Luka 4
4
Sɩtanɩ yɩɛ Yesu lɔ tɩba
Matiyo 4:1-11; Maakɩ 1:12-13
1Gʋ Yesu lɩɩ Yodaŋ buo naŋ kɔŋ na, Ɩsʋɔ Feliŋ su wʋ tɩba sɛ Ɩsʋɔ Feliŋ mʋ ɩ ju ifuli dʋɔ. 2Dɩmaŋ sɛ Sɩtanɩ gaa yɩɛ ɩ lɔ tɩba wɩɛ ŋɩla (40). Wʋ n di bʋrʋ dɩmʋŋ gɩyɩɛnɩŋ ŋina kpiniŋ sɛ dusoŋ chaŋ ɩ.
3Sɛ Sɩtanɩ tawɩ ɩ sɛ, <<Sɛ nyaŋ n nyina Ɩsʋɔ Bu na, tawɩ bʋɩ gana na gaa bɩrɩŋsɛ adiya.>>
4Sɛ Yesu lɩsɛ ɩ nʋɔ sɛ, <<Ba sabɩɛ si Ɩsʋɔ wɩɛ naŋ sɛ, <Adiya nyiŋeŋ baa fa wʋkpa nkpa a.>#Ditiro 8:3. >>
5Sɛ Sɩtanɩ mʋ Yesu ju bʋrɔŋ ga jalɩŋtɛ garɛ dʋɔ sɛ wʋ mʋ tibi dʋɔ juori kpiniŋ kalaa Yesu gabʋanaŋ. 6Sɛ wʋ tawɩ Yesu sɛ, <<Maa mʋ ŋina dʋɔ yikuo na jilima kpiniŋ fa nyaŋ. Akala takɩɛ ba mʋ ŋina kpiniŋ fa maŋ, maa dɩlɛ mʋ fa wʋkʋma wʋŋ maa jawʋ na. 7Dɩmʋŋ dʋɔ, sɛ nyaa luuŋ tʋm maŋ na, ŋina kpiniŋ aja yɩɛ n teri.>>
8Sɛ Yesu lɩsɛ nʋɔ sɛ, <<Ba sabɩɛ Sabɩɛwɩɛ ŋii naŋ sɛ, <Tʋm Kpaŋjuo nya Ɩsʋɔ na nyaa tʋŋ wʋ nyiŋeŋ.>#Ditiro 6:13.>>
9Sɛ Sɩtanɩ ti mʋ Yesu ju Yerusalem dɩɛ naŋ sɛ wʋ mʋ ɩ ga sɩŋ Ɩsʋɔ tʋm danɛ adugbe. Sɛ wʋ tawɩ ɩ sɛ, <<Sɛ nyaŋ n nyina Ɩsʋɔ Bu na, Puli lɩɩ jɩna ga tala tibi. 10Akala takɩɛ, ba sabɩɛ Sabɩɛwɩɛ ŋii naŋ sɛ,
<<<Ɩsʋɔ aja kpiri wʋ gabʋɔsɛ
na baa gaa gara nyaŋ.
11Baa chaŋ n tɩba ba pamɩɛ naŋ
na n nafara n baa baŋ bʋɩ.>#Num 91:11.>>
12Sɛ Yesu lɩsɛ nʋɔ sɛ, <<Ba ti sabɩɛ Sabɩɛwɩɛ ŋii naŋ sɛ, n baa yɩɛ Kpaŋjuo nya Ɩsʋɔ lɔ tɩba.>>
13Gʋ Sɩtanɩ mʋna gbɩɛ kʋma dʋɔ yɩɛ Yesu lɔ tɩba taŋ na, wʋ yela wʋ dana saŋa bam naŋ.
Yesu fara wʋ dɩtʋm Galaliya tibi dʋɔ
Matiyo 4:12-17; Maakɩ 1:14-15
14Yesu bɔrɛ ju Galaliya tibi dʋɔ Ɩsʋɔ Feliŋ yikuo naŋ. Sɛ wʋ wʋsɛ dʋɔ wɩɛ yalagi tibi gaa dʋɔ gapɩlɛkʋma. 15Sɛ Yesu kalaa Ɩsʋɔ wɩɛ Yudatina tʋm danɛ naŋ sɛ wʋkʋma kalɩɛ ɩ.
Nasaratitina pɩɛ Yesu
Matiyo 13:53-58; Maakɩ 6:1-6
16Sɛ Yesu ju Nasarati diele gaa ba bɩsɛ ɩ na, gʋ fɩɛsɛ wɩɩ talɛ na, wʋ ju Yudatina tʋm danɛ naŋ ganaŋkʋ wʋ ayɩɛsa akala na. Sɛ wʋ kʋlʋ sɩŋ na wʋ a karaŋ Ɩsʋɔ Wɩɛ. 17Sɛ ba mʋ Ɩsʋɔ wɩɛ tanɛ gaa ba go ga sɛ Ɩsʋɔ ɔja Yisaya sabɩɛ na fa ɩ. Gʋ wʋ buoli na, wʋ na diele gaa ba sabɩɛ sɛ,
18<<Ɩsʋɔ Feliŋ wɩɛ ma dʋɔ
akala takɩɛ wʋ lɩsɛ maŋ sɛ maŋ tawɩ Ɩsʋɔ Wɩɛ Abama ŋii fa ayɔŋtina.
Wʋ kpiri maŋ sɛ maŋ ga tawɩ danɛ tʋɔra sɛ baa di ba nyie,
na bataŋpʋna asa a na abʋrɩ na baa baa nyala ba na a di ba nyie.
19Wʋ kpiri maŋ sɛ maŋ gaa jɔ dawuta sɛ saŋa gaa
Ɩsʋɔ aja wɩɩ bakpa dʋɔ na talɛ.>>
20Sɛ Yesu go tanɛ gaa mʋ fa Yudatina tʋm danɛ naŋ kɩɛrɛ sɛ wʋ ga cha. Yela baa ba wɩɛ dɩmaŋ na kpiniŋ a kɩɛ ɩ 21sɛ Yesu fara wʋ a tawɩ ba sɛ, <<Jaŋ, Ɩsʋɔ Sabɩɛwɩɛ ŋina kɔŋ tɩba amɩɛ dɩla naŋ.>>
22Sɛ bakpa kpiniŋ tawɩ wʋ wʋsɛ dʋɔ wɩɛ abama sɛ dɩ yɩɛ ba doba lɩɩna wɩɩ dʋɔ wɩɛ ŋii ŋɩ lɩɩ wʋ nʋɔ naŋ na. Sɛ ba tasɛ sɛ, <<Naa Yosefu bu wʋŋ mɩnaŋ?>>
23Sɛ Yesu tawɩ ba sɛ, <<Ma jiŋ gʋ ɩ jɔ maŋ diduu sɛ, chʋɔrɛ, chɔ n wʋsɛ! Yɩɛ n dɩɛ naŋ jɩna bʋrʋ gaa dɩ nyii sɛ nya yɩɛ Kapeniyum na.>>
24Sɛ Yesu ju dʋɔ tawɩ ba sɛ, <<Maa tawɩ sɛ n nyii na dieli sɛ baa lɩɛ Ɩsʋɔ ɔja baa di wʋ dɩɛ naŋ ŋ. 25N nyii na dieli, Ɩsʋɔ ɔja Eliya saŋa na, bakʋlapʋna fɔɩ cha ba wɩɛ Isirali tibi dʋɔ. Saŋa gana sɛ ɩwʋlɛ sɩŋ bɩŋsɛ sɩ toro na salɛ sɛ dusoŋ janɛ gaa ga nʋɔ wɩɛ doŋ kɔŋ tibi kpiniŋ dʋɔ. 26Ama Ɩsʋɔ n kpiri Eliya ju ba wʋrʋ jaŋ ŋ, amʋɔ okulapu wʋrʋ wʋŋ wʋ wɩɛ Sarifata gaa ga wɩɛ Sidoŋ tibi dʋɔ na nyiŋeŋ. 27Ɩsʋɔ ɔja Eliya saŋa na, achalaŋa fɔɩ cha ba wɩɛ Isirali tibi dʋɔ, ama naa ba kpiniŋ sɛ wʋ chʋɔ ɔ, amʋɔ Siriya wʋkpa Naaman nyiŋeŋ.>>
28Bakpa baa ba wɩɛ Yudatina tʋm danɛ naŋ na nyii Yesu wɩɛ na, biŋbira chaŋ ba. 29Sɛ ba kʋlʋ ti ɩ lɩɩ dɩɛ gaa naŋ. Mʋ ɩ ju bʋrɔŋ gaa dɩɛ gaa wɩɛ ga dʋɔ na laraŋ na baa ga ti ɩ dʋ ogie naŋ. 30Ama wʋ mʋna jama baa tɩba laŋ.
Yesu gɩŋ Feliŋ sʋbʋ lɩɩ baalɛ wʋrʋ tɩba
Maakɩ 1:21-28
31Yesu ju Kapeniyum dɩɛ gaa ga wɩɛ Galaliya tibi dʋɔ na. Gʋ fɩɛsɛ wɩɩ talɛ na, sɛ wʋ ju Yudatina tʋm danɛ naŋ ga kalaa bakpa abʋrɩ. 32Sɛ wʋ kalaa ŋii yɩɛ ba doba, akala takɩɛ yikuo wɩɛ wʋ wɩɛ ŋii naŋ.
33Dɩmaŋ gana na, baalɛ wʋrʋ feliŋ sʋbʋ wɩɛ wʋ tɩba wʋ wɩɛ Yudatina tʋm danɛ gaa naŋ sɛ wʋ kuusi sɛ, 34<<Ndo! Nyaŋ, Yesu Nasarati wʋkpa, be sɛ nyaa ja daa jaŋ? Nya kɔŋ na nyaa warɩɛ daa bɛ? Ma jiŋ wʋkpa wʋŋ nya yɩɛ na. Nya yɩɛ wʋŋ wʋ yɩɛ dɩchɩrɩchɩrɩ wʋŋ wʋ lɩɩ Ɩsʋɔ jaŋ na bɛ.>>
35Yesu fuba feliŋ sʋbʋ wʋŋ dʋɔ sɛ, <<Fu n nʋɔ dʋɔ na nyaa lɩɩ baalɛ wʋŋ tɩba.>> Feliŋ sʋbʋ wʋŋ jigisi baalɛ wʋŋ sɛ wʋ kuusi na doŋ sɛ wʋ lɩɩ wʋ tɩba. Sɛ feliŋ sʋbʋ wʋŋ kara baalɛ wʋŋ lɔ tibi ba asanaŋ sɛ wʋ lɩɩ wʋ tɩba laŋ yela bʋrʋ n yɩɛ ɩ ɩ.
36Sɛ dɩ yɩɛ bakpa baa kpiniŋ doba sɛ ba tawɩ fa dɔŋa sɛ, <<Be kalaa mɩnaŋ? Wʋ chamɩna yikuo wʋ a fuba feliŋ sʋbʋ dʋɔ yela baa lɩɩ bakpa tɩba>> 37Dɩ lɩɩ takɩɛ Yesu wʋsɛ dʋɔ wɩɛ ŋii nyii Galaliya tibi dʋɔ gapɩlɛkʋma.
Yesu chɔ bakpa fɔɩ
Matiyo 8:14-17; Maakɩ 1:29-34
38Gʋ Yesu lɩɩ Yudatina tʋm danɛ gaa naŋ na, wʋ ju Simoŋ waa dʋɔ. Simoŋ wʋ awu cha wʋ a kili gibirima sɛ ba sʋlʋ Yesu sɛ wʋŋ gaa chɔ ɩ. 39Sɛ wʋ gaa sɩŋ wʋ jaŋ sɛ wʋ tawɩ gibirima gaa sɛ ga n lɩɩ wʋ tɩba, sɛ ga yela ɩ. Sɛ wʋ kʋlʋ fa ba adiya.
40Bʋyanɔ gʋ wiita a ju wʋ a ga sala na, bakpa baa ga mʋ lʋmɩɛtina kpiniŋ baa baa kili lʋmɩɛ ngoriŋ-ngoriŋ mʋ kɔŋ Yesu jaŋ. Sɛ wʋ n mʋ wʋ pam jaga wʋkʋma dʋɔ na wʋ a chɔ ba. 41Gʋ feliŋ sʋbʋ baa a lɩɩ bakpa fɔɩ baa tɩba na, yela baa kuusi sɛ, <<Nyaŋ n nyina Ɩsʋɔ Bu wʋŋ.>> Ama wʋ jɔ ba nyienaŋ sɛ wʋ n nkpa na baa tawɩ e, akala takɩɛ ba jiŋ gʋ wʋŋ n nyina Kirisito wʋŋ.
42Gʋ tɩɛ naa na, Yesu ju ifuli dʋɔ, yela bakpa dɔŋ baa ja ɩ. Gʋ ba na ɩ na, baa ti ja baa fa ɩ gbɩɛ na wʋ a lɩɩ ba jaŋ ŋ. 43Ama Yesu tawɩ ba sɛ, <<Ŋɩ tiri gʋ maa tawɩ Ɩsʋɔ Juori gaa Wɩɛ Abama ŋii fa dɩɛsɛ ŋii ŋɩ kakaa na. Akala takɩɛ ŋɩ dʋɔ sɛ Ɩsʋɔ kpiri maŋ.>> 44Sɛ Yesu ju dʋɔ tawɩ Ɩsʋɔ wɩɛ Yudatina tʋm danɛ naŋ Yudiya tibi dʋɔ.
Currently Selected:
Luka 4: CLL
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy amp Bible Translation
