Ka Di Poglkwa 11
11
Yagl suo ye God kamo yoba di tebrika
1Ana angelo ta ere mogl, buglo sie ta muglbo mere yegl yogwa i narsre, yegl dugwa, Ene ede pi God yugumo sie yedre, tawa bogl ta kiglkwa i ama sie yei, yoba siramna ta ye God yugumo yomara togl suna mogl, God debie si meglkwa i, ama kerenatne dugwa. 2Ba agai ta togl meda yogwa i, ene sie yeikro. God ye dumo i, yoba ta Juda yoba moglkrikwa i togwa pre sie ta yeikratniwe dugwa. Yoba ye yugobuno pere mogl, Juda yoba moglkrikwa i, ye God taunmo kuda bogl tedre, yobuglo ere, ba 42-pela mere ege 1,260 de yegl God taunmo i, sugl moraiglme dugwa.
3Sugl meglbi, yagl suo na kana yoba di nogugl ede tenabredi yobuglo bogl tenagliwa. Na yobuglo bogl tebo, yagl suo i ye deno muduno ibun dogwa pre kugugl gagl kide edidre, ba 42-pela ege 1,260 de mere yegl na kana kep ere dinabriwe di, Krais yegl dume di, angelo i yegl dugwa.
4Ana yagl suo i, ye Yagl Kade, dumo makan mudu sugl moglkwa yagl i gumuglo mina ede oliv suo ya ken lam suo mere yegl miurka. 5Yoba ta ye ere kide ere tenamnedi eribi, ye drano mina doga drabie ede meda pi yoba i si gorabuka. Yegl pre yoba ta ye ere kide ere tenamnedi eraiglkwa i, mudu doga de, goraiglkwa paugwa. 6Te, yagl suo i, God ye kimagl kane kane erabredi yobuglo tenabuka pre ye ka kep ere di morabrika igne i kamun sikrabedi eribr, kamun sikrabuka. Te, nigl ama ede u bormai koglo enabedi ersre, yubun kane kane dumo makan mina plau dinabedi erabrika i, kuno erabuka pre ye kimagl kane kane yegl ta erabugledi prabrika igne, erabrika keme paugwa.
7Ana yagl suo i ye Krais kamo yoba di te kodibr, agl bugla are ta mur yei ede atne kaima omara i mogl, ede meda ugwa ikra ere mogl yagl suo i, kuda bogl tedre, ye yobuglo ere te, ye si gorabuka. 8Si goran, ye ogono nagino, taun ta yoba okna ye Yaglno Kade Jisas si geglmara i, konbauna suna yenabuka. Taun i kagie, ka ebrie mere yegl, dumo Sodom mo Isip we dinamga. 9Ana yagl suo i, ogono nagino ege suota yedre, ege namba 4 ikne keme meda yegl yenan, yoba uglo koglo koglo moglsre, yugobuno pere pere mogl, ka pere pere digwa i, ye ogono nagino toro kan moglsre, yoba ye maugl si dinaiglmedi mane dinaiglkwa. 10Te, yagl suo i giurka pre makandigle yoba wakai prisre, gun yei, ye gun yeigwa pre taragl wakai te ikne ikne edenaiglkwa. I siragl pre yagl suo i komono kana kide kane kane makandigle yoba meglkwa i, sinabedi eribr, ye giugl praiglkwa pre okuo yagl suo i giur, yoba i gun yenaiglkwa.
11Ana yagl suo i, ogono nagino ege suota mudu meda yedre, ege swara ta ikne keme meda yegl yenan, God ere mogl, ye pipo didre, kor morabredi eran, ye yene adrabrika. Adiur, yoba ye kan moraiglkwa i, kudugl podo goraiglkwa. 12Te, yagl suo i adiur, God heven ibo mogl, di atne ede, Ene ede egli wiro! dinan, ye kudano ikne kan meglbi, yagl suo i ye God ka dinabuka i prisre, ede egli ibo pi, kamun kua mina suna pidre, ede heven ibo enabrika.
13Ana yagl suo i adiglsre, ede heven ibo enabrika igne i imem podo kide ta udre, taun kade suna yomara i, yugu togl bage bage yenaiglmara i, bage swara mere ere kide ersre, bage 9-pela mere kanige erabuka. Yegl plau dinan, yoba 7,000 goraiglkwa. Geglbi, yoba ta kor moraiglkwa i kudugl goglsre, God ye heven ibo moglkwa i kagie kade tenaiglkwa.
14Ana yubun podo suota plau dinaiglkwa paugwa i, yubun namba 2 yegl mere udre, dudugo, na kaniga ba yubun swara ta ama tabre plau dinabuka pai moglkwa.
Angelo namba 7 ye biugelmo pu dugwa
15Ana okuo, angelo namba 7 i, ye biugelmo pu dugo, be dugwa igne, angelo heven ibo meglkwa i ka podo yegl digwa,
Nono Yaglno Kade i ya te, ye Kere Yugwa Yagl i, ye king moglsre, dumo makan mudu bitno mogl kodibrika.
Te, God ye aimadi kamin king morabiwe
di, yegl digwa.
16Ana angelo yegl di kodigo, bitno yagl 24-pela ye siano king mina ame di mogl, God gumuglo mina meglkwa i, yage kobragai padre, God kagie kade te, 17yegl digwa,
Yagl Kade God yo, yobugln pai kawa togwa motnga i, no ene di wakai yei tomga.
Ene motnga i, ene okna aimadi kamin moglsre, erme ama mogl pai motnga.
No ene di wakai yei tomga i, i siragl pre ene yobugln podo pamara i mina
ene taragl mudu i atne ede kodidre, erme yoba mudu bitno motnga.
18Yoba yugobuno pere pere meglkwa i, ye ene deno kubro teigwa ba ene ye kubro tenga i, erme i nogugl edinga.
Erme ene yoba geglkwa i, kotno pratnga ege yogwa.
Ene ye kotno prisre, ama nigl kogonen yoba ka kep erikwa i ya te, ene yobanma mudu topo wakai tenatnga.
Te, yoba kade meglkwa mo kebra meglkwa mo,
ene kuduglnen geglkwa i, ene topo wakai tedre,
ama makadigle u kide enabedi erikwa mabuno meglkwa i, ene ere kide ere te kodinatniwe
di, yegl digwa.
19Ana igne i God yugumo heven ibo yogwa i yauro edigo, na kaniga i, God ka di te paduglkwa boksmo ikra yugugl yogo, na kaniga. Kanigo, kamun tai sidre, kamun gur podo di pai moglko, imem ta makandigle ugo, te, aragl mogo podo kaima yage makandigle sugwa.
Currently Selected:
Ka Di Poglkwa 11: KB
Highlight
Copy
Compare
Share
Want to have your highlights saved across all your devices? Sign up or sign in
Copyright 2015 New Tribes Mission
