Luka 5
5
Yesu yagɛ wʋ kpalɛnara asanaŋtina
Matiyo 4:18-22; Maakɩ 1:16-20
1Wɩɩ darɛ Yesu sɩmɩɛɩ Jɛnasɛrɛtɩ lɩɩ nʋɔ yela bakpa sɩmɩɛɩ logo ɩ na baa nyii Ɩsʋɔ wɩɛ. 2Sɛ wʋ na buoriŋ ala lɩɩ nʋɔ ŋii ŋɩ yɩɛ aji chamɩra barɛ n mʋ si, sɛ ba ju baa ga yalɛ ba asawu. 3Sɛ wʋ jʋʋ buori garɛ naŋ gaa ga yɩɛ Simoŋ teri na, sɛ wʋ tawɩ ɩ sɛ wʋ n ti ga dʋ chonii. Sɛ wʋ laŋ cha buori gaa tɩba sɛ wʋ kalaa bakpa baa Ɩsʋɔ wɩɛ.
4Gʋ Yesu tawɩ Ɩsʋɔ wɩɛ ŋii fa ba taŋ na, sɛ wʋ tawɩ Simoŋ sɛ, <<Wʋ n palaa buori gaa ju diele gaa wɩɛ dɩkɩŋ na, na wʋ na wʋ dɔŋa baa lɔ asawu chaŋ aji.>>
5Sɛ Simoŋ lɩsɛ nʋɔ sɛ, <<Kpaŋjuo, dɩ lɔ asawu yuluma kpiniŋ, dɩ n yu bʋrʋ ʋ. Ama ganaŋkʋ nya tawɩ na dʋɔ, maa lɔ asawu gaa.>>
6Gʋ ba lɔ asawu gaa na, sɛ ba chaŋ aji fɔɩ sɛ ba asawu gaa aja gaa chati. 7Dɩmʋŋ dʋɔ ba mʋ ba pamɩɛ yɩɛ daasɛ yagɛ ba dɔŋa baa ba wɩɛ buori ga banbaŋ naŋ sɛ ba n gaa chɔna ba. Sɛ ba kɔnɛ, sɛ ba na ba lɩsɛ aji baa dʋ buoriŋ ala ŋii tɩba sɛ ŋɩ suu ŋii ja ŋii muru.
8Gʋ Simoŋ Petero na ŋii ŋɩ yɩɛ na, wʋ luuŋ wʋ dʋna dʋɔ Yesu asanaŋ tawɩ sɛ, <<Kpaŋjuo lɩɩ ma jaŋ. Ma yɩɛ dɩsʋbʋ yɩɛrɛ bɛ.>> 9Aji baa Simoŋ na wʋ dɔŋa baa chaŋ fɔɩ na dʋɔ, dɩ yɩɛ ba doba. 10Dɩmʋŋ gba sɛ dɩ yɩɛ Simoŋ wʋ dɔŋa tʋmɩra Jamesi na Yohane Sebedi bie baa doba. Sɛ Yesu tawɩ Simoŋ sɛ, <<N baa yɩɛ nyɩŋtɩɛ, lɩɩ jaŋ mʋ a ju, nyaa lɩsɛ bakpa fa Ɩsʋɔ.>>
11Gʋ ba palaa ba buoriŋ ŋii gaa daŋ lɩɩ nʋɔ wʋrʋgbɩɛ na, ba yela bʋrʋkʋma sɛ ba kpaŋ Yesu.
Yesu chɔ baalɛ chaalaŋa wʋrʋ
Matiyo 8:1-4; Maakɩ 1:40-45
12Gʋ Yesu wɩɛ Galaliya dɩɛsɛ ŋii garɛ naŋ na, baalɛ wʋŋ gɩchalaŋa#5:12 Dɩmʋŋ gɩchalaŋa gana yɩɛ lʋm gaa gaa fu wʋkpa dʋɔ ama ga ba yɩɛ gɩchalaŋa a fu wʋ wʋsɛ dʋɔ na kɔŋ dɩmaŋ. Gʋ wʋ na Yesu na, wʋ luuŋ wʋ asanaŋ sʋlʋ ɩ sɛ, <<Kpaŋjuo, nyaa jawʋ na, nyaa dɩlɛ chɔ maŋ.>>
13Sɛ wʋ tɩɛŋɩ wʋ pam jaga wʋ dʋɔ tawɩ sɛ, <<Maa jawʋ, n wʋsɛ n yɩɛ dɩchɩrɩchɩrɩ.>> Gabʋanaŋ sɛ gɩchalaŋa gaa lam.
14Sɛ Yesu jɔ wʋ nyinaŋ sɛ, <<N baa tawɩ wʋrʋ. Ama mʋ n wʋsɛ ju ga kalaa Ɩsʋɔ sei na nyaa diesi gadiesa ganaŋkʋ Mosesi mbara akala na, na ŋii di seriya takɩɛ nya yu lʋm chʋɔ.>>
15Ama Yesu wʋsɛ dʋɔ wɩɛ yalagi gapɩlɛkʋma sɛ dɩ yela sɛ bakpa fɔɩ kɔŋ na baa gaa nyii wʋ wɩɛ na wʋ a chɔ ba. 16Ama Yesu a dɩlɛ wʋ a kara wʋ wʋsɛ wʋ a lɩɩ bakpa naŋ wʋ a ju ifuli dʋɔ na wʋ a ga jɔ dɩga.
Yesu chɔ buobi baalɛ wʋrʋ
Maakɩ 2:1-12; Luka 5:17-26
17Wɩɩ darɛ Yesu a kalaa Ɩsʋɔ wɩɛ, yela Farasitina na mbara bakalaasa baa ba lɩɩ Galaliya na Yudiya dɩɛsɛ bisi kpiniŋ, na Yerusalem dɩɛ naŋ na chaɩ dɩmaŋ. Na Ɩsʋɔ yikuo wɩɛ wʋ dʋɔ sɛ wʋ n chɔ lʋmɩɛ. 18Sɛ baala barɛ silɛ buobi wʋrʋ kalaŋ dʋɔ baa ja gbɩɛ baa mʋ ɩ jʋʋ waa gaa Yesu wɩɛ ga tɩba na baa mʋ ɩ ga si wʋ asanaŋ. 19Ama jama baa dʋɔ, ba n yu gbɩɛ na baa mʋ ɩ jʋʋ ʋ. Dɩmʋŋ dʋɔ ba jiŋ danɛ adugbe fʋrʋ bʋɔ diele gaa wʋ wɩɛ na, sɛ ba tibina ɩ yela wʋ duwei kalaŋ dʋɔ si Yesu asanaŋ jama baa tɩba.
20Gʋ Yesu na ba lɩɛdi na wʋ tawɩ baalɛ wʋŋ sɛ, <<Ma dɩɛtɛ, ma mʋ n dɩsʋbʋ chɩɛ nyaŋ.>>
21Dɩmaŋ sɛ Farasitina na mbara bakalaasa baa fa nfɩɛrɛ ba nyienaŋ sɛ, <<Mmʋɔ n nyina wʋkpa wina sɛ wʋ a tawɩ mbusu wɩɛ dɩmʋŋ? Mmʋɔ aaŋ dɩlɛ mʋ dɩsʋbʋ chɩɛ? Amʋɔ Ɩsʋɔ nyiŋeŋ.>>
22Yesu jiŋ ba nfɩɛrɛ, sɛ wʋ tasɛ ba sɛ, <<Be n yɩɛ sɛ ɩ fa dɩmʋŋ nfɩɛrɛ ŋina? 23Ŋɩ amʋɔ n tamana doŋ, sɛ ma tawɩ sɛ, <Ma mʋ n dɩsʋbʋ chɩɛ nyaŋ,> yaa ma tawɩ sɛ, <Kʋlʋ na nyaa pala?> 24Ama ganaŋkʋ aja yela na ɩ jiŋ gʋ Wʋkpa Bu wʋŋ wɩɛna yikuo tibi dʋɔ sɛ wʋ a dɩlɛ mʋ dɩsʋbʋ chɩɛ.>> Sɛ Yesu tawɩ buobi wʋŋ sɛ, <<Maa tawɩ nyaŋ sɛ, kʋlʋ mʋ n kalaŋ na nyaa ju dɩɛ.>> 25Gabʋanaŋ sɛ wʋ kʋlʋ sɩŋ ba asanaŋ, sɛ wʋ mʋ wʋ kalaŋ gaa wʋ duwei ga dʋɔ na yela wʋ a kalɩɛ Ɩsʋɔ. 26Sɛ dɩ yɩɛ wʋkʋma doba sɛ ba kalɩɛ Ɩsʋɔ. Sɛ nyɩŋtɩɛ chaŋ ba sɛ ba tawɩ sɛ, <<Dɩ na doba wɩɛ jaŋ.>>
Yesu yagɛ Lewi
Matiyo 9:9-13; Maakɩ 2:13-17
27Ŋina wʋrʋgbɩɛ na, Yesu lɩɩ dɩɛ gaa naŋ, sɛ wʋ na lampo lɩɛrɛ wʋrʋ baa yagɛ ɩ sɛ Lewi wʋ chaɩ lampo danɛ naŋ. Sɛ Yesu tawɩ ɩ sɛ, <<Kpaŋ maŋ.>> 28Sɛ Lewi yela bʋrʋkʋma sɛ wʋ kʋlʋ kpaŋ ɩ.
29Sɛ Lewi yagɛ asadi adiya di janɛ wʋ waa dʋɔ fa Yesu. Sɛ lampo lɩɛra baa fɔɩ na bakpa barɛ na ba a di. 30Ama Farasitina na Mosesi mbara bakalaasa baa barɛ baa ba kpi Farasitina dikpeŋ dʋɔ na, ba fʋlʋ fa Yesu kpalɛnara baa sɛ, <<Be n yɩɛ sɛ amɩɛ na lampo lɩɛra na dɩsʋbʋ yɩɛra ɩ di ɩ nyʋɔ?>>
31Sɛ Yesu lɩsɛ ba nʋɔ sɛ, <<Alaŋfiyatina n tiri lʋm chʋɔrɛ ɛ, amʋɔ lʋmɩɛtina. 32Ma n kɔŋ na maa gaa yagɛ bachirigisa a. Ama ma kɔŋ na maa gaa yagɛ dɩsʋbʋ yɩɛra na baa biliŋi lɩɩ ba dɩsʋbʋ naŋ bɛ.>>
Wɩɛ tasɛ lɩɩ nʋɔ pɔgʋ dʋɔ
Matiyo 9:14-17; Maakɩ 2:18-22
33Sɛ bakpa barɛ tasɛ Yesu sɛ, <<Yohane kpalɛnara achaŋ nʋɔ pɔgʋ yela baa jɔ dɩga baa fa Ɩsʋɔ dɩmʋŋ sɛ Farasitina kpalɛnara gba a yɩɛ. Ama n kpalɛnara baa bɩrɛ, baa di yela baa nyʋɔ.>>
34Sɛ Yesu lɩsɛ ba nʋɔ sɛ, <<Alʋfɔlɛ baalɛ wʋŋ mʋɔrɛ a chaŋ nʋɔ pɔgʋ yela wʋ wɩɛ ba jaŋ? 35Ama saŋa gʋrʋ aja kɔŋ baa mʋ alʋfɔlɛ baalɛ wʋŋ lɩɩ ba jaŋ, saŋa gana sɛ baa chaŋ nʋɔ pɔgʋ.>>
36Sɛ Yesu jɔ ba diduu sɛ, <<Wʋrʋ baa kara dukuru fɔlɛ na wʋ a mʋ tarɛ gabɩnɛ naŋ ŋ. Wʋ yɩɛ dɩmʋŋ na, gaa chati gafɔlɛ gaa sɛ gafɔlɛ gaa na gabɩnɛ gaa baa yɩɛ bʋdʋŋdʋlʋŋ ŋ. 37Dɩmʋŋ sɛ wʋrʋ baa mʋ wayɩŋ sʋlʋŋ fɔlɛ wʋ a dʋ kpalɛ gabɩnɛ naŋ ŋ. Wʋ yɩɛ dɩmʋŋ na, wayɩŋ sʋlʋŋ ŋii aja salɩɛ kpalɛ gaa, na ŋii chɩɛgɩ tʋsʋ. 38Dɩmʋŋ dʋɔ ŋɩ tiri gʋ ba n mʋ wayɩŋ sʋlʋŋ fɔlɛ dʋ kpalɛ gafɔlɛ naŋ. 39Wʋrʋ baa nyʋɔ wayɩŋ sʋlʋŋ abɩnɩɛ na wʋ a ti wʋ a ja afɔlɩɛ ɛ. Akala takɩɛ wʋ a tawɩ sɛ sʋlʋŋ gabɩnɛ gaa wɩɛ dieli kii gafɔlɛ gaa.>>
Currently Selected:
Luka 5: CLL
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy amp Bible Translation
