Luka 13
13
Biliŋi lɩɩ dɩsʋbʋ naŋ yaa sɩŋ
1Saŋa gaa Yesu akala na, bakpa barɛ cha ba wɩɛ dɩmaŋ sɛ ba tawɩ Yesu sɛ Galaliyatina barɛ kɔŋ baa gaa diesi gadiesa Ɩsʋɔ tʋm danɛ naŋ. Sɛ Juo Pilato yela sɛ ba kʋ ba sɛ ba asima bʋga namɩɛ baa ba mʋ kɔŋ baa gaa diesi na asima naŋ. 2Yesu lɩsɛ ba nʋɔ sɛ, <<Ɩ jiŋ sɛ dɩmʋŋ Galaliyatina bana n nyina dɩsʋbʋ yɩɛra kii Galaliyatina baa ba kakaa na, dɩmʋŋ dʋɔ sɛ ba cha na yowu sɩŋ ŋina? 3Aye, ama maa tawɩ amɩɛ sɛ, ɩŋ biliŋi lɩɩ amɩɛ dɩsʋbʋ naŋ na, dɩmʋŋ sɛ amɩɛ kpiniŋ ɩ sɩŋ, 4yaa ɩ jiŋ sɛ bakpa gifi jiŋinara baa danɛ jalɩŋtɛ gaa ga wɩɛ Silowam cha sala kʋ ba na yɩɛ dɩsʋbʋ yɩɛra kii bakpa baa ba kakaa Yerusalem naa? 5Aye, maa tawɩ amɩɛ sɛ, ɩŋ biliŋi lɩɩ amɩɛ dɩsʋbʋ naŋ na, dɩmʋŋ sɛ amɩɛ kpiniŋ ɩ sɩŋ.>>
Figi daŋ gaa ga n si bie na diduu
6Yesu jɔ ba diduu sɛ, <<Baalɛ wʋrʋ n duu figi daŋ wʋ girepi fʋɔ naŋ. Gʋ wʋ ju wʋ a ga kɩɛ daŋ gaa dʋɔ sɛ wʋ a yu bie na, wʋ n yu u. 7Sɛ wʋ tawɩ fʋɔ kɩɛrɛ wʋŋ sɛ kɩɛ, bɩŋsɛ sɛ toro mɩnaŋ ma dɔŋ maa ja figi daŋ gana dʋɔ bie, ama maa yu bʋrʋ ʋ. Wʋŋ ga lɔ. Be sɛ ga sɩmɩɛɩ tibi gana dʋɔ gaa yɩɛ?>>
8Sɛ kɩɛrɛ wʋŋ lɩsɛ nʋɔ sɛ, <<Kpaŋjuo, yela ga na gaa sɩŋ bɩriŋnʋɔ garɛ kpi, na maa wuru bʋɔ logo ga tie, na maa mʋ namɩɛ bɩna dʋ ga tie. 9Bɩriŋnʋɔ garɛ sɛ ga si na, wɩɛ dieli. Ama sɛ ga n si na, na nyaa wʋŋ ga lɔ.>>
Yesu Chɔ alʋ wʋŋ wʋ guo na Fɩɛsɛ wɩɩ
10Fɩɛsɛ wɩɩ garɛ, Yesu cha wʋ a kalaa Yudatina tʋm danɛ garɛ naŋ. 11Alʋ wʋrʋ cha wʋ wɩɛ dɩmaŋ wʋŋ feliŋ sʋbʋ yela sɛ wʋ kili bɩŋsɛ gifi jiŋinara. Wʋ guo sɛ wʋ a dɩlɛ tɩɛŋɩ wʋ wʋsɛ ɛ. 12Gʋ Yesu na ɩ na, wʋ yagɛ ɩ kɔŋ asanaŋ sɛ wʋ tawɩ ɩ sɛ, <<Alʋ, nya yu alaŋfiya.>> 13Wʋ mʋ wʋ pam jaga wʋ dʋɔ, gabʋanaŋ sɛ wʋ tɩɛŋɩ tɩba sɛ wʋ kalɩɛ Ɩsʋɔ.
14Sɛ Yudatina tʋm danɛ naŋ bɩnɛ wʋŋ kara biŋbira sɛ Yesu chɔ lʋm fɩɛsɛ wɩɩ. Dɩmʋŋ dʋɔ wʋ tawɩ bakpa baa sɛ, <<Wɩɛ lʋrʋ sɛ ba chamɩna baa tʋm. Dɩmʋŋ dʋɔ n kɔŋ na baa chɔ amɩɛ dɩmʋŋ gɩyɩɛnɩŋ ŋina naŋ, naa Fɩɛsɛ wɩɩ ɩ.>>
15Sɛ Kpaŋjuo lɩsɛ nʋɔ sɛ, <<Amɩɛ aluguusitina! Amɩɛ Mmʋɔ bɛ ba aaŋ ja wʋ a buoli wʋ naa baalɛ yaa wʋ kpaŋa lɩɩ wʋ dɩkpaŋtɩŋ na wʋ a ga nyʋɔ lɩŋ Fɩɛsɛ wɩɩ? 16Alʋ wina yɩɛ Abiraham ganana bie bɛ sɛ Sɩtanɩ mʋ lʋm pɔgʋ ɩ bɩŋsɛ gifi jiŋinara, dɩ n daga na maa chɔ ɩ Fɩɛsɛ wɩɩ?>>
17Gʋ Yesu tawɩ ŋina na, sɛ asaju chaŋ wʋ badʋŋna baa kpiniŋ. Ama adaŋgana ŋii wʋ a yɩɛ dʋɔ na, bakpa baa asadi.
Kpeli daŋ bi dʋɔ diduu
Matiyo 13:31-32; Maakɩ 4:30-32
18Sɛ Yesu tasɛ bakpa baa sɛ, <<Sɩnɛ sɛ Ɩsʋɔ Juori gaa kɩɛna? Be bʋrʋ dʋɔ sɛ maa mʋ kɩɛsɩna? 19Ga kɩɛna bɛ takɩɛ kpeli daŋ bi gaa baalɛ wʋrʋ duu wʋ fʋɔnaŋ. Gaa bɩɩ sɛ gaa yɩɛ daŋ janɛ sɛ jimbisi a gaa yɩɛ gasɩsasɛ ga gayabɩsɛ naŋ.>>
Yiisi dʋɔ diduu
Matiyo 13:33
20Sɛ Yesu ti bɔrɛ tasɛ sɛ, <<Be bʋrʋ dʋɔ sɛ maa mʋ Ɩsʋɔ Juori gaa kɩɛsɩna? 21Ga kɩɛna bɛ takɩɛ yiisi gaa alʋ wʋrʋ mʋ pii bʋga bodobodo mʋlʋŋ ŋii ŋɩ bɔlɩɛɩ. Sɛ dɩ yela sɛ ŋɩ yɩɛ gafʋʋ.>>
Buonɔ mɔmɔkyɩ gaa
Matiyo 7:13-14; 21:23
22Gʋ Yesu dɔŋ gbɩɛ naŋ wʋ a ju Yerusalem na, wʋ kalaa-kalaa Ɩsʋɔ wɩɛ dɩɛsɛ a janɩɛ na dɩɛsɛ bisi ŋii wʋ mʋna ŋɩ tɩba na. 23Sɛ wʋrʋ tasɛ ɩ sɛ, <<Kpaŋjuo, bakpa pii barɛ sɛ Ɩsʋɔ aja lɩɛ ba nkpa?>>
Sɛ Yesu lɩsɛ nʋɔ sɛ, 24<<N chɩdɩsɛ na ɩ mʋna buonɔ mɔmɔkyɩ gaa naŋ. Maa tawɩ amɩɛ sɛ, bakpa fɔɩ aaŋ ja sɛ baa jʋʋ, ama baa dɩlɛ ɛ.>> 25Sɛ waatɛ wʋŋ kʋlʋ tɔ bʋɔlɛ gaa na, ɩ sɩŋ asʋŋ ɩ jɔ bʋɔlɛ gaa sʋlʋ ɩ sɛ, <<Kpaŋjuo, tʋlʋ daa. Ama wʋ a lɩsɛ amɩɛ nʋɔ sɛ, ma ba jiŋ amɩɛ sɛ ma ba jiŋ diele gaa ɩ lɩɩ ɩ.>>
26Dɩmaŋ sɛ ɩ tawɩ sɛ, <<Daa na nyaŋ aaŋ di sɛ dɩ nyɔ, sɛ nya kalaa-kalaa daa dɩɛ naŋ gbɩɛsɛ bisi naŋ.>>
27Ama wʋ a tawɩ amɩɛ sɛ, <<Ma ba jiŋ amɩɛ na diele gaa ɩ lɩɩ ɩ. N lɩɩ ma jaŋ, amɩɛ dɩsʋbʋ yɩɛra.>>
28Dɩmaŋ sɛ, <<Ɩ na amɩɛ duluŋ Abiraham, Isaki, Yakubu na Ɩsʋɔ bajana kpiniŋ ba wɩɛ Ɩsʋɔ juori gaa naŋ. Ama amɩɛ bɩrɛ ɩ yu gbɩɛ jʋʋ ʋ, dɩmaŋ sɛ wiiniŋ na kela naŋ tawʋ wɩɛ. 29Bakpa aja lɩɩ dɩlɩɩtɩŋ na dɩsalɩtɩŋ, tie na adugbe na baa gaa cha lɩɛ ba asa Ɩsʋɔ Juori gaa naŋ. 30Kɩɛ, wʋrʋgbɩɛtina aja yɩɛ asanaŋtina, na asanaŋtina a yɩɛ wʋrʋgbɩɛtina.>>
Yesu wɩɩ fa Yerusalem
Matiyo 23:37-39
31Saŋa gana naŋ, Farasitina baa barɛ kɔŋ gaa tawɩ Yesu sɛ, <<Kʋlʋ lɩɩ jɩna ju gatʋŋgʋrʋ. Akala takɩɛ Juo Hɛrɔdɩ a ja nyaŋ na wʋ a kʋ.>>
32Sɛ Yesu lɩsɛ ba nʋɔ sɛ, <<N ju ga tawɩ dɩmʋŋ awʋja wina sɛ wʋ n nyii, maa gɩŋ feliŋ sʋbʋ lɩɩ bakpa naŋ na maa chɔ bakpa jaŋ na chifuo, pɔɩ na wɩɩ atorotɛ na, maa taŋ ma dɩtʋm.>> 33Gbɩɛ kʋma dʋɔ ŋɩ tiri gʋ maa ju dʋɔ maa yɩɛ ma dɩtʋm jaŋ na chifuo na chifuo wʋrʋgbɩɛ. Akala takɩɛ Ɩsʋɔ bajana kpiniŋ baa sɩŋ gatʋŋgʋrʋ ʋ amʋɔ Yerusalem.
34Sɛ Yesu ju dʋɔ tawɩ sɛ, <<O Yerusalemtina, Yerusalemtina! Amɩɛ baa ɩ kʋ Ɩsʋɔ bajana sɛ ɩ lɔ baa Ɩsʋɔ kpiri ba amɩɛ jaŋ na bʋɛ. Maa ja sɛ maa sila amɩɛ na maa gie amɩɛ takɩɛ ganaŋkʋ dijim naa a sila wʋ bie wʋ baŋasɛ naŋ sɛ wʋ a gie ba na. Ama ɩŋ kpa a. 35N nyii, Ɩsʋɔ aja lɩsɛ wʋ asa lɩɩ amɩɛ dɩɛ janɛ dʋɔ na gaa yɩɛ dɩtakpaŋ. Maa tawɩ amɩɛ sɛ ɩɩ ti na maŋ ŋ ga tala saŋa gaa ɩ tawɩ sɛ, kusee n nyina wʋŋ wʋ a kɔŋ Kpaŋjuo yɩrɩɛ naŋ na.>>#Num 118:26.
Currently Selected:
Luka 13: CLL
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy amp Bible Translation
