Mak 10
10
Jisas yagl abu si biglke digwa pre dugwa
(Matyu 19.1-12, Luk 16.18)
1Ana Jisas dumo ta moglmara i kide kodo, ede distrik Judia nigl Jordan koglo ibo kra ogwa. Ye dumo i ogo, yoba mere kide aglke kor ye moglmara wigwa. Wigo, ye ege ege yoba ka beke tomere yegl ye ama ka beke togwa.
2Beke te moglko, Farisi yoba tau ye moglmara udre, Jisas ka aglau ere dinabo mo di, kira yegl pogl prikwa, Yagl ta ye ebie sedinabuka i, mane ta pamo mo paikrume? digwa. 3Yegl digo, Jisas di ikne ede yegl dugwa, Okna ibo, Moses ene kowano awano siragl mere eraiglmedi di tome? dugwa. 4Dugo, Farisi yoba yegl digwa, Yagl ta ebie sedinagledi pran, ye pepa ta bogl tedre, sedinabuka i, Moses pra we dumiwe digwa. 5Digo, Jisas di ikne ede, Owo. Ene God kamo prakirikwa yoba meglkwa pre Moses ene yegl eraiglmedi pra we dugwa. 6Ba okna ibo God taragl pra pra ere yogwa igne, ye yagl ya abu beke yogwa.#10.6 Oknayane Ibo 1.27 7Te, mabuno i pre yagl ye nem mam kide kodidre, 8ye ebie bogl si dakagl morabrika. Miur, ye pere pere moglkribrika. Ogno nagino swara kaima mere yegl paugwa. 9Yegl paugwa pre God taragl ta ere i swara edenabuka i, yoba ta ere i pere pere edekraiglmiwe dugwa.
10Ana okuo Jisas ye duglo beglkwa yagl bogl ede yugugl ta eigo, ye duglo beglkwa yagl Jisas ka dugwa i, kira pogl prikwa. 11Kira pogl priko, ye yegl di togwa, Yagl ta ye ebie sedidre, abu kor ta yunan, ye abu i kunogl nogwa. 12Te, abu ta wie kide kodo, ede yagl kor ta enan, ye yagl i kunogl nomiwe dugwa.
Jisas Gak kebra na moglmara unaiglkwa i, kanige erio dugwa
(Matyu 19.13-15, Luk 18.15-17)
13 Ana yoba tau gak kebra Jisas akenabedi auro yuigwa. Auro yuigo, Jisas duglo beglkwa yagl kandre, ka teigwa. 14Ka teigo, Jisas kandre, ye dem boglko, ye yegl di togwa, Gak kebra na moglmara unaiglkwa i, ene mane dikre, kanige erio! I siragl pre yoba ta gak meglmere yegl ta moraiglkwa i, God yoba kingno mogl, ye suglno morabara yoba i pre yenabuka. 15Na ene ka kaima di teiga. Yoba ta ye gak kebra meglmere yegl mere ta moglsre, God na kingna mogl, na suglna morabedi yegl prabuka i, yoba i keme God yoba suglno morabara ede suna enabuka. Ba yoba yegl ta prikrabuka i, ye suna ta pikrabiwe dugwa. 16Yegl didre, ye gak kebra swarade kugro bikie bolamugl edidre, ye ake, di wakai yei togwa.
Yagl ta mige moni mere kan yogwa i Jisas bogl ka dibrika
(Matyu 19.16-30, Luk 18.18-30)
17 Ana okuo Jisas ede bage ta enagledi ogo, yagl ta muku di ede pi Jisas omara pidre, gumamugl yage goglko bodugl, yegl dugwa, Tisa yo, yagl wakai, na siragl mere ersre, aimadi kamin kor moraiglkwa ikra kaima inagle? dugwa. 18Yegl dugo, Jisas ye yegl di prukwa, Ene siragl pre na yagl wakai we dine? Yoba wakai ta moglkrikwa ba God swara wakai moglkwa. 19Ana God lomo siragl mere paugwa i, enene pitnga, Ene yoba ta si goglkre, yagl abu ta bogl kunogl nekre, taragl ta kunogl nekre, kot mina ka kibi dikre, te yoba taraglno inamnedi bakagl tekre, ene neno mano pre i mitna edidre, kano prio!#10.19 Isip Kide Kodigwa 20.12-16, Lo 5.16-20 di, God lomo yegl dumiwe dugwa. 20Jisas yegl dugo, yagl i di ikne ede, Neno Yagle, na gak mogl ede u erme wiga i pra, lo mudu i na duglo boluwe dugwa. 21Yegl dugo, Jisas ye yagl i kan, dem muduo tedre, yegl di togwa, Ene taragl swara ta erekitnga pai moglkwa i, ene taraglnen mudu i pi topo boglsre, mige i pi goduglme yoba to! Ene yegl etn, ene heven ibo taragl wakai wakai inatnga. Te, ene yegl ersre, u na duglo boglo dugwa. 22Jisas yegl dugo, yagl i prisre, guma dra u kide ogo, kide pre, ede ogwa. I siragl pre ye taragl mere kaima kan nogwa yagl ta moglkwa.
23Ana Jisas kan winabo didre, ye duglo beglkwa yagl yegl di togwa, Yoba taragl podo ere neigwa i, ye God yoba kingno mogl, suglno morabara ede suna enaiglkwa i, waragne pamiwe dugwa. 24Jisas ka yegl dugo, ye duglo beglkwa yagl prisre, nagino keglkwa. Nagino keglkwa ba Jisas ye aglke kor yegl di togwa, Gak wagle, God yoba kingno mogl, suglno morabara yoba suna enaiglkwa i, waragne kaima pamiwe dugwa. 25Bugla kamel ta kar nil kwie yomara ede suna enabuka i yuaglke paugwa ba yoba ta taragl podo kan neigwa i, God yoba kingno moglmara ede suna enaiglkwa i, waragne kaima pamiwe dugwa. 26Yegl dugo, ye nagino podo koglsre, yegl di meglkwa, Yegl eran, God yoba ira ere inan, kuno erabe? digwa. 27Yegl digo, Jisas ye kandre, di ikne ede yegl dugwa, Yoba ye yene ere idre, ede suna enaiglkwa ta kuno erekrabuka. Ba God taragl mudu erabuka keme paugwa pre ye ere inabuka i, waragne ta paikrumiwe dugwa.
28Ana Jisas yegl dugo, Pita ye yegl di prukwa, Kano. No taraglno mudu kide kodidre, ene duglo buniwe dugwa. 29Yegl dugo, ye yegl di togwa, Na ene kaima di teiga. Yoba swara ta na duglo boglsre, na kana wakai yoba di tenagledi ye yugumo toglmo kide kodinabuka mo agiglema abaugloma mo nem mam mo nagiglma kide kodinabo mo ye makanmo kide kodinabuka i, 30ye ege erme magigl i taragl mere kide kaima ikne edenabiwe dugwa. Ye yugu togl ya agiglema abaugloma ya mano ya gagiglma ya kaya togl mere kide kaima 100 mere yegl inabuka pre diwe dugwa. Ege erme taragl yegl mere idre, yubun tau ama inabuka ba ege okuo ta yenabuka igne, ye aimadi kamin kor morabuka. 31Ba yoba tau mere erme mogl mitna edigwa i, okuo kagno paikran, atne kaima moraiglkwa. Te, yoba tau erme atne kaima meglkwa i, okuo mogl mitna kaima edenaiglmiwe dugwa.
Jisas goglsre, adigl u kor enabuka pre aglke kor dugwa
(Matyu 20.17-19, Luk 18.31-34)
32Ana Jisas ye duglo beglkwa yagl bogl ede ido Jerusalem enamnedi konbauna pi meglko, Jisas ye gumanomugl ede okna pi moglko, ye ede Jerusalem enaiglkwa i nagino keglkwa. Nagino keglko, yoba tau ama Jisas omara sika si eigwa i ama kudugl geglkwa. Kudugl geglko, Jisas ye okna erumere ere, ye aglke kor ye duglo beglkwa yagl 12-pela di i bina edidre, ye moglmara siragl taragl plau dinabuka i, di togwa. 33Ene prio. Nono ede ido Jerusalem enauniwa. Omun, yoba ta na Yoba Wam moglka i, i pi tawa teigwa yoba bitno meglkwa i ya God lomo beke teigwa yoba i ogono mina yenabuka. Na i pi ye ogono mina yenan, yoba i na kotna prisre, Ene goratniwe dinaiglkwa. Didre, na i pi yugobuno pere, Juda yoba moglkrikwa i, ogono mina yebi, 34ye na agai goratnedi ersre, eur si narsre, ama duglnai sidre, ede prak mina na si goraiglkwa paugwa. Si geglbi, na ege suota pai mogl, adigl u kor enaluwe dugwa.
Jems ya Jon yagl kade morabugledi pre, Jisas kira pogl pribrika
(Matyu 20.20-28)
35Ana Jems ya Jon, Sebedi wam suo ikra ere mogl, Jisas moglmara udre, yegl di pribrika, Neno Yagle, no taragl ta dubugl, ene pre noratnedi prubugle dibrika. 36Yegl dibriko, Jisas ye di pre, Na siragl ere norabedi pribre? dugwa. 37Dugo, ye di tedre, Ene erme prawe din, ene king mogl, sianen idre, ame dinatnga igne, nono ene ogon wo kra ta edin, ame dinan, ta ogon koda kra edin, ame dinan, yegl erabedi prubugle dibrika.
38Jems ya Jon yegl dibrika ba Jisas di ikne ede yegl dugwa, Ene na yegl di pribrika i, pre pogl sikre, dibrika. Na nigl kide ta kogl nenaglka i, ene kogl nebr, kuno erabo? dugwa. Te, yoba ede nigl atne eigwa igne, nigl i mogl winabo di, ye i suna edumere mere yegl, yubun mere kide u na moraglmara winabo di, na i suna edenabuka. Ene yubun yegl mere ta ibr, kuno erabo? dugwa. 39Kuno erabiwe dibrika. Yegl dibriko, Jisas aglke kor yegl dugwa, Kaima, na nigl kide ta kogl nenaglka i, ene ama kogl nedre, na yubun podo inaglmere yegl, ene yubun podo yegl inabrika. 40Yegl inabrika ba yoba ta na ogona wo kra ya ogona koda kra ame dinabuka i, i na mina ta paikrukwa. Na Nina ira kra ame dinaiglkwa i, yene kere i pere edugo, i keme ame dinaiglmiwe dugwa.
41Ana Jisas duglo beglkwa yagl 10-pela ye Jems ya Jon ka yegl dibrika i prisre, ye deno kubro teigwa. 42Deno kubro teigo, Jisas ye agle di, wio dugo, ede magigl wigo, ye yegl di togwa, Yoba Juda yoba moglkre, yugobuno pere meglkwa i, ye yobano kade ebrie mabuno erikwa i, ene pre kan erikwa. Yobano kade, ye bitno meglme digwa i, ye yene mogl mitna edidre, yobano kan atne ede teigwa. Te, ye kingno ama ka dimere dimere i, sika sidre, yegl erio digo, erikwa. 43Yegl erikwa ba ene meglmara suna i, mabuno yegl kaima ta paikrabuka. Ene meglmara suna i, ene ta kade moragledi pratnga i, ene mogl atne edidre, yoba ake ple di tenatnga paugwa. 44Te, yoba ta mogl gumamugl edenagledi pratnga i, ene yoba mudu niglno kogono yoba mere yegl moratnga paugwa. 45Na Yoba Wam moglka i, ama kuno yegl mere yoba na niglna kogona ere naraiglmedi ukrika ba na yoba niglno kogono ere tenagledi wiga. Nigl kogono ere tedre, ye pre goglsre, topono tebo, yoba kane paimara i, kide kodidre, ede meda unaiglmedi pre wiwe di, Jisas yegl dugwa.
Yagl ta gumuglo koglo koglo kin yogwa i, Jisas ere wakai ere togwa
(Matyu 20.29-34, Luk 18.35-43)
46 Ana okuo Jisas ye duglo beglkwa yagl bogl ede pi dumo ta Jeriko we dimara ede suna pidre, aglke kor ede meda wigo, yoba mere kide ye wimara akie wigwa. Wigo, yagl gumuglo kin yogwa ta konbauna bina ame di mogl, ogo kugl, mige pre yana di moglkwa. Yagl i kagie Bartimeus we digwa. Kagie i, mabuno yegl mere paugwa, Timeus wam. 47Ana yagl i ame di moglsre, yoba tau Jisas, Nasaret nem ikra umiwe digo, prukwa. Prisre, ka podo di yegl dugwa, Jisas yo, Devit Gawamo motnga i, na mitna goglo! dugwa. 48Yagl i yegl dugo, yoba tau mere ye ka tedre, Ka kodo! digwa. Yegl digwa ba ye kano prikre, ka podo kaima di, Devit Gawamo motnga i, na mitna goglo! dugwa. 49Ana Jisas u adigl moglsre, yoba tau yagl i auro yu wio dugo, yoba ere mogl, yagl i agle di, yegl digwa, Ene gun yei, adiglo! Jisas ene wo dumiwe digwa. 50Yegl digo, yagl i ir gaglmo pia si makandigle edidre, tabre adigl, ede Jisas moglmara ogwa. 51Ogo, Jisas ye di pre, Ene siragl ere tenaglka pre dine? dugwa. Yegl dugo, yagl i di ikne ede, Neno Yagle yo, na aglke kor kanagledi priwe dugwa. 52Yegl dugo, Jisas di ikne ede yegl dugwa, Ene ede po. Ene na pre mediglnara pre ene gumugln u wakai omiwe dugwa. Jisas yegl dugo, yagl i gumuglo tabre kaima u wakai ogo, ye aglke kor kandre, Jisas omara duglo boglkwa.
Currently Selected:
Mak 10: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
