19Ana yagl i yegl dugo, Jisas di ikne ede yegl dugwa, Ene yoba yugobuno erme meglkwa i, na pre mediglkrikwa. Nono akie ege olto munga i, na pre medraiglmo mo pre mediglkraiglme? Ene wan pra auro yu magigl ya edo! dugwa. 20Yegl dugo, ye gak ikra agre ede Jisas moglmara wigo, murubuglo kide i Jisas kandre, ye oglade gak i ogo gagie ake pru dinabedi eruko, gak yage makandigle sidre, bera kara u ikne ikne ogo, dra eurie sugwa.
21Ana gak i yegl eruko, Jisas ere mogl, gak nem di pre, yegl dugwa, Murubuglo kide i ege siramna ye moglmara suna moglme? di, yegl dugwa. Yegl dugo, gak nem ye di te, yegl dugwa, Ye gak kebra mogl, ede u erme ugwa i, murubuglo kide ye moglmara suna moglme dugwa. 22Murubuglo kide i, ege mere na wana si goragledi ere, pia si doga mina ya nigl mina edumiwe dugwa. Yegl erukwa ba ene taragl ta eratnga kuno ta eran, no mitno gogl, no ake ple di noro! di, yegl dugwa. 23Yegl dugo, Jisas di ikne ede te, yegl dugwa, Ene taragl ta eratnga kuno eran we di yegl dinga i we? dugwa. Ene na pre medigln, na taragl mudu eraglka keme pamiwe di, Jisas yegl dugwa. 24Jisas yegl dugo, gak nem ikra oglade ka podo didre, yegl di togwa, Na ene pre mediglka ba na kinana suo yenabara i ene na kinana suo yekrabedi ero! di, yegl dugwa. 25Yegl dugo, yoba mere kide ye dibrika i kanamnedi tabre u ye miurara i wigwa. Wigo, Jisas kandre, ye murubuglo kide ka te, yegl dugwa, Ene murubuglo kide, gak i kina gi dinabedi ere, ye ka dikrabedi ere motnga i, ene ye moglmara kide kodo, ede meda pidre, aglke kor ye moglmara ikne ukro! di, yegl dugwa. 26Yegl dugo, murubuglo kide ikra kaglkane idre, gak i moglmara ogo gagie ake piga podo kaima didre, ede meda ogwa. Ede meda ogo, gak i yoba ta goglkwa mere yegl pai mogl, wermane erekrukwa pre yoba ikra kandre, Gak i goglmiwe di, yegl digwa. 27Yegl digwa ba Jisas gak i ogo ake aduglko, ye aduglkwa.
28Ana okuo Jisas ye duglo beglkwa yagl bogl ede pi yugugl ta yene mudu meglko, ye Jisas di pre, yegl digwa, Siragl eruko, no murubuglo kide di meda edinamnedi erumga kuno erekrume? digwa. 29Yegl digo, Jisas di ikne ede te, yegl dugwa, Murubuglo kide yegl meglkwa i, ene di meda edinamnedi eraiglkwa i, ene God kamage ere tebi keme ye ede meda enaiglmiwe di, yegl dugwa.
Jisas gorabuka pre aglke kor dugwa
(Matyu 17.22-23, Luk 9.43-45)
30-31Ana Jisas ye duglo beglkwa yagl bogl dumo meglmara i kide kodo, ye ede distrik Galili we dimara i pidre, suna i konbauna wan ede eigwa. Konbauna wan eigwa ba Jisas ye duglo beglkwa yagl keme ka beke tenagledi prukwa pre ye eimara i yoba pre kan erekraiglmedi prukwa. Prisre, ye duglo beglkwa yagl ka beke te, yegl dugwa, Na Yoba Wam moglka i, yoba ta na i pi yoba pere ogono mina yenabuka paugwa. Ogono mina yenan, yoba i na si geglbi, na ege suota mogl, adigl u kor enaglka pamiwe dugwa. 32Yegl dugwa ba ye duglo beglkwa yagl mem pre pogl sikrikwa te, ye ka i pre Jisas di praiglkwa i, kudugl geglkwa pre dikrikwa.
Jisas duglo beglkwa yagl i, ira kra mogl mitna edibedi pre ka drano digwa
(Matyu 18.1-5, Luk 9.46-48)
33Ye konbauna wan ede dumo Kapernaum pi plau didre, ede yugu ikra eigwa. Ede yugugl eigo, Jisas ye duglo beglkwa yagl di pre, yegl dugwa, Nono konbauna u mungo, ene konbo bage ka drano digwa i, siragl pre dime? dugwa. 34Dugo, ye duglo beglkwa yagl i ye ka okna dimara pre agai gogl, ka ta di ikne edekrikwa. I siragl pre ye konbauna u meglkwa igne, ye yene meglmara suna i, ira mogl mitna ede, tau egre tenabuka i pre ka drano digwa. 35Ana Jisas ame didre, ye duglo beglkwa yagl magigl ya wio di togo, wigo, Jisas ye di te, yegl dugwa, Ene ta kade moragledi pratnga i, ene mogl atne edidre, yoba ake ple di tenatnga pamiwe dugwa. 36Yegl didre, ye gak kebra ta agre i ede u ye meglmara suna edidre, gak kebra i kugro moglsre, ye duglo beglkwa yagl yegl di togwa, 37Yoba ta na pre mediglsre, gak kebra yegl mere ta di inan, ye na di yugwa. Te, na di inabuka i, na swara keme di yukrukwa ba na Nina na dedugo, wiga i, ye ama di yumiwe dugwa.
Yoba ta nono ere kide ere norokrabuka i, ye nono mina moglme dugwa
(Luk 9.49-50)
38Ana Jisas ka yegl di kodugo, Jon di yegl dugwa, Tisa yo, no kamga, yagl ta ene kagn daglsre, murubuglo kide di meda edenagledi eruko, kamniwa. Kandre, ye no duglo bunga yoba munara suna ta moglkrukwa pre ye mane di tomne dugwa. 39Jon yegl dugwa ba Jisas di ikne ede, yegl dugwa, Ene ye mane di tekrio! Yoba ta na kagna daglsre, kimagl ta eran, yoba i aglke tabre ere mogl, na kenaglna ta sikrabuka. 40Yoba ta ere mogl, nono ere kide ere norokran, ye nono mina moglkwa. 41Na ene ka kaima di teiga, yoba ta ere mogl, ene na God Kere Yugwa Yagle moglka i yobanama meglmedi pre nigl kor kap swara ta kogl tenan, ye topomo ta wau boglkrabiwe di, yegl dugwa.
Yoba yage si dinamedi eraiglkwa paugwa
(Matyu 18.6-9, Luk 17.1-2)
42Ba gak kebra magigl meglkwa i, na pre mediglkwa pre yoba ta yage sinabedi eran, ye yubun podo kide inabuka. Yoba ta ye nugu mina kobuglo podo ta kan kogl padigl, pia si mudi nigl atne edibi, yuwaglke panabuka ba God ye ka tage tenabuka i, podo kide panabuka. 43-44Te, ene ogono ta ene yage sinaiglmedi eran, ogono i si keglu sio! Ene ogono koglo ekrike panan, ene ede pi kor moraiglmara enaiglkwa i, wakai panabuka. Ba ene ogono suo akie panan, ene ede doga kade aimadi de pamara enaiglkwa i, kide panabiwe dugwa. 45-46Te, ene kaglno ta ene yage sinaiglmedi eran, kaglno i si keglu sio! Ene kaglno koglo ekrike panan, ene ede kor moraiglmara enaiglkwa i, wakai panabuka. Ba ene kaglno suo akie panan, ene ede doga kade de pamara ebi, i kide panabuka. 47Te, ene gumuglno ta ene yage sinaiglmedi eran, gumuglno pogl edio! Aglau eran, ene gumuglno kogl koglo panan, ede doga kade enatnga i, kide panabuka. Ba ene gumuglno koglo ekrike keme panan, ene God yoba kingno mogl, ye sugl morabara enaiglkwa i, wakai panabuka. 48Doga kade de pamara i, degreme yoba ogono nagino aimadi kamin ne mogl, dudukrikwa ya te, doga aimadi kamin de panan, gogokrabuka.#9.48 Aisaia 66.24 49Yoba kaya mokna mina mudi sigwa, ake beimere mere yegl, God doga dedenan, yoba mudu de, gagno mina ake benabiwe dugwa.
50Mudi taragl wakai ta yogwa ba mudi kuglomo ta dudinan, ene siragl mere kuglomo ere ikne edinaiglme? Ene mudi mere yegl moglsre, deno muduno swara yei, wakai akie molo.
Currently Selected:
Mak 9: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
