Luka 16
16
Kɩɛrɛ kpiŋjim-tɛ dʋɔ diduu
1Sɛ Yesu jɔ diduu tawɩ wʋ kpalɛnara baa sɛ, <<Akpaŋtatɛ wʋrʋ n cha wʋ wɩɛna sɛ wʋ wɩɛna kɩɛrɛ wʋŋ wʋ a kɩɛ wʋ akpaŋta dʋɔ. Sɛ ba pʋɩ ɩ fa wʋ kpaŋjuo wʋŋ sɛ wʋ a warɩɛ wʋ akpaŋta.>> 2Dɩmʋŋ dʋɔ wʋ yagɛ ɩ sɛ wʋ tasɛ ɩ sɛ, <<Be wɩɛ sɛ maa nyii lɩɩ n dʋɔ n na? Gaa kalaa maŋ ma akpaŋta ŋii nyaa kɩɛ dʋɔ na kpiniŋ nʋɔ, akala takɩɛ nyaa ti dɩlɛ yɩɛ ma akpaŋta dʋɔ kɩɛrɛ ɛ.>>
3Sɛ kɩɛrɛ wʋŋ fa nfɩɛrɛ sɛ, <<Sɩnɛ sɛ maa yɩɛ dɩtɩɛna? Ma Kpaŋjuo aja wʋ a lɩɛ ma dɩtʋm lɩɩ ma pamɩɛ naŋ. Ma taŋ doŋ na maa fara a, sɛ ŋɩ wɩɛ maŋ juu na maa ga sʋlʋ. 4Ma jiŋ bʋrʋ gaa maa yɩɛ, ganaŋkʋ ma dɩtʋm lɩɩ ma pamɩɛ naŋ na, bakpa aja lɩɛ maŋ ba waasɛ dʋɔ.>>
5Dɩmʋŋ dʋɔ wʋ yagɛ wʋkʋma wʋŋ wʋ dina wʋ Kpaŋjuo wʋŋ kɩm gaa jaŋi. Sɛ wʋ tasɛ asanaŋtɛ wʋŋ sɛ, <<Kɩm aŋmaŋ sɛ nya dina ma Kpaŋjuo?>>
6Sɛ wʋ lɩsɛ nʋɔ sɛ, <<Olifi nuŋ galɔŋ gafisi jiŋinara. Sɛ kɩɛrɛ wʋŋ tawɩ ɩ sɛ mʋ n kɩm tanɛ na nyaa cha bileŋ na nyaa sabɩɛ gafisi sɩ nara.>>
7Sɛ wʋ tasɛ balatɛ wʋŋ sɛ, <<Kɩm aŋmaŋ sɛ nyaŋ dʋɔ n dina? Sɛ wʋ lɩsɛ nʋɔ sɛ, gamɩsɛ bʋɔtaŋ kɔrɔ. Sɛ wʋ tawɩ ɩ sɛ mʋ n kɩm tanɛ na nyaa sabɩɛ gafisi jiŋinara.>>
8Gʋ akpaŋtatɛ wʋŋ nyii dɩmʋŋ na, <<Wʋ kalɩɛ kɩɛrɛ wʋŋ wʋ aa di gasiŋteŋ na kpiŋjim gbɩɛ gaa wʋ mʋna na dʋɔ. Akala takɩɛ tibi dʋɔ bakpa chamɩna dɩsɛ karɛ ba chaɩ na ba nabie kii Ɩsʋɔ bie.>> 9Maa tawɩ amɩɛ sɛ, n mʋ amɩɛ dulunya akpaŋta mʋ yɩɛ dɩbam mʋ ja dɩɛtina, sɛ akpaŋta ŋii tam na, baa mʋ amɩɛ ju dɩchatɩŋ gaa ga taŋ gɩtɛ na naŋ.
10Sɛ wʋ ju dʋɔ tawɩ sɛ, <<Wʋkʋma wʋŋ wʋ di gasiŋteŋ bʋrʋ pii dʋɔ na, wʋ a di gasiŋteŋ abʋrɩ fɔɩ dʋɔ. Sɛ wʋkʋma wʋŋ wʋ n di gasiŋteŋ bʋrʋ pii dʋɔ na, wʋ aa di gasiŋteŋ abʋrɩ fɔɩ gba dʋɔ ɔ. 11Dɩmʋŋ dʋɔ wʋkʋma wʋŋ wʋ aa di gasiŋteŋ dulunya akpaŋta dʋɔ na, Ɩsʋɔ baa yela wʋ a kɩɛ adugbe akpaŋta abama dʋɔ ɔ. 12Sɛ nyaa n di gasiŋteŋ wʋrʋ akpaŋta dʋɔ na, aja yɩɛ sɩnɛ na Ɩsʋɔ a fa amɩɛ tɩŋtɩŋ akpaŋta?>>
13Sɛ wʋ ju dʋɔ tawɩ sɛ, <<Tʋmɩrɛ wʋrʋ taŋ wʋ a dɩlɛ tʋŋ Kpaŋjuo aba bala a. Sɛ dɩ kɔŋ dɩmʋŋ na, wʋ a kɔla wʋrʋ na wʋ a ja wʋrʋ wɩɛ, yaa wʋ a mʋ wʋ wʋsɛ fa wʋrʋ na wʋ a kɩɛ wʋrʋ kpakpuo. Ɩɩ dɩlɛ tʋŋ Ɩsʋɔ na aterembie e.>>
Yesu wɩɛ a tawɩsa ŋarɛ
Matiyo 11:12-13; 5:31-32; Maakɩ 10:11-12
14Gʋ Farasitina baa baa ja aterembie na nyii wɩɛ ŋii Yesu tawɩ na, sɛ ba mʋɩ ɩ. 15Sɛ wʋ tawɩ ba sɛ, <<Amɩɛ aaŋ yɩɛ amɩɛ wʋsɛ takɩɛ ɩ yɩɛ ba chirigisa bakpa asa dʋɔ, ama Ɩsʋɔ bɩrɛ wʋ jiŋ amɩɛ agela naŋ. Ŋii ŋii su wʋkpa asa na, Ɩsʋɔ asanaŋ bɩrɛ, yɩɛ akɔlɛsa bɛ.>>
16Sɛ Yesu ju dʋɔ tawɩ sɛ, <<Pɔɩ na Yohane Ɩsʋɔ Sɔrɛ wʋŋ a kɔŋ na, Mosesi mbara na Ɩsʋɔ bajana baa sabɩɛ wɩɛ. Ama lɩɩ Yohane saŋa na, ba jɔ Ɩsʋɔ Juori gaa dʋɔ Wɩɛ Abama ŋii dawuta, sɛ wʋkʋma a chɩdɩsɛ wʋ a ja wʋ a yu gbɩɛ jʋʋ. 17Ŋɩ taŋ doŋ fa Ɩsʋɔ adugbe na tie takɩɛ ŋii laŋ, ama ŋii yɩɛ doŋ takɩɛ mbara ŋii tɩba sabɩɛ ga pii garɛ aja lɩɩ tɩba.>>
18Sɛ Yesu tawɩ sɛ, <<Baalɛ kʋma wʋŋ wʋ yela wʋ alʋ sɛ wʋ saa alʋ fɔlɛ na, wʋ yɩɛ alʋ wʋrʋgbɩɛ lɩɩ, sɛ baalɛ kʋma wʋŋ wʋ saa alʋ wʋŋ ba yela ɩ sarɛ na, wʋ yɩɛ alʋ wʋrʋgbɩɛ lɩɩ.>>
Aterembie-tɛ wʋŋ na Lasarosi
19Sɛ Yesu ju dʋɔ jɔ diduu gana sɛ, <<Baalɛ aterembietɛ wʋrʋ n cha wʋ wɩɛna. Saŋa kʋma wʋ a fu kirimaŋ lɩŋ gagba na dɩkalala gagba ŋii ŋɩ yawʋ wɩɛ doŋ. Wʋ a lɩɛ wʋ asa wɩɩ kʋma. 20Baalɛ ayɔŋtɛ wʋrʋ dʋɔ cha wʋ wɩɛ baa yagɛ ɩ sɛ Lasarosi wʋŋ wʋ wʋsɛ kpiniŋ yɩɛ awʋnda. Saŋa kʋma baa mʋ ɩ baa kɔŋ baa si aterembie-tɛ wʋŋ waa buonɔ. 21Wʋ yu na nafʋɔ wʋ a di adiya ŋii ŋii lɩɩ ŋii sala aterembie-tɛ wʋŋ tebulu tie na. Paasɛ gba gaa nyɩsɩ wʋ awʋnda ŋii naŋ.>>
22Dɩ kɔŋ takɩɛ, <<Ayɔŋtɛ wʋŋ sɩŋ sɛ Ɩsʋɔ gabʋɔsɛ gaa mʋ ɩ ju Abiraham jaŋ. Sɛ aterembietɛ wʋŋ gba sɩŋ sɛ ba wuu ɩ. 23Gʋ wʋ wɩɛ awʋrʋfʋɔ bʋala naŋ na, wʋ a na awʋrʋfʋɔ na, wʋ jiŋna wʋ asa sɛ wʋ na Abiraham taŋasɛ-taŋasɛ yela Lasarosi wɩɛ wʋ jaŋ. 24Sɛ wʋ kuusi sɛ Majuo Abiraham, wɩɩ ma gɩyɔŋ na nyaa kpiri Lasarosi na wʋ a mʋ wʋ pam nyiŋbie ga nyʋ lɩŋ naŋ na wʋ a mʋ gaa tapʋ ma nʋɔjʋlʋŋ na gaa fɩɛ maŋ, akala takɩɛ maa na awʋrʋfʋɔ bʋala gana naŋ.>>
25Ama Abiraham lɩsɛ nʋɔ sɛ, <<Mabu, nyiŋi gʋ saŋa gaa n chaɩ nkpa naŋ na, n wʋsɛ fɩɛ nyaŋ, sɛ Lasarosi bɩrɛ, wʋ na awʋrʋfʋɔ. Ama dɩtɩɛna bɩrɛ wʋ wʋsɛ fɩɛ ɩ jɩna, sɛ nyaŋ dʋɔ, n wɩɛ awʋrʋfʋɔ naŋ. 26Ŋina kpiniŋ wʋrʋgbɩɛ na, ogie janɛ garɛ duwei daa na amɩɛ tɩtɩba, wʋkʋma wʋŋ wʋ a ja sɛ wʋ a lɩɩ daa jaŋ ju amɩɛ jaŋ na, wʋ aa dɩlɛ ɛ, dɩmʋŋ sɛ wʋrʋ gba baa dɩlɛ lɩɩ amɩɛ jaŋ kɔŋ daa jaŋ jɩna a.>>
27Sɛ aterembie-tɛ wʋŋ lɩsɛ nʋɔ sɛ, <<Dɩmʋŋ bɩrɛ, majuo, maa sʋlʋ nyaŋ, kpiri Lasarosi majuo waa dʋɔ. 28Akala takɩɛ ma wɩɛna nabie baala jaŋ ba nʋŋ. Yela na wʋ a ju ga jɔ ba nyienaŋ ganaŋkʋ baa kɔŋ gaa na awʋrʋfʋɔ ŋina a.>>
29Sɛ Abiraham lɩsɛ nʋɔ sɛ, <<Mosesi mbara na Ɩsʋɔ bajana sabɩɛ wɩɛ ŋii fɩla ŋɩ wɩɛ ba jaŋ, yela baa di ŋɩ dʋɔ.>>
30Sɛ wʋ lɩsɛ nʋɔ sɛ, <<Aye, majuo Abiraham, wʋrʋ lɩɩ sira naŋ ju ba jaŋ na, baa biliŋi lɩɩ ba dɩsʋbʋ naŋ.>>
31Sɛ wʋ tawɩ ba sɛ, <<Ba n nyii Mosesi mbara na Ɩsʋɔ bajana sabɩɛ wɩɛ ŋii na, hali wʋrʋ lɩɩ sɩŋ naŋ ju ba jaŋ gba, ba aa lɩɛ wɩɛ ŋii wʋ tawɩ na di i.>>
Currently Selected:
Luka 16: CLL
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy amp Bible Translation
