Maakɩ 12
12
Fʋɔ kɩɛra barɛ dʋɔ diduu
Matiyo 21:33-46; Luka 20:9-19
1Sɛ Yesu jɔ ba diduu sɛ, <<Baalɛ wʋrʋ n cha fara girepi fʋɔ sɛ wʋ ma dɩpɔrɛ logo fʋɔ gaa, sɛ wʋ wuru bʋɔ bɔlɛ ga tɩba, dɩmaŋ sɛ baa ŋaŋsɛ girepi bie lɩŋ ŋii baa mʋ baa yɩɛ sʋlʋŋ na. Sɛ wʋ ma giera danɛ jalɩŋtɛ garɛ gaa naŋ. Sɛ wʋ mʋ girepi fʋɔ gaa dʋ kɩɛra barɛ pamɩɛ naŋ. Wʋrʋgbɩɛ na, wʋ ju gbɩɛ. 2Gʋ girepi bie karɩŋ saŋa talɛ na, sɛ girepi fʋɔtɛ wʋŋ kpiri wʋ tʋmɩrɛ fʋɔ kɩɛra baa jaŋ sɛ wʋ n ju ga lɩɛ wʋ teri kɔna ɩ. 3Ama fʋɔ kɩɛra baa chaŋ ɩ, tugu ɩ sɛ ba gɩŋ ɩ bɔsɩna pamɩɛ kpaŋ. 4Sɛ girepi fʋɔtɛ wʋŋ ti bɔrɛ kpiri wʋ baŋbaŋ, sɛ fʋɔ kɩɛra baa mʋ dɩchʋchʋ kpasɛ-kpasɛ wʋ nyinaŋ, sɛ ba tii ɩ ŋaba ɩ. 5Sɛ wʋ ti bɔrɛ kpiri wʋ baŋbaŋ, sɛ fʋɔ kɩɛra baa kʋ ɩ. Sɛ wʋ kpiri fɔɩ, sɛ ba tugu barɛ sɛ ba kʋ barɛ.>>
6<<Wʋŋ wʋ kakaa na wʋ a kpiri ɩ na, n nyina wʋbu baalɛ jaŋ wʋŋ wʋ a ja wʋ wɩɛ, sɛ wʋ kpiri ɩ. Sɛ wʋ tawɩ sɛ mabu baalɛ jaŋ wina bɩrɛ, baa bu ɩ.>>
7Ama fʋɔ kɩɛra baa tawɩ dɔŋa sɛ, <<Wina n nyina gapatɩɛ diiri wʋŋ. N kɔŋ na dɩ kʋ ɩ na gapatɩɛ gaa a yɩɛ daa teri. 8Dɩmʋŋ dʋɔ, ba chaŋ wʋbu wʋŋ, sɛ ba kʋ ɩ sɛ ba fɔŋɩ ɩ lɩɩ girepi fʋɔ gaa naŋ.>>
9Sɛ Yesu tasɛ ba sɛ, <<Be sɛ fʋɔtɛ wʋŋ aja wʋ a yɩɛ? Wʋ a kɔŋ gaa kʋ fʋɔ kɩɛra baa na wʋ a mʋ fʋɔ gaa dʋ kɩɛra ba fɔlɩɛ pamɩɛ naŋ.>> 10Sɛ Yesu tasɛ ba sɛ, <<Ɩŋ karaŋ ta Ɩsʋɔ Sabɩɛwɩɛ ŋii? Ŋii ba sabɩɛ sɛ,
<<<Bʋɩ gaa danɛ mara pɩɛ ga na,
gaa aaŋ ja gaa chaŋ danɛ gaa dɩkɔŋ naŋ na doŋ.
11Ɩsʋɔ n yɩɛ ŋina,
sɛ dɩ yɩɛ doba daa asa dʋɔ.>#Num 118:22-23.>>
12Yudatina bɩnɩɛ baa jiŋ gʋ baa sɛ Yesu jɔ diduu ga na, dɩmʋŋ dʋɔ baa ja gbɩɛ gaa baa mʋna dʋɔ na baa chaŋ ɩ. Ama baa se jama baa, dɩmʋŋ dʋɔ ba yela ɩ sɛ wʋ lam.
Lampo tɔ dʋɔ wɩɛ tasɛ
Matiyo 22:15-22; Luka 20:20-26
13Ba kpiri Farasitina na Juo Hɛrɔdɩ wʋrʋgbɩɛtina tɩba barɛ sɛ ba n ju ga yii Yesu gʋdʋ wʋ wɩɛ a tawɩsa dʋɔ, na baa sɩŋ ŋɩ dʋɔ chaŋ ɩ. 14Ba kɔŋ Yesu jaŋ gaa tawɩ ɩ sɛ, <<Wʋkalaasa, dɩ jiŋ gʋ nya yɩɛ gasiŋteŋ diri bɛ, sɛ ŋɩ n tiri nyaŋ lɩɩ ŋii bakpa a tawɩ ɩ akala takɩɛ nyaa kɩɛ wʋkpa asanaŋ n dɩ tawɩ naŋ ŋ. Ama nyaŋ bɩrɛ, nyaa kalaa Ɩsʋɔ wɩɛ ŋii ŋɩ yɩɛ gasiŋteŋ ŋɩ gbɩɛ dʋɔ. Tawɩ daa, ŋɩ wɩɛ gbɩɛ sɛ dɩ n tɔ lampo fa Roma Juo Kayisa yaa dɩ n baa tɔ? 15Dɩdaga na dɩ tɔ yaa dɩ n ba tɔ?>> Ama Yesu jiŋ ba aluguusi wɩɛ, dɩmʋŋ dʋɔ wʋ tasɛ ba sɛ, <<Be n yɩɛ sɛ ɩ ja sɛ ɩ yii maŋ gʋdʋ? N mʋ diterembi dinari#12:15 Dinari yɩɛ Romatina diterembi bɛ garɛ kɔna maŋ na maa kɩɛ.>>
16Sɛ ba mʋ kɔna ɩ sɛ wʋ tasɛ ba sɛ, <<Mmʋɔ nyi na wʋ yɩrɛ n jaga na ga dʋɔ?>> Sɛ ba lɩsɛ nʋɔ sɛ, <<Juo Kayisa teri.>>
17Sɛ Yesu tawɩ ba sɛ, <<Dɩmʋŋ bɩrɛ, n mʋ ŋii ŋɩ yɩɛ Juo Kayisa teri na fa Juo Kayisa na ɩ mʋ ŋii ŋɩ yɩɛ Ɩsʋɔ teri na fa Ɩsʋɔ.>> Sɛ Yesu wɩɛ ŋii yɩɛ ba doba.
Feŋ lɩɩ sɩŋ naŋ dʋɔ wɩɛ tasɛ
Matiyo 22:23-33; Luka 20:27-40
18Sɛ Sadukitina baa baa lɩɛ baa di sɛ feŋ lɩɩ sɩŋ naŋ wɩɛ na barɛ kɔŋ Yesu jaŋ gaa tasɛ ɩ sɛ, 19<<Wʋkalaasa, Mosesi mbara ŋii naŋ na, wʋ sabɩɛ fa daa Yudatina sɛ baalɛ sɩŋ yela wʋ alʋ sɛ ba n lʋrʋ na, ŋɩ tiri gʋ wʋnabu n saa okulapu wʋŋ, na wʋ a lʋrʋ bie fa wʋ ŋmɩɛtɩ wʋŋ wʋ sɩŋ na. 20Juo lʋrʋbie baala jaŋ lɩkaarɛ barɛ n cha ba wɩɛna. Sɛ ba tɩba bɩnɛ jaŋ wʋŋ saa alʋ, wʋ n lʋrʋ ʋ sɛ wʋ sɩŋ. 21Wʋnabu balatɛ saa okulapu wʋŋ. Wʋŋ dʋɔ, wʋ n lʋrʋ ʋ sɛ wʋ sɩŋ. Dɩmʋŋ sɛ dɩ mɩɛna batoro-tɛ wʋŋ. 22Baala lɩkaarɛ baa kpiniŋ saa alʋ wʋŋ ama ba n lʋrʋ ʋ sɛ ba sɩŋ. Wʋrʋgbɩɛ na, sɛ alʋ wʋŋ gba sɩŋ. 23Dɩmʋŋ dʋɔ, feŋ lɩɩ sɩŋ naŋ wɩɩ na, ba tɩba wʋ Mmʋɔ alʋ n nyina alʋ wʋŋ?>> Akala takɩɛ juo lʋrʋbie lɩkaarɛ baa kpiniŋ saa ɩ.
24Sɛ Yesu lɩsɛ ba nʋɔ sɛ, <<Ɩ tʋsʋ gbɩɛ, akala takɩɛ ɩ ba jiŋ Ɩsʋɔ Sabɩɛwɩɛ ŋii yaa Ɩsʋɔ doŋ ŋ. 25Feŋ lɩɩ sɩŋ naŋ wʋrʋgbɩɛ na, bakpa baa saa a, baa kɩɛna bɛ takɩɛ Ɩsʋɔ gabʋɔsɛ baa ba wɩɛ Ɩsʋɔ adugbe na. 26Dɩtɩɛna, lɩɩna atatina feŋ lɩɩ sɩŋ naŋ na, ɩŋ karaŋ Mosesi tanɛ naŋ ganaŋkʋ bʋala a chaŋ dɩpʋnfa naa? Dɩmaŋ sɛ Ɩsʋɔ tawɩ Mosesi sɛ, <Maŋ n nyina Abiraham Ɩsʋɔ, Isaki Ɩsʋɔ na Yakubu Ɩsʋɔ.>#Ɛsa 3:6. 27Wʋ ba yɩɛ atatina Ɩsʋɔ ɔ, ama wʋ yɩɛ bakpa bakɩɛnasa Ɩsʋɔ bɛ. Dɩmʋŋ dʋɔ ɩ tʋsʋ gbɩɛ amɩɛ dɩ tawɩ naŋ.>>
Mbara gaa ga yɩɛ gajanɛ
Matiyo 22:34-40; Luka 10:25-28
28Mosesi mbara bakalaasa baa tɩba wʋrʋ kɔŋ dɩmaŋ, sɛ wʋ nyii gʋ Yesu na Sadukitina baa a di noro. Sɛ wʋ na gʋ Yesu lɩsɛ Sadukitina baa nʋɔ bam, wʋ tasɛ ɩ sɛ, <<Mosesi mbara ŋii kpiniŋ naŋ, gamʋɔ n nyina gajaŋ-janɛ?>>
29Sɛ Yesu lɩsɛ ba nʋɔ sɛ, <<Mbara ŋii tɩba gajanɛ n nyina: Isiralitina n nyii. Ɩsʋɔ daa Ɩsʋɔ wʋŋ yɩɛ Ɩsʋɔ wʋ dʋŋdʋlʋŋ bɛ. 30Ja Ɩsʋɔ lɩɩ n digela naŋ, n sʋbʋ kpiniŋ, nya nfɩɛrɛ kpiniŋ naŋ na n doŋ kpiniŋ. 31Mbara bʋlatɛ n nyina sɛ, <Ja n dʋɔ takɩɛ n wʋsɛ.> Mbara ŋarɛ taŋ sɛ ŋɩ kii ŋina a.>>
32Sɛ Mosesi mbara wʋkalaasa wʋŋ tawɩ Yesu sɛ, <<Wʋkalaasa, nya tawɩ gasiŋteŋ sɛ Ɩsʋɔ yɩɛ wʋdʋŋdʋlʋŋ bɛ. Wʋrʋ taŋ ŋ amʋɔ wʋ nyiŋeŋ. 33Ja Ɩsʋɔ lɩɩ n digela kpiniŋ naŋ, nya nfɩɛrɛ kpiniŋ naŋ na n doŋ kpiniŋ na nyaa ja n dʋɔ takɩɛ n wʋsɛ dɩmʋŋ mbara ŋina kii gʋ nya yɩɛ ŋɩɛwʋ nam gadiesa na gadiesa fa Ɩsʋɔ na.>>
34Gʋ Yesu na gʋ wʋ lɩsɛ nʋɔ na dieli na, sɛ wʋ tawɩ ɩ sɛ, <<Nya tirina Ɩsʋɔ Juori gaa.>> Ganaŋkʋ Yesu lɩsɛ nʋɔ na dʋɔ, wʋrʋ n ti dɩlɛ yu digela tasɛ ɩ wɩɛ ŋarɛ ɛ.
Kirisito dʋɔ wɩɛ tasɛ
Matiyo 22:41-46; Luka 20:41-44
35Gʋ Yesu akalaa Ɩsʋɔ tʋm danɛ naŋ na, wʋ tasɛ ba sɛ, <<Be dʋɔ sɛ mbara bakalaasa baa a tawɩ sɛ Kirisito#12:35 Kirisito tie akala sɛ nkpalɩɛrɛ. Girikitina a yagɛ sɛ Kirisito sɛ Yudatina a yagɛ sɛ Mesaya wʋŋ yɩɛ Juo Dawidi ganana bie? 36Sɛ Ɩsʋɔ Feliŋ yela sɛ Dawidi tawɩ sɛ,
<<Ɩsʋɔ wʋŋ n tawɩ ma Kpaŋjuo sɛ,
cha ma pam jɩsaŋ dʋɔ ga tala gʋ maa mʋ n badʋŋna mʋ yɩɛ n nafara dɩjagatɩŋ.#Num 110:1.>>
37Dawidi tɩŋtɩŋ a yagɛ Kirisito sɛ, <<Kpaŋjuo. Dɩmʋŋ dʋɔ, sɩnɛ sɛ Kirisito wʋŋ a ti dɩlɛ yɩɛ Dawidi ganana bie?>> Sɛ bakpa baa mʋ asadi nyii wɩɛ ŋii wʋ a tawɩ na.
38Gʋ Yesu a kalaa ba na, wʋ tawɩ ba sɛ, <<N kɩɛ amɩɛ wʋsɛ dʋɔ mbara bakalaasa baa dʋɔ. Baa fu gagbasɛ ajalɩŋtina ba dɔŋ ba dɔŋ, na bakpa a luuŋ yɩlɩ ba gɩyɩɛnɩŋ naŋ. 39Baa ja achaatɩŋ ajanɩɛ Yudatina tʋm danɛ naŋ, na achaatɩŋ ŋii ŋɩ wɩɛ jilima na asadi adiya di tie. 40Baa mʋna kpiŋjim gbɩɛ dʋɔ baa lɩɛ bakʋlapʋna gapatɩɛ. Baa jɔ dɩga jalɩŋtɛ takɩɛ ba yɩɛ bakpa ba bama. Dɩmʋŋ dʋɔ, Ɩsʋɔ aja fɔŋɩ dɩmʋŋ bakpa bana dɩlɛ fɔɩ.>>
Okulapu wʋŋ faa
41Wɩɩ darɛ, Yesu cha ju Yudatina tʋm danɛ naŋ, sɛ wʋ ga cha faa dɩdaka gaa sinabie wʋ a kɩɛ ganaŋkʋ bakpa baa a mʋ aterembie baa dʋ faa dɩdaka gaa naŋ. Aterembietina a mʋ aterembie ajanɩɛ-ajanɩɛ baa kɔŋ baa dʋ. 42Dɩmaŋ sɛ alʋ okulapu ayɔŋtɛ wʋrʋ gba kɔnɛ, sɛ wʋ mʋ kpaŋnyɔ ala ju ga dʋ faa dɩdaka gaa naŋ.
43Sɛ Yesu yagɛ wʋ kpalɛnara baa kɔŋ wʋ jaŋ sɛ wʋ tawɩ ba sɛ, <<Maa tawɩ sɛ n nyii na dieli, dɩmʋŋ alʋ okulapu ayɔŋtɛ wina mʋ aterembie dʋ faa dɩdaka naŋ kii wʋkʋma. 44Akala takɩɛ bakpa baa kpiniŋ lɩsɛ chonii bɛ lɩɩ ba akpaŋta naŋ dʋ faa dɩdaka naŋ. Ama okulapu ayɔŋtɛ wʋŋ bɩrɛ, wʋ lɩɩ wʋ gɩyɔŋ naŋ bɛ sɛ wʋ mʋ pii ŋii wʋ a di na kpiniŋ ju ga dʋ faa dɩdaka gaa naŋ.>>
Currently Selected:
Maakɩ 12: CLL
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy amp Bible Translation
