Dɩtʋm 18
18
Pɔɔlʋ ju Koronto
1Gʋ Pɔɔlʋ lɩɩ dɩɛnaŋ bɩnɩɛ naŋ bɩnɩɛ dikpeŋ gaa asanaŋ wʋrʋgbɩɛ na, wʋ lɩɩ Atensi ju Koronto dɩɛ naŋ. 2Dɩmaŋ sɛ wʋ ga mɩɛna Yuda wʋkpa wʋrʋ baa yagɛ ɩ sɛ Akʋɩla, wʋ yɩɛ Pontosi dɩɛsɛ-bu bɛ, wʋ na wʋ alʋ Pirisila lɩɩ Italiya kɔŋ Koronto dɩɛ naŋ na, dɩ n taŋgɩlɛ ta a akala takɩɛ Kaladiyosi cha dʋ sɛ Yudatina kpiniŋ n lɩɩ Roma tibi dʋɔ. Sɛ Pɔɔlʋ ju na wʋ a ga kɩɛ ba, 3Akala takɩɛ wʋ yɩɛ dukuru diko yɩɛrɛ bɛ takɩɛ ba. Dɩmʋŋ dʋɔ wʋ cha ba jaŋ sɛ wʋ na ba yɩɛ dɩtʋm. 4Fɩɛsɛ wɩɩ kʋma Pɔɔlʋ a ju Yudatina tʋm danɛ naŋ na wʋ a ga mɩɛgɩ Ɩsʋɔ wɩɛ naŋ na Yudatina na Girikitina baa, sɛ wʋ chɩdɩsɛ wʋ a tawɩ wʋ a fa ba na baa lɩɛ wɩɛ ŋii wʋ a tawɩ na di.
5Gʋ Silasi na Timoti lɩɩ Masidoniya kɔŋ na, Pɔɔlʋ mʋ wʋ wʋsɛ kpiniŋ fa Ɩsʋɔ wɩɛ tawɩ yela wʋ a di seriya wʋ a fa Yudatina baa sɛ Yesu n nyina Kirisito wʋŋ.#18:5 Wʋŋ wʋdʋŋdʋlʋŋ wina n nyina Mesaya. 6Ama Yudatina baa kʋlʋ sɩŋ Pɔɔlʋ dʋɔ yela baa tii ɩ, wʋ kpisi wʋ abʋrɩ afuusa dibuu tawɩ ba sɛ, <<Amɩɛ asima n dʋɔ amɩɛ tɩŋtɩŋ amɩɛ nyienaŋ. Ma ba jiŋ dʋɔ ɔ. Lɩɩ dɩtɩɛna mʋ a ju, maa ju baa ba ba yɩɛ Yudatina na jaŋ.>>
7Dɩmaŋ sɛ Pɔɔlʋ lɩɩ Yudatina tʋm danɛ naŋ ju Titosi Jositosi wʋŋ wʋ yɩɛ Ɩsʋɔ tʋmɩrɛ na waa dʋɔ. Wʋ waa tirina Yudatina tʋm danɛ gaa. 8Kirisiposi wʋŋ wʋ yɩɛ Yudatina tʋm danɛ naŋ asanaŋtɛ na wʋ waa dʋɔtina kpiniŋ lɩɛ Kpaŋjuo di, sɛ Korontotina fɔɩ baa ba nyii wʋ wɩɛ na, lɩɛ di sɛ ba sɔ ba.
9Yuluma gʋrʋ Pɔɔlʋ yu Ɩsʋɔ lɩsɛ kalaa. Sɛ Kpaŋjuo tawɩ ɩ sɛ, <<N baa se nyɩŋtɩɛ, ju dʋɔ tawɩ wɩɛ ŋii, n baa fu n nʋɔ dʋɔ. 10Ma kpi n dʋɔ, sɛ wʋrʋ ba aa dɩlɛ kʋlʋ sɩŋ n dʋɔ na wʋ a yɩɛ nyaŋ bʋrʋ ʋ, akala takɩɛ ma wɩɛna bakpa fɔɩ dɩɛ janɛ gana naŋ.>> 11Dɩmʋŋ dʋɔ Pɔɔlʋ cha dɩmaŋ bɩriŋnʋɔ garɛ na salɛ yela wʋ a kalaa ba Ɩsʋɔ wɩɛ.
12Gʋ Galiyo yɩɛ Roma tibi dʋɔ kɩɛrɛ wʋŋ wʋ a kɩɛ Akaya tibi na dʋɔ, Yudatina baa yɩɛ nʋɔ kʋlʋ sɩŋ Pɔɔlʋ dʋɔ mʋ ɩ ju wɩɛ didiitiŋ. 13Sɛ ba pʋɩ ɩ sɛ, <<Baalɛ wina a fuosi wʋ a dʋ bakpa sɛ ba n tʋm Ɩsʋɔ yela ŋii chicha mbara ŋii.>>
14Gʋ Pɔɔlʋ aja wʋ a tawɩ na, Galiyo tawɩ Yudatina baa sɛ, <<O amɩɛ Yudatina! Nafʋɔ ŋɩ yɩɛ dɩsʋbʋ gajanɛ yaa bʋrʋ gaa ga taŋ dieli na dʋɔ sɛ ɩɩ pʋɩ ɩ na, nafʋɔ ŋɩ wɩɛ dieli fa maŋ na maa yu digela nyii amɩɛ jaŋ. 15Ama gʋ ŋɩ yɩɛ lɩɩna wɩɛ, na yɩrɩɛ na amɩɛ Yudatina mbara wɩɛ tasɛ n na bɩrɛ, amɩɛ tɩŋtɩŋ n desina amɩɛ wɩɛ. Ma aa yɩɛ wɩɛ diri ŋina dʋɔ ɔ.>> 16Sɛ wʋ yela sɛ ba geŋ ba lɩɩ wɩɛ didiitiŋ dɩmaŋ 17Dɩmaŋ sɛ ba kpiniŋ ba chaŋ Sositene wʋŋ wʋ yɩɛ Yudatina tʋm danɛ naŋ asanaŋtɛ na tugu ɩ wɩɛ didiitiŋ gaa asanaŋ. Ama ŋɩ n tiri Galiyo o.
Pɔɔlʋ bɔrɛ kɔŋ Antiyokiya dɩɛ naŋ
18Sɛ Pɔɔlʋ cha Koronto gɩyɩɛnɩŋ akalasa ŋarɛ. Dɩmaŋ sɛ wʋ yela lɩɛdɩra baa sɛ wʋ mʋna lɩŋ dʋɔ ju Siriya, sɛ Pirisila na Akʋɩla ba kpaŋ ɩ. Pɔɩ na wʋ a ju na, wʋ fʋŋ wʋ nyɩnyʋɔsɛ Kenkiriya dɩɛ naŋ lɩɩna ntaŋ ŋii wʋ ka na dʋɔ. 19Gʋ ba tala Efiso na, dɩmaŋ sɛ Pɔɔlʋ yela Pirisila na Akʋɩla sɛ wʋ tɩŋtɩŋ wʋ jʋʋ Yudatina tʋm danɛ gaa naŋ na wʋ a ga mɩɛgɩ-mɩɛgɩ Ɩsʋɔ wɩɛ ŋii naŋ na Yudatina baa. 20Gʋ ba sʋlʋ ɩ sɛ wʋ n cha ba jaŋ wɩɛ akalasa ŋarɛ na, sɛ wʋ pɩɛ. 21Ama gʋ wʋ a ja wʋ a ju na, wʋ tawɩ si sɛ, <<Sɛ Ɩsʋɔ kpa na, maa bɔrɛ kɔŋ.>> Sɛ wʋ lɩɩ Efiso mʋna lɩŋ dʋɔ laŋ. 22Gʋ wʋ dʋɔsɩŋ Kayisariya na, wʋ ga yɩlɩ lɩɛdɩra dikpeŋ gaa, sɛ wʋ ju Antiyokiya.
23Gʋ Pɔɔlʋ di wɩɛ akalasa ŋarɛ Antiyokiya wʋrʋgbɩɛ na, wʋ lɩɩ dɩmaŋ ju Galatiya na Firigiya tibi dʋɔ yela wʋ a tawɩ wʋ a dʋ kpalɛnara baa doŋ naŋ.
24Saŋa gana na, Yuda wʋkpa wʋŋ baa yagɛ ɩ sɛ Apolo sɛ wʋ yɩɛ Alesandiriya dɩɛsɛ bu na kɔŋ Efiso. Wʋ jiŋ dɩtawɩ sɛ wʋ jiŋ Ɩsʋɔ Sabɩɛwɩɛ ŋii na dieli. 25Ba kalaa ɩ Kpaŋjuo gbɩɛ gaa dʋɔ, sɛ wʋ lɩɩ wʋ jawʋ naŋ tawɩ sɛ wʋ kalaa Yesu dʋɔ wɩɛ kʋrʋkʋrʋ. Ŋɩ wɩɛ tɩba takɩɛ Yohane Ɩsʋɔ sɔ nyiŋeŋ sɛ wʋ jiŋ. 26Sɛ wʋ mʋ digela fara wʋ a tawɩ Yudatina tʋm danɛ gaa naŋ. Gʋ Pirisila na Akʋɩla nyii wɩɛ ŋii wʋ a tawɩ na, ba yagɛ ɩ ju ba waa dʋɔ ga lɩsɛ Ɩsʋɔ gbɩɛ gaa kalaa ɩ kʋrʋkʋrʋ.
27Gʋ Apolo aja wʋ a ju Akaya na, lɩɛdɩra baa tawɩ dʋ ɩ, sɛ ba sabɩɛ tanɛ ga fa kpalɛnara baa ba wɩɛ dɩmaŋ sɛ ba n lɩɛ ɩ. Gʋ wʋ talɛ na, wʋ chɔna baa Ɩsʋɔ wɩɩ dʋɔ ba lɩɛ di fɔɩ. 28Akala takɩɛ wʋ mʋ noro ŋii ŋɩ nʋɔ wɩɛ doŋ di na Yudatina baa, sɛ wʋ di ba dʋɔ bakpa naŋ, sɛ wʋ mʋ Ɩsʋɔ Sabɩɛwɩɛ ŋii kalaa tɩba takɩɛ Yesu n nyina Kirisito wʋŋ.
Currently Selected:
Dɩtʋm 18: CLL
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy amp Bible Translation
