Dɩtʋm 16
16
Timoti kpaŋ Pɔɔlʋ na Silasi
1Sɛ Pɔɔlʋ kɔŋ Dɛbɩ, sɛ wʋ ju dʋɔ ju Lisitira dɩɛ naŋ, diele gaa kpalɛnarɛ wʋŋ baa yagɛ ɩ sɛ Timoti chaɩ. Wʋnaa yɩɛ Yuda wʋkpa lɩɛdɩrɛ bɛ, ama wʋjuo bɩrɛ yɩɛ Giriki wʋkpa bɛ. 2Lɩɛdɩra baa ba wɩɛ Lisitira na Ikoniyom na tawɩ wʋ wʋsɛ dʋɔ wɩɛ abama. 3Pɔɔlʋ aja sɛ wʋ a mʋ ɩ kpi wʋ wʋsɛ dʋɔ ju gbɩɛ, dɩmʋŋ dʋɔ wʋ kara wʋ baŋlɛ Yudatina baa ba chaɩ dɩmaŋ na kpiniŋ dʋɔ, akala takɩɛ ba jiŋ gʋ wʋ juo yɩɛ Giriki wʋkpa bɛ. 4Gʋ ba pala lɩɩ dɩɛsɛ naŋ baa ju dɩɛsɛ naŋ na, ba tawɩ wɩɛ ŋii kpirida na lɩɛdɩra dikpeŋ bɩnɩɛ baa ba wɩɛ Yerusalem lɩɛ dʋ na fa bakpa baa sɛ ba n di dʋɔ. 5Dɩmʋŋ dʋɔ lɩɛdɩra akpeŋ ŋii yɩɛ doŋ ŋɩ lɩɛdi naŋ yela ŋii bɩɩ wɩɩ kʋma.
Pɔɔlʋ yu Ɩsʋɔ lɩsɛ kalaa Tʋrasɩ
6Sɛ Pɔɔlʋ na wʋ dɔŋa mʋna Firigiya na Galati tibi dʋɔ, akala takɩɛ Ɩsʋɔ Feliŋ n fa ba gbɩɛ sɛ ba n tawɩ Ɩsʋɔ wɩɛ Asiya tibi dʋɔ ɔ. 7Gʋ ba ga tala Misiya dɩkpalɩŋ na, ba chɩdɩsɛ baa jʋʋ Bitiniya dɩɛ naŋ, ama Yesu Feliŋ n fa ba gbɩɛ ɛ. 8Dɩmʋŋ dʋɔ ba mʋna Misiya ju Tʋrasɩ dɩɛ naŋ. 9Yuluma na, Pɔɔlʋ yu Ɩsʋɔ lɩsɛ kalaa sɛ wʋ na gʋ Masidoniya baalɛ wʋrʋ sɩmɩɛɩ wʋ a sʋlʋ ɩ sɛ, <<Kɔŋ Masidoniya gaa chɔna daa.>> 10Gʋ Pɔɔlʋ yu Ɩsʋɔ lɩsɛ kalaa ŋii wʋrʋgbɩɛ na, dɩ kʋla daa wʋsɛ bʋdʋŋdʋlʋŋ na dɩɩ ju Masidoniya, akala takɩɛ dɩ jiŋ gʋ Ɩsʋɔ n yagɛ daa sɛ dɩ n gaa tawɩ wɩɛ abama ŋii fa ba.
Lidiya lɩɛ Kpaŋjuo di Filipi dɩɛ naŋ
11Dɩ lɩɩ Tʋrasɩ cha ɔpʋ dʋɔ ju Samotiraki. Gʋ tɩɛna na, sɛ dɩ ju dʋɔ ju Niyapolisi. 12Sɛ dɩ lɩɩ dɩmaŋ ju Filipi gaa ga yɩɛ dɩɛ janɛ gakpari Masidoniya tibi dʋɔ, sɛ ga wɩɛ Romatina tie. Dɩ cha dɩmaŋ gɩyɩɛnɩŋ fɔɩ.
13Gʋ Fɩɛsɛ wɩɩ talɛ na, dɩ lɩɩ dɩɛ gaa naŋ ju lɩɩ nʋɔ, dɩmaŋ sɛ dɩɩ kɩɛ sɛ dɩɩ yu dɩga dɩjʋɔtɩŋ. Dɩ cha dɩmaŋ sɛ dɩ fara dɩɩ tawɩ dɩɩ fa ala baa ba sɩla dɩmaŋ. 14Ala baa baa nyii na tɩba wʋrʋ wʋ yɩrɛ n nyina Lidiya wʋ lɩɩ Tatira dɩɛ janɛ gaa naŋ bɛ, sɛ wʋ a yaa akura ŋii ŋɩ yawʋ wɩɛ doŋ. Wʋ a tʋŋ Ɩsʋɔ sɛ Kpaŋjuo fulu wʋ digela sɛ wʋ lɩɛ Pɔɔlʋ wɩɛ ŋii. 15Gʋ ba sɔ wʋ na wʋ waa dʋɔtina na, wʋ yagɛ daa ju wʋ waa dʋɔ. Sɛ wʋ tawɩ daa sɛ, <<Sɛ ɩɩ kɩɛ maŋ takɩɛ ma yɩɛ lɩɛdɩrɛ Kpaŋjuo naŋ na, n kɔŋ gaa cha ma waa dʋɔ.>> Sɛ wʋ sʋlʋ daa sɛ dɩ kpa.
Ba tɔ Pɔɔlʋ na Silasi danɛ
16Gɩyɩɛ gʋrʋ gʋ dɩɩ ju dɩga dɩjʋɔtɩŋ na, dɩ jaŋina gbeŋi galibie wʋŋ feliŋ sʋbʋ wɩɛ wʋ tɩba sɛ wʋ a dɩlɛ wʋ a gbala ŋii ŋii kɔŋ chifuo. Wʋ a yu aterembie fɔɩ wʋ a fa wʋ kpaŋjuo aba lɩɩ wʋ gbalɩŋ ŋii naŋ. 17Dɩmʋŋ galibie wina kpaŋ Pɔɔlʋ na daa baa dɩ kakaa na yela wʋ a kuusi sɛ, <<Dɩmʋŋ bakpa bana yɩɛ Ɩsʋɔ Wʋjanɛ wʋŋ tʋmɩra bɛ, baa aaŋ kalaa amɩɛ gbɩɛ gaa ɩɩ mʋ yu mɔlɔgɩ.>> 18Wʋ ju dʋɔ wʋ a yɩɛ ŋina gɩyɩɛnɩŋ fɔɩ. Dɩtamtɩŋ na, Pɔɔlʋ kara biŋbira fɔɩ sɛ wʋ biliŋi kɩɛ tawɩ feliŋ sʋbʋ wʋŋ sɛ, <<Ma dʋ nyaŋ Yesu Kirisito yɩrɛ naŋ sɛ lɩɩ wʋ tɩba!>>Gabʋanaŋ sɛ feliŋ sʋbʋ wʋŋ lɩɩ wʋ tɩba.
19Gʋ gbeŋi galibie wʋŋ wʋ kpaŋjuo aba na gʋ ba tamaa gaa baa yu aterembie tam na, ba chaŋ Pɔɔlʋ na Silasi fɔŋɩ ba ju gɩyɩɛnaŋ mʋ ba ga sɩŋ wɩɛ dira asanaŋ. 20Ba kɔna ba wɩɛ dira asanaŋ gaa tawɩ sɛ, <<Baala bana yɩɛ Yudatina bɛ, sɛ baa ja sɛ baa bala daa dɩɛ fu, 21sɛ baa kalaa ayɩɛsa ŋii daa Romatina mbara n fa gbɩɛ sɛ dɩ n lɩɛ dʋ yaa dɩ n yɩɛ ɛ.>>
22Sɛ jama baa gba kʋlʋ Pɔɔlʋ na Silasi dʋɔ, sɛ wɩɛ dira baa dʋ sɛ ba n fulu ba abʋrɩ afuusa na baa taɩ ba. 23Gʋ ba taɩ ba na dieli taŋ na, ba mʋ ba ga tɔ danɛ sɛ ba tawɩ danɛ dɩtʋɔtɩŋ kɩɛrɛ wʋŋ sɛ wʋ n gara ba na dieli. 24Gʋ wʋ lɩɛ dɩmʋŋ dʋ ŋina na, wʋ mʋ dɩgbaraŋgbaraŋ pɔgʋ ba nafara mata digbiliŋ sɛ wʋ mʋ ba dʋ danɛ dɩtʋɔtɩŋ lorinaŋ.
25Aja yɩɛ takɩɛ tɩɛtɩtɩba na, Pɔɔlʋ na Silasi a jɔ dɩga yela baa kpie numbasɛ baa fa Ɩsʋɔ yela ba dɔŋa danɛtʋɔra baa a nyii ba jaŋ. 26Gabʋanaŋ sɛ tibi jigisi gaa ga nʋɔ wɩɛ doŋ jigisi danɛ dɩtʋɔtɩŋ gaa tie dɩpɔrɛ. Gabʋanaŋ sɛ danɛ dɩtʋɔtɩŋ gaa bʋɔlɩɛ ŋii tʋlʋ sɛ ba wʋkʋma agbaraŋgbaraŋ ŋii buoli. 27Gʋ danɛ dɩtʋɔtɩŋ kɩɛrɛ wʋŋ feŋ na gʋ bʋɔlɩɛ ŋii tʋlʋ na, wʋ fɔŋɩ wʋ yuo dabɩla na wʋ a kʋ wʋ wʋsɛ, akala takɩɛ wʋ jiŋ sɛ danɛtʋɔra baa sebi. 28Ama Pɔɔlʋ kuusi na doŋ sɛ, <<N baa pɩra n wʋsɛ daa kpiniŋ dɩ wɩɛ jɩna!>>
29Sɛ danɛ dɩtʋɔtɩŋ kɩɛrɛ wʋŋ yela sɛ ba mʋ fitila kɔna ɩ, sɛ wʋ yɩɛ bileŋ jʋʋ gaa sala Pɔɔlʋ na Silasi asanaŋ yela wʋ a selesi. 30Sɛ wʋ lɩsɛ ba kɔŋ asʋŋ gaa tasɛ ba sɛ, <<Ma kpaŋjuo aba, be sɛ ŋɩ tiri gʋ ma n yɩɛ na maa yu mɔlɔgɩ?>>
31Sɛ ba lɩsɛ ɩ nʋɔ sɛ, <<Lɩɛ Kpaŋjuo Yesu di, nyaŋ na n waa dʋɔtina ɩɩ yu mɔlɔgɩ.>> 32Dɩmaŋ sɛ ba tawɩ Ɩsʋɔ wɩɛ ŋii fa wʋ na baa ba wɩɛ wʋ waa dʋɔ na kpiniŋ. 33Dɩmʋŋ yuluma saŋa gana, danɛ dɩtʋɔtɩŋ kɩɛrɛ wʋŋ kpaɩ ba awʋnda, gabʋanaŋ sɛ ba sɔ wʋ na wʋ lʋŋtina kpiniŋ. 34Danɛ dɩtʋɔtɩŋ kɩɛrɛ wʋŋ mʋ ba kɔŋ wʋ waa dʋɔ sɛ wʋ fa ba adiya. Wʋ asadi akala takɩɛ wʋ na wʋ lʋŋtina kpiniŋ ba lɩɛ Ɩsʋɔ di.
35Gʋ tɩɛna na, wɩɛ dira baa kpiri ba gagbasɛ anyaŋnyaŋtina ga tawɩ danɛ dɩtʋɔtɩŋ kɩɛrɛ wʋŋ sɛ, <<Yela dɩmʋŋ baala bana.>> 36Danɛ dɩtʋɔtɩŋ kɩɛrɛ wʋŋ tawɩ Pɔɔlʋ sɛ, <<Wɩɛ dira baa dʋ maŋ sɛ ma n yela nyaŋ na Silasi. Dɩtɩɛna ɩɩ dɩlɛ lam. N pala wʋsɛfɩɛ naŋ.>>
37Ama Pɔɔlʋ tawɩ gagbasɛ anyaŋnyaŋtina baa sɛ, <<Ba tugu daa bakpa naŋ yela ba n di daa wɩɛ ɛ, sɛ ba tɔ daa danɛ hali gʋ dɩ yɩɛ Romatina na gba. Sɛ dɩtɩɛna baa ja sɛ baa wɩsɛ lɩsɛ daa? Aye, yela ba tɩŋtɩŋ baa gaa lɩsɛ daa.>>
38Sɛ gagbasɛ anyaŋnyaŋtina baa ga tawɩ wɩɛ dira baa, gʋ ba nyii sɛ Pɔɔlʋ na Silasi yɩɛ Roma dɩɛsɛ bie na nyɩŋtɩɛ nyaŋ ba. 39Ba kɔŋ gaa duo ba dɩsɩsɩ sɛ ba lɩsɛ ba lɩɩ danɛ dɩtʋɔtɩŋ gaa, sɛ ba sʋlʋ ba sɛ ba n lɩɩ dɩɛ janɛ gaa naŋ. 40Gʋ Pɔɔlʋ na Silasi lɩɩ danɛ dɩtʋɔtɩŋ na, ba ju Lidiya waa dʋɔ dɩmaŋ sɛ ba sɩla lɩɛdɩra baa sɛ ba tawɩ dʋ ba. Sɛ ba lam.
Currently Selected:
Dɩtʋm 16: CLL
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy amp Bible Translation
