Dɩtʋm 19
19
Pɔɔlʋ wɩɛ Efiso
1Gʋ Apolo wɩɛ Koronto na, Pɔɔlʋ pala Asiya adugbe salɛ ga tala Efiso. Dɩmaŋ sɛ wʋ ga na kpalɛnara barɛ 2sɛ wʋ tasɛ ba sɛ, <<Gʋ ɩ lɩɛ di na ɩ yu Ɩsʋɔ Feliŋ?>>
Sɛ ba lɩsɛ nʋɔ sɛ, <<Aye, dɩ n nyii ta gba sɛ Ɩsʋɔ Feliŋ ŋarɛ wɩɛ ɛ.>>
3Dɩmʋŋ dʋɔ Pɔɔlʋ tasɛ ba sɛ, <<Dɩmʋŋ bɩrɛ Ɩsʋɔ sɔ gamʋɔ sɛ ɩ yu?>>
Sɛ ba lɩsɛ nʋɔ sɛ, <<Yohane Ɩsʋɔ sɔ.>>
4Sɛ Pɔɔlʋ tawɩ ba sɛ, <<Yohane Ɩsʋɔ sɔ yɩɛ biliŋi lɩɩ dɩsʋbʋ naŋ bɛ. Sɛ wʋ tawɩ bakpa baa sɛ ba n lɩɛ wʋŋ wʋ a kɔŋ wʋ wʋrʋgbɩɛ na di, wʋŋ n nyina Yesu.>> 5Gʋ ba nyii ŋina na, ba sɔ ba Kpaŋjuo Yesu yɩrɛ naŋ. 6Gʋ Pɔɔlʋ mʋ wʋ pamɩɛ jaga-jaga ba dʋɔ na, Ɩsʋɔ Feliŋ kɔŋ ba dʋɔ sɛ ba tawɩ atawɩ afɔlɩɛ, sɛ ba gbalɛ. 7Baala baa kpiniŋ aja yɩɛ gifi bala.
8Pɔɔlʋ jʋʋ Yudatina tʋm danɛ gaa naŋ sɛ wʋ mʋ digela tawɩ fa bakpa baa gafɩtasɛ sɩ toro. Sɛ wʋ mʋ noro wʋ a tawɩ lɩɩna Ɩsʋɔ juori gaa dʋɔ wɩɛ wʋ a fa ba na baa lɩɛ wɩɛ ŋii wʋ a tawɩ na di. 9Ama ba barɛ yɩɛ dɩlɛ na doŋ, sɛ ba pɩɛ na baa lɩɛ di, sɛ ba sɩŋ bakpa naŋ tawɩ wɩɛ asʋbʋɛ baŋ Gbɩɛ gaa. Dɩmʋŋ dʋɔ Pɔɔlʋ yela ba, sɛ wʋ mʋ kpalɛnara baa kpaŋ wʋ wʋsɛ sɛ wɩɩ kʋma wʋ a mɩɛgɩ Ɩsʋɔ wɩɛ ŋii naŋ Tirano dɩkalaatɩŋ gaa naŋ. 10Ŋina ju dʋɔ bɩŋsɛ ala, sɛ ŋɩ yela sɛ Yudatina na Girikitina baa ba wɩɛ Asiya tibi dʋɔ na kpiniŋ nyii Kpaŋjuo Yesu wɩɛ ŋii.
11Ɩsʋɔ pala na Pɔɔlʋ dʋɔ yɩɛ adaŋgana ŋii ŋɩ wɩɛ mamachi, 12hali gʋ bakpa mʋ chimuŋ na akura ŋii ba mʋ tapʋ Pɔɔlʋ mʋ gaa tapʋ lʋmɩɛtina na, ba yu lʋm chʋɔ, sɛ feliŋ sʋbʋ lɩɩ ba tɩba.
13Yudatina barɛ baa ba dɔŋ baa geŋ feliŋ sʋbʋ baa lɩɩ bakpa tɩba na, aja sɛ baa mʋ Kpaŋjuo Yesu yɩrɛ mʋ geŋ feliŋ sʋbʋ lɩɩ baa ba wɩɛ ba tɩba na. Baa tawɩ sɛ, <<Ma dʋ nyaŋ sɛ Yesu wʋŋ Pɔɔlʋ a tawɩ wʋ wʋsɛ dʋɔ wɩɛ na yɩrɛ naŋ, lɩɩ wʋ tɩba.>> 14Sikifa wʋŋ wʋ yɩɛ Yudatina sei bɩnɛ na bie baala jaŋ lɩkaarɛ aaŋ yɩɛ ŋina. 15Wɩɩ darɛ feliŋ sʋbʋ wʋŋ tawɩ ba sɛ, <<Ma jiŋ Yesu, sɛ ma jiŋ Pɔɔlʋ dʋɔ, sɛ Mmʋɔ n nyina amɩɛ?>> 16Dɩmaŋ sɛ baalɛ wʋŋ feliŋ sʋbʋ wɩɛ wʋ tɩba na sala ba dʋɔ tugu ba na dieli sɛ wʋ di ba kpiniŋ dʋɔ. Sɛ ba se lɩɩ waa gaa dʋɔ diboloŋ yela asima a lɩɩ ba wʋsɛ dʋɔ.
17Gʋ Yudatina na Girikitina baa ba wɩɛ Efiso nyii ŋii ŋɩ tibi na, nyɩŋtɩɛ chaŋ ba sɛ ba kalɩɛ Kpaŋjuo Yesu yɩrɛ gaa. 18Sɛ bakpa baa ba lɩɛ di na fɔɩ kɔŋ gaa tawɩ fulu ba dɩsʋbʋ ayɩɛsa jama baa asanaŋ. 19Sɛ ba fɔɩ baa baa yɩɛ majigi na mʋ ba tanɩɛ aguosa kɔŋ gaa sɩla sɛ ba tʋʋ ŋɛ bakpa asanaŋ. Gʋ ba kɩɛ tanɩɛ aguosa ŋii yawʋ na, ŋɩ ga lɩɩ aterembie afʋlʋma bie kɔrʋɔsɛ ŋɩla na sala (50,000). 20Ŋina dʋɔ Kpaŋjuo wɩɛ ŋii yalagi sɛ ŋɩ bɩɩ doŋ dʋɔ.
21Gʋ ŋina kpiniŋ tibi wʋrʋgbɩɛ na, Pɔɔlʋ yɩɛ wʋ nfɩɛrɛ sɛ wʋ a mʋna Masidoniya na Akaya ju Yerusalem. Sɛ wʋ tawɩ sɛ, <<Ma ju dɩmaŋ wʋrʋgbɩɛ na, ŋɩ tiri gʋ maa bʋɔ Roma gba dʋɔ.>> 22Sɛ wʋ kpiri wʋ chɔnara bala, Timoti na Erasito ju Masidoniya, sɛ wʋ dʋɔ cha Asiya tibi dʋɔ chonii.
Wɩɛ siŋii Efiso
23Aja yɩɛ dɩmʋŋ saŋa gana na, siŋii gaa ga nʋɔ yɩɛ doŋ kɔŋ lɩɩna Gbɩɛ gaa dʋɔ. 24Bayɩpʋ wʋrʋ baa yagɛ ɩ sɛ Dimiterosi wʋŋ wʋ a mʋ aterembie afʋlʋma wʋ a luu Atemisi panɛ alʋ jaŋ panɩŋ danɩŋ. Ŋina yela sɛ wʋ na adawʋtina baa kpiniŋ yu dɩtʋm baa yɩɛ. 25Sɛ wʋ yagɛ ba, na baa wʋ na ba dɩtʋm yɩɛ bʋdʋŋdʋlʋŋ na gaa jaŋi tawɩ ba sɛ, <<Ma dɔŋa, ɩ jiŋ gʋ dɩɩ yu aterembie na dieli dɩɩ lɩɩ dɩmʋŋ dɩtʋm gana tɩba. 26Ɩ naa sɛ ɩ nyii ganaŋkʋ dɩmʋŋ Pɔɔlʋ wina tawɩ fa ba sɛ ba lɩɛ wɩɛ ŋii wʋ tawɩ na di, wʋ yela sɛ bakpa fɔɩ baa ba wɩɛ Efiso jɩna na Asiya tibi dʋɔ kpiniŋ tʋsʋ gbɩɛ. Wʋ a tawɩ sɛ panɩŋ ŋii bakpa yɩɛ na ba yɩɛ panɩŋ kpiniŋ-kpiniŋ. 27Wɩɛ asʋbʋɛ a kɔnɛ naa daa dɩtʋm nyiŋeŋ yɩrɛ aaŋ ja warɩɛ ɛ, ama panɛ janɛ alʋ jaŋ Atemisi panɛ danɛ gba aja yɩɛ kpakpuo, na panɛ alʋ jaŋ tɩŋtɩŋ wʋŋ Asiya tibi kpiniŋ na dulunya a tʋm ɩ na, a paŋ wʋ panɛ gɩjaŋjanɛ.>>
28Gʋ ba nyii ŋina na, ba kara biŋbira sɛ ba fara baa kuusi sɛ, <<Daa Efisotina panɛ Atemisi n nyina panɛ gajanɛ!>> 29Sɛ dɩɛ gaa naŋ siŋii. Sɛ bakpa baa chaŋ Gayosi na Arisitakosi, Pɔɔlʋ wʋ dɔŋa baa wʋ na ba a ju gbɩɛ sɛ ba lɩɩ Masidoniya na, fɔŋɩ ba ju dijaŋitiŋ. 30Nafʋɔ Pɔɔlʋ ja wʋ a ju jama baa asanaŋ, ama kpalɛnara baa n fa ɩ gbɩɛ ɛ. 31Hali tibi gaa dʋɔ asanaŋtina barɛ baa ba yɩɛ Pɔɔlʋ wʋ dɩɛtina na gba fa nʋɔ sʋlʋ ɩ sɛ wʋ n baa ju dijaŋitiŋ dɩmaŋ.
32Saŋa gana na, bakpa baa ba jaŋi na wuliti, barɛ a kuusi baa tawɩ wɩɛ ŋarɛ, sɛ barɛ dʋɔ a kuusi baa tawɩ wɩɛ abaŋbaŋ. Bakpa fɔɩ ba jiŋ bʋrʋ gaa ga dʋɔ sɛ ba wɩɛ dɩmaŋ na a. 33Sɛ Yudatina baa ti Alesanda gaa sɩŋ asanaŋ, sɛ jama baa tɩba barɛ kuusi tawɩ ɩ ŋii wʋ n yɩɛ. Sɛ wʋ ŋɩrɛ ba pam sɛ ba n cha kuruŋ na wʋ a dɩlɛ tawɩ gara wʋ wʋsɛ bakpa baa asanaŋ. 34Ama gʋ ba jiŋ gʋ wʋ yɩɛ Yuda wʋkpa na, ba kpiniŋ ba kuusi nʋɔ garɛ naŋ aja yɩɛ takɩɛ saŋa ala tawɩ sɛ, <<Daa Efisotina panɛ Atemisi n nyina panɛ gajanɛ!>>
35Sɛ dɩɛ janɛ gaa sabɩɛrɛ yela sɛ bakpa baa cha kuruŋ sɛ wʋ tawɩ sɛ, <<Ma dɔŋa Efisotina, dulunya kpiniŋ jiŋ gʋ Efiso dɩɛ janɛ gana aaŋ kɩɛ panɛ janɛ Atemisi panɛ danɛ na wʋ bʋɩ gaa ga lɩɩ adugbe sala tibi naa? 36Dɩmʋŋ dʋɔ lɩɩna gʋ wʋrʋ ba aa dɩlɛ pɩɛ gasiŋteŋ ŋina dʋɔ, dɩ daga na ɩ cha kuruŋ na n baa kpaala yɩɛ bʋrʋ. 37Ɩ mʋ baala bana kɔŋ jɩna, ŋɩ wɩɛ tɩba takɩɛ ba n ŋmɩɛlɛ bʋrʋ lɩɩ tʋm danɩŋ naŋ yaa ba n tawɩ mbusu wɩɛ chicha daa panɛ alʋ jaŋ ŋ. 38Sɛ Dimiterosi na wʋ dɔŋa adawʋtina wɩɛna wɩɛ na baa mʋ pʋɩ wʋrʋ na, wɩɛ didiitiŋ na wɩɛ dira baa wɩɛ. Baa dɩlɛ pʋɩ ba dɩmaŋ. 39Sɛ ɩ wɩɛna wɩɛ ŋarɛ kpi na, ŋɩ tiri gʋ bakpa baa n mʋna gbɩɛ bam dʋɔ sɩla na baa desina ŋɛ. 40Ganaŋkʋ ŋɩ kɩɛna na, wɩɛ aja mɩɛna daa lɩɩna jaŋ siŋii ŋii dʋɔ, akala takɩɛ dɩ tana kpɩnɩdɩ dɩɩ mʋ kalaa dɩmʋŋ siŋii ŋina tɩba a.>> 41Gʋ wʋ tawɩ ŋina taŋ na, sɛ wʋ yela sɛ bakpa baa ba sɩla na yasɩŋ.
Currently Selected:
Dɩtʋm 19: CLL
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy amp Bible Translation
