Ka Di Poglkwa 12
12
Jon abu ya toki podo kide ta kanugwa
1Ana okuo, na kan moglko, diu podo to kamun mitna ibo plau dugwa. Diu i yegl mere paugwa, abu ta kamun mitna ibo moglko, na kaniga. Abu i, ye ba mina tebe adigl moglkwa. Ye kuguglmo gaglmo ade abuglage sumere mere yegl sugwa. Te, king bitno gagl edimere mere yegl, kugl kuri 12-pela ye bre gagl mere yegl edugwa. 2Ana abu i, dane paugo, ye gak kuragledi gagie giugl pre, grigle dugwa.
3Ana na diu yegl mere kandre, ama diu ta yegl mere kaniga, toki gogl podo kide ta kamun mitna ibo plau dugo, na kaniga. Toki i bre 7-pela koglkwa. Bre 7-pela paimara i, bre yogagle 10-pela ugwa. Te, bre swara swarade pamara i, king bitno gagl edugo, paugwa. 4Ana toki i, dem yagle mina kugl kuri tau mere kide brum di edugo, yage makandigle sigwa. Kugl kuri kamin mitna ibo paigwa i, bage suota mere yegl paigo, bage swara mere yegl, toki mudu si atne edugo, bage suo mere, ibo pai meglkwa.
Ana toki podo i, ye abu ta gak kuragledi erukwa ikra gumamugl moglsre, gak ta kuran, si nenagledi sugl kan moglkwa. 5Ye sugl kan moglko, abu i ye yagl gak ta kuglkwa. Yagl gak ta kuglkwa i, ye buglo muglbo ain mina ta bekigwa i ake idre, yugobuno pere pere uglo koglo koglo meglkwa i mudu bitno mogl, suglno morabuka#12.5 Giglage 2.9 moglkwa. Abu i, yagl gak i kuglko, God ye yagl gak i tabre ake i mina edidre, ye siamo king mina morabedi edugo, moglkwa. 6Moglko, abu i teke ede pi dumo ta wau yomara ogwa. Dumo wau yomara suna i, God ye dumo ta ere wakai ersre, ye ege 1,260 de agai i moran, angelo ye suglmo moglsre, kaya mokna i pi tebi, ne morabedi dumo i ere wakai eruko, ye teke ede dumo i ogwa.
7Ana igne i heven ibo kuda podo beglkwa. Angelo ta kagie Maikel we digwa i yogo, ye angelo tau sugl moglkwa i yeigo, ye kuda bogl, toki podo ikra angeloma bogl teigo, toki podo ya angelo tau ye duglo beglkwa i ama kuda bogl ikne ede teigwa 8ba ye yobuglno pai kuno erekrukwa pre ye okuo heven ibo mogl dinaiglmedi 9God ye toki podo i ya te, angelo tau ye duglo beglkwa i, pia si makandigle edugwa. Toki podo i, ye toki ta okna ibo moglkwa ikra moglsre, yoba uglo koglo koglo meglkwa i bakagl togwa yagle moglko, ye kagie Satan we didre, Yagl Kide we dumga.
10Ana na taragl yegl mere kanigo, yoba ta heven ibo moglkwa i ka podo ta dugo, na prika. Ye ka dugwa i, yegl dugwa, Erme nono Godno i, ye nono ere i kodugo, yobuglomo ede nogugl umiwe dugwa. Te, ye erme nono kingno mogl kodugwa. Te, ye Kere Yugwa Yagl moglkwa i, ama yoba mudu bitno moragledi namba i kodugwa. I siragl pre God ye Satan pia si makandigle edugwa. Satan, ye nono agroma abaroma aglauno etne ya eduer God gumamugl di pogl moglkwa i, erme God ye pia si makandigle ede kodume dugwa. 11Te, nono agroma abaroma meglkwa i, ye sipsip nagigle bormaimo suru edumara i mina yobuglo idre, ye kamo yoba di nogugl ede te meglkwa. Te, ye yene kor moraiglkwa i, pre i mitna edekre, sipsip nagigle pre goraiglkwa ama pra we digwa pre ye Yagl Kide yobuglo ere teimiwe dugwa.
12Ana taragl yegl mere plau dugwa pre ene angelo ya yoba mudu heven ibo meglkwa i, gun yeio! dugwa. Ba ene yoba ta makandigle wan meglkwa mo mudi nigl tebe wan meglkwa i, yubun podo kide inaiglkwa. I siragl pre Yagl Kide ede atne u ene meglmara moglsre, dem podo kubrukwa. I siragl pre ye prukwa i, ege sugunagle keme mogl pai moraglka pamiwe di pre, kide prumiwe di, yoba ta heven ibo moglkwa i yegl dugwa.
13Ana toki podo ikra, God na pia si makandigle ede kodumiwedi pre kan ersre, abu ta yagl gak kuglkwa i sinagledi sika sugwa. 14Ye sika sugwa ba God ye kua kigla koye suo abu i padigl togo, ye pur di ede pi dumo wau yomara ta teke panabedi God ere yei tomara i ede ogwa. Ye pidre, bugla yugu suota mudu moglsre, bugla yugu ta ikne dumo i toki podo na kan dinabedi teke paugo, angelo tau ye suglmo moglsre, kaya mokna teigwa. 15Abu teke ede ogwa igne, toki podo ikra abu i nigl nedre, gorabedi pre ye dra mina nigl we di i meda edugo, nigl podo i, abu teke ede omara sika sugwa. 16Sika sugwa ba dumo makan ere mogl, abu i ake ple di tedre, makan buko di ede koglo koglo ogo, toki nigl we di i meda edugwa ikra, ede makan atne ogwa pre abu i si goglkrukwa. 17Yegl erukwa pre toki podo i, ye abu i dem podo kubro tedre, ede pi ye gagiglma tau, God kamo duglo boglsre, Jisas kamo yoba di te meglkwa i sinagledi ede ogwa.
18Ana okuo, toki podo i ere mogl, mudi nigl bina adigl moglko, na kaniga.
Currently Selected:
Ka Di Poglkwa 12: KB
Highlight
Copy
Compare
Share
Want to have your highlights saved across all your devices? Sign up or sign in
Copyright 2015 New Tribes Mission
