Mak 13
13
Yoba tawa teigwa yugu ere kide eraiglkwa i pre Jisas dugwa
(Matyu 24.1-2, Luk 21.5-6)
1 Ana Jisas ye duglo beglkwa yagl bogl tawa teigwa yugu yomara togl suna meglmara i kide kodo, ede meda eigo, ye duglo beglkwa yagl swara ta kan ikne ede, tawa teigwa yugu kandre, Jisas di te, yegl dugwa, Neno Yagle, ene tawa teigwa yugu yomara yugu tau mere keigwa i kano! dugwa. Yoba kobuglo tau podo kide idre, yugu tau keigwa i, wakai kaima kemiwe di, Jisas duglo boglkwa yagl ta yegl dugwa. 2Yegl dugo, Jisas ye di te, yegl dugwa, Ene yugu magigl kan dinga i, okuo yoba udre, yugu i si gur di atne edibi, kobuglo swara ta kobuglo ta yenabara tebe ta yeikrabiwe dugwa.
Yubun podo podo okuo plau dinaiglkwa
(Matyu 24.3-14, Luk 21.7-19)
3Ana Jisas tawa teigwa yugu yomara kide kodo, ede pi koglo ibo kra pidre, muglo meglbi Muglo Oliv we dimara pi ame di moglko, Pita yogo, Jems yogo, Jon ya Andru ye keme u, Jisas moglmara yegl di prikwa, 4Ene taragl yegl mere plau dinabe dinga i, aunake plau dinabe? Te, no siragl taragl kandre, taragl i plau dinabuka i, magigl erumedi pramne? digwa.
5Yegl digo, Jisas yegl dugwa, Yoba ta ene bakagl te dinaiglmedi kan kun erio. 6I siragl pre yoba tau mere na kagna mina udre, Na Krais moliwe didre, yoba mere bakagl tenaiglkwa.
7Te, yoba tau kuda beglme dibi, prisre, kuda yegl yegl plau dinarume dibi, ene ama praiglkwa ba ene kudugl goglkrio. I siragl pre taragl yegl mudu plau dinaiglkwa paugwa ba taragl pra pra dudunabuka ege i, okuo kaima unabuka. 8Kantri ikne ikne kuda beglbi, te, king ikne ikne ama kuda boraiglkwa. Imem podo podo unan, bage tau kidan podo kaima panaiglkwa. Taragl yegl mere mudu plau dinaiglkwa i, abu ta gak kuragledi mabuno bogl gagie giugl prumere mere yegl mere panabuka.
9Te, ene yoba pre kan kun erio! Ye ene si kane sidre, kot ere tedre, ka mabuno yuguno yenabara ene duglnai sinaiglkwa. Yegl ersre, ene na duglo beglmedi ene gudu i pi king ya gavana moraiglmara edenaiglkwa. Edibi, na kana yoba kade wagle ya yugobuno pere pere ta moraiglkwa i, ama di tenaiglkwa. 10Yoba na kana wakai yogwa i komono kana di tebi, yoba yugobuno pere pere uglo koglo koglo meglkwa i pribi, taragl mudu dudunabuka ege ikra okuo plau dinabuka. 11Ene i pi kot wagle edenaiglkwa igne, ene ka siragl mere kot mina di ikne ede tenaiglkwa i pre, pre yubun dekrio. Pre yubun dekre, God ka siragl mere ene di tenaiglmere mere igne i, ene tenabuka. Tenan, dinaiglkwa igne, ene digwa mere yegl ta paikrabuka ba Mudu Murubuglo ene drano mina ka dugwa mere yegl panabiwe dugwa. 12Ana yegl panan, yoba yene agroma i pi kot wagle edibi, ye si goraiglkwa. Te, yoba gagroma ere mogl, yene neno mano kano sedidre, i pi kot wagle edibi, yoba ye si goraiglkwa. 13Te, ene na duglo beglmedi yoba mudu ene kide kanaiglkwa. Ba yoba ta ibun idre, adigl gigledi mogl enan, ege kide i dudinan, God ye ere inabiwe dugwa.
Jisas taragl kide kaima ta plau dinabuka pre dugwa
(Matyu 24.15-28, Luk 21.20-24)
14Ana Jisas ka ta ama yegl dugwa, Taragl ta God gumuglo mina kide kaima yogo, taragl mudu ere kide erabuka i,#13.14 Daniel 9.27, 11.31, 12.11 dumo mawagl mina bodugl padiglbi, ene kanaiglkwa. (Prio. Yoba ta ka magigl paugwa kerenatnga i, pre pogl suo!) Ana ege i, yoba ta distrik Judia suna moraiglkwa i, ye teke ede muglo paimara ebi, 15yoba yugu idaule moraiglkwa i, ye taragl ta yugugl yenabuka ikre, tabre teke ede ebi, 16te, yoba kaya mokna ere yaiglmara kogon ere meglkwa i, ede ikne u kugugl gaglno wakai inamnedi erekre, mudu teke edenaiglkwa. 17Igne i, abu dano panabuka mo gak kebra am te moraiglkwa i, mitno erabuka. 18Te, ene teke ede enaiglkwa ege i, ir erabuka ege yei dinabedi kamage erio! 19Igne i, yubun podo kide kaima plau dinabuka. God dumo makan ere yogwa igne, ede u erme pra, yubun yegl mere ta plau dikrukwa. Te, okuo ama yegl ta plau dikrabuka. 20Ege kide plau dinabuka i, Yagl Kade tabre ta ere i sugunagle edekran, yoba mudu goraiglkwa mere yegl panabuka pre ye ere i sugunagle edenabuka. Ba ye yoba tau kere igrawa we di prisre, ege i, ere i sugunagle edenabiwe dugwa.
21Ege i, yoba tau ene yegl di tenaiglkwa, Ene kanio! Krais magigl i moglmiwe didre, Ye bage ta iro moglmiwe dinaiglkwa. Ba ye yegl dibi, ene ye pre mediglkrio. 22I siragl pre yoba ka kibi didre, Krais muniwe dinaiglkwa i, mere unaiglkwa. Te, ka kep yoba kibi meglkwa i, mere udre, kimagl ya diu podo ere, yoba bakagl tenaiglkwa. Te, ta kuno eran, God yoba ta kere i pere edugwa meglkwa i, ama bakagl tenaiglkwa. 23Yegl eraiglkwa ba na erme eglke pai moglko, siragl taragl okuo plau dinabuka i, ene di te kodiga pre ene kan kun ere molo! di, Jisas yegl dugwa.
Yoba Wam ede ikne unabuka
(Matyu 24.29-31, Luk 21.25-28)
24Ana Jisas yegl didre, ama yegl dugwa,
Yubun podo kide yegl unan, mokomugl i ade ake mim eran, ba ama abuglage sikrabiwa. 25Kugl kuri paigwa i, yage makadigle sibi, taragl tau heven ibo giglede paigwa i, ama piga kar dinaiglmiwe#13.25 Aisaia 13.10, 34.4
dugwa.
26Taragl yegl plau dinan, na Yoba Wam moglka i, kamun mitna ibo plau didre, na yobuglna ya abuglagena podo paugwa i nogugl edibo, na kanaiglmiwe dugwa. 27U plau dibo, yoba na kanibi, na angelo dedibo, ye ede uglo koglo koglo pi, yoba God kere yugwa meglkwa i, yu makai sinaiglkwa. Ye ade umara ya ade beimara pidre, te nigl bre ya nigl beye pidre, na yobanama yu makai sinaiglmiwe di, yegl dugwa.
Yoba ede fik kandre, nomane inaiglkwa ka padum
(Matyu 24.32-35, Luk 21.29-33)
28 Ana Jisas ka yegl di kodidre, ye ka ebrie swara ta yegl di togwa, Ede fik paugwa i, poglo di prisre, nomane io. Ede fik yogagle ake wida dugo, yaudo sugwa igne, ene kandre, niga dinabuka ege i yenabiwe di primere 29na taragl tau plau dinaiglme diga i plau dibi, ene kandre, na ede ikne unaglka igne i ede magigl u kodumedi praiglmiwe dugwa. 30Jisas yegl didre, ama yegl dugwa, Na ene ka kaima di teiga, Yoba erme meglkwa i goglkre, yoko meglbi, taragl yegl mere mudu plau di kodinan, okuo goraiglkwa. 31Kamun mitna ibo ya dumo makan dudunabuka ba na kana ta dudukre, aimadi kamun pai morabiwe dugwa.
Jisas ere mogl, Na aunake unaglka, yoba ta prikrime dugwa
(Matyu 24.36-44)
32Jisas yegl didre, ama yegl dugwa, Na aunake igne unaglka i, ade kwia mo ege i, yoba ta pre kan erekrikwa. Yoba ta pre kan erekriko, angelo heven ibo meglkwa i pre kan erekriko, te na God Wam moglka i ama pre kan erekrika. Na Nina swara ege i pre kan erukwa. 33Kuno yegl mere na aunake unaglka i, ene pre kan erekrikwa pre kwi ere molo! dugwa. 34Jisas yegl didre, ama yegl dugwa, I siragl pre na unaglka igne i yegl mere pame dinaglka. Yagl ta ede bage ta enagledi ersre, yene nigl kogonmo yoba na taraglna sugl mogl naraiglmedi yubu si tedre, yagl ta yugu dua sugl moglkwa yagle i ye yugu dua sugl morabedi dedenabuka. 35Kuno yegl mere ene ama sugl molo! Ene yugu nem aunake unabuka i, ene prikrikwa. Ye min panan unabo mo eduer suna unabo mo koduagle wi sinan unabo mo, tagna mogl unabo mo i, ene prikrikwa pre 36ene sugl moglkre, ugl pai meglbi, ye tabre u ene ugl pai moraiglkwa i kanan, i kide panabiwa. 37Na ene sugl molo diga i, ene na ka diga pre meglkwa i pre didre, yoba mudu pre diwe di, Jisas yegl dugwa.
Currently Selected:
Mak 13: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission
