Luka 17
17
Dɩsʋbʋ dʋɔ wɩɛ
Matiyo 18:6-7; Matiyo 18:21-22; Maakɩ 9:42
1Yesu tawɩ wʋ kpalɛnara baa sɛ, <<Dɩ yɩɛ ganaŋkʋma, bʋrʋ gaa gaa yela sɛ bakpa a yɩɛ dɩsʋbʋ na aja kɔŋ. Ama wʋŋ aja pala na wʋ dʋɔ kɔŋ na, wʋŋ lakʋ. 2Ŋɩ wɩɛ dieli fa ɩ takɩɛ ba mʋ bʋɩ ganamsa janɛ pɔgʋ wʋ lafu tie na baa lɔ ɩ dʋ ɔpʋ naŋ kii gʋ wʋ a yela na ba buruburu bana tɩba wʋrʋ aja yɩɛ dɩsʋbʋ.>> 3Dɩmʋŋ dʋɔ <<N kɩɛ amɩɛ wʋsɛ dʋɔ na dieli. N dʋɔ lɩɛdɩrɛ yɩɛ nyaŋ dɩsʋbʋ na, tawɩ ɩ. Wʋ nyii wʋ wʋsɛ tie na, mʋ chɩɛ ɩ. 4Wʋ yɩɛ nyaŋ dɩsʋbʋ gbɩɛta lɩkaarɛ wiitabi, sɛ wʋ kɔŋ n jaŋ gbɩɛta lɩkaarɛ gaa tawɩ nyaŋ sɛ wʋ nyii wʋ wʋsɛ tie na, mʋ chɩɛ ɩ.>>
Lɩɛdi dʋɔ wɩɛ
5Sɛ wʋ kpirida baa tawɩ Kpaŋjuo sɛ, <<Suri daa lɩɛdi dʋɔ.>>
6Sɛ kpaŋjuo wʋŋ lɩsɛ ba nʋɔ sɛ, <<Ɩ wɩɛna lɩɛdi pii takɩɛ kpeli daŋ bi na, nafʋɔ ɩ dɩlɛ tawɩ daŋ janɛ gana sɛ, <Kuli ga baŋ ɔpʋ naŋ,> gaa nyii amɩɛ wɩɛ.>>
Tʋmɩrɛ dɩtʋm yɩɛ
7Sɛ Yesu ju dʋɔ tawɩ sɛ, <<<Dɩ n mʋ takɩɛ amɩɛ tɩba Mmʋɔ n wɩɛna tʋmɩrɛ wʋ a farɛ n fʋɔ yaa wʋ a kɩɛ n feŋ dʋɔ, sɛ wʋ lɩɩ fʋɔ kɔŋ na, wʋ kpaŋjuo wʋŋ aja tawɩ ɩ sɛ yɩɛ bileŋ gaa cha na nya di?> 8Aye, ama wʋ a tawɩ ɩ sɛ, <Tɩŋɛ adiya na nyaa mʋ n wʋsɛ na nyaa fa maŋ adiya na maa di na maa nyʋɔ. Wʋrʋgbɩɛ na, nyaŋ gba nyaa di na nyaa nyʋɔ.> 9Wʋ aa yɩlɩ wʋ tʋmɩrɛ wʋŋ ŋii wʋ dʋ ɩ sɛ wʋŋ yɩɛ sɛ wʋ yɩɛ naa? 10Dɩmʋŋ sɛ amɩɛ gba ɩ yɩɛ bʋrʋkʋma gaa ba tawɩ amɩɛ sɛ n yɩɛ na, ɩ tawɩ sɛ dɩ yɩɛ tʋmɩra baa dɩ n daga na, dɩ yɩɛ dɩtʋm gaa ga tiri gʋ dɩ n yɩɛ na.>>
Yesu chɔ baala achalaŋa gifi barɛ
11Sɛ dɩ kɔŋ takɩɛ Yesu dɔŋ gbɩɛ dʋɔ wʋ a ju Yerusalem dɩɛ naŋ, wʋ mʋna Samariya na Galaliya dɩkpalɩŋ. 12Gʋ wʋ a jʋʋ dɩɛ bie garɛ naŋ na, baala gifi barɛ baa baa kili gɩchalaŋa jaŋina ɩ. Sɛ ba sɩŋ taŋasɛ 13sɛ ba kuusi sɛ, <<Kpaŋjuo Yesu wɩɩ daa gɩyɔŋ.>>
14Gʋ Yesu na ba na sɛ wʋ tawɩ ba sɛ, <<N pala na ɩ mʋ amɩɛ wʋsɛ ga kalaa Ɩsʋɔ seina.>> Gʋ baa ju na sɛ ba na gʋ ba yu lʋm chʋɔ.
15Gʋ ba tɩba wʋrʋ na gʋ wʋ yu alaŋfiya na, wʋ bɔrɛ kɔŋ Yesu jaŋ, sɛ wʋ kuusi na doŋ kalɩɛ Ɩsʋɔ. 16Wʋ laŋ duo Yesu nafara tie sɛ wʋ yɩlɩ ɩ. Wʋ cha wʋ yɩɛ Samariya wʋkpa bɛ.
17Sɛ Yesu tasɛ ɩ sɛ, <<Naa bakpa gifi sɛ ma chʋɔ? Saŋgʋ baa wɩɛ le? 18Be n yɩɛ sɛ wʋŋ wʋ ba yɩɛ Yuda wʋkpa na nyɩŋɩŋ n bɔrɛ kɔŋ gaa yɩlɩ Ɩsʋɔ?>> 19Sɛ Yesu tawɩ ɩ sɛ, <<Kʋlʋ pala, n lɩɛdi yela sɛ nya yu lʋm chʋɔ.>>
Ɩsʋɔ Juori gaa kɔnɛ
Matiyo 24:23-28; Matiyo 24:37-41
20Wɩɩ darɛ, Farasitina baa barɛ tasɛ Yesu saŋa gaa Ɩsʋɔ Juori gaa aja kɔŋ. Sɛ wʋ lɩsɛ ba nʋɔ sɛ, <<Ɩsʋɔ juori gaa ba yɩɛ bʋrʋ gaa bakpa aja mʋ ba asa na a 21yaa bakpa aja tawɩ sɛ, <N kɩɛ, ga wɩɛ jɩna,> yaa <Gaa n wɩɛna dɩmaŋ na.> Akala takɩɛ ga fɩla ga wɩɛ amɩɛ tɩba.>>
22Sɛ Yesu tawɩ wʋ kpalɛnara baa sɛ, <<Saŋa gʋrʋ a ja kɔŋ ɩ ja sɛ nafʋɔ ɩ na Wʋkpa Bu wʋŋ gɩyɩɛnɩŋ ŋii naŋ ŋarɛ, ama ɩɩ na a. 23Bakpa aja tawɩ amɩɛ sɛ, <N kɩɛ, wʋŋ n wɩɛna jɩna na,> yaa <Wʋŋ n wɩɛna dɩmaŋ na.> N baa kpaŋ ba. 24Wʋkpa Bu wʋŋ bɔrɛ kɔŋ saŋa aja yɩɛ bɛ takɩɛ ganaŋkʋ duoni ŋmaŋi a charɩɛ na ŋii ŋmaŋi Ɩsʋɔ adugbe lɩɩ salɛ garɛ mʋ ju salɛ garɛ na. 25Ama ŋɩ tiri gʋ wʋ a chɩŋkpɩɛ na awʋrʋfʋɔ fɔɩ na jaŋ gɩnanaŋ a pɩɛ ɩ.>>
26Ganaŋkʋ kɩɛna Nowa saŋa na, dɩmʋŋ sɛ Wʋkpa Bu wʋŋ bɔrɛ kɔŋ saŋa aja yɩɛ. 27Bakpa cha baa di baa nyʋɔ yela baa saa ga tala wɩɩ gaa Nowa jʋʋ buori janɛ naŋ. Sɛ lɩŋ gaa su walɛ kʋ ba.
28Sɛ Yesu ju dʋɔ tawɩ sɛ, <<Dɩmʋŋ sɛ ŋɩ chaɩ Lɔtɩ saŋa gaa naŋ. Bakpa cha baa di baa nyɔ, baa lɩɛ yela baa yaa, sɛ baa du yela baa ma danɩŋ. 29Ama saŋa gaa Lɔtɩ a lɩɩ Sodom na, sɛ bʋala na abʋrɩ ŋii baa yagɛ sɛ sɔfa tibi lɩɩ Ɩsʋɔ adugbe gaa sala ŋɩɛ ba kpiniŋ.>>
30Sɛ Yesu ju dʋɔ tawɩ sɛ, <<Dɩmʋŋ sɛ aja yɩɛ saŋa gaa Wʋkpa Bu wʋŋ aja lɩsɛ wʋ wʋsɛ na. 31Wɩɩ gana na, wʋŋ wʋ wɩɛ danɛ adugbe na, n baa tibi jʋʋ danɛ naŋ ga mʋ bʋrʋ. Dɩmʋŋ sɛ wʋŋ wʋ wɩɛ fʋɔnaŋ na, n baa yɩɛ wʋ nfɩɛrɛ sɛ wʋ a ti bɔrɛ kɔŋ dɩɛ gaa mʋ bʋrʋ. 32N nyiŋi ŋii ŋɩ mɩɛna Lɔtɩ alʋ na. 33Wʋkʋma wʋŋ wʋ a ja wʋ a yu nkpa fa wʋ wʋsɛ na, ŋii jɔ ɩ. Ama wʋkʋma wʋŋ wʋ nkpa jɔ ɩ lɩɩ maŋ na Ɩsʋɔ wɩɛ dʋɔ na, wʋ a yu nkpa. 34Maa tawɩ amɩɛ sɛ, ma bɔrɛ kɔŋ wɩɩ yuluma na, bakpa bala aja duo mpa garɛ dʋɔ, baa mʋ wʋrʋ na baa yela wʋrʋ. 35Ala bala aja naŋ gamɩsɛ bʋɩ garɛ dʋɔ, baa mʋ wʋrʋ na baa yela wʋrʋ. 36Baala bala aja wɩɛ fʋɔnaŋ, baa mʋ wʋrʋ na baa yela wʋrʋ.>>#17:36 Naa Ɩsʋɔ wɩɛ ŋii kpiniŋ n wɩɛna ŋina a
37Sɛ Yesu kpalɛnara baa tasɛ ɩ sɛ, <<Daa Kpaŋjuo, le sɛ ŋina aja tibi?>> Sɛ wʋ lɩsɛ ba nʋɔ sɛ, <<Diele gaa atatɛ wɩɛ na, dɩmaŋ sɛ ajɩsaŋ asila.>>
Currently Selected:
Luka 17: CLL
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy amp Bible Translation
