Dɩtʋm 17
17
Pɔɔlʋ na Silasi wɩɛ Tesalonika dɩɛ naŋ
1Gʋ Pɔɔlʋ na Silasi ba mʋna Amfipolisi na Apoloniya dɩɛsɛ naŋ na, ba kɔŋ Tesalonika dɩɛ naŋ, diele gaa Yudatina tʋm danɛ cha ga wɩɛ. 2Sɛ Pɔɔlʋ jʋʋ Yudatina tʋm danɛ gaa naŋ ganaŋkʋ wʋ ayɩɛsa a kalaa, sɛ wʋ na ba mɩɛgɩ-mɩɛgɩ Ɩsʋɔ Sabɩɛwɩɛ ŋii naŋ Fɩɛsɛ wɩɩ atoro. 3Pɔɔlʋ kalaa tɩba mʋ kalaa sɛ dɩ daga na Kirisito#17:3 Wʋŋ wʋdʋŋdʋlʋŋ wina n nyina Mesaya. a na awʋrʋfʋɔ na wʋ a feŋ lɩɩ sɩŋ naŋ. Sɛ wʋ bɔrɛ tawɩ sɛ, <<Dɩmʋŋ Yesu wʋŋ maa jɔ wʋ dʋɔ dawuta maa fa amɩɛ na, n nyina Kirisito wʋŋ.>> 4Sɛ Yudatina baa barɛ lɩɛ wɩɛ ŋii Pɔɔlʋ tawɩ na di sɛ ba kpi wʋ na Silasi dʋɔ, dɩmʋŋ gba sɛ Girikitina baa baa se Ɩsʋɔ na fɔɩ, na ala bakpari fɔɩ.
5Ama dɩ jʋʋ Yudatina baa sɛ ba ju ga ja wɩɛ asʋbʋɛtina barɛ gɩyɩɛnaŋ sɛ ba ga bɔlɩɛɩ sɛ ba fara kɔna siŋii dɩɛ janɛ gaa naŋ. Sɛ ba kpala ju Jasiŋ waa dʋɔ ga ja Pɔɔlʋ na Silasi na baa mʋ ba kɔna jama baa. 6Ama gʋ ba n na ba na, ba fɔŋɩ Jasiŋ na lɩɛdɩra baa barɛ kɔŋ dɩɛ janɛ gaa bɩnɛ asanaŋ yela baa kuusi sɛ, <<Dɩmʋŋ bakpa bana aaŋ biliŋi dulunya baa fu gakplɩɛkʋma, dɩtɩɛna ba kɔŋ jɩna, 7sɛ Jasiŋ lɩɛ ba wʋ waa dʋɔ. Ba kpiniŋ ba kʋlʋ chicha Roma tibi dʋɔ kɩɛrɛ Juo Kayisa mbara ŋii yela baa tawɩ sɛ juo wʋrʋ wɩɛ baa yagɛ ɩ sɛ Yesu.>> 8Gʋ jama baa na dɩɛ janɛ gaa bɩnɛ baa nyii wɩɛ ŋina na, dɩ nyala ba fɔɩ. 9Sɛ ba yela sɛ Jasiŋ na lɩɛdɩra ba baŋbaŋ tɔ aterembie ganaŋkʋ dɩ daga sɛ ba yela ba.
Pɔɔlʋ na Silasi wɩɛ Beriya dɩɛ naŋ
10Gʋ tɩɛ tam na, lɩɛdɩra baa tii Pɔɔlʋ na Silasi gbɩɛ ju Beriya dɩɛ naŋ. Gʋ ba tala dɩmaŋ na, ba ju Yudatina tʋm danɛ gaa naŋ. 11Beriyatina nfɩɛrɛ naŋ fulu kii Tesalonikatina, akala takɩɛ ba kaŋ dɩlɛ nyii wɩɛ ŋii, sɛ baa kɩɛ Ɩsʋɔ Sabɩɛwɩɛ ŋii tɩba na dieli wɩɩ kʋma na baa kɩɛ sɛ wɩɛ ŋii Pɔɔlʋ cha tawɩ na yɩɛ gasiŋteŋ. 12Dɩmʋŋ dʋɔ Yudatina fɔɩ, Giriki ala bakpari na Giriki baala fɔɩ lɩɛ di.
13Gʋ Yudatina baa ba wɩɛ Tesalonika jiŋ gʋ Pɔɔlʋ a tawɩ Ɩsʋɔ wɩɛ ŋii Beriya dɩɛ naŋ na, ba kɔŋ dɩmaŋ gaa dʋ jama baa biŋbira yela baa fuosi baa dʋ ba. 14Sɛ lɩɛdɩra baa yɩɛ bileŋ mʋ Pɔɔlʋ ju ɔpʋ nʋɔ, ama Silasi na Timoti dʋɔ Beriya. 15Sɛ baala baa ba mʋ Pɔɔlʋ baa ju na, mʋ ɩ kɔŋ Atensi dɩɛ naŋ, sɛ wʋ mʋ tɩla si ba sɛ ba n tawɩ Silasi na Timoti sɛ ba n yɩɛ bileŋ gaa kpi wʋ dʋɔ.
Pɔɔlʋ wɩɛ Atensi
16Gʋ Pɔɔlʋ wɩɛ Atensi wʋ dana Silasi na Timoti, sɛ wʋ na gʋ panɩŋ su dɩɛ janɛ gaa naŋ na, dɩ nyala ɩ fɔɩ 17Dɩmʋŋ dʋɔ wʋ na Yudatina na Girikitina baa baa se Ɩsʋɔ sɛ baa jaŋi Yudatina tʋm danɛ naŋ, na baa ba wɩɛ gɩyɩɛnaŋ tɩɛ na ga naa kʋma na mɩɛgɩ-mɩɛgɩ Ɩsʋɔ wɩɛ ŋii naŋ. 18Sɛ Epikuriyotina na Sitokitina kpiŋjim bakalaasa dikpeŋ fara baa di Pɔɔlʋ noro. Sɛ ba barɛ tasɛ sɛ, <<Be sɛ gɩmɩɛmɩɛtɛ wʋmalaŋpʋ wina aja wʋ a tawɩ bɛ?>> Sɛ barɛ dʋɔ tawɩ sɛ, <<Aja yɩɛ wʋ a tawɩ panɩŋ afɔlɩɛ ŋarɛ wɩɛ bɛ.>> Ba tawɩ ŋina bɛ akala takɩɛ Pɔɔlʋ a tawɩ Yesu wɩɛ abama ŋii na wʋ feŋ lɩɩ sɩŋ naŋ wɩɛ. 19Sɛ ba mʋ ɩ kɔŋ Ariyopagusi dɩɛnaŋ bɩnɩɛ naŋ bɩnɩɛ dikpeŋ gaa asanaŋ. Dɩmaŋ sɛ ba tasɛ ɩ sɛ, <<Dɩɩ dɩlɛ jiŋ dɩmʋŋ kalaa afɔlɩɛ ŋii nyaa tawɩ ŋɩ wɩɛ n naa? 20Akala takɩɛ nyaa tawɩ wɩɛ afɔlɩɛ nyaa fa daa sɛ dɩɩ ja sɛ dɩɩ jiŋ ŋɩ tie.>> 21[Atensitina na mʋɔra baa ba wɩɛ dɩmaŋ na kpiniŋ mʋ ba saŋa kpiniŋ baa nyii wɩɛ afɔlɩɛ yela baa tawɩ ŋɩ dʋɔ wɩɛ.]
22Dɩmaŋ sɛ Pɔɔlʋ kʋlʋ sɩŋ Ariyopagusi dɩɛnaŋ bɩnɩɛ naŋ bɩnɩɛ dikpeŋ gaa asanaŋ tawɩ sɛ, <<Atensitina, ma na gʋ gbɩɛ kʋma dʋɔ na, ɩɩ ja panɩŋ tʋm na dieli. 23Akalaa takɩɛ gʋ ma dɔŋ-ma dɔŋ maa kɩɛ abʋrɩ ŋii ɩɩ tʋm na dieli na, ma na gadiesa dɩgbɩŋgbɩŋ gaa ba sabɩɛ ga dʋɔ sɛ Ɩsʋɔ WƲŊ Ɩ BA JIŊ Ɩ na. Dɩtɩɛna ŋii ɩɩ tʋm yela ɩ ba jiŋ ŋɛ na dʋɔ wɩɛ sɛ maa ja maa tawɩ amɩɛ.>>
24Sɛ Pɔɔlʋ ju dʋɔ tawɩ sɛ, <<Ɩsʋɔ wʋŋ wʋ lɔ dulunya na ga tɩba bʋrʋkʋma na, n nyina Ɩsʋɔ adugbe na tie Kpaŋjuo, sɛ wʋ aa cha tʋm danɩŋ gaa bakpa ma ga na naŋ ŋ. 25Wʋ aa ja sɛ bakpa n mʋ ba pamɩɛ tʋŋ ɩ ɩ, takɩɛ wʋ a ja bʋrʋ darɛ na, akala takɩɛ wʋŋ wʋ tɩŋtɩŋ n fa bakpa nkpa, na wuosi na bʋrʋkʋma. 26Wʋ lɩɩ wʋkpa wʋdʋŋdʋlʋŋ naŋ lɔ atawɩ yɩrɩ kpiniŋ bakpa sɛ ba n cha tibi kpiniŋ dʋɔ. Sɛ wʋ fa ba saŋa na diele gaa ba n cha na dekulie gaa dɩ daga na baa cha. 27Ɩsʋɔ yɩɛ ŋina bɛ ganaŋkʋ bakpa aja ja ɩ na baa na ɩ. Ŋɩ wɩɛ tɩba takɩɛ wʋ taŋ taŋasɛ na daa tɩba wʋrʋ ʋ. 28Akala takɩɛ wʋ tɩba sɛ dɩ chaɩ, dɩ dɔŋ yela dɩ wɩɛna nkpa. Takɩɛ ganaŋkʋ amɩɛ tɩba kpiŋjim wɩɛ sabɩɛra barɛ tawɩ sɛ daa kpiniŋ dɩ yɩɛ wʋ bie bɛ.>>
29Dɩmʋŋ dʋɔ sɛ dɩ yɩɛ Ɩsʋɔ bie bɩrɛ na, dɩ daga na dɩ n baa yɩɛ daa nfɩɛrɛ sɛ Ɩsʋɔ duluŋ kɩɛna takɩɛ diterembi gasɩɛm yaa diterembi gafʋlʋm yaa bʋɩ gaa wʋkpa n mʋ wʋ kpiŋjim na adawʋ yɩɛ. 30Saŋa gaa ga lam na, Ɩsʋɔ ba aa kɩɛ ba gɩbajɩŋ ŋ, ama dɩtɩɛna bɩrɛ wʋ dʋ bakpa kpiniŋ gapɩlɛkʋma sɛ ba n biliŋi lɩɩ ba dɩsʋbʋ naŋ. 31Akala takɩɛ wʋ lɩsɛ wɩɩ garɛ si takɩɛ wʋ a pala na baalɛ wʋrʋ wʋŋ wʋ lɩsɛ ɩ na dʋɔ na wʋ a di dulunya wɩɛ ŋɩ gbɩɛ dʋɔ. Wʋ yɩɛ ŋina mʋ kalaa bakpa kpiniŋ gʋ wʋ feŋsi ɩ lɩɩ sɩŋ naŋ.
32Gʋ ba nyii atatina feŋ lɩɩ sɩŋ naŋ dʋɔ wɩɛ na, ba barɛ jabi ɩ, sɛ barɛ dʋɔ tawɩ sɛ, <<Dɩɩ ja sɛ nyaa bɔrɛ tawɩ dɩmʋŋ wɩɛ ŋina.>> 33Dɩmaŋ sɛ Pɔɔlʋ lɩɩ dɩɛnaŋ bɩnɩɛ naŋ bɩnɩɛ dikpeŋ gaa asanaŋ. 34Sɛ baala barɛ yɩɛ Pɔɔlʋ kpamɩra sɛ ba lɩɛ di. Ba tɩba barɛ n nyina Diyonisi wʋŋ wʋ kpi Ariyopagusi dɩɛnaŋ bɩnɩɛ naŋ bɩnɩɛ dikpeŋ gaa dʋɔ, na alʋ wʋŋ baa yagɛ ɩ sɛ Damarisi na bakpa baa barɛ.
Currently Selected:
Dɩtʋm 17: CLL
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy amp Bible Translation
