Luka 14
14
Yesu chɔ baalɛ wʋrʋ
1Fɩɛsɛ wɩɩ garɛ Yesu ju Farasi bɩnɛ wʋrʋ waa dʋɔ na wʋ a ga di. Sɛ Farasitina baa ba wɩɛ dɩmaŋ na fara baa pɩɛtɩ ɩ na dieli. 2Baalɛ wʋrʋ wʋŋ wʋ wʋsɛ cha pʋʋ na wɩɛ wʋ asanaŋ dɩmaŋ. 3Sɛ Yesu tasɛ Farasitina na Mosesi mbara bakalaasa baa sɛ, <<Daa mbara fa gbɩɛ sɛ dɩ n chɔ lʋm fɩɛsɛ wɩɩ yaa dɩ n ba chɔ?>> 4Ama ba n tawɩ bʋrʋ ʋ. Sɛ Yesu mʋ wʋ pam jaga baalɛ wʋŋ dʋɔ sɛ wʋ chɔ ɩ, sɛ wʋ yela ɩ sɛ wʋ lam.
5Sɛ wʋ tasɛ ba sɛ, <<Amɩɛ tɩba wʋ Mmʋɔ n wɩɛna bu baalɛ yaa naa baalɛ sɛ wʋ sala ditiribuo naŋ Fɩɛsɛ wɩɩ sɛ wʋ aa lɩsɛ ɩ gabʋanaŋ?>> 6Ama ba n dɩlɛ lɩsɛ wʋ wɩɛ ŋii nʋɔ ɔ.
Kɔna n wʋsɛ tie
7Gʋ Yesu na gʋ bakpa baa ba yagɛ ba asadi adiya di a ŋmari jilima achaatɩŋ na, sɛ wʋ jɔ ba diduu sɛ, 8<<Sɛ wʋrʋ yagɛ nyaŋ sarɛ tie asadi adiya di na, n baa ga cha jilima dɩchatɩŋ, a dɩlɛ kɔŋ takɩɛ wʋ yagɛ wʋŋ wʋ kii nyaŋ na. 9Sɛ dɩ kɔŋ dɩmʋŋ na, wʋŋ wʋ yagɛ amɩɛ bala na, wʋ a tawɩ nyaŋ sɛ, <Kʋlʋ mʋ n gbeli fa wina.> Na asaju a chaŋ nyaŋ na nyaa kʋlʋ ga cha wʋrʋgbɩɛ. 10Ama sɛ wʋrʋ yagɛ nyaŋ asadi adiya di na, ju ga cha wʋrʋgbɩɛ ganaŋkʋ wʋŋ wʋ yagɛ nyaŋ kɔnɛ na, wʋ a gaa tawɩ nyaŋ sɛ, <Ma dɩɛtɛ, kʋlʋ ga cha jilima dɩchatɩŋ.> Dɩmaŋ sɛ nyaa yu jilima n dɔŋa baa wʋ yagɛ ba na asanaŋ. 11Akala takɩɛ wʋkʋma wʋŋ wʋ a jiŋna wʋ wʋsɛ na, Ɩsʋɔ aja kɔna ɩ tie, sɛ wʋkʋma wʋŋ wʋ a kɔna wʋ wʋsɛ tie na, Ɩsʋɔ aja jiŋna ɩ adugbe.>>
12Sɛ Yesu tawɩ wʋŋ wʋ yagɛ ɩ asadi adiya di tie na sɛ, <<Nya yagɛ bakpa wiita yaa bʋyanɔ adiya di na, n baa yagɛ n dɩɛtina, n ŋmɩɛtina, n lʋŋtina yaa akpaŋtatina baa nyaŋ na ba ɩ chaɩ tirina na. Nya yɩɛ dɩmʋŋ na, baa gba baa yagɛ nyaŋ kɔŋ ba asadi adiya di tie na baa tɔ nyaŋ kɩm. 13Ama nyaa yagɛ bakpa asadi adiya di na, yagɛ ayɔŋtina, buobi aba, baa ba jaɩ-jaɩ, bataŋpʋna, 14na nyaa yu kusee. Wɩɛ takɩɛ baa dɩlɛ tɔ nyaŋ kɩm m, ama Ɩsʋɔ aja tɔ nyaŋ kɩm saŋa gaa wʋ a feŋsi bachirigisa feŋ lɩɩ sɩŋ naŋ wɩɩ na.>>
Asadi adiya di janɛ dʋɔ diduu
Matiyo 22:1-10
15Sɛ bakpa baa ba na Yesu ba chaɩ baa di na tɩba wʋrʋ nyii wɩɛ ŋina na, wʋ tawɩ Yesu sɛ, <<Kusee n nyina wʋkpa wʋŋ wʋ a di asadi adiya di Ɩsʋɔ Juori gaa naŋ.>>
16Sɛ Yesu lɩsɛ ɩ nʋɔ sɛ, <<Baalɛ wʋrʋ n yagɛ bakpa fɔɩ asadi adiya di janɛ tie.>> 17Gʋ di saŋa talɛ na, wʋ kpiri wʋ tʋmɩrɛ sɛ wʋ n ju ga tawɩ baa wʋ yagɛ ba na sɛ, <<Ba n kɔŋ, ma yɩɛ bʋrʋkʋma taŋ.>>
18Gʋ wʋ tawɩ dɩmʋŋ na, <<Ba wʋkʋma yu nʋɔ lɩsɛ sɛ wʋ aa dɩlɛ kɔŋ ŋ. Wʋŋ wʋ dɔŋ asanaŋ na tawɩ sɛ, dɩtɩɛna gana sɛ ma lɩɛ tibi. Dɩmʋŋ dʋɔ maa dɩlɛ kɔŋ ŋ.>>
19Sɛ, <<Balatɛ wʋŋ dʋɔ tawɩ sɛ dɩtɩɛna gana sɛ ma lɩɛ naa baala gifi. Ma dɔŋ gbɩɛ naŋ maa ju maa mʋ ba ga yɩɛ kɩɛ, dɩmʋŋ dʋɔ maa dɩlɛ kɔŋ ŋ.>>
20Sɛ, <<Wʋfɔlɛ dʋɔ tawɩ sɛ dɩtɩɛna gana sɛ ma taa saa alʋ, dɩmʋŋ dʋɔ maa dɩlɛ kɔŋ ŋ.>>
21Sɛ, <<Tʋmɩrɛ wʋŋ bɔrɛ kɔŋ gaa tawɩ wɩɛ ŋii kpiniŋ fa wʋ Kpaŋjuo. Sɛ waatɛ wʋŋ kara biŋbira sɛ wʋ tawɩ wʋ tʋmɩrɛ wʋŋ sɛ, yɩɛ bileŋ ju dɩɛ gbɩɛ na dɩɛ naŋ gbɩɛsɛ bisi naŋ ga yagɛ ayɔŋtina, buobi aba, bataŋpʋna na baa ba jaɩ-jaɩ na kɔŋ.>>
22Gʋ wʋ ju ga yɩɛ ŋii wʋ kpaŋjuo tawɩ ɩ taŋ na, wʋ bɔrɛ kɔŋ gaa tawɩ ɩ sɛ, <<Kpaŋjuo, ma yɩɛ ŋii nya dʋ maŋ na taŋ, ama achaatɩŋ saŋ ŋɩ wɩɛ.>>
23Sɛ Kpaŋjuo wʋŋ ti tawɩ wʋ tʋmɩrɛ wʋŋ sɛ, <<Ju gbɩɛsɛ na dɩɛsɛ bisi gbɩɛsɛ naŋ ga sʋlʋ bakpa kɔŋ na ma waa a su. 24Maa tawɩ amɩɛ sɛ, bakpa baa ma yagɛ ba sɛ ba n kɔŋ na tɩba wʋrʋ taŋ wʋ a yu asadi adiya ŋii di i.>>
Yesu kpam wɩɛ yawʋ doŋ
Matiyo 10:37-38
25Jama baa kpamɩna Yesu baa ju gbɩɛ, sɛ wʋ biliŋi kɩɛ ba tawɩ sɛ, 26<<Wʋkʋma wʋŋ wʋ a ja sɛ wʋ a kpaŋ maŋ sɛ wʋ aa ja maŋ kii wʋ lʋrʋda, wʋ alʋ na wʋ bie, wʋ ŋmɩɛtina na wʋ diesina na wʋ tɩŋtɩŋ wʋ wʋsɛ na, wʋ aa dɩlɛ yɩɛ ma wʋrʋgbɩɛtɛ ɛ. 27Sɛ wʋkʋma wʋŋ wʋ n mʋ wʋ tɩŋtɩŋ wʋ daŋ gasagasa silɛ na wʋ a kpaŋ maŋ na, wʋ aa dɩlɛ yɩɛ ma wʋrʋgbɩɛtɛ ɛ.>>
28Sɛ Yesu tawɩ sɛ, <<Dɩ n mʋ takɩɛ amɩɛ tɩba wʋrʋ aja sɛ wʋ a ma danɛ jalɩŋtɛ, wʋ aa chɩŋkpɩɛ cha na wʋ a kɩɛ aterembie ŋii wʋ a tiri na wʋ a mʋ ma danɛ gaa ga taŋ?. 29Akala takɩɛ wʋ si tie dɩpɔrɛ ama wʋ n dɩlɛ ma danɛ gaa taŋ na, wʋkʋma wʋŋ wʋ a na ga na, wʋ a mʋɩ ɩ. 30Na wʋ a tawɩ sɛ baalɛ wina fara danɛ maa, ama wʋ n dɩlɛ taŋ ŋ.>>
31Yaa, <<Dɩ n mʋ takɩɛ Juo wʋrʋ aja sɛ wʋ a ju ga yuo na wʋ dʋɔ Juo, wʋ aa chɩŋkpɩɛ cha na wʋ a kɩɛ sɛ wʋ a dɩlɛ mʋ wʋ yuora kɔrʋɔsɛ gifi (10,000) ga yuo na wʋ dʋɔ Juo wʋŋ wʋ wɩɛna yuora kɔrʋɔsɛ nkuo (20,000)? 32Sɛ wʋ na gʋ wʋ aa dɩlɛ na, wʋ a kpiri gabʋɔsɛ Juo wʋ baŋbaŋ wʋŋ jaŋ saŋa gaa wʋ saŋ wʋ wɩɛ taŋasɛ wʋ a kɔnɛ na, na baa ga ja wʋsɛfɩɛ kɔŋ ba tɩtɩba. 33Dɩmʋŋ sɛ wʋkʋma wʋŋ wʋ aa dɩlɛ yela bʋrʋkʋma gaa wʋ a jawʋ na, wʋ aa dɩlɛ yɩɛ ma kpalɛnarɛ ɛ.>>
Yasɛ ŋii ŋɩ taŋ dieli na
Matiyo 5:13; Maakɩ 9:50
34Sɛ Yesu tawɩ sɛ, <<Yasɛ wɩɛ dieli, ama ŋɩ jʋŋ lɩɩ ŋɩ tɩba na, sɩnɛ sɛ ɩ yɩɛ ŋɛ na ŋii tii yɩɛ jʋŋ? 35Ŋɩ taŋ dieli fa tibi yaa fa adiya na ŋii bɩɩ ɩ, baa chɩɛgɩ tʋsʋ bɛ. Sɛ Yesu tawɩ sɛ, wʋkʋma wʋŋ wʋ wɩɛna dɩla na wʋ n nyii.>>
Currently Selected:
Luka 14: CLL
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy amp Bible Translation
