Luka 10
10
Yesu kpiri kpalɛnara ŋitoro sala na bala
1Ŋina wʋrʋgbɩɛ na, Yesu lɩsɛ bakpa ŋitoro sala na bala barɛ, sɛ wʋ kpiri ba bala-bala pala wʋ asanaŋ ju dɩɛsɛ kʋma na gapɩlɛkʋma gaa wʋ a ja sɛ wʋ a ju na. 2Wʋ tawɩ ba sɛ, <<Mala karɩŋ bɔlɩɛɩ ama karada n bɔla a. Dɩmʋŋ dʋɔ n sʋlʋ Kpaŋjuo fʋɔtɛ wʋŋ na wʋ a kpiri tʋmɩra barɛ gaa kpi karada baa dʋɔ fʋɔ gaa naŋ. 3N pala! Maa kpiri amɩɛ takɩɛ feŋ bie gbogboo aba naŋ. 4N baa mʋ aterembie takpe yaa didiku yaa asibita, na n baa yɩlɩ wʋrʋ gbɩɛ dʋɔ.>>
5Ɩ jʋʋ waa kʋma dʋɔ na, n chɩŋkpɩɛ tawɩ sɛ, <<Wʋsɛfɩɛ n kɔŋ waa gana dʋɔ. 6Wʋrʋ wɩɛ dɩmaŋ sɛ wʋ a ja wʋsɛfɩɛ na, amɩɛ wʋsɛfɩɛ n kɔŋ wʋ dʋɔ. Ama sɛ wʋ aa ja wʋsɛfɩɛ na, amɩɛ wʋsɛfɩɛ n bɔrɛ kɔŋ amɩɛ jaŋ. 7N cha waa gana dʋɔ, n di na ɩ nyʋɔ bʋrʋkʋma gaa ba fa amɩɛ na. Akala takɩɛ tʋmɩrɛ kʋma daga wʋ dɩtʋm dʋɔ kɩmtʋɔ. N baa pala sʋɩ waasɛ dʋɔ.>>
8Dɩɛ kʋma gaa ɩ jʋʋ sɛ ba lɩɛ amɩɛ na, n di adiya kʋma ŋii ba fa amɩɛ. 9N chɔ lʋmɩɛtina baa ba wɩɛ dɩmaŋ, na ɩ tawɩ ba sɛ, <<Ɩsʋɔ Juori gaa tirina amɩɛ.>> 10Ama ɩ jʋʋ dɩɛ kʋma sɛ ba n lɩɛ amɩɛ na, n ju dɩɛ naŋ gbɩɛsɛ bisi dʋɔ na ɩ tawɩ sɛ, 11<<Dɩ kpisi amɩɛ dɩɛ naŋ dibuu ŋii ŋɩ wɩɛ daa nafara tie na wʋrʋgɩ amɩɛ dʋɔ na ŋii chicha amɩɛ. Ama dɩ ja ɩ jiŋ gʋ Ɩsʋɔ juori gaa tirina.>> 12N nyii na dieli sɛ Ɩsʋɔ dɩpʋɛ fuu wɩɩ gaa na, wʋ a fɔŋɩ dɩɛ gana bakpa dɩla kii Sodomtina.
Dɩɛsɛ ŋii ŋɩ n lɩɛ Yesu di i
Matiyo 11:20-24
13Sɛ Yesu ju dʋɔ tawɩ sɛ, <<Korasintina amɩɛ lakʋ, Betisayidatina amɩɛ lakʋ, adaŋgana ŋii ma yɩɛ amɩɛ tɩba na sɛ ma yɩɛ Tirosi na Sidoŋ dɩmʋŋ na, nafʋɔ baa fu kotoku gagba na baa susaa npʋɔ na ŋii kalaa takɩɛ ba biliŋi lɩɩ ba dɩsʋbʋ naŋ taŋgɩlɛ. 14Ama Ɩsʋɔ wɩɛ di wɩɩ gaa na, wʋ a fɔŋɩ Korasintina na Betisayidatina dɩlɛ na dieli kii Tirositina na Sidoŋtina. 15Amɩɛ Kapeniyumtina, ɩ jiŋ sɛ Ɩsʋɔ aja jiŋna amɩɛ Ɩsʋɔ adugbe bɛ? Aye, Ɩsʋɔ aja mʋ amɩɛ ju atatina diele bɛ.>>
16Sɛ Yesu tawɩ wʋ kpalɛnara baa sɛ, <<Wʋkʋma wʋŋ wʋ nyii amɩɛ wɩɛ na nyii ma wɩɛ, sɛ wʋkʋma wʋŋ wʋ pɩɛ amɩɛ na pɩɛ maŋ. Ama wʋkʋma wʋŋ wʋ pɩɛ maŋ na, wʋ pɩɛ Ɩsʋɔ wʋŋ wʋ kpiri maŋ na gba.>>
Kpalɛnara ŋɩtʋrʋ sala baa bɔrɛ kɔŋ
17Gʋ Kpalɛnara ŋitoro sala na bala baa bɔrɛ kɔŋ na, ba mʋ asadi tawɩ sɛ, Kpaŋjuo, n yɩrɛ naŋ, feliŋ asʋbʋɛ kɔna ba wʋsɛ tie fa daa.
18Sɛ Yesu lɩsɛ ba nʋɔ sɛ, <<Ma na Sɩtanɩ lɩɩ Ɩsʋɔ adugbe takɩɛ duoni ŋmaŋi na gaa sala tibi. 19N nyii! Ma fa amɩɛ yikuo sɛ n chicha dʋmɩɛ na gachɩrasɛ dʋɔ, na ɩ dɩ ɔdʋŋ wʋŋ yikuo kpiniŋ dʋɔ. Bʋrʋ baa dɩlɛ yɩɛ amɩɛ ɛ. 20Ama n baa yela na amɩɛ asa a lɩɛ takɩɛ feliŋ asʋbʋɛ kɔna ba wʋsɛ tie fa amɩɛ. Ama n yela na amɩɛ asadi gʋ Ɩsʋɔ sabɩɛ amɩɛ yɩrɩɛ Ɩsʋɔ adugbe.>>
21Dɩmʋŋ saŋa gana naŋ na, Ɩsʋɔ Feliŋ yela sɛ Yesu asadi sɛ wʋ tawɩ sɛ, <<Majuo, Ɩsʋɔ adugbe na tie tɛ maa kalɩɛ nyaŋ gʋ nya mʋ ŋina wɩsɛ kpiŋjimtina na baa ba nfɩɛrɛ naŋ fulu na sɛ nya lɩsɛ kalaa bachaasɛ bisi. Majuo, ŋii nya yɩɛ na su nya asa.>>
22Sɛ Yesu ti bɔrɛ tawɩ sɛ, <<Majuo mʋ abʋrɩ kpiniŋ dʋ ma pam naŋ. Wʋrʋ ba jiŋ Bu wʋŋ ŋ, amʋɔ Juo wʋŋ nyiŋeŋ. Dɩmʋŋ sɛ wʋrʋ ba jiŋ Juo wʋŋ ŋ, amʋɔ Bu wʋŋ nyiŋeŋ na baa Bu wʋŋ a jawʋ na sɛ wʋ a lɩsɛ Juo wʋŋ kalaa ba.>>
23Sɛ wʋ biliŋi kɩɛ wʋ kpalɛnara baa tawɩ ba nyiŋeŋ sɛ, <<Kusee n nyina amɩɛ baa amɩɛ asa a na ŋii ɩ na n na. 24Maa tawɩ amɩɛ sɛ Ɩsʋɔ bajana na juoneŋ aja sɛ baa na ŋii ɩ na n na, na baa nyii ŋii ɩ nyii n na, ama ba n na a sɛ ba n nyii i.>>
Diduu lɩɩna Samariya wʋkpa bam wʋrʋ dʋɔ
25Wɩɩ darɛ Mosesi mbara wʋkalaasa wʋbɩɩsa wʋrʋ kʋlʋ sɩŋ gaa yɩɛ Yesu lɔ tɩba sɛ, <<Wʋkalaasa, be sɛ ma n yɩɛ na maa yu nkpa ŋii ŋɩ taŋ gɩtɛ?>>
26Sɛ Yesu lɩsɛ ɩ nʋɔ sɛ, <<Be sɛ ba sabɩɛ Ɩsʋɔ mbara ŋii naŋ?>> Wʋ lɩsɛ nʋɔ, <<Sɩnɛ sɛ nya nyii tie?>>
27Sɛ Mosesi mbara wʋkalaasa wʋŋ lɩsɛ nʋɔ sɛ, <<<Ja Kpaŋjuo nya Ɩsʋɔ lɩɩ n digela naŋ, n sʋbʋ kpiniŋ, nya nfɩɛrɛ kpiniŋ naŋ na n doŋ kpiniŋ na nyaa ja n dʋɔ takɩɛ n wʋsɛ.>#Lɛf 19:18.>>
28Sɛ Yesu tawɩ ɩ sɛ, <<Nya lɩsɛ nʋɔ na dieli. Yɩɛ ŋina na nya yu nkpa.>>
29Ama wʋ a ja sɛ wʋ a lɩɛdʋ sɛ wʋ chirigi, dɩmʋŋ dʋɔ wʋ tasɛ Yesu sɛ, <<Mmʋɔ n nyina ma dʋɔ?>>
30Sɛ Yesu jɔ diduu mʋ lɩsɛ ɩ nʋɔ sɛ, <<Baalɛ wʋrʋ cha lɩɩ Yerusalem wʋ a ju Yeriko. Wʋ a ju na, sɛ ŋmɩɛla baa ba chamɩna doŋ baa lɩɛ bakpa abʋrɩ ga fu wʋ dʋɔ sɛ ba lɩɛ wʋ bʋrʋkʋma sɛ ba fulu wʋ abʋrɩ afuusa, ba tugu ɩ hali wʋ aja wʋ a sɩŋ, sɛ ba laŋ yela ɩ. 31Dɩ kɔŋ takɩɛ Ɩsʋɔ sei wʋrʋ dɔŋ gbɩɛ gana dʋɔ. Gʋ wʋ na baalɛ wʋŋ na sɛ wʋ giligi ɩ laŋ. 32Dɩmʋŋ gba sɛ Lewi wʋkpa wʋrʋ gaa lɩɩ wʋ dʋɔ. Gʋ wʋ na ɩ na, wʋŋ gba wʋ giligi ɩ laŋ. 33Ama Samariya wʋkpa wʋrʋ wʋŋ wʋ a ju gbɩɛ na gaa lɩɩ wʋ dʋɔ. Gʋ wʋ na ɩ na, wʋ wɩɩ wʋ gɩyɔŋ. 34Wʋ ju wʋ jaŋ sɛ wʋ dʋ nuŋ na wayɩŋ sʋlʋŋ wʋ awʋnda ŋii naŋ sɛ wʋ mʋ dɩpaŋtaŋ pɔgʋ ɩ. Sɛ wʋ mʋ ɩ cha wʋ kpaŋa dʋɔ mʋ ɩ ju mʋɔra diduwei sɛ ba n kɩɛ wʋ dʋɔ.>> 35Gʋ tɩɛna na, wʋ lɩsɛ aterembie dinari ala mʋ fa diduwei kɩɛrɛ wʋŋ sɛ wʋ tawɩ ɩ sɛ, <<Kɩɛ wʋ dʋɔ, ma bɔrɛ kɔŋ na, maa tɔ aterembie kʋma ŋii nya warɩɛ wʋ dʋɔ na kpi.>>
36Sɛ Yesu tasɛ Mosesi mbara wʋkalaasa wʋŋ sɛ, <<Dɩmʋŋ bakpa batoro bana tɩba wʋ Mmʋɔ sɛ nyaa fa nfɩɛrɛ sɛ wʋŋ n nyina baalɛ wʋŋ ŋmɩɛla baa ba chamɩna doŋ baa lɩɛ bakpa abʋrɩ tugu ɩ na wʋ dʋɔ?>>
37Sɛ Mosesi mbara wʋkalaasa wʋbɩɩsa wʋŋ lɩsɛ nʋɔ sɛ, <<Wʋŋ wʋ wɩɩ wʋ gɩyɔŋ na.>> Sɛ Yesu tawɩ ɩ sɛ, <<Pala ga yɩɛ dɩmʋŋ.>>
Yesu ju Maata na Mariya jaŋ
38Gʋ Yesu na wʋ kpalɛnara baa dɔŋ gbɩɛ naŋ baa ju Yerusalem na, ba tala dɩɛ bie garɛ naŋ. Sɛ alʋ wʋŋ baa yagɛ ɩ sɛ Maata na yɩɛ ba nsa-nsa wʋ waa dʋɔ. 39Wʋ wɩɛna kʋɔ wʋrʋ baa yagɛ ɩ sɛ Mariya, wʋŋ wʋ cha Kpaŋjuo nafara tie wʋ a nyii wʋ wɩɛ na. 40Ama Maata bɩrɛ, wʋ dɩsɛ chɩbɛ wʋ a tɩŋɛ adiya. Dɩmʋŋ dʋɔ wʋ kɔŋ Yesu jaŋ gaa tawɩ ɩ sɛ, <<Kpaŋjuo ŋɩ n tiri nyaŋ gʋ ma kʋɔ yela ma nyiŋeŋ maa yɩɛ dɩtʋm gana kpiniŋ naa? Tawɩ ɩ na wʋ a gaa chɔna maŋ.>>
41Sɛ Kpaŋjuo lɩsɛ ɩ nʋɔ sɛ <<Maata, Maata, n chamɩna wɩɛ fɔɩ nyaa nyala n wʋsɛ. 42Ama bʋrʋ ga dʋŋdʋlʋŋ n tiri gaa sɛ Mariya lɩsɛ na. Wʋrʋ baa dɩlɛ lɩɛ ga lɩɩ wʋ jaŋ ŋ.>>
Currently Selected:
Luka 10: CLL
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy amp Bible Translation
