Ka Di Poglkwa 10
10
Angelo buk kebra ta ake moglsre, Jon togo, nogwa
1Ana na taragl yegl mere kan kodidre, ama ta kaniga i, angelo gigledi kaima ta ama moglkwa i, heven ibo mogl, ede atne ugo, na kaniga. Angelo i, ye kamun kua kruo were moglko, te ye bre mina titokubun tebe boglkwa. Te, ye guma dra ade abuglage sumere mere yegl abuglage sugo, ye kagle koglo koglo i, doga drabie ede mitna ugwa mere yegl kaniga. 2Te, angelo i ye ogo mina buk kebra ta pogl, ake moglkwa. Angelo i ye kagle wo kra mudi nigl egrisre, te kagle koda kra dumo makan egrukwa. 3Ye yegl mere adigl moglsre, laion be podo dumere mere yegl ka podo dugo, kamun ege 7-pela gur dugwa. Gru dugwa i,yoba mere yegl dugo, na prika. 4Ana kamun gur didre, ka siragl mere dugwa ibo, na bogl atne edenagledi erika ba yoba ta heven ibo mogl, ka ta yegl di narukwa, Kamun ege 7-pela gur didre, ka siragl mere dugwa i, ene pre i nomanen suna keme ede, bogl atne edekro! di, yegl di naruko, na bogl atne edekrika.
5Ana angelo ta mudi nigl ya dumo makan egruko, na kaniga ikra, ye ere mogl, ogo wo ake mitna ede, heven ibo buglo sidre, 6-7God kagie mina ka gigledi yegl dugwa, God ye sugl kanana moglkwa i, dudumiwa. Angelo namba 7 ye kuri ta mogl, biugelmo pu dinan, God ye siragl mere eragledi prukwa i, kaima plau dinabe dugwa. God ye eragledi prukwa i, okna ye niglmo kogonmo yoba tau ye kamo kep yoba ta meglkwa i keme di togwa ba biugel i boran, God siragl mere eragledi prukwa i, plau di, ede u nogugl pi kodinabiwe di, yegl dugwa. Ye God kagie mina yegl dume diga i, God kor aimadi moglsre, kamun mitna ya dumo makan ya mudi nigl ere yogwa yaglmo moglkwa i kagie mina dugwa pre diga. Te, ye taragl kane kane kamun mitna ya dumo makan mina ya mudi nigl atne meglkwa ya paigwa i, ye ere yogwa yagl moglkwa i, kagie mina dugwa pre diga.
8Ana taragl yegl mere plau dugo, yoba ta okna heven ibo ka ta dugo, na prika i, aglke kor na di narsre, yegl dugwa, Angelo ta mudi nigl ya dumo makan egre moglkwa ime, ye buk kebra ta pogl, ake moglkwa i, ene pi yo! dugwa. 9Yegl dugwa pre na angelo i moglmara pidre, Buk kebra i, naro diga. Na yegl digo, angelo i di ikne ede narsre, yegl dugwa, Ene buk i, idre, no! dugwa. Ene nen, dran mina brume nuglo druo erumere yegl erabuka ba den biglko mina giu erabiwe#10.9 Esekiel 3.3 di, yegl dugwa. 10Yegl dugo, na buk kebra i idre, neiga. Na neiga igne, kaima drana mina brume nuglo mere yegl druo erukwa ba na ne atne edigo, dena biglko mina giu erukwa.
11Ana na neigo, yoba ta di nariko, prika i, Ene God kamo aglke kor kep ere, bogl atne edin, yoba kantri pere pere ya yugobuno pere pere meglkwa i ya, ka pere pere digwa i ya te, ye kingno meglkwa i, i mudu pre ka kep ere dinatniwe, di, yegl di narikwa.
Currently Selected:
Ka Di Poglkwa 10: KB
Highlight
Copy
Compare
Share
Want to have your highlights saved across all your devices? Sign up or sign in
Copyright 2015 New Tribes Mission
