Mak 11
11
Jisas king mere yegl mogl, ede Jerusalem suna ugwa
(Matyu 21.1-11, Luk 19.28-40, Jon 12.12-19)
1Ana Jisas ye duglo beglkwa yagl bogl ede Jerusalem magigl udre, taun Betfage ya Betani muglo Oliv ibo yebrara ede magigl wigo, Jisas ye duglo biurka yoba suo dedidre, 2ye yegl di togwa, Ene dumo ta yomara iro suna pidre, donki ta kane kogl padiglbi, tabre kanabrika. Donki i, yoba ege swara ta au sikrikwa. Ene donki i kandre, kane poko ede, yunabrika. 3Te, yoba ta ene di pre, ene siragl pre donki i kane poko edibre? dibi, ene yegl diro, Yagl Kade kogonmo ta paugwa pre dugwa ba ye tabre te ikne edenabiwe di, ene yegl diro dugwa. 4Yegl dugo, yagl suo i ede dumo ta dumara i suna pidre, donki nagigle ta konbauna bina, yugu dramugl dua yomara kane kogl padiglko, kanibrika. Kandre, kane poko ede miurko, 5yoba tau magigl adigl meglkwa i ye di pre, Ene siragl pre donki nagigle i kane poko edibre? digwa. 6Yegl digo, Jisas ye dinabredi di tomere i di tebriko, yoba pra we digwa. 7Ana yagl suo i, ye donki nagigle yu Jisas moglmara edidre, ir gaglno gugl, donki moko bolamugl kiglbriko, Jisas donki au sidre, ede ogwa. 8Te, ye ede omara i, yoba tau mere ir gaglno gugl, Jisas konbauna unabara kugl yeigo, te tau, ede bina dage pi, ede yaudo ya ki bru yu maginagle kugl yeigwa. 9Yeigo, Jisas tebe ede pi moglkwa igne, yoba tau ede okna eigo, tau okuo wigo, Jisas yene suna ogwa. Eimara i, mudu aglage kaglkane ere, yegl digwa, God debie si tomniwa! Yagl ta Yagl Kade dedugo, ugwa i, God ye ere wakai ere tenabiwe!#11.9 Giglage 118.25-26 di, yegl didre, 10ye ama yegl digwa, Devit gawamo ta ugwa, Devit okna ibo no kingno moglmere no kingno morabuka i, ye debie si tedre, God heven ibo moglkwa i, debie si tomniwe di, yegl digwa.
11Ana Jisas ede Jerusalem suna pidre, ede tawa teigwa yugu yomara togl suna pi, kan winabo di, taragl mudu kan kodugo, min panagledi erukwa pre ye duglo beglkwa yagl 12-pela bogl aglke ede ikne pi dumo kebra Betani we dimara eigwa.
Jisas ede fik ta di kide yogwa
(Matyu 21.18-19)
12Ana dumo Betani pi pai, tagana mogl Jisas ye duglo beglkwa yagl bogl dumo Betani kide kodo, ede eigo, Jisas kidan goglsre, 13ye kan eglke ede, ede fik ta yaudo si paugo, kanugwa. Kandre, ede magigl pi mogo ta kogl pamo mo di, kanugwa i, mogo ta kogl paugo kankrukwa. Ede fik i, mogo koglkwa egemo yekrukwa pre yaudo keme paugo, kandre, 14ede i di kide yei te, Yoba okuo ta ene mogonen uro nekraiglmiwe dugwa. Yegl dugo, ye duglo beglkwa yagl pre meglkwa.
Tawa teigwa yugu yomara yoba taragl tau topo beglkwa i, Jisas si meda edugwa
(Matyu 21.12-17, Luk 19.45-48, Jon 2.13-22)
15 Ana Jisas duglo beglkwa yagl bogl ede Jerusalem suna eigo, Jisas ede tawa teigwa yugu yomara togl suna pidre, yoba taragl tau i pi topo bogl meglkwa i, si meda edugwa. Ye si meda edidre, mige topo suade erikwa yobamo i, bogl ake yake tedre, kua yumugl mige beglkwa yobamo i, siano ama ake yake tedre, 16ye ama tawa teigwa yugu yomara yoba taragl kane kane kake idre, konbauna i suna ede yei, ede iro pi, ede ya u, ere dinaiglmedi mane dugwa. 17Ye mane didre, yoba ka beke te, yegl dugwa, God kamo mina bage ta beglkwa i, yegl dugwa, Na yuguna i, yoba uglo koglo koglo meglkwa i, kamage eraiglkwa dumo ta yenabiwe#11.17 Aisaia 56.7 dugwa. Ba ene dumo i ere i kunogl gogl yoba teke paigwa dumo mere yegl edimiwe#11.17 Jeremaia 7.11 dugwa.
18Ana tawa teigwa yoba bitno meglkwa i ya God lomo beke teigwa yoba Jisas ka dugwa i prisre, ye kuduglmo podo gogl, Jisas si goramnedi konbauna dokigwa. I siragl pre yoba Jisas ka dugwa i prisre, mudu nagino kogl, wakai pre, kinano gudu meglkwa. 19Ana min paugo, Jisas ye duglo beglkwa yagl bogl Jerusalem kide kodo, ede meda eigwa.
Ede fik goglmara Jisas ye duglo beglkwa yagl ka beke togwa
(Matyu 21.20-22)
20 Ana tagugo, Jisas ye duglo beglkwa yagl bogl konbauna pi mogl, ede fik ikra kanigwa. Kanigwa i, ede fik ikra, duglane ede pi yaudo ogwa i, mudu gigle goglko, kanigwa. 21Yegl eruko, yagl Pita poglo di prisre, ye Jisas yegl di togwa, Neno Yagle, kano! Ene ede fik di kide yei tenga ikra gigle goglmiwe dugwa. 22Yegl dugo, Jisas ye duglo beglkwa yagl i mudu di tedre, Ene God yobuglomo pre medilo dugwa. 23Na ene ka kaima di teiga. Yoba ta nomane suo yeikre, muglo magigl i di te, God ene i pi mudi nigl suna edenabiwe! didre, ye ka dugwa i kaima plau dinabedi pre medran, God ye dumere ere tenabuka. 24Yegl pre na ka ta dibo, praiglkwa i, ene siragl taragl pre God agle didre, kamage ere praiglkwa i, ene i kodigwa mere yegl pre mediglbi, God ene tenabuka. 25-26Te, Ene adigl mogl, kamage eraiglkwa igne, yoba ta ene ere kide ere tenaiglkwa i, ene gugl ede teo! dugwa. Yegl eribi, ene Neno heven ibo moglkwa i ene tadaglme erikwa i ama gugl edenabiwe di, yegl dugwa.
Ira ene kagn kade tomedi yoba kade wagle Jisas kira peglkwa
(Matyu 21.23-27, Luk 20.1-8)
27Ana Jisas ye duglo beglkwa yagl bogl aglke kor ede ikne pi, Jerusalem suna eigo, Jisas tawa teigwa yugu yomara togl suna wan moglko, tawa teigwa yoba bitno meglkwa i ya te, God lomo beke teigwa yoba ya te, Juda yobano kade ye moglmara udre, 28kira pogl pre, yegl digwa, Ira ene dedugo, taragl yegl etne? Te, ira taragl yegl ero dugwa i, no di noro! digwa. 29Yegl digo, Jisas di ikne ede yegl dugwa, Na ama ka kira swara ta poglbo, ene di ikne ede naribi, ira na dedugo, kogon erika i, ene di tenagle dugwa. 30Jon yoba nigl bugl togwa i, God dedugo, erumo mo yoba dedigo, erume? Na di nario! dugwa.
31Dugo, yoba kade wagle yene meglmara di ikne ikne ede, ka di pre yegl digwa, Nono di ikne ede God ye Jon dedume dumun, yagl i ere mogl, Ene siragl eruko, Jon kamo pre mediglkrime? di norabuka. 32Ba nono di ikne ede, Makadigle yoba digo erume dumun, nono ama yoba kuduglno goramga paugwa. I siragl pre ye mudu prikwa i, yagl Jon i ye God kamo kep yoba kaima ta moglmedi primiwe di, yene ikne ikne yegl digwa. 33Yegl paugwa pre Jisas di ikne ede te, No ta pre kan erekrumniwe digwa. Yegl digo, Jisas yegl dugwa, Yegl eran we, ira na dedugo, kogon yegl erika i, ene ta di tebo, prikraiglmiwe dugwa.
Currently Selected:
Mak 11: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
