Taitus 3
3
God gagiglma ye mabuno wakai boraiglkwa paugwa
1Ana Taitus yo, ene pre mediglkwa yoba mudu di ten, ye gavman yoba ta bitno moraiglkwa i, moraiglmara mogl atne edidre, kano prio! di to. Pre mediglkwa yoba mabuno yegl eraiglkwa paugwa, te ye ama ege ege mabuno wakai ta panabuka i keme eramnedi prisre, mabuno wakai keme duglo boraiglkwa paugwa pre ene ama ye yegl eraiglmedi di to. 2Te, ye ama yoba swara ta kenaglmo sikre, yoba nonga si tekre, kiede moraiglkwa paugwa. Te, ye yoba mudu ere wakai ere tenamnedi prisre, ake ple di tenaiglkwa paugwa pre ene ye ama yegl eraiglmedi di to.
3Nono okna siragl mere munga i, ene pitnga. Nono okna Jisas pre mediglkunga igne, nono God mabunomo i ta pre pogl sikre, ye kamo sedumga. Te, yagl kide ama nono bakagl norukwa. Te, nono mabuno kide kane kane i wakai kandre, gun erme keme yenamnedi pre, mabuno kide kane kane erumnara i mina kane pamga. Nono yegl ersre, te nono ama yoba ta ido jelas ere tedre, kide kan, ere kide ere tomgo, ye ama nono kide kanigo, yegl ere wan munga.
4Nono okna mabuno kide yegl ere wan munga ba God nono ere yugwa yagl moglkwa i, ye Jisas dedumara i mina i nogugl ede, ye yoba mudu dem muduo norsre, ere wakai ere noragledi prukwa i, i nogugl edugwa. 5Ye mabunomo i, i nogugl edidre, nono yoko kaima ere yugwa. Nono mabuno wakai swara ta erumga pre God nono ta ere ikrukwa ba ye nono mitno goglmara swara i mina nono ere yugwa. Te, God nono ere yugwa igne, ye nono tadeglmeno ere edidre, nono ere i kor edugo, Mudu Murubuglo nono munara udre, kiano kor norukwa. 6God ye Mudu Murubuglo norukwa i, ye Jisas Krais, nono ere yugwa yagl i, kogon erumara i pre Mudu Murubuglo dedugo, nono munara si kau si norukwa.
7Ana God prukwa i, Na yoba yoko kaima ere wakai ere tebo, ye na gumuglna mina yoba du moglsre, taragl wakai wakai ama inaiglmiwe di prisre, nono ere yugwa. Te, God ama prukwa i, nono kor aimadi kamin moramga i nono pre pogl sinaiglmedi prisre, nono ere yugwa. Yegl pre nono God bogl aimadi kamin wakai moramga i, kaima plau dinabedi prisre, pre gi di, sugl moramga paugwa.
8Na ka tau God ye siragl mere nono yoko kaima ere yugwa pre magigl diga i, ka i kaima paugwa pre yoba ta God kamo pre mediglkwa ta moraiglkwa i, ye ka i praiglkwa paugwa. Te, God nono ere yugwa ka i, wakai padre, nono yoba ake ple di norukwa ka yogwa pre ene ka i yoba nigade beke te pai moglo. Beke te motn, ye God no ere yumiwedi pre pogl sidre, mabuno wakai keme duglo boramnedi kene eraiglmedi prika.
9Ana God nono ere yugwa ka i, ka wakai paugwa ba yoba ka mabuno kibi digwa i, mem wakai ta paikre, yoba ama ta ake ple di tekrukwa ka yogwa pre yoba ka mabuno kibi didre, ka drano dinaiglmara suna i, ene moglkro. Ka mabuno kibi digwa yobamo i, ye God lomo i pre ka kane kane didre, te God kamo mina okna ibo yoba kagno epigl beglkwa paugwa i ye kandre, yoba i kogon yegl yegl erimiwedi yene primere ka kibi tau beke idre, i God kamo dumniwe di, yoba di teigwa. Ye yegl mere didre, yoba bogl ka drano di, nonga digwa. 10Yoba ta ka mabuno kibi yegl mere didre, God yobama si pere pere edinamnedi eraiglkwa i, ene ye ka drano dinaiglmara suna i ta moglkratnga ba ene ye mane di ten, okuo ta dikraiglkwa paugwa. Ana ene mane di ten, prikribi, aglke kor mane di tenatnga. Ba ene aglke kor mane di ten, ye prikre, di pai meglbi, ene yoba i mokon tenatnga. 11Ene ye mokon tedre, ene pre pogl sinatnga i, yoba yegl ta erukwa i ye yene u kide pidre, tadaglme ere moglkwa, te yene mabuno kide erumara i mina ye ka idre, ede meda omiwedi, ene yegl kan pogl sinatnga.
Ka dudumara
12-13Ana erme yagl suo ene motnara unabrika. Ta, yagl Apolos moglko, te ta Senas, ye loya ta moglkwa. Yagl suo i, ene motnara udre, okuo God kogonmo erabugledi ede bage ta enabrika. Yegl pre ene ye ake ple di tenagledi ersre, siragl taragl ta inabrika mere panabuka i, ye ten, ye ede dumo ta enabrara i, pi plau dinabrika. Te, okuo, yagl suo i motnara udre, ede ebr, na yagl swara ta ene againen inabedi dedenaglka. Na yagl ta dedenaglka i, Artemas mo Tikikus swarano dedenaglka. Dedibo, ye swarano ta u ene againen inan, ene ailan Krit i kide kodo, na dumo Nikopolis moraglmara i, ede unagledi ero. I siragl pre ir erabuka igne, na dumo Nikopolis i moragledi prika.
14Na erme diga i, yagl suo Apolos ya Senas ubr, ene swara ye ake ple di tenatnga mere yegl diga ba ene swara ye ake ple di tekratnga. Nono yobanoma pre mediglkwa yoba mudu i ene di ten, ye ama yagl suo i ake ple di tenaiglmedi prika. I siragl pre pre mediglkwa yoba i ye mabuno wakai ersre, agroma abaroma taragl tau inaiglkwa panabara ake ple di tenaiglkwa mabuno i, ama beke inaiglkwa paugwa pre ene ye yegl eraiglmedi di to. Ye mabuno yegl beke ibi, ye yoko moglkre, moraiglmara mogo wakai koraiglkwa.
15Ana nono agroma abaroma tau na bogl akie munga i, ye mudu ene wakai we di teigwa. Te, ene ere mogl, yoba ta ka swara pre medunara i pre nono wakai kanaiglkwa yobamo i, ene ama na drana idre, Pol ene wakai we di tomiwe do.
Na prika, God ene mudu yoko kaima ere wakai ere te pai morabedi prika. Kaima.
Currently Selected:
Taitus 3: KB
Highlight
Share
Compare
Copy
Want to have your highlights saved across all your devices? Sign up or sign in
Copyright 2015 New Tribes Mission