Filemon 1
1
1Filemon yo, pepa magigl i, na Pol, Krais Jisas kogonmo erika pre na si kane sigo, moglka i, ene bogl teiga. Te nono agro Timoti bogl akie muglko, na pepa i boglka. Filemon ene motnga i, no deno muduno ene tedre, nono kogon yoba akie muniwedi prumga. 2Te no abaro Apia wakai we di tedre, yagl Arkipus, ye no bogl akie soldia mere yegl munga i wakai we di tedre, pre mediglkwa yoba ene Filemon kipanara makai sigwa i ama wakai we di tomga. 3Na prika i, Neno Kade God ya nono Yaglno Kade Jisas Krais ene ere wakai ere tedre, deno muduno wida di padigl tenabredi prika.
Pol ye Filemon debie sugwa
4-5Yoba ene kanen digo, prika i, ene Yagl Kade Jisas pre medigl moglsre, God yobama mudu den mudun te motne digo, na prika. Prisre, ene poglo di pre, kamage erika igne, na Godna ege ege di wakai yei teiga. 6Te, na ama kamage erika i, nono pre medunara i mina God yobama ake ple di tenatnedi kamage erika. Krais mina taragl wakai kane kane mudu inga pre kan etn, ake ple dinatnga u wakai enabuka. 7I siragl pre ene God yobama siragl mere deno muduno si gigle di tenga i, yoba di nariko, na prisre, gun yeigo, dena muduna ama aragan erukwa.
Filemon ye Onesimus na agra moglmedi kandre, di inabuka paugwa
8Ana ene boinen Onesimus ede ikne unabuka pre dibo, pratnga. Na Krais kagie mina adigl moglsre, ene siragl mere eratnere i, ka gigledi di tebo, kuno erabuka 9ba na dena muduna ene teiga pre ene ka gigledi di tekre, ka kiede dinagledi prika. Na yagl kidagl Pol, Krais Jisas kogonmo erimara i pre na si kane sigo, kane yoba moglka i, ene di teiga. 10Ene ta eratnedi prika i, yagl Onesimus, okna ene boinen paugwa i, ede ikne ene motnara unan, ene ye mabuno wakai ere tenatnedi prika. Onesimus i, na erme kane paimara ye kuglka, na wana mere yegl moglkwa. 11Te, na prika, okna Onesimus ye ene kogon wakai ere tekrukwa ba erme ye kogonmo wakai panabuka paugwa. Ye ene ake ple di tedre, na ama ake ple di narsre, erabuka i, kuno erukwa pre diga.
12Ana erme yagl Onesimus, na dena muduna suna moglkwa i, na dedidre, ene motnara ede ikne po diga. 13Na Jisas kamo wakai i yoba di teiga pre na si kane sigo, kane paiga pre ye na moglmara mogl pai morabedi prika. Moran, ene na ake ple di naratnere mere yegl, ye ene againen idre, ake ple di narabedi prika. 14Na yegl prika ba na okuo prika i, na ene di pribo, ene pra we din, ye na moglmara morabedi prika. I siragl pre na ene ka gigledi di tedre, ye na moglmara morabiwe dibo, i kide panabedi prika ba na ene di pribo, enene pitnere mere akie moglsro din, i wakai panabuka.
15Okna Onesimus ene kide kodidre, ene motnara ege sugunagle kaima ta moglkrukwa ba na prika i, God ye taragl yegl mere plau dinabedi kanige erumedi prika. I siragl pre ye ege sugunagle ta ene motnara moglkrukwa ege i, taragl wakai ta plau dugwa pre ye ede ikne ene motnara unan, ene Onesimus bogl aimadi kamin akie morabrika. 16Te, ye ede ikne unan, na boina keme moglmedi kankro. I siragl pre ye erme ene agitn moglkwa. Na ye kaniga i, ye na dena muduna suna moglsre, agra kaima ta moglmedi kaniga ba na prika, ene ye yegl mere kandre, ye wakai kaima kanatnedi prika. I siragl pre ye kogon erabuka i, ene wakai kandre, te Yaglno Kade mina na agra kaima moglmedi kanatnga.
17Ene na kabaglenen to moglmedi pitn, na mabuno wakai ere natnere mere ene Onesimus kuno yegl mere ama mabuno wakai ere to! 18Te, ye okna ene ere kide ere tedre, dina mere yegl erukwa i, ene pratnga, Na dinana i, Pol nare ikne edenabiwedi pratnga. 19Kaima na Pol, nana ogona mina ka magigl i boglsre, ye ene dinanen ta erukwa i, na ene te ikne edinaluwe diga. Ba ene pro, na kogon erimara i, ene u kor pidre, kor motnga pre ene pratnga, Pol dina podo ta ere narukwa pamiwedi pratnga.
20Agra, na Yagl Kade kagie mina ene di prika. Ene na dimere yegl, ere wakai ere naratnedi prika. Nono Krais yugobunomo mina swara muglka pre ene na dena muduna aragan erabedi etn, wakai panabedi prika.
21Na ka yegl mere ene bogl teiga i, na prika, ene na dinaglmere mere kaima duglo boratngra we di prisre, pepa i boglka. Te, na ama prika i, ene na dimere yegl ersre, taragl tau ama ere tebe edinatngra we di prisre, ene pepa bogl teiga.
22Te, na ka swara ta ama dinaglka i, ene kiule ta na panaglmara ere wakai ere naratnedi prika. I siragl pre na pre gi diga i, ene na kamage ere narimara i mina God na kane yugu i, i meda edidre, ene meglmara enatnedi konbauna yauro narabedi prika.
Pol yoba drano idre, Filemon di wakai yei togwa
23Na Epafras bogl akie Krais Jisas kogonmo erubuglka pre no si kane sigo, akie kane pabuglka i, ye ene wakai we di togwa. 24Te, kogon akie erumga yoba i, Mak ya Aristarkus ya Demas ya Luk, ye ama ene wakai we di teigwa.
25Nono Yaglno Kade Jisas Krais ye ene mudu deno muduno mina ere wakai ere te pai morabedi prika.
Currently Selected:
Filemon 1: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission