Luka 2
2
Yesu lʋrʋ dʋɔ wɩɛ
Matiyo 1:18-25
1Dɩmʋŋ gɩyɩɛnɩŋ ŋina naŋ na, Juo Kayisa Agusitusi dʋ sɛ ba n kalaa bakpa Roma tibi kpiniŋ dʋɔ. 2Dɩmʋŋ bakpa kalɩŋ ŋina n nyina ŋii ŋɩ dɔŋ asanaŋ saŋa gaa Kireniyosi yɩɛ Siriya tibi dʋɔ kɩɛrɛ. 3Sɛ wʋkʋma wina ju wʋ dɩɛnaŋ na wʋ a ga sabɩɛ wʋ yɩrɛ.
4Dɩmʋŋ dʋɔ Yosefu lɩɩ Nasarati gaa ga wɩɛ Galaliya tibi dʋɔ ju Betilehem, Juo Dawidi dɩɛ gaa ga wɩɛ Yudiya tibi dʋɔ. Akala takɩɛ wʋ lɩɩ Juo Dawidi lʋŋtɩrɛ naŋ bɛ sɛ wʋ yɩɛ wʋ ganana bie. 5Sɛ Yosefu na Mariya wʋŋ ba mʋ ɩ fa ɩ sarɛ na ju baa ga sabɩɛ ba yɩrɩɛ. Na Mariya dɔŋ na fɩlɩ. 6Gʋ ba wɩɛ dɩmaŋ na, sɛ dʋŋɩwʋ chaŋ Mariya, 7sɛ wʋ lʋrʋ wʋbu asanaŋtɛ bu baalɛ. Sɛ wʋ mʋ apaŋtaŋ mɩlɩ ɩ, wʋ mʋ ɩ ga duosi namɩɛ adiya dɩdaka naŋ. Akala takɩɛ ba n yu diduwei mʋɔra danɛ gaa naŋ ŋ.
Feŋ kpara na Ɩsʋɔ gabʋɔsɛ
8Dɩmʋŋ saŋa gana na, feŋ kpara barɛ cha ba wɩɛ Betilehem tibi dʋɔ salɛ gatʋŋgʋrʋ baa kɩɛ ba feŋ dikpeŋ dɩmʋŋ yuluma gana. 9Sɛ Ɩsʋɔ gabʋɔ wʋrʋ lɩsɛ wʋ wʋsɛ kalaa ba sɛ Ɩsʋɔ jilima ŋmaŋi logo ba sɛ nyɩŋtɩɛ chaŋ ba. 10Ama Ɩsʋɔ gabʋɔ wʋŋ tawɩ ba sɛ, <<N baa yela na nyɩŋtɩɛ a chaŋ amɩɛ. Ma chamɩna Ɩsʋɔ wɩɛ abama ŋii ŋii mʋ asadi fa bakpa kpiniŋ na bɛ maa kɔna amɩɛ. 11Jaŋ, ba lʋrʋ Mɔlɔgɩrɛ fa amɩɛ Juo Dawidi dɩɛ naŋ, wʋŋ n nyina Kirisito#2:11 Kirisito tie akala sɛ Mɔlɔgɩrɛ. Girikitina a yagɛ ɩ sɛ Kirisito sɛ Yudatina a yagɛ ɩ sɛ Mesaya Kpaŋjuo wʋŋ. 12Ŋina aaŋ ja yɩɛ amɩɛ daasɛ wɩɛ, ɩ na ba mʋ apaŋtaŋ mɩlɩ wʋchaa fɔlɛ wʋ duwei namɩɛ adiya dɩdaka naŋ.>>
13Dɩmaŋ sɛ Ɩsʋɔ gabʋɔsɛ fɔɩ lɩɩ Ɩsʋɔ adugbe gaa kpi gabʋɔ wʋŋ dʋɔ, sɛ ba kalɩɛ Ɩsʋɔ sɛ,
14<<Jilima n ju fa Ɩsʋɔ wʋŋ wʋ wɩɛ adugbe na
sɛ wʋsɛfɩɛ n ju fa bakpa baa Ɩsʋɔ wɩɩ ba dʋɔ tibi dʋɔ na.>>
15Gʋ Ɩsʋɔ gabʋɔsɛ baa lɩɩ ba jaŋ bɔrɛ ju Ɩsʋɔ adugbe na, sɛ feŋ kpara baa tawɩ dɔŋa sɛ, <<N yela na dɩ ju Betilehem ga kɩɛ bʋrʋ gaa ga yɩɛ sɛ Ɩsʋɔ tawɩ ŋɩ wɩɛ fa daa na.>>
16Dɩmʋŋ dʋɔ ba yɩɛ bileŋ ju ga ja na Yosefu na Mariya na wʋchaa fɔlɛ wʋŋ wʋ duwei namɩɛ adiya dɩdaka gaa naŋ. 17Gʋ ba na ɩ na, ba tawɩ fa wʋkʋma ŋii Ɩsʋɔ gabʋɔ wʋŋ gaa tawɩ ba lɩɩ wʋchaa wʋŋ dʋɔ na. 18Sɛ dɩ yɩɛ wʋkʋma wʋŋ wʋ nyii feŋ kpara baa wɩɛ ŋii ba tawɩ na doba. 19Ama Mariya bɩrɛ, wʋ mʋ wɩɛ ŋii wɩsɛ wʋ digela naŋ wʋ a fa ŋɩ dʋɔ nfɩɛrɛ. 20Gʋ feŋ kpara baa bɔrɛ baa kɔnɛ na, ba mʋ yɩlɩ na kalɩɛwʋ fa Ɩsʋɔ lɩɩ ŋii ba nyii sɛ ba naa na dʋɔ ganaŋkʋ Ɩsʋɔ gabʋɔ wʋŋ tawɩ ba na.
Ba si Yesu yɩrɛ
21Gʋ wʋchaa wʋŋ di wɩɛ jiŋinara, sɛ baa kara wʋ baŋlɛ na, sɛ ba si ɩ yɩrɛ sɛ Yesu. Yɩrɛ gaa Ɩsʋɔ gabʋɔ wʋŋ tawɩ si pɔɩ sɛ ba yu wʋ fɩlɩ na.
22Gʋ saŋa talɛ gʋ ba n ju ga yɩɛ iniesi saŋ lɩsɛ ganaŋkʋ Mosesi mbara kalaa na, Yosefu na Mariya ba mʋ wʋchaa wʋŋ ju Yerusalem Ɩsʋɔ tʋm danɛ naŋ na baa ga mʋ ɩ fa Ɩsʋɔ 23[ganaŋkʋ ba sabɩɛ Mosesi mbara naŋ sɛ,<<Bu baalɛ asanaŋtɛ kʋma yɩɛ dɩchɩrɩchɩrɩ fa Ɩsʋɔ bɛ.>>#Ɛsa 13:2.] 24Na baa diesi gadiesa ganaŋkʋ Mosesi mbara kalaa na sɛ ba n mʋ, <<Juori gakuosɛ bala yaa gakuo bisi bala ju ga diesi gadiesa.>>
25Dɩmʋŋ saŋa gana na, baalɛ wʋrʋ cha wʋ wɩɛ Yerusalem baa yagɛ ɩ sɛ Simiyoŋ. Wʋ yɩɛ wʋkpa wʋ chirigisa sɛ wʋ a se Ɩsʋɔ sɛ Ɩsʋɔ Feliŋ wɩɛ wʋ dʋɔ. Wʋ dana saŋa gaa Ɩsʋɔ aja mɔlɔgɩ Isirali. 26Ɩsʋɔ Feliŋ cha lɩsɛ kalaa ɩ sɛ wʋ a sɩŋ ŋ, amʋɔ wʋ na Kirisito wʋŋ Ɩsʋɔ lɩsɛ ɩ na. 27Sɛ Ɩsʋɔ Feliŋ yela sɛ Simoŋ ju Ɩsʋɔ tʋm danɛ naŋ. Gʋ Yesu lʋrʋda baa mʋ ɩ ju tʋm danɛ naŋ ga yɩɛ ganaŋkʋ Mosesi mbara kalaa na, 28Simoŋ mʋ ɩ chaŋ wʋ pamɩɛ naŋ sɛ wʋ mʋ kalɩɛwʋ fa Ɩsʋɔ tawɩ sɛ,
29<<Kpaŋjuo Ɩsʋɔ, ŋii nya tawɩ si na kɔŋ tɩba,
dɩtɩɛna bɩrɛ, tii nya tʋmɩrɛ gbɩɛ wʋsɛfɩɛ naŋ.
30Akala takɩɛ ma asa na nya Mɔlɔgɩrɛ wʋŋ.
31Wʋŋ nya fɩla desina si bakpa kpiniŋ na.
32Wʋŋ n nyina ŋmaŋi fa baa ba ba yɩɛ Yudatina na,
na wʋ a mʋ jilima kɔna wʋ bakpa Isiralitina.>>
33Wɩɛ ŋii Simoŋ tawɩ lɩɩ wʋchaa wʋŋ dʋɔ na yɩɛ wʋ lʋrʋda doba. 34Sɛ Simiyoŋ yɩɛ ba kusee sɛ wʋ tawɩ Mariya sɛ, <<Kɩɛ, wʋchaa wina wɩɛ takɩɛ wʋŋ aaŋ ja wʋ a mʋ salɩŋ na kʋlʋ kɔna Isiralitina, na wʋ a yɩɛ daasɛ ŋii bakpa aja tawɩ chicha 35na ŋii yela bakpa fɔɩ nyienaŋ wɩɛ a lɩɩ ifuli. Sɛ nyaŋ gba yuo dabɩla aja sɔ nyaŋ.>>
36Dɩmʋŋ saŋa gana naŋ, anʋmʋŋsarɛ wʋrʋ cha wʋ wɩɛ baa yagɛ ɩ sɛ Ana, wʋ yɩɛ Ɩsʋɔ ɔja alʋ jaŋ bɛ. Wʋ juo n nyina Fanuweli wʋŋ wʋ lɩɩ Asa buonɔ naŋ. Wʋ saa sɛ wʋ cha wʋ baalɛ jaŋ bɩŋsɛ lɩkaarɛ sɛ wʋ baalɛ sɩŋ. 37Wʋ cha gikula bɩŋsɛ ŋɩnara na anara. Wʋ n lɩɩ Ɩsʋɔ tʋm danɛ naŋ ŋ, ama wiita na yuluma wʋ wɩɛ dɩmaŋ wʋ a tʋm, wʋ a chaŋ nʋɔ pɔgʋ yela wʋ a jɔ dɩga wʋ a fa Ɩsʋɔ. 38Gʋ Simoŋ saŋ wʋ a tawɩ na, sɛ Ana kɔŋ ba jaŋ sɛ wʋ yɩlɩ Ɩsʋɔ, sɛ wʋ tawɩ wʋchaa wʋŋ wʋsɛ dʋɔ wɩɛ fa bakpa baa ba dana Ɩsʋɔ mɔlɔgɩ ŋii wʋ a mɔlɔgɩ Yerusalem dɩɛ na.
39Gʋ Yosefu na Mariya ba yɩɛ bʋrʋkʋma taŋ ganaŋkʋ Ɩsʋɔ mbara kalaa na, ba bɔrɛ ju ba dɩɛnaŋ Nasarati. 40Sɛ wʋchaa wʋŋ bɩɩ. Sɛ wʋ yɩɛ doŋ sɛ wʋ yu kpiŋjim, sɛ Ɩsʋɔ wɩɩ wɩɛ wʋ dʋɔ.
Wʋchaa Yesu wɩɛ Ɩsʋɔ tʋm danɛ naŋ
41Bɩriŋnʋɔ kʋma Yesu lʋrʋda a ju Yerusalem baa di nyiŋi asadi adiya di gɩyɩɛnɩŋ ŋii. 42Gʋ Yesu dɩ bɩŋsɛ gifi ala na, ba ju baa ga di wɩɩ di ganaŋkʋ Yudatina ayɩɛsa a kalaa na. 43Gʋ ba di asadi adiya di taŋ sɛ wʋ lʋrʋda baa bɔrɛ baa ju dɩɛ na, Yesu dʋɔ Yerusalem, yela wʋ lʋrʋda ba jiŋ ŋ. 44Na ba jiŋ sɛ wʋ kpi ba dikpeŋ gaa dʋɔ bɛ, dɩmʋŋ dʋɔ ba pala wɩɩ gana kpiniŋ pɔɩ sɛ ba fara baa ja ɩ ba lʋŋtina naŋ na ba dɩɛtina naŋ. 45Gʋ ba n na ɩ na, ba bɔrɛ ju Yerusalem na baa ga ja ɩ. 46Wɩɛ atoro wɩɩ na, ba na ɩ wʋ cha ɩ Ɩsʋɔ tʋm danɛ naŋ bakalaasa baa jaŋ wʋ a nyii ba jaŋ yela wʋ a tasɛ ba wɩɛ. 47Wʋkʋma wʋŋ wʋ nyii wʋ wɩɛ na, dɩ yɩɛ ɩ doba lɩɩna wʋ tie nyii na wʋ nʋɔ lɩsɛ. 48Gʋ Yesu lʋrʋda na ɩ na, dɩ yɩɛ ba doba. Sɛ wʋnaa tasɛ ɩ sɛ, <<Mabu, be n yɩɛ sɛ nya yɩɛ daa dɩmʋŋ? Kɩɛ, maŋ na njuo daa asa chɩbɛ dɩ ja nyaŋ.>>
49Sɛ Yesu tasɛ ba sɛ, <<Be n yɩɛ dʋɔ sɛ ɩ ja maŋ? Ɩ ba jiŋ sɛ ŋɩ tiri gʋ maa cha Majuo waa dʋɔ?>> 50Ama ba n nyii wɩɛ ŋii wʋ tawɩ ba na tie ɩ.
51Sɛ Yesu kpaŋ wʋ lʋrʋda bɔrɛ ju Nasarati yela wʋ a nyii ba dɩ tawɩ. Ama Mariya mʋ wɩɛ ŋina wɩsɛ wʋ nyinaŋ. 52Sɛ Yesu bɩɩ sɛ wʋ bɩɩ kpiŋjim naŋ, sɛ wʋ yu Ɩsʋɔ na bakpa asa naŋ Ɩsʋɔ wɩɩ.
Currently Selected:
Luka 2: CLL
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy amp Bible Translation
