Maakɩ 10
10
Yesu kalaa sarɛ yela dʋɔ wɩɛ
Matiyo 19:1-12; Luka 16:18
1Gʋ Yesu lɩɩ Kapeniyum dɩɛ naŋ na, wʋ tɩɛsɛ Yodaŋ buo ju Yudiya tibi dʋɔ Yodaŋ gatɩɛsa. Sɛ jama baa kɔŋ wʋ jaŋ sɛ wʋ kalaa ba Ɩsʋɔ wɩɛ ganaŋkʋ wʋ ayɩɛsa kɩɛna na.
2Sɛ Farasitina barɛ baa baa ja baa yɩɛ ɩ lɔ tɩba na kɔŋ wʋ jaŋ gaa tasɛ ɩ sɛ, <<Daa mbara fa gbɩɛ sɛ baalɛ n yela wʋ alʋ?>>
3Sɛ Yesu dʋɔ tasɛ ba sɛ, <<Be mbara sɛ Mosesi dʋ amɩɛ?>>
4Sɛ Farasitina baa lɩsɛ nʋɔ sɛ, <<Mosesi fa gbɩɛ sɛ baalɛ n sabɩɛ tanɛ fa wʋ alʋ na gaa kalaa gʋ wʋ yela ɩ sarɛ pɔɩ na wʋ a yela ɩ.>>
5Yesu tawɩ ba sɛ, <<Amɩɛ agela doŋ dʋɔ sɛ Mosesi sabɩɛ dɩmʋŋ mbara ŋina fa amɩɛ. 6Ama lɩɩ dulunya dɩfaratɩŋ sɛ, <Ɩsʋɔ lɔ ba, baalɛ na alʋ.>#Jene 1:27. 7Ŋina dʋɔ, baalɛ aja yela wʋjuo na wʋnaa na wʋ na wʋ alʋ baa ga cha bʋga 8na baa bala baa yɩɛ wʋsɛ tanɛ gadʋŋdʋlʋŋ.#Jene 2:24. Dɩmʋŋ dʋɔ ba ba ti yɩɛ bakpa bala a, ama wʋdʋŋdʋlʋŋ. 9Ŋina dʋɔ, ŋii Ɩsʋɔ bʋga na, wʋrʋ n baa kpara tɩba.>>
10Gʋ ba bɔrɛ kɔŋ waa dʋɔ na, wʋ kpalɛnara baa tasɛ ɩ sarɛ yela dʋɔ wɩɛ. 11Sɛ Yesu lɩsɛ nʋɔ sɛ, <<Baalɛ kʋma wʋŋ wʋ yela wʋ a alʋ sɛ wʋ ga saa alʋ fɔlɛ na, wʋ yɩɛ alʋ wʋrʋgbɩɛ lɩɩ. 12Dɩmʋŋ gba sɛ alʋ wʋŋ wʋ yela wʋ baalɛ sɛ wʋ ga saa baalɛ wʋ fɔlɛ na, wʋ yɩɛ baalɛ wʋrʋgbɩɛ lɩɩ.>>
Yesu yɩɛ bachaasɛ bisi kusee
Matiyo 19:13-15; Luka 18:15-17
13Bakpa barɛ mʋ bachaasɛ bisi kɔŋ Yesu jaŋ sɛ wʋ n mʋ wʋ pam jaga ba dʋɔ ama wʋ kpalɛnara baa gɩŋ ba. 14Gʋ Yesu na ŋina na, wʋ kara biŋbira. Sɛ wʋ tawɩ ba sɛ, <<N yela na bachaasɛ bisi baa a kɔŋ ma jaŋ, ama n baa gaa ba gbɩɛ. Akala takɩɛ Ɩsʋɔ juori gaa yɩɛ baa ba kɩɛna dɩmʋŋ na teri bɛ. 15Maa tawɩ sɛ n nyii na dieli sɛ, wʋkʋma wʋŋ wʋ n lɩɛ Ɩsʋɔ Juori di takɩɛ wʋchaa pii na, wʋ aa dɩlɛ jʋʋ ʋ.>> 16Sɛ Yesu mʋ wʋ pam jaga-jaga bachaasɛ bisi baa dʋɔ garɛ-garɛ sɛ wʋ yɩɛ ba kusee.
Baalɛ akpaŋtatɛ wʋrʋ wɩɛ
Matiyo 19:16-30; Luka 18:18-30
17Gʋ Yesu na wʋ kpalɛnara baa chaŋ gbɩɛ baa ju na, baalɛ wʋrʋ se ga luuŋ wʋ dʋna dʋɔ wʋ asanaŋ tawɩ sɛ, <<Wʋkalaasa wʋbam, be n tiri gʋ ma n yɩɛ na maa yu nkpa ŋii ŋɩ taŋ gɩtɛ?>>
18Sɛ Yesu lɩsɛ ɩ nʋɔ sɛ, <<Be n yɩɛ sɛ nyaa yagɛ maŋ sɛ wʋbam? Wʋrʋ taŋ wʋ yɩɛ wʋbam m, amʋɔ Ɩsʋɔ nyiŋeŋ. 19N jiŋ Ɩsʋɔ mbara ŋii ŋii kalaa sɛ n baa tagapʋ, n baa yɩɛ baalɛ wʋrʋgbɩɛ lɩɩ yaa alʋ wʋrʋgbɩɛ lɩɩ, n baa ŋmɩɛlɛ, n baa di akarɩɛ seriya, n baa sisi wʋrʋ, na nyaa bu njuo na nnaa#Ditiro 5:16-20..>>
20Sɛ baalɛ wʋŋ tawɩ Yesu sɛ, <<Wʋkalaasa, lɩɩ ma gɩchasɩtɩɛ sɛ ma kpaŋ mbara wɩɛ ŋina kpiniŋ dʋɔ.>>
21Sɛ Yesu kɩɛ ɩ, sɛ wʋ ja wʋ wɩɛ. Sɛ wʋ tawɩ ɩ sɛ, <<Dɩkaka nyaŋ bʋrʋ darɛ. Ju ga yaa bʋrʋkʋma gaa nya wɩɛna, na nyaa mʋ aterembie ŋii ga fa ayɔŋtina, nyaa yu akpaŋta Ɩsʋɔ adugbe. Na nyaa gaa kpaŋ maŋ.>>
22Ama baalɛ wʋŋ nyii wɩɛ ŋina na, dɩ n yɩɛ ɩ jʋŋ ŋ, akala takɩɛ wʋ wɩɛna akpaŋta fɔɩ.
23Sɛ Yesu kɩɛ logo wʋ kpalɛnara baa sɛ wʋ tawɩ ba sɛ, <<Aja yɩɛ doŋ fa akpaŋtatina na baa jʋʋ Ɩsʋɔ Juori gaa naŋ.>>
24Sɛ wɩɛ ŋii yɩɛ Yesu kpalɛnara baa doba. Ama Yesu ti bɔrɛ tawɩ sɛ, <<Mabie, aja yɩɛ doŋ fa wʋkpa na wʋ a jʋʋ Ɩsʋɔ Juori gaa naŋ. 25Aja fʋ fa nyɔma na wʋ a mʋna dɩkparɛ bʋɔ naŋ, ama aja yɩɛ wiliŋ fa akpaŋtatɛ na wʋ a jʋʋ Ɩsʋɔ Juori gaa naŋ.>>
26Gʋ Yesu kpalɛnara baa nyii wɩɛ ŋii na, dɩ yɩɛ ba doba ga laŋ. Sɛ ba tasɛ dɔŋa sɛ, <<Dɩmʋŋ bɩrɛ Mmʋɔ sɛ baa mɔlɔgɩ?>>
27Yesu kɩɛ ba sɛ wʋ tawɩ sɛ, <<Wʋkpa jaŋ bɩrɛ, ŋina baa dɩlɛ yɩɛ ɛ, ama Ɩsʋɔ jaŋ bɩrɛ, ŋina a dɩlɛ yɩɛ. Ɩsʋɔ a dɩlɛ yɩɛ bʋrʋkʋma.>>
28Sɛ Petero tawɩ Yesu sɛ, <<Dɩ yela bʋrʋkʋma gaa kpaŋ nyaŋ.>>
29Yesu tawɩ ba sɛ, <<Maa tawɩ sɛ n nyii na dieli sɛ wʋkʋma wʋŋ wʋ a yela wʋ waa yaa wʋ ŋmɩɛtina yaa wʋ diesina, wʋjuo yaa wʋnaa yaa wʋbie yaa wʋ fʋɔ maŋ na Ɩsʋɔ Wɩɛ Abama ŋii dʋɔ na, 30wʋ a yu ŋɩ dʋɔ kɩmtʋɔ. Wʋ a yu waasɛ, nabie, diesina, naa aba, bie na fʋɔsɛ gafisi-gafisi dʋɔ saŋa gana dulunya naŋ na baa nyala ɩ. Wʋrʋgbɩɛ na, wʋ a ti yu nkpa ŋii ŋɩ taŋ gɩtɛ dulunya gaa gaa kɔŋ na naŋ. 31Ama fɔɩ baa ba yɩɛ asanaŋtina na aja yɩɛ wʋrʋgbɩɛtina na wʋrʋgbɩɛtina a yɩɛ asanaŋtina.>>
Yesu tawɩ wʋ sɩŋ wɩɛ gbɩɛta butoro tɛ
Matiyo 20:17-19; Luka 18:31-34
32Yesu na wʋ kpalɛnara baa ju dʋɔ baa ju Yerusalem dɩɛ naŋ, Yesu dɔŋ ba asanaŋ. Sɛ dɩ yɩɛ wʋ kpalɛnara baa doba sɛ nyɩŋtɩɛ chaŋ baa ba kpamɩna ɩ na. Sɛ Yesu ti bɔrɛ mʋ wʋ kpirida gifi bala baa lɩɩ laraŋ sɛ wʋ tawɩ ba bʋrʋ gaa gaa tibi wʋ dʋɔ na. 33Sɛ wʋ tawɩ ba sɛ, <<N nyii, dɩɩ ju Yerusalem dɩɛ naŋ, dɩmaŋ sɛ baa lɩsɛ Wʋkpa Bu wʋŋ fa Ɩsʋɔ sei bɩnɩɛ na Mosesi mbara bakalaasa baa na baa fu ɩ dɩpʋɛ sɛ ba n kʋ ɩ na baa mʋ ɩ fa baa ba ba yɩɛ Yudatina, 34baa jabi ɩ, tɔ mɩtalɩŋ fu ɩ, ta ɩ achʋchʋɛ na baa kʋ ɩ. Wɩɛ atoro wɩɩ na, wʋ a feŋ lɩɩ sɩŋ naŋ.>>
Yakubu na Yohane ba sʋlʋ Yesu bʋrʋ garɛ
Matiyo 20:20-28
35Sɛ Jamesi na Yohane Sebedi bie baa kɔŋ Yesu jaŋ gaa tawɩ ɩ sɛ, <<Wʋkalaasa, dɩ ja sɛ bʋrʋkʋma gaa dɩ tasɛ nyaŋ na, nyaa yɩɛ fa daa.>>
36Sɛ Yesu tasɛ ba sɛ, <<Be sɛ ɩ ja sɛ maa yɩɛ fa amɩɛ?>>
37Sɛ ba lɩsɛ nʋɔ sɛ, <<Nya cha n jilima juorigbeli gaa dʋɔ na, yela na daa wʋrʋ a cha n jɩsaŋ dʋɔ na wʋrʋ a cha n nambi dʋɔ.>>
38Sɛ Yesu tawɩ ba sɛ, <<Ɩ ba jiŋ ŋii ɩ tasɛ na a. Ɩ dɩlɛ na awʋrʋfʋɔ ŋii maa naa? Ɩ dɩlɛ sɔ yuewu sɔ ŋii baa mʋ sɔ maŋ naa?>>
39Sɛ ba lɩsɛ nʋɔ sɛ, <<ɛɛŋ, dɩ dɩlɛ.>> Sɛ Yesu tawɩ ba sɛ ɩ dɩlɛ na awʋrʋfʋɔ ŋii maa na, na ɩ sɔ yowu sɔ ŋii baa mʋ sɔ maŋ na. 40Ama naa maŋ aaŋ ja maa yela na ɩ cha ma jɩsaŋ dʋɔ yaa ma nambi dʋɔ ɔ. Dɩchatɩŋ gana bɩrɛ, ga yɩɛ baa Ɩsʋɔ desina ba si na teri bɛ.
41Gʋ kpirida gifi baa ba kakaa na nyii wɩɛ ŋina na, ba kara biŋbira dʋ Yakobo na wʋ nabu Yohane. 42Dɩmaŋ sɛ Yesu yagɛ wʋ kpalɛnara baa kpiniŋ kɔŋ gaa sila wʋ jaŋ sɛ wʋ tawɩ ba sɛ, <<Ɩ jiŋ gʋ baa ba ba yɩɛ Yudatina na juoneŋ a mʋ yikuo bɛ baa di ba bakpa dʋɔ, sɛ ba bɩnɩɛ gba a mʋ yikuo baa di ba bakpa dʋɔ. 43Ama amɩɛ bɩrɛ, n baa yɩɛ takɩɛ ba. Wʋkʋma wʋŋ wʋ a ja sɛ wʋ a yɩɛ wʋjanɛ amɩɛ tɩba na, ŋɩ tiri gʋ wʋ a yɩɛ amɩɛ tɩba tʋmɩrɛ, 44sɛ wʋkʋma wʋŋ wʋ a ja sɛ wʋ a yɩɛ asanaŋtɛ na, ŋɩ tiri gʋ wʋ a yɩɛ amɩɛ kpiniŋ tɩba tʋmɩrɛ. 45Akala takɩɛ Wʋkpa Bu wʋŋ, n kɔŋ sɛ ba n tʋm ɩ. Ama wʋ gaa tʋm, sɛ wʋ mʋ wʋ nkpa tɔ kɩm lɩɛ bakpa fɔɩ nkpa.>>
Yesu fulu ɔtaŋpʋ Batimiyosi asa
Matiyo 20:29-34; Luka 18:35-43
46Sɛ Yesu na wʋ kpalɛnara baa ju Yeriko dɩɛ naŋ. Gʋ ba na jama baa a lɩɩ dɩɛ janɛ gaa naŋ na, ɔtaŋpʋ wʋŋ baa yagɛ ɩ sɛ Batimiyosi wʋŋ wʋ juo yɩɛ Timiyosi, cha wʋ chaɩ gbɩɛ laraŋ wʋ a sʋlʋ. 47Gʋ wʋ nyii sɛ Yesu Nasarati wʋkpa wʋŋ a lam na, wʋ kuusi tawɩ sɛ, <<Yesu, Juo Dawidi ganana bie, wɩɩ ma gɩyɔŋ.>>
48Sɛ bakpa baa barɛ tawɩ ɩ sɛ fu n nʋɔ dʋɔ. Ama wʋ ju dʋɔ kuusi na doŋ sɛ, <<Juo Dawidi ganana bie, wɩɩ ma gɩyɔŋ.>>
49Sɛ Yesu dʋɔsɩŋ sɛ wʋ tawɩ ba sɛ, <<N yagɛ ɩ fa maŋ.>> Sɛ ba yagɛ ɩ tawɩ ɩ sɛ, <<Yela n digela a fɩɛ nyaŋ, kʋlʋ, Yesu a yagɛ nyaŋ.>>
50Sɛ ɔtaŋpʋ wʋŋ lɩsɛ wʋ adugbe gagba tʋsʋ, sɛ wʋ puli sɛ wʋ kɔŋ Yesu jaŋ.
51Sɛ Yesu tasɛ ɩ sɛ, <<Be sɛ nyaa ja sɛ maa yɩɛ fa nyaŋ?>> Sɛ ɔtaŋpʋ wʋŋ lɩsɛ nʋɔ sɛ, <<Wʋkalaasa, maa ja sɛ maa na.>>
52Sɛ Yesu tawɩ ɩ sɛ, <<Pala, n lɩɛdi chɔ nyaŋ.>> Gabʋanaŋ sɛ wʋ asa fulu sɛ wʋ kpaŋ Yesu laŋ.
Currently Selected:
Maakɩ 10: CLL
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy amp Bible Translation
