Luka 7
7
Yesu chɔ Roma yuora bɩnɛ wʋrʋ tʋmɩrɛ
Matiyo 8:5-13
1Gʋ Yesu tawɩ ŋina kpiniŋ fa bakapa baa taŋ na, wʋ bɔrɛ ju Kapeniyum. 2Dɩmaŋ sɛ Roma yuora gafie bɩnɛ wʋrʋ wʋ tʋmɩrɛ wʋŋ wʋ a ja wʋ wɩɛ fɔɩ na a kili wʋ a ja wʋ a sɩŋ. 3Gʋ yuora gafie bɩnɛ wʋŋ nyii Yesu dʋɔ na, wʋ kpiri Yudatina bɩnɩɛ barɛ wʋ jaŋ ga sʋlʋ ɩ sɛ wʋ n kɔŋ gaa chɔ wʋ tʋmɩrɛ wʋŋ. 4Gʋ ba kɔŋ Yesu jaŋ na, sɛ ba mʋ dɩsɛ chɩbɛ sʋlʋ ɩ sɛ, <<Baalɛ wina daga na nyaa chɔna ɩ, 5akala takɩɛ wʋ a ja daa Yudatina wɩɛ, sɛ wʋ ma daa tʋm danɛ fa daa.>> 6Dɩmʋŋ dʋɔ Yesu na ba mʋ gbɩɛ baa ju. Gʋ ba tirina waa gaa na, sɛ yuora gafie bɩnɛ wʋŋ kpiri wʋ dɩɛtina sɛ ba n ju ga tawɩ ɩ sɛ, <<Kpaŋjuo, n baa nyala nya wʋsɛ. Akala takɩɛ ma n daga nyaa kɔŋ ma waa dʋɔ ɔ.>>
7Dɩmʋŋ dʋɔ ma na ma wʋsɛ sɛ maŋ n daga na maa kɔŋ n jaŋ ŋ. Ama tawɩ wɩɛ, ma tʋmɩrɛ wʋŋ aja yu alaŋfiya. 8Akala takɩɛ ma tɩŋtɩŋ ma wɩɛ bɩnɩɛ tie, sɛ maŋ gba ma wɩɛna yuora ma tie. Ma tawɩ ba tɩba wʋrʋ sɛ, <<Ju na wʋ a ju sɛ ma tawɩ wʋ baŋbaŋ sɛ <kɔŋ na wʋ a kɔnɛ. Sɛ ma tawɩ ma tʋmɩrɛ sɛ yɩɛ ŋina> na wʋ a yɩɛ.>>
9Gʋ Yesu nyii wɩɛ ŋina na, dɩ yɩɛ ɩ doba. Sɛ wʋ biliŋi kɩɛ jama baa ba kpamɩna ɩ na tawɩ ba sɛ, <<Maa tawɩ amɩɛ sɛ n nyii na dieli sɛ, ma n naa ta wʋrʋ Isiralitina naŋ wʋ wɩɛna lɩɛdi gana duluŋ ŋ.>> 10Sɛ kpirida baa bɔrɛ ju dɩɛ ga na gʋ tʋmɩrɛ wʋŋ yu alaŋfiya.
Yesu fensi okulapu wʋrʋ bu baalɛ jaŋ
11Gʋ Yesu chɔ Roma yuora bɩnɛ tʋmɩrɛ wʋrʋgbɩɛ na, wʋ ju dɩɛ gaa baa yagɛ sɛ Nayin. Sɛ wʋ kpalɛnara na jama baa kpaŋ ɩ. 12Gʋ Yesu tirina dɩɛ gaa na, kɩɛ, wʋ na gʋ ba siana atatɛ wʋrʋ baa ju baa wuu. Atatɛ wʋŋ yɩɛ okulapu wʋŋ bu baalɛ jaŋ wʋ dʋŋdʋlʋŋ bɛ yela jama baa ba lɩɩ dɩɛ gaa naŋ na kpamɩna okulapu wʋŋ. 13Gʋ Kpaŋjuo na okulapu wʋŋ na, wʋ wɩɛ yɩɛ ɩ gɩyɔŋ sɛ wʋ tawɩ ɩ sɛ, <<N baa wii.>>
14Sɛ Yesu mʋ wʋ pam tapʋ atatɛ dɩdaka gaa sɛ sɩlɛda baa dʋɔ sɩŋ, sɛ wʋ tawɩ sɛ, <<Yeleŋbu, ma sɛ, kʋlʋ.>> 15Sɛ atatɛ wʋŋ kʋlʋ cha sɛ wʋ fara wʋ a tawɩ. Sɛ Yesu mʋ ɩ fa wʋnaa.
16Sɛ nyɩŋtɩɛ chaŋ bakpa baa kpiniŋ sɛ ba mʋ kalɩɛwʋ fa Ɩsʋɔ sɛ, <<Ɩsʋɔ ɔja wʋjanɛ kɔŋ daa jaŋ. Ɩsʋɔ kɔŋ gaa bʋɔ wʋ bakpa dʋɔ.>> 17Sɛ Yesu wʋsɛ dʋɔ wɩɛ ŋii yalagi Yudiya tibi dʋɔ na dɩɛsɛ ŋii ŋɩ logo dɩmaŋ na kpiniŋ.
Yohane Ɩsʋɔ Sɔrɛ kpiri kpirida Yesu jaŋ
Matiyo 11:2-19
18Yohane kpalɛnara baa tawɩ ŋii Yesu yɩɛ na kpiniŋ fa ɩ. Sɛ wʋ yagɛ ba tɩba bala, 19sɛ wʋ kpiri ba Kpaŋjuo wʋŋ jaŋ sɛ ba n ga tasɛ ɩ sɛ, <<Nyaŋ n nyina wʋŋ wʋ a kɔnɛ na yaa dɩ n kɩɛ wʋ fɔlɛ gbɩɛ?>>
20Gʋ bala baa kɔŋ Yesu jaŋ na, ba tawɩ ɩ sɛ, <<Yohane Ɩsʋɔ Sɔrɛ n kpiri daa sɛ dɩ n kɔŋ n jaŋ na dɩ gaa tasɛ nyaŋ sɛ nyaŋ n nyina wʋŋ wʋ a kɔnɛ na yaa dɩ n kɩɛ wʋ fɔlɛ gbɩɛ?>>
21Dɩmʋŋ saŋa gana na, Yesu chɔ lʋmɩɛ na baa a bɩɩ ba na fɔɩ, wʋ gɩŋ feliŋ sʋbʋ lɩɩ bakpa tɩba, sɛ wʋ fulu bataŋpʋna fɔɩ asa. 22Sɛ wʋ lɩsɛ Yohane kpirida baa nʋɔ sɛ, <<N bɔrɛ ju ga tawɩ Yohane ŋii ɩ naa na ŋii ɩ nyii na sɛ bataŋpʋna asa fulu, buobi aba palɛ, achalaŋa yu lʋm chʋɔ, akpawu a nyii wɩɛ, atatina feŋ lɩɩ sɩŋ naŋ, sɛ ayɔŋtina gba nyii Ɩsʋɔ wɩɛ abama ŋii. 23Kusee n nyina wʋkʋma wʋŋ ma dʋɔ wʋ aa yela wʋ lɩɛdi naŋ ŋ.>>
24Gʋ Yohane kpirida baa bɔrɛ laŋ wʋrʋgbɩɛ na, Yesu fara wʋ a tawɩ Yohane wʋsɛ dʋɔ wɩɛ wʋ a fa jama baa sɛ, <<Gʋ ɩ ju Yohane jaŋ ifuli dʋɔ na, be sɛ ɩ ju ga kɩɛ? Ɩ ju ga kɩɛ ŋmɩrɛ ŋii feliŋ a jʋɔ naa? 25Sɛ naa dɩmʋŋ na, be sɛ ɩ ju ga kɩɛ? Yaa baalɛ wʋŋ wʋ fuona gagbasɛ abama naa? Aye, baa ba fuona gagbasɛ ŋii ŋɩ yawʋ wɩɛ doŋ sɛ ba cha ɩ chawʋ bam na wɩɛ juori-gbɩɛ naŋ. 26Be sɛ ɩ ju ga kɩɛ? Ɩsʋɔ ɔja? Gasiŋteŋ, maa tawɩ amɩɛ, n nyii na dieli sɛ Yohane wʋŋ ɩ naa na, kii Ɩsʋɔ ɔja. 27Yohane wina wʋsɛ dʋɔ wɩɛ sɛ ba sabɩɛ si Ɩsʋɔ Wɩɛ naŋ, sɛ Ɩsʋɔ tawɩ sɛ,
<<Kɩɛ, maa kpiri ma gabʋɔ pala nya asanaŋ
na wʋ a desina gbɩɛ si fa nyaŋ.>>#Mal 3:1.
28Maa tawɩ amɩɛ sɛ, <<Yohane yɩɛ wʋjanɛ kii wʋkʋma wʋŋ ba lʋrʋ ɩ. Ama wʋŋ wʋ yɩɛ wʋ pii Ɩsʋɔ juori naŋ na, kii ɩ.>>
29Bakpa kpiniŋ na lampo lɩɛra baa ba nyii Yesu wɩɛ na, ba lɩɛ kpa sɛ Ɩsʋɔ wʋŋ wʋ wɩɛ duwei ŋɩ gbɩɛ dʋɔ na yela sɛ Yohane Ɩsʋɔ Sɔrɛ wʋŋ sɔ ba Ɩsʋɔ sɔ. 30Ama Farasitina na mbara bakalaasa baa pɩɛ Ɩsʋɔ jawʋ ŋii wʋ wɩɛna fa ba na. Dɩmʋŋ dʋɔ, ba n yela Yohane a sɔ ba Ɩsʋɔ sɔ ɔ.
31Sɛ Yesu tasɛ sɛ, <<Be sɛ maa mʋ jaŋ gɩnanaŋ gana bakpa mʋ kɩɛsɛ na? Ba kɩɛna takɩɛ be? 32Ba kɩɛna bɛ takɩɛ bachaasɛ baa ba chaɩ gɩyɩɛ naŋ baa yagɛ dɔŋa sɛ,
<<Dɩ fʋlʋ galɩɛbɩ fa amɩɛ,
ama ɩŋ sʋɛ ɛ,
Dɩ kpie lie numba fa amɩɛ,
ama ɩŋ wii i.>>
33Gʋ Yohane Ɩsʋɔ Sɔrɛ wʋŋ kɔnɛ na, wʋ n di adiya a, sɛ wʋ n nyʋɔ sʋlʋŋ ŋ, sɛ ɩ tawɩ sɛ, <<Feliŋ sʋbʋ wɩɛ wʋ tɩba. 34Wʋkpa Bu wʋŋ kɔnɛ na, wʋ a di sɛ wʋ a nyʋɔ, sɛ ɩ tawɩ sɛ, n kɩɛ, wʋ yɩɛ diiri na sʋlʋŋ nyʋɔrɛ. Wʋ yɩɛ lampo lɩɛra na dɩsʋbʋ yɩɛra ba dɩɛtɛ.>> 35Bakpa baa ba wɩɛna Ɩsʋɔ kpiŋjim na lɩɛ dʋ sɛ ŋɩ wɩɛ dieli.
Alʋ dɩsʋbʋ yɩɛrɛ wʋrʋ mʋ nuŋ alifeŋsa susaa Yesu
36Farasitina baa tɩba wʋrʋ yagɛ Yesu sɛ wʋ n kɔŋ na baa di, sɛ wʋ ju Farasi wʋkpa wʋŋ waa dʋɔ ga cha na wʋ a di. 37Alʋ dɩsʋbʋ yɩɛrɛ wʋrʋ wɩɛ dɩɛ gana naŋ dɩmaŋ. Gʋ wʋ nyii sɛ Yesu wɩɛ Farasi wʋkpa wʋŋ waa dʋɔ wʋ a di na, wʋ mʋ sapɩɛ bie gaa nuŋ alifeŋsa wɩɛ ga tɩba kɔŋ dɩmaŋ. 38Sɛ alʋ wʋŋ lɩɩ Yesu wʋrʋgbɩɛ gaa sɩŋ wʋ nafara tie wʋ a wii asa lɩŋ wʋ a wʋrʋgɩ wʋ nafara dʋɔ. Sɛ wʋ mʋ wʋ nyi nyʋɔsɛ kpaɩ, puga ɩ sɛ wʋ chɩɛgɩ nuŋ alifeŋsa ŋii wʋrʋgɩ dʋɔ.
39Gʋ Farasi wʋkpa wʋŋ wʋ yagɛ Yesu na dɩmʋŋ na, wʋ tawɩ wʋ nyinaŋ sɛ, <<Dɩmʋŋ baalɛ wina yɩɛ Ɩsʋɔ ɔja na, nafʋɔ wʋ a jiŋ alʋ wʋ dʋŋdʋlʋŋ wʋŋ wʋ tapʋ ɩ na sɛ wʋ yɩɛ dɩsʋbʋ yɩɛrɛ.>>
40Sɛ Yesu lɩsɛ ɩ nʋɔ sɛ, <<Simoŋ, ma wɩɛna wɩɛ ŋarɛ maa tawɩ nyaŋ.>> Sɛ Simoŋ tawɩ sɛ, <<Wʋkalaasa tawɩ maŋ.>>
41Sɛ Yesu jɔ ba diduu sɛ, <<Baala bala barɛ n chamɩna aterembie kɩmɩrɛ wʋrʋ kɩm. Wʋrʋ chamɩna ɩ kɩm aterembie dinari#7:41 Dinari yɩɛ dɩtʋm yɩɛrɛ wiita bɩɩ kɩmtʋɔ gafɩsɩ sɩ nuŋ, sɛ wʋrʋ dʋɔ ŋɩla na salaa. 42Ba tɩba wʋrʋ n dɩlɛ yu aterembie ŋii ju ga tɔ ɩ kɩm m. Dɩmʋŋ dʋɔ wʋ mʋ ba kɩmɩɛ ŋii chɩɛ baa bala. Ba tɩba wʋ Mmʋɔ, aaŋ ja wʋ a ja aterembie kɩmɩrɛ wʋŋ wɩɛ fɔɩ?>>
43Sɛ Simoŋ lɩsɛ nʋɔ sɛ, <<Maa tamaa sɛ wʋŋ wʋ kɩm bɔlɩɛɩ na.>> Sɛ Yesu tawɩ ɩ sɛ, <<Nya lɩsɛ nʋɔ na dieli.>>
44Sɛ Yesu biliŋi kɩɛ alʋ wʋŋ sɛ wʋ tawɩ Simoŋ sɛ, <<Nya na alʋ wina? Gʋ ma kɔŋ nya waa dʋɔ na, nyaŋ fa maŋ lɩŋ na maa yalɛ ma nafara tie e. Ama alʋ wina bɩrɛ, wʋ mʋ wʋ asa lɩŋ yalɛ ma nafara tie sɛ wʋ mʋ wʋ nyi nyʋɔsɛ kpaɩ. 45Nya n puga maŋ ŋ, ama alʋ wina bɩrɛ, lɩɩ saŋa gaa ma kɔŋ jɩna na, wʋ aa yela ma nafara tie puga a. 46Nya n mʋ olifi nuŋ wʋrʋgɩ ma nyinaŋ ŋ, ama alʋ wina mʋ nuŋ alifeŋsa wʋrʋgɩ ma nafara dʋɔ. 47Ŋina dʋɔ, maa tawɩ nyaŋ sɛ ma mʋ wʋ dɩsʋbʋ fɔɩ ŋii chɩɛ ɩ, akala takɩɛ wʋ a ja maŋ fɔɩ. Ama wʋŋ wʋ mʋ wʋ dɩsʋbʋ pii chɩɛ ɩ na, wʋŋ gba wʋ jawʋ yɩɛ pii bɛ.>>
48Sɛ Yesu tawɩ alʋ wʋŋ sɛ, <<Ma mʋ n dɩsʋbʋ chɩɛ nyaŋ.>>
49Sɛ baa ba kpi wʋ dʋɔ didiitiŋ dɩmaŋ na tawɩ dɔŋa sɛ, <<Mmʋɔ n nyina wina bɛ sɛ wʋ a mʋ dɩsʋbʋ wʋ a chɩɛ?>>
50Sɛ Yesu tawɩ alʋ wʋŋ sɛ, <<N lɩɛdi lɩɛ nya nkpa. Pala wʋsɛfɩɛ naŋ.>>
Currently Selected:
Luka 7: CLL
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy amp Bible Translation
