Maakɩ 16
16
Yesu feŋ lɩɩ sɩŋ naŋ
Matiyo 28:1-8; Luka 24:1-12
1Fɩɛsɛ wɩɩ lam na, Mariya Magadalini, Jamesi wʋnaa Mariya, na Salome lɩɛ wuu fʋagɩɛ tii alifeŋsa na baa mʋ ga susaa Yesu gɩtatɛ. 2Fɩɛsɛ wɩɩ wʋrʋgbɩɛ wɩɩ gaa ga dɔŋ soji asanaŋ na nafo fuu, ala baa cha ba dɔŋ baa ju akpanaŋ bʋɔ gaa dʋɔ. 3Gʋ ba dɔŋ gbɩɛ naŋ baa ju na, sɛ ba tasɛ dɔŋa sɛ, <<Mmʋɔ aaŋ ja wʋ a ga gbiliti bʋɩ janɛ gaa lɩɩ akpanaŋ bʋɔ gaa nʋɔ fa daa?>>
4Ama ba kɩɛ ba asanaŋ na, ba na gʋ bʋɩ janɛ gaa ga fuwei akpanaŋ bʋɔ gaa nʋɔ na, gbiliti lɩɩ dɩmaŋ. 5Gʋ ba jʋʋ akpanaŋ bʋɔ gaa naŋ na, ba na yeleŋbu wʋrʋ wʋ fuona gagbasɛ afʋlʋma ajalɩŋtina wʋ chaɩ pam jɩsaŋ dʋɔ. Sɛ nyɩŋtɩɛ chaŋ ba.
6Sɛ yeleŋbu wʋŋ tawɩ ba sɛ, <<N baa yela nyɩŋtɩɛ a chaŋ amɩɛ. Ma jiŋ gʋ Yesu wʋŋ wʋ lɩɩ Nasarati sɛ ba jɔ ɩ daŋ gasagasa dʋɔ na sɛ ɩ jawʋ. Wʋ taŋ jɩna a. Wʋ feŋ lɩɩ sɩŋ naŋ. N gaa kɩɛ diele gaa ba cha mʋ wʋ gɩtatɛ si na. 7Sɛ wʋ tawɩ sɛ ba n ju ga tawɩ Petero na kpalɛnara baa sɛ Yesu pala amɩɛ asanaŋ wʋ a ju Galaliya. Dɩmaŋ sɛ ɩ ga na ɩ, ganaŋkʋ wʋ fɩla tawɩ amɩɛ na.>>
8Sɛ ba mʋ nyɩŋtɩɛ na wʋsɛ selesi se lɩɩ gachaŋ gaa naŋ. Ba n tawɩ wɩɛ ŋarɛ fa wʋrʋ ʋ, akala takɩɛ nyɩŋtɩɛ chaŋ ba.
Yesu lɩsɛ wʋ wʋsɛ kalaa Mariya Magadalini
Matiyo 28:9-10
9 # 16:9 Ɩsʋɔ sabɩɛ na gɩbɩnɩŋ Sabɩɛwɩɛ ŋii tana Maakɩ 16:9-20 Fɩɛsɛ wɩɩ wʋrʋgbɩɛ wɩɩ gaa ga dɔŋ asanaŋ na nafo, gʋ Yesu feŋ lɩɩ sɩŋ naŋ na, wʋ chɩŋkpɩɛ lɩsɛ wʋ wʋsɛ kalaa Mariya Magadalini wʋŋ wʋ cha geŋ feliŋ basʋbʋɛ lɩkaarɛ lɩɩ wʋ tɩba na. 10Sɛ wʋ ju ga tawɩ Yesu kpalɛnara baa baa yɩyɩɛ yela baa wii na. 11Gʋ ba nyii gʋ Yesu feŋ kɔŋ nkpa naŋ sɛ Mariya Magadalini na ɩ na, ba n lɩɛdi i.
Yesu lɩsɛ wʋ wʋsɛ kalaa kpalɛnara bala barɛ
Luka 24:13-35
12Yesu feŋ lɩɩ sɩŋ naŋ wʋrʋgbɩɛ na, wʋ lɩsɛ wʋ wʋsɛ gbɩɛ gafɔlɛ dʋɔ kalaa wʋ kpalɛnara baa tɩba bala saŋa gaa ba dɔŋ gbɩɛ naŋ baa ju dɩɛ bie garɛ naŋ. 13Sɛ ba bɔrɛ ga tawɩ baa ba kakaa na, ama ba n lɩɛ di i.
Yesu lɩsɛ wʋ wʋsɛ kalaa kpirida gifi darɛ baa
Matiyo 28:16-20; Luka 24:36-49; Dɩtʋm 1:6-8
14Ŋina wʋrʋgbɩɛ na, Yesu ti bɔrɛ lɩsɛ wʋ wʋsɛ kalaa wʋ kpirida gifi darɛ baa saŋa gaa baa di na. Sɛ wʋ tawɩ baŋ ba gʋ ba n lɩɛ di na ba agela doŋ ŋii ba wɩɛna, sɛ ba n lɩɛ baa ba na ɩ gʋ wʋ feŋ lɩɩ sɩŋ naŋ na wɩɛ ŋii di i.
15Sɛ Yesu tawɩ ba sɛ, <<N ju dulunya gapɩlɛkʋma ga tawɩ Ɩsʋɔ Wɩɛ Abama ŋii fa wʋkʋma. 16Wʋkʋma wʋŋ wʋ aa lɩɛ di sɛ ba sɔ ɩ Ɩsʋɔ sɔ na, wʋ a yu nkpa. Ama wʋkʋma wʋŋ wʋ a lɩɛ wʋ a di i, Ɩsʋɔ aja fu ɩ dɩpʋɛ. 17Baa ba lɩɛ di na, daasɛ ŋii ŋii kpaŋ ba na n nyina sɛ, ma yɩrɛ naŋ, baa geŋ feliŋ sʋbʋ na baa tawɩ atawɩ afɔlɩɛ. 18Baa chaŋ dʋmɩɛ tɩba na baa nyʋɔ ti gakʋʋsa, ama ŋɩ ɩɩ yɩɛ ba bʋrʋ ʋ. Baa mʋ ba pamɩɛ jaga lʋmɩɛtina dʋɔ, na baa yu alaŋfiya.>>
Yesu ju Ɩsʋɔ adugbe
Luka 24:50-53; Dɩtʋm 1:9-11
19Gʋ Kpaŋjuo Yesu tawɩ fa kpirida gifi darɛ baa taŋ na, sɛ Ɩsʋɔ mʋ ɩ ju Ɩsʋɔ adugbe ga chasɛ wʋ pam jɩsaŋ dʋɔ. 20Sɛ Yesu kpalɛnara baa ju ga tawɩ Ɩsʋɔ Wɩɛ Abama ŋii gapɩlɛkʋma. Sɛ Kpaŋjuo Yesu fa doŋ sɛ daasɛ kpaŋ na ŋii kalaa takɩɛ wɩɛ ŋii ba tawɩ na yɩɛ gasiŋteŋ.
Currently Selected:
Maakɩ 16: CLL
Highlight
Share
Compare
Copy
Want to have your highlights saved across all your devices? Sign up or sign in
2025 Ghana Institute of Linguistics Literacy amp Bible Translation
