Luka 9
9
Yesu kpiri wʋ kpalɛnara gifi bala baa
Matiyo 10:5-15; Maakɩ 6:7-13
1Yesu yagɛ wʋ kpalɛnara gifi bala baa kɔŋ wʋ jaŋ, sɛ wʋ fa ba yikuo na doŋ sɛ ba n gɩŋ feliŋ sʋbʋ lɩɩ bakpa tɩba na baa chɔ lʋmɩɛ. 2Sɛ wʋ kpiri ba sɛ ba n ju ga tawɩ Ɩsʋɔ Juori gaa dʋɔ wɩɛ na baa chɔ lʋmɩɛtina. 3Sɛ wʋ tawɩ ba sɛ, <<Ɩ ju gbɩɛ gaa na, n baa mʋ bʋrʋ chaŋ. N baa mʋ dasɛ atugasa yaa aterembie takpe yaa adiya yaa aterembie yaa gagba alatɛ chaŋ. 4Waa kʋma gaa ɩ jʋʋ ga dʋɔ sɛ ba lɩɛ amɩɛ na, n cha dɩmaŋ ga tala saŋa gaa ɩ lɩɩ dɩɛ gana naŋ. 5Gapɩlɛkʋma gaa bakpa n lɩɛ amɩɛ na, ɩ lɩɩ dɩɛ gana naŋ na, n kpisi amɩɛ nafara tie dibuu wʋrʋgɩ dɩmaŋ, na ŋii di seriya chicha ba takɩɛ ba dɩsʋbʋ dʋɔ ba dʋɔ.>> 6Dɩmʋŋ dʋɔ, Yesu kpalɛnara baa ju dɩɛsɛ bisi ŋii naŋ ga tawɩ Ɩsʋɔ Wɩɛ Abama ŋii yela baa chɔ bakpa gapɩlɛkʋma.
Dɩ yɩɛ Juo Hɛrɔdɩ kpakpuo
Matiyo 14:1-12; Maakɩ 6:14-29
7Gʋ Juo Hɛrɔdɩ nyii ŋii Yesu yɩɛ kpiniŋ na, dɩ yɩɛ ɩ kpakpuo. Akala takɩɛ barɛ a tawɩ sɛ Yohane Ɩsʋɔ Sɔrɛ wʋŋ n feŋ lɩɩ sɩŋ naŋ. 8Sɛ barɛ dʋɔ sɛ Eliya n feŋ lɩɩ sɩŋ naŋ, sɛ barɛ dʋɔ sɛ Ɩsʋɔ bajana gɩbɩnɩŋtina baa tɩba wʋrʋ n feŋ kɔŋ nkpa naŋ. 9Ama Juo Hɛrɔdɩ sɛ, <<Ma yela sɛ ba kara Yohane nyi. Sɛ Mmʋɔ n nyina wʋŋ maa nyii wʋ wɩɛ n na?>> Na wʋ a ja sɛ wʋ a na Yesu.
Yesu fa bakpa kɔrʋɔsɛ sɩ nʋŋ (5,000) adiya
Matiyo 14:13-21; Maakɩ 6:30-44
10Gʋ kpirida gifi bala baa bɔrɛ kɔŋ Yesu jaŋ na, ba tawɩ ŋii ba yɩɛ na kpiniŋ fa ɩ. Sɛ wʋ na ba nyiŋeŋ ju dɩɛ gaa baa yagɛ sɛ Betisayida. 11Ama jama baa nyii ba dʋɔ sɛ ba kpaŋ ɩ. Wʋ yɩɛ ba nsa-nsa sɛ wʋ tawɩ Ɩsʋɔ Juori gaa wɩɛ fa ba. Sɛ wʋ chɔ baa baa kili na.
12Gʋ dɩ tala bʋyanɔ na, gifi bala baa kɔŋ wʋ jaŋ gaa tawɩ ɩ sɛ, <<Lɩsɛ bakpa baa gbɩɛ na baa ju dɩɛ na dɩɛsɛ bisi ŋii ŋɩ tirina daa na naŋ, na baa ga ja adiya di na baa ja aduotiŋ. Akala takɩɛ jɩna yɩɛ ifuli dʋɔ bɛ.>>
13Sɛ Yesu tawɩ ba sɛ, <<Amɩɛ tɩŋtɩŋ n fa ba adiya na baa di.>> Sɛ ba tawɩ ɩ sɛ, <<Bodobodo anʋŋ na aji bala sɛ dɩ wɩɛna, amʋɔ dɩ ju ga lɩɛ adiya kɔna jama bana.>> 14Baala baa ba wɩɛ dɩmaŋ na, aja yɩɛ takɩɛ kɔrʋɔsɛ sɩ nʋŋ (5,000). Sɛ Yesu tawɩ ba sɛ, <<N yela na baa cha akpeŋ takɩɛ ŋɩla na sala-sala.>>
15Sɛ wʋ kpalɛnara baa yɩɛ dɩmʋŋ. Sɛ ba yela sɛ bakpa baa kpiniŋ cha. 16Sɛ Yesu mʋ bodobodo anʋŋ na aji bala baa, sɛ wʋ kɩɛ Ɩsʋɔ adugbe sɛ wʋ yɩlɩ Ɩsʋɔ. Sɛ wʋ jaɩ mʋ fa wʋ kpalɛnara baa sɛ ba n mʋ fa bakpa baa. 17Sɛ wʋkʋma wina di sɛ wʋ pawʋ. Sɛ wʋ kpalɛnara baa tɔɔsɩ ŋii ba di kakaa na gachaŋasɛ gifi ala.
Petero kalaa wʋkpa wʋŋ Yesu yɩɛ
Matiyo 16:13-19; Maakɩ 8:27-29
18Wɩɩ darɛ Yesu a jɔ dɩga wʋ nyiŋeŋ yela wʋ kpalɛnara baa wɩɛ wʋ jaŋ. Sɛ wʋ tasɛ ba sɛ, <<Mmʋɔ sɛ bakpa a tawɩ sɛ ma yɩɛ?>>
19Sɛ ba lɩsɛ nʋɔ sɛ, <<Barɛ sɛ Yohane Ɩsʋɔ Sɔrɛ, barɛ sɛ Ɩsʋɔ ɔja Eliya, sɛ barɛ dʋɔ sɛ wʋ yɩɛ Ɩsʋɔ bajana baa tɩba wʋrʋ bɛ.>>
20Sɛ Yesu tasɛ ba sɛ, <<Amɩɛ dʋɔ, Mmʋɔ sɛ ɩ sɛ ma yɩɛ?>> Sɛ Petero lɩsɛ nʋɔ sɛ, <<Nyaŋ n nyina Kirisito#9:20 Yudatina a yagɛ ɩ sɛ Mesaya sɛ Girikitina a yagɛ sɛ Kirisito wʋŋ wʋ lɩɩ Ɩsʋɔ jaŋ na.>>
Yesu tawɩ wʋ awʋrʋfʋɔ na wʋ sɩŋ wɩɛ
Matiyo 16:20-28; Maakɩ 8:30; 9:1
21Sɛ Yesu jɔ ba nyienaŋ sɛ ba n baa tawɩ wɩɛ ŋina fa wʋrʋ. 22Sɛ Yesu tawɩ sɛ, <<Ŋɩ tiri gʋ Wʋkpa Bu wʋŋ a na awʋrʋfʋɔ fɔɩ, na dɩɛ bɩnɩɛ, Ɩsʋɔ sei bɩnɩɛ na mbara bakalaasa a pɩɛ ɩ na baa kʋ ɩ, ama wɩɛ atoro wɩɩ na, wʋ a feŋ lɩɩ sɩŋ naŋ.>>
23Sɛ Yesu tawɩ ba kpiniŋ sɛ, <<Wʋkʋma wʋŋ wʋ a ja sɛ wʋ a kpaŋ maŋ na, ŋɩ tiri gʋ wʋ a yela wʋ tɩŋtɩŋ wʋ jawʋ na wʋ a mʋ wʋ daŋ gasagasa na wʋ a kpaŋ maŋ. 24Akala takɩɛ wʋkʋma wʋŋ wʋ a ja wʋ a yu nkpa fa wʋ wʋsɛ na, ŋii jɔ ɩ. Ama wʋkʋma wʋŋ wʋ nkpa jɔ ɩ ma dʋɔ na, wʋ a yu nkpa. 25Wʋkpa yu dulunya abʋrɩ kpiniŋ sɛ wʋ nkpa lɩɩ wʋ pam naŋ na, be sɛ wʋ a yu? 26Wʋkʋma wʋŋ asaju chaŋ ɩ lɩɩ maŋ na ma wɩɛ dʋɔ na, dɩmʋŋ sɛ asaju aja chaŋ Wʋkpa Bu wʋŋ fa wʋkpa wina saŋa gaa maa bɔrɛ kɔŋ ma jilima naŋ na Majuo na Ɩsʋɔ gabʋɔsɛ dɩchɩrɩchɩrɩ jilima naŋ na.>> 27Sɛ Yesu ju dʋɔ tawɩ ba sɛ, <<Maa tawɩ sɛ n nyii na dieli sɛ amɩɛ baa ɩ wɩɛ jɩna na barɛ baa na sɩŋ ŋ ga tala gʋ baa na Ɩsʋɔ Juori gaa.>>
Yesu wʋsɛ gori
Matiyo 17:1-8; Maakɩ 9:2-8
28Gʋ Yesu tawɩ dɩmʋŋ wɩɛ ŋina taŋ wɩɛ jiŋinara wʋrʋgbɩɛ na, wʋ mʋ Petero, Yohane na Jamesi sɛ wʋ na ba ju bʋrɔŋ garɛ dʋɔ na baa ga jɔ dɩga. 29Gʋ wʋ a jɔ dɩga na, sɛ wʋ asanaŋ gori, sɛ wʋ gagba ŋalagi takɩɛ duoni ŋmaŋi na. 30Dɩmaŋ sɛ ba na baala bala barɛ kɔŋ wʋ jaŋ. Baa n nyina Ɩsʋɔ ɔja Mosesi na Eliya. 31Ba lɩsɛ ba wʋsɛ ifuli kalaa Yesu jilima naŋ yela ba na ɩ baa tawɩ. Ba tawɩ wʋ sɩŋ gaa gaa kɔŋ tɩba Yerusalem na dʋɔ wɩɛ. 32Saŋa gana, Petero na wʋ dɔŋa ba cha baa duo asoroŋ. Ama gʋ ba feŋ na, ba na Yesu jilima na baala bala baa ba sɩmɩɛɩ wʋ jaŋ na. 33Gʋ baala baa lɩɩ Yesu jaŋ na, Petero tawɩ Yesu sɛ, <<Kpaŋjuo, ŋɩ wɩɛ dieli gʋ dɩ wɩɛ jɩna. Yela na dɩ baŋ akoneŋ atoro. N teri garɛ, Mosesi teri garɛ na Eliya gba teri garɛ.>> [Wʋ cha wʋ ba jiŋ ŋii wʋ a tawɩ ɩ.]
34Gʋ wʋ saŋ wʋ a tawɩ na, Ɩsʋɔ tanɩɛ gaa fu ba dʋɔ. Gʋ dɩ fu ba dʋɔ na, sɛ nyɩŋtɩɛ chaŋ ba. 35Sɛ lofu garɛ lɩɩ Ɩsʋɔ tanɛ gaa naŋ kɔŋ sɛ, <<Wina n nyina Mabu wʋŋ ma lɩsɛ na. N nyii wʋ jaŋ.>> 36Gʋ lofu gaa tawɩ taŋ na, kpalɛnara baa na gʋ dɩ kakaa Yesu nyiŋeŋ. Sɛ ba yela sɛ wɩɛ ŋii dʋɔ ba nyienaŋ, ba n tawɩ wɩɛ ŋii ba naa na fa wʋrʋ ʋ.
Yesu geŋ feliŋ sʋbʋ lɩɩ wʋchaa wʋrʋ tɩba
Matiyo 17:14-18; Maakɩ 9:14-27
37Gʋ tɩɛ naa sɛ ba lɩɩ bʋrɔŋ dʋɔ kɔŋ na, jama baa gaa jaŋina Yesu. 38Kɩɛ baalɛ wʋrʋ lɩɩ jama baa tɩba kuusi tawɩ sɛ, <<Wʋkalaasa, maa sʋlʋ nyaŋ bɛ kɩɛ ma bu fa maŋ, akala takɩɛ wʋ nyiŋeŋ n nyina mabu. 39Feliŋ sʋbʋ kɔŋ wʋ dʋɔ na, gabʋanaŋ sɛ wʋ a kuusi, sɛ ŋii karɩɛ ɩ lɔ tibi, afɔŋɩ ɩ yela afʋfʋ a lɩɩ wʋ nʋɔ naŋ. Ŋii yela ɩ bileŋ n, ama ŋii nyala ɩ pɔɩ na ŋii yela ɩ. 40Ma sʋlʋ nya kpalɛnara baa sɛ ba n geŋ feliŋ sʋbʋ wʋŋ lɩɩ wʋ tɩba, ama ba n dɩlɛ ɛ.>>
41Sɛ Yesu tawɩ ba sɛ, <<O, amɩɛ gɩnanaŋ baa ɩɩ lɩɛ ɩ di sɛ amɩɛ gbɩɛsɛ n chirigi i. Mʋ ga tala wɩɛ aŋmaŋ sɛ maŋ na amɩɛ dɩ n cha? Mʋ ga tala wɩɛ aŋmaŋ sɛ ma n yu digela fa amɩɛ? Mʋ nbu wʋŋ kɔna maŋ.>>
42Gʋ wʋchaa wʋŋ a kɔnɛ na, feliŋ sʋbʋ wʋŋ kara ɩ lɔ tibi yela afɔŋɩ ɩ. Ama Yesu fʋba feliŋ sʋbʋ wʋŋ dʋɔ sɛ wʋ chɔ wʋchaa wʋŋ sɛ wʋ mʋ ɩ fa wʋjuo. 43Ganaŋkʋ Yesu lɩsɛ Ɩsʋɔ gɩjanɛ kalaa na yɩɛ bakpa baa kpiniŋ doba. Gʋ ŋɩ saŋ ŋɩ wɩɛ ba doba lɩɩna ŋii Yesu yɩɛ na, wʋ tawɩ wʋ kpalɛnara baa 44sɛ, <<N nyii wɩɛ ŋii maa kɔŋ ma tawɩ amɩɛ n na na dieli. Baa lɩsɛ Wʋkpa Bu wʋŋ dʋ bakpa pamɩɛ naŋ.>> 45Ama wʋ kpalɛnara baa n nyii wɩɛ ŋii tie ɩ, akala takɩɛ Ɩsʋɔ mʋ wɩɛ ŋii tie wɩsɛ ba. Ama wɩɛ ba nyɩŋtɩɛ na baa tasɛ ɩ wɩɛ ŋii tie.
Mmʋɔ n nyina wʋjaŋ-janɛ Ɩsʋɔ Juori naŋ
Matiyo 18:1-5; Maakɩ 9:33-37
46Sɛ Yesu kpalɛnara baa a di dɔŋa noro sɛ Mmʋɔ n nyina wʋjaŋ-janɛ. 47Ama gʋ Yesu jiŋ ba nfɩɛrɛ ŋii baa fa na, sɛ wʋ mʋ wʋchaa pii gaa sɩŋ wʋ jaŋ. 48Sɛ wʋ tawɩ sɛ, <<Wʋkʋma wʋŋ wʋ lɩɛ wʋchaa pii wina ma yɩrɛ naŋ na, wʋ lɩɛ maŋ. Wʋkʋma wʋŋ wʋ lɩɛ maŋ na, wʋ lɩɛ wʋŋ wʋ kpiri maŋ na gba. Wʋŋ wʋ yɩɛ wʋ pii amɩɛ tɩba na, wʋŋ n nyina wʋjaŋ-janɛ.>>
Wʋkʋma wʋŋ wʋ aa yuo daa na, wɩɛ da jaŋ
Maakɩ 9:38-40
49Sɛ Yohane tawɩ Yesu sɛ, <<Kpaŋjuo, dɩ na baalɛ wʋrʋ wʋ mʋ n yɩrɛ wʋ a geŋ feliŋ sʋbʋ wʋ a lɩɩ bakpa tɩba sɛ dɩ tawɩ ɩ sɛ wʋ n yela, akala takɩɛ wʋ n kpi daa dʋɔ ɔ.>>
50Ama Yesu tawɩ ba sɛ, <<N baa tawɩ ɩ sɛ wʋ n yela. Akala takɩɛ wʋkʋma wʋŋ wʋ aa yuo daa na, wɩɛ daa jaŋ bɛ.>>
Samariyatina n lɩɛ Yesu di i
51Gʋ saŋa gaa Yesu aja wʋ a ju adugbe tirina na, wʋ yɩɛ wʋ nfɩɛrɛ sɛ wʋ a ju Yerusalem. 52Sɛ wʋ kpiri gabʋɔsɛ sɛ ba n pala wʋ asanaŋ ju Samariya dɩɛ bie garɛ naŋ ga kʋla da ɩ. 53Ama bakpa baa ba wɩɛ dɩmaŋ na, n lɩɛ ɩ di i, akala takɩɛ wʋ a ju Yerusalem bɛ. 54Gʋ wʋ kpalɛnara Jamesi na Yohane na dɩmʋŋ na, ba tasɛ sɛ, <<Kpaŋjuo, nyaa ja na dɩ yagɛ bʋala lɩɩ Ɩsʋɔ adugbe gaa gaa ŋɩɛ ba?>> 55Ama Yesu biliŋi kɩɛ ba sɛ wʋ tawɩ baŋ ba. 56Sɛ wʋ na wʋ kpalɛnara baa bɔrɛ ju dɩɛ bie ga baŋbaŋ garɛ naŋ.
Baa baa ja baa kpaŋ Yesu na
Matiyo 8:19-22
57Gʋ Yesu na wʋ kpalɛnara baa dɔŋ gbɩɛ naŋ baa ju na, baalɛ wʋrʋ tawɩ Yesu sɛ, <<Gapɩlɛkʋma gaa nyaa ju na maa kpaŋ nyaŋ.>>
58Sɛ Yesu tawɩ ɩ sɛ, <<Awʋja aba wɩɛna bʋɔsɛ baa duo sɛ jimbisi wɩɛna gasɩsasɛ. Ama Wʋkpa Bu wʋŋ bɩrɛ, wʋ tana diduwei i.>>
59Sɛ Yesu tawɩ baalɛ wʋ baŋbaŋ wʋŋ sɛ, <<Kpaŋ maŋ.>> Ama baalɛ wʋŋ lɩsɛ nʋɔ sɛ, <<Kpaŋjuo, yela maa chɩŋkpɩɛ ju ga wuu majuo pɔɩ.>>
60Sɛ Yesu tawɩ ɩ sɛ, <<Yela na sira a wuu dɔŋa, ama nyaŋ bɩrɛ, ju ga jɔ Ɩsʋɔ Juori gaa dʋɔ dawuta.>>
61Sɛ wʋ baŋbaŋ dʋɔ sɛ, <<Kpaŋjuo, maa kpaŋ nyaŋ, ama yela maa chɩŋkpɩɛ ju ga kali ma lʋŋtina pɔɩ.>>
62Sɛ Yesu tawɩ ɩ sɛ, <<Wʋkʋma wʋŋ wʋ chaŋ puligi nyɩŋgɩrɛ ga farɛsa sɛ wʋ biliŋi kɩɛ wʋ wʋrɩgbɩɛ na, n daga Ɩsʋɔ Juori gaa naŋ ŋ.>>
Currently Selected:
Luka 9: CLL
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy amp Bible Translation
