Mak 12
12
Yoba kide ede wain sugl moglsre, mabuno kide beglkwa ka ebrie
(Matyu 21.33-46, Luk 20.9-19)
1 Ana yoba kade wagle ka yegl digo, Jisas ka ebrie mina ka beke tedre, yegl dugwa, Yagl ta ede wain podo ere yaglsre, ede wain ere yaglmara togl ere winabo didre, suna wom yugu ta kei bodugl sugl kan moraiglmedi kedre, ye wain nuglo duglo inaiglmedi pre maugl ta pere yedre, erukwa. Ersre, ye ede bage ta enagledi yoba ta sugl mogl, mige teke yei naraiglmedi pre yoba ta ogono mina yedre, ede ogwa. 2Pi mogl prukwa i, erme wain mogo bogl yenabuka egemo yomedi prisre, ye nigl kogonmo yagl ta komono kana dedugwa. Dedidre, Ene ede wain sugl meglkwa yoba meglmara en, ye mige kia ta tebi, idre, ede ikne unatniwe didre, dedugwa. 3Dedugo, ogwa i, ede wain sugl meglkwa yoba i, ye si akidre, ere sidre, siragl ta tekre, yoko dedigo, ede ikne ugwa. 4Ede ikne ugo, wain nem yagl aglke kor nigl kogonmo yoba ta dedugo, ede ogwa. Ba ede wain sugl meglkwa yoba i, ye bre mina sidre, agai gorabedi eriko, yoko ede ikne ugwa. 5Ugo, wain nem yagl ta dedugo, ogwa i, ye si geglkwa. Yegl erikwa pre makan nem yagl i ere mogl, nigl kogonmo yoba tau aglke mere dagl dedugo, ede eigwa ba wain sugl meglkwa yoba i erimere ere, nigl kogon yoba tau ere sidre, tau si geglkwa. 6Yegl eriko, makan nem ye yagl swara kaima ta dedenabuka yoko moglkwa. Yagl i, ye wam, muduo suna moglkwa. Ana okuo kaima ede wain nem yagl i, nomane ta idre, Na pra wana dedibo, enan we, ye kandre, kamo praiglmiwe di prisre, ye wam dedugo, ogwa. 7Ba wain sugl meglkwa yoba ye kandre, yene di ikne ikne ede pre, yegl digwa, Wain nem yagl ikra wam ugwa pre siragl mudu sugl kan munga i, ye mudu inabuka umiwe digwa. Yegl pre ye si gun we, nono taragl mudu kan munga i, no nono pre yenabiwe digwa. 8Yegl didre, ye ake gi di mogl, si goglsre, pia si meda edime dugwa.
9Jisas yegl didre, ama yegl dugwa, Ana ede wain nem yagl yoba kade moglkwa i, ye erimara i siragl ere tenabedi prime? Ye ede ikne udre, ede wain sugl meglkwa yoba i mudu si gogl, ye makanmo i, yoba pere ogono wagle yenabiwe dugwa. 10Ene God kamo mina ka yegl ta paugo, kerekrikwa paugwa. Ka i yegl dugwa,
Kobuglo yugu keigwa yoba i,
ye kobuglo gade imara i kobuglo swara ta kide yomedi kandre, kide kodigwa.
Ba God yugu ta kenagledi kobuglo swara ta kide kodigwa i, idre,
Yugu kei ede mitna enabara i,
Mabunomugl mabuno bogl paduglmiwa.
11Yagl Kade yene yegl eruko,
No kandre, nagino podo kuniwe#12.11 Giglage 118.22-23
di, yegl dugwa.
12Ana Jisas yegl di kodugo, yagl kade wagle ikra, ye Jisas ka ebrie dugwa i, no di boglmedi prisre, Jisas si kane sinamnedi prikwa ba ye yoba kuduglno gogl, ye kanige ersre, ede eigwa.
Taks tenamno mo tekramnedi yoba Jisas kira peglkwa
(Matyu 22.15-22, Luk 20.20-26)
13 Ana okuo yagl kade wagle ikra ere mogl, Jisas aglau ta eran, kot tenamnedi ye Farisi yoba ya Herot yobama tau bogl akie enaiglmedi dedigo, 14ye pi Jisas yegl di teigwa, Tisa yo, no prumga i, ene ka du keme didre, yoba beke tenga. Ene yoba kade meglkwa mo yoko meglkwa i kerekre, God konbaunamo kuno keme yoba beke tenga. Yegl pre ene siragl we di pitne? Nono mige taks Rom king tenamga kuno erumo mo tekramne? digwa. 15Te, taks tenamno mo tekramne? di, yegl digwa. Yegl digwa ba Jisas ye bakagl narimedi kan pogl sidre, ye yegl di togwa, Ene siragl pre na aglau ere dinan, pramnedi na kira pogl prime? Ene mige silva ta naribi, kanaluwe dugwa. 16Yegl dugo, ye mige silva ta yu teigo, Jisas mige i kandre, yegl dugwa, Ira kwiamo ya kagie mige i mina pame? dugwa. Dugo, ye di ikne ede, Rom king kagie ya kwiamo pamiwe digwa. 17Yegl digo, Jisas ye yegl di togwa, Yegl eran we, taragl ta Rom king pre yenabuka i, Rom king teo. Te, taragl ta God pre yenabuka i, God teo! dugwa. Yegl dugo, ye prisre, nagino podo kiglkwa.
Sadyusi yoba tau ere mogl, yoba adigl u kor ta pikraiglmedi Jisas kira peglkwa
(Matyu 22.23-33, Luk 20.27-40)
18Ana okuo, Sadyusi yoba tau Jisas moglmara wigwa. Sadyusi yoba digwa i, yoba ta goglsre, adigl u kor ta pikraiglmiwe digwa. 19Ka yegl didre, tau Jisas moglmara u ka yegl digwa, Tisa yo, Moses ka ta bogl norumara i, yegl dugwa, Yagl ta abu inabuka ba gak kuglkre, goran, ye agigle ta morabuka i, abu werai i inan, gak kurabrika i, nem goglkwa agaimo idre, makanmo inabiwe dugwa. 20Moses ka bogl norumara i mina ka kira ta poramga. Aglke ta agigle agigle 7-pela meglkwa. Ta komono moglkwa i, abu ta yugwa ba ye gak kuglkre, goglkwa. 21Te, agigle namba 2 moglkwa i, abu i yugwa ba ye ama gak ta kuglkre goglko, agigle namba 3 ede pi 22namba 7 i mudu abu werai i idre, gak kuglkre, geglkwa. Ana okuo kaima abu i ama goglkwa. 23Agigle agigle 7-pela i, mudu abu swara i igwa pre yoba adigl u kor enaiglkwa igne, abu i, ira ebie morabuka i di noro! digwa.
24Ana Sadyusi yoba yegl digo, Jisas ye di ikne ede te, yegl dugwa, Ene God kamo pre pogl sikre, God yobuglomo siragl mere paugwa i, ama pre pogl sikrikwa pre ene nomano kugl dugwa. 25Yoba adigl u kor enaiglkwa igne, ye abu idre, ede yagl pidre, erimere yegl ta erekraiglkwa ba angelo heven ibo meglmere yegl moraiglkwa. 26Ba yoba geglkwa ka kaima adigl u kor enaiglkwa paugwa i, Moses kaima i nogugl ede kodugwa ba ene kere kankrikwa paugwa. Okna ibo God ede kebra ta de bauglo erumara u suna moglsre, yegl dugwa,
Na yagl Abraham, ya Aisak, ya Jekop Godno mogl pai moluwe#12.26 Isip Kide Kodigwa 3.6
dugwa. 27God kamo yegl dugwa i, ye yoba gogl kodigwa i, Godno moglkwa pre dikrukwa ba yoba kor mogl pai meglkwa i, Godno moglkwa pre dugwa. Ene siragl mere pre mediglkwa i, aglau podo erimiwe di, yegl dugwa.
Lo swara ta podo pai, mudu egre togwa pre dugwa
(Matyu 22.34-40, Luk 10.25-28)
28Ana ye ka drano yegl di meglko, God lomo beke togwa yagl ta u prukwa. Pre moglsre, Jisas ye di ikne ede togwa i, wakai dumedi prisre, ye Jisas kira pogl, yegl dugwa, God lomo paimara suna i, siragl lo podo pai, lo tau egre tome? dugwa. 29Yegl dugo, Jisas yegl di togwa, Lo ta podo pai, mudu egre togwa i, yegl pame dugwa, Israel yoba, ene prio! Yagl Kade nono Godno moglkwa i, ye swara Yagl Kade moglkwa. 30Yegl pre ene den mudun bogl mudu Yaglnen Kade God tedre, ene nomanen, ya yobugln bogl mudu, te ene mudu motnere God to#12.30 Lo 6.4-5 dugwa. 31Te, lo ta mokomugl paugwa i, yegl paugwa, Ene enene wakai kanere mere yegl, yoba ta magigl akie kipanaiglkwa i, ama yegl mere wakai kano#12.31 Tawa Teigwa 19.18 dugwa. Lo suo i podo pai, lo tau mudu egre tebriwe di, yegl dugwa.
32Ana Jisas ka yegl di kodugo, yagl i di ikne ede, yegl dugwa, Neno Yagle, ene ka kaima diniwe dugwa. Ene di notnga, God swara moglko, god pere ta moglkrikwa pre dinga i, ya te, 33deno muduno bogl, ya nomano ya yobuglno bogl mudu God tedre, no nono wakai kanumnere mere yegl, yoba ta magigl akie kipamga i, ama yegl mere wakai kanamga pre dinga i, ka kaima podo padre, tawa mudu gagl tege ere tenamga ya tawa mudu siragl mere tenamga i, ka kaima egre tomiwe dugwa. 34Yegl dugo, Jisas ye dugwa i, pre pogl sidre, dumedi kandre, ye yegl di togwa, God yoba kingno mogl, suglno morabara i, ene ede suna ukitnga ba ede magigl uniwe dugwa. Yegl dugo, mokomugl i, yoba okuo kira poraiglkwa i, kudugl geglkwa.
God Kere Yugwa Yagle, ye Devit gawamo keme ta moglkrabuka
(Matyu 22.41-46, Luk 20.41-44)
35Ana okuo Jisas ye tawa teigwa yugu yomara togl suna mogl, yoba ka beke te moglsre, yegl dugwa, God lomo beke teigwa yoba ene ka swara ta beke teigwa i, yegl digwa, God Kere Yugwa Yagle ta unabuka i, King Devit Gawamo ta unabiwe di, yegl digwa. Ba ye yoba yoko moran, kuno erabedi primo? 36God Kere Yugwa Yagl yoba yoko ta moglkrabuka i, nogugl paugwa. I siragl pre God Murubuglo ye okna ibo King Devit nomane togo, Devit ere mogl, ka ta God Kere Yugwa Yagl pre yegl boglkwa,
Neno Kade ere mogl, na Yaglna Kade yegl di togwa,
Ene ogona wo kra ame di moglo.
Na ene kudanen ikne yobuglo ere tedre,
kagln mina atne edinaluwe#12.36 Giglage 110.1
di, yegl dume dugwa. 37Devit yene God Kere Yugwa Yagl i pre na Yaglna Kade we dugwa ba yoba tau Devit gawamo morabe digwa i we, siragl pre ka yegl dime? Na di nario, dugwa. Dugo, yoba mere kide pre meglkwa i gun yei, grigle digwa.
God lomo beke teigwa yoba pre kan kun erio!
(Matyu 23.1-36, Luk 11.37-54, 20.45-47)
38Jisas ka beke te moglsre, yegl dugwa, God lomo beke teigwa yoba ene bakagl te dinaiglmiwa. Ye gagl suna olto, wakai yogwa i edinamnedi prisre, ye maket wanigwa igne yoba ye wakai we di teigwa i, gun podo yeigwa. 39Te, ka mabuno yugu yugugl eigwa igne mo yoba kaya mokna podo gaiglkwa igne, ye sia wakai, gumamugl iro ame dinamnedi prikwa. 40Ba ye abu werai meglmara bakagl te, yuguno toglno kunogl idre, ama yoba wakai muniwedi kamage olto kuri kaima erikwa. Yegl pre God yoba ka tage tenabuka igne, ye ka podo kaima inaiglmiwe, dugwa.
Abu werai ta mige mogo gogl suo God togwa
(Luk 21.1-4)
41Okuo Jisas ede tawa teigwa yugu pidre, mige boks yomara bina ia ame di mogl, yoba mige ofa tenamnedi mige i pi boks mina atne edigo, kan moglkwa. Kan moglko, mige podo kan neigwa yoba mere u mige podo boks i mina atne edigwa. 42Edigo, abu werai ta goduglme moglkwa mige mogo gogl suo ta i pi atne edugo, kanugwa. Mige mogo gogl suo togwa i, mige kebra kide yogwa. 43Kandre, ye duglo beglkwa yagl ede magigl wio didre, yegl dugwa, Na ene kaima di teiga, abu werai goduglme moglkwa i, mige podo togo, mudu mige kebra teigwa. 44I siragl pre ye mudu mige podo kawa tomara i mina ofa teigwa ba abu werai i, mige ta kan nomere mudu togwa. Ye migemo tau yoko yenan, ye ere nenabuka i ta yeikrume, dugwa.
Currently Selected:
Mak 12: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
